OMWATSI W’ERIGHA 34
Unawite omwanya omo ndeko ya Yehova!
“Kusangwa ngoko mubiri ni muguma nikwa awite ebitsuko bingyi; nʼebitsuko byosi byʼomubiri nomo byangabya bingyi, ni mubiri muguma, neryo Kristo kwʼali atya.”—1 KOR. 12:12.
OLWIMBO 101 Erikola omo bughuma
EBIKENDIKANIBWAKO *
1. Tuwite lusunzo lwahi?
NI LUSUNZO lunene eribya mughuma w’oko abali omo ndeko ya Yehova! Tuli omo paradiso y’obunya-kirimu eyiswire mo abandu abanzire obuholo kandi abatsemire. Naghu unawite omubírí omo ndeko?
2. Paulo mwakolesya eky’erileberyako kyahi omo syobaruha siwe esyasondolawa n’ekirimu ky’oMungu?
2 Eky’elileberyako ekyo mukwenda Paulo akolesaya omo syobaruha siwe nyingyi esyasondolawa n’ekirimu ky’oMungu kyanganatuwatikya eriminya bingyi oko mwanya wetu omo ndeko. Omo buli baruha, Paulo mwasosekania endeko n’omubiri w’omundu. Kandi mwasosekania abandu b’omo ndeko n’ebitsuko by’oko mubiri.—Rom. 12:4-8; 1 Kor. 12:12-27; Efe. 4:16.
3. Omo mwatsi ono tukendikania oko syosomo isatu syahi?
3 Omo mwatsi ono, tukendilangira esyosomo isatu esyomughaso esyo tukigha omo eky’elileberyako ekyo Paulo akolesaya. Eky’erimbere, tukendilangira ngoko obuli mundu anawite omwanya * omo ndeko ya Yehova. Eky’akabiri, tukendilangira ekyo twangakola twamalangira nga situwite omwanya omo ndeko. Eky’akasatu, tukendilangira busanaki litolere itwabya n’ebingyi by’erikola omo mubírí owo Yehova abirituha omo ndeko.
OBULI MUGHUMA W’OKWITWE AWITE OMUBÍRÍ OMO NDEKO YA YEHOVA
4. Tukighaki omo Abanya Roma 12:4, 5?
4 Esomo y’erimbere eyo tukigha omo eky’erileberyako ekyo Paulo akolesaya yeno, obuli mughuma w’okwitwe anawite omwanya w’omughaso omo kihanda kya Yehova. Paulo akatsuka eky’erileberyako kiwe ati: ‘Ngoko tuwite ebitsuko bingyi oko mubiri muguma, nʼobuli kitsuko kiwite mubírí wakyo. Netu tutya tuli bangyi, tuli mubiri muguma itumatikene na Kristo, kandi tuwatene haguma ngʼebitsuko misindo-misindo byʼomubiri muguma.’ (Rom. 12:4, 5) Paulo mwasonda eritukangiriryaki? Abyakasonda eritukangania ngoko obuli mughuma w’okwite awite omubírí omo ndeko ow’asighene n’owo ghundi, aliwe obuli mughuma w’okwitwe ni w’omughaso.
Situwite emibírí mighumerera omo ndeko, aliwe obuli mughuma w’okwitwe ni w’omughaso (Lebaya enungu 5-12) *
5. Ni “bihembo” byahi ebyo Yehova abiriha endeko?
5 Twamabulibwa abawite omwanya omo ndeko nga bobahi, amalengakania wetu akalu iniayighusa oko abakasondola. (1 Tes. 5:12; Ebr. 13:17) Ni kwenene, erilabira Kristo, Yehova abirituha endeko yiwe “abalume mo bihembo”. (Efe. 4:8, NWT) “Ebihembo” ebyo muli abalume b’omo Katunga Akakasondola n’abakawatikayabo emibírí, Abalume b’omo Katunga ak’Ebeteli, abalebereya b’omutimbo, abalume abakakangiriraya ehilasi mbiriri-mbiriri ey’eBiblia, abasyakulu b’omo ndeko n’abaghombe bawatikya. Abaghala betu bosi abo bakahirawaho erilabira ekirimu kibuyirire batoke erisondola esyombuli sya Yehova esiwite mughaso munene, n’eriwatya endeko.—1 Pet. 5:2, 3.
6. Ngoko kiri omo 1 Abanya Tesalonika 2:6-8, abalume abahirawaho erilabira ekirimu kibuyirire bakayikasa erikolaki?
6 Abaghala betu abo bakahirawaho erilabira ekirimu kibuyirire batoke erikola emibírí mbiriri-mbiriri. Ngoko ebitsuko mbiriri-mbiriri by’oko mubiri ng’ebyala n’ebisando, bikakola haghuma eriwatikya omubiri wosi, abaghala betu abo, abakahirawaho erilabira ekirimu kibuyirire bakakola kutsibu eriwatikya endeko yosi. Sibalikola emyatsi eyo bakasonda eripipwa n’abandu. Aliwe, bakakola kutsibu busana n’erihimba bunya-kirimu abaghala na bali betu. (Soma 1 Abanya Tesalonika 2:6-8.) Tukasima Yehova yo kutsibu busana n’abalume abatolere abo, abatsomene abandi!
7. Abaghala n’abali betu bangyi abali omo mubírí w’omughulu wosi bakabana miyisa yahi?
7 Abandi omo ndeko ni bamisyonere, bapainia b’embaghane n’abapainia b’omughulu wosi. Kwenene, abaghana na bali betu bangyi omo kihugho kyosi babiriyisogha eritulira n’erikola abigha omo mubiri w’omughulu wosi. Ekyo kyabirileka ibawatikya abandu bangyi eribya bigha ba Yesu Kristo. N’omo abatuliri b’omughulu wosi kangyi-kangyi sibaliyira bindu bingyi eby’ekinya-mubiri, Yehova abirihembabo akabaha engebe eyuswiremo emiyisa mingyi. (Mar. 10:29, 30) Twanzire kutsibu abaghala n’abali betu abo, kandi tutsemire eribya nabo omo ndeko!
8. Busanaki obuli mutuliri w’engulu mbuya ni w’omughaso omo meso wa Yehova?
8 Abaghala betu abakasondola n’abaghala n’abali betu abakakola omubírí w’omughulu wosi, ni n’abo basa bo bawite omwanya omo ndeko kwehi? Kobitebitya n’ahake! Obuli mutuliri w’engulu mbuya ni w’omughaso embere sy’oMungu n’omo ndeko. (Rom. 10:15; 1 Kor. 3:6-9) Omwatsi mughuma w’oko myatsi eyikaleka endeko iyakolwa ry’eriyira abandu mo bigha ab’oMwami Yesu Kristo. (Mat. 28:19, 20; 1 Tim. 2:4) Abosi akatulira haghuma n’endeko, bangabya batuliri abatebabatisibwa kutse abatuliri ababatisibwe, abosi bakayikasa erihira omubírí oyu w’embere omo ngebe yabo.—Mat. 24:14.
9. Busanaki twanzire abali betu Bakristo?
9 Yehova akakanganaya abali betu Bakristo b’olukogho akabaha omubírí w’obughuli omo ndeko. Yehova asikirye abakali b’omo bunyumba, obo koyo, abakwirwa n’abali betu abasimbi abakamukolera butaleghula. Amasako akakanaya oko bakali abatsemesaya oMungu. Abakali abo bakasimawa kusangwa babya by’erileberyako eby’uwene. Babya n’obwenge, obwikirirya, omuhwa munene, obutubaha, ini benge, kandi ibawite amategheko mabuya. (Luka 8:2, 3; Emib. 16:14, 15; Rom. 16:3, 6; Flp. 4:3; Ebr. 11:11, 31, 35) Tukasima Yehova busana n’abakali Bakristo abali n’emibere mibuya ng’eyi eribya omo syondeko syetu!
10. Busana tusikirye abaghala n’abali betu abakekeluhire?
10 Kandi tutsemire kusangwa omo ndeko muli abasyakulu n’abakekulu. Omo ndeko silebe mune abaghala n’abali betu ababirikolera Yehova omo ngebe yabo yosi. Abandi mubaminya ekwenene mwalindi-lindi. N’abandi ni bakoni kutse bawite amaligho awakasa busana n’obukulu. Ebyosi ebyo byanganaleka ibatakola ndeke omo ndeko n’omo muburi w’eritulira. Kwenene, abaghala n’abali betu abo abakekeluhire bakakila ngoko bangatoka omo mubírí w’eritulira, kandi bakakolesaya akaghala kosi ako bawite erihira omo bandi m’omumwa n’eribegheryabo! Ebyo babirilabamo binemutuletera endundi. Yehova anzirebo kundu, netu twanzirebo.—Emis. 16:31.
11-12. Ekyo ukatsemera oko balwana omo ndeko yetu ni kyahi?
11 Tutelilengekania oko balwana betu. Bawite ebitsibu bingyi kusangwa bakakulira omo kihugho ekyuswiremo amalengekania mabi ekikatabalawa na Sitani. (1 Yoa. 5:19) N’omo kine kitya, tukatsema kutsibu tukalangira abalwana abo bakasubirya omo mihindano, bakayatulira, n’erimira butubaha obwikirirya bwabo. Kwenene, abalwana betu abo banawite omwanya w’omughaso omo ndeko ya Yehova!—Esy. 8:2.
12 Kikanakala oko baghala n’abali betu balebe eriligha ngoko ni bw’omughaso omo ndeko. Ekyangawatikya obuli mughuma w’okwitwe eriminya ngoko naye anawite omughaso omo ndeko niki? Muleke tulangirekyo.
UMINYE NGOKO UNAWITE OMWANYA OMO NDEKO
13-14. Busani abandu balebe omo ndeko banganalengakania bati sibali na mughaso?
13 Tulangire esomo y’akabiri eyo twangy’igha oko eky’erileberyako ekyo Paulo akolesaya. Mwahanda omunwe oko mwatsi owakakenderaya abandu banene munabwire; bakalengekanaya bati sibawite mughaso omo ndeko. Paulo mwahandika ati: “Ekisando kyamabuga kiti, ingye kusangwa sindi byala, neryo sindi wʼomubiri, ekyo sikyangaleka kikatendibya ekitsuko kyʼomubiri. Kandi okutu kwamabuga kuti, kusangwa sindi riso, neryo sindi wʼoko mubiri, ekyo sikyangaleka okutu ikutabya kitsuko kyʼomubiri.” (1 Kor. 12:15, 16) Paulo asonda eritukangiriryaki?
14 Wamayilingirirania n’abandi omo ndeko, iwukendilangira nga sighuwite mughaso. Abaghuma omo ndeko bakakangiriraya ndeke, bakatondeka emyatsi yo ndeke kutse ni balisya babuya. Alinga wanganalengekania uti iwe siwangakola ndeke ngoko bakakola. Ekyo kikakanganaya ngoko ukayikehaya kandi uyasi lulengo. (Flp. 2:3) Aliwe ulebaye ndeke. Wamabya ukayilingirirania n’abakulengire butoki iwanganabunika mutima. Wanganihika n’okwilengekania uti omo ndeko simuli mwanya waghu na hake ngoko Paulo abugha. Ekyangakuwatikya eritendibya n’amalengekania ng’ayo niki?
15. Ngoko kiri omo 1 Abanya Korinto 12:4-11, litolere itwaligha omwatsi wahi oko buli butoki obo twangabya nabo?
15 Terilengekania oko kwenene eyi: Erilabira ekirimu kiwe kibuyirire, Yehova mwaha aBakristo balebe ab’erimbere ebihembo mbiriri-mbiriri by’erikola ebitiko-tiko, aliwe aBakristo bosi mubatabana ebihembo bighumerera. (Soma 1 Abanya Korinto 12:4-11.) Yehova mwabaha ebihembo n’obutoki obusighene, aliwe obuli Mukristo abya w’omughaso. Munabwire, situwite obutoki obwerikola ebitiko-tiko erilabira ekirimu kibuyirire. Aliwe ekyeriminya kyakino, itwe bosi sitwangayira obutoki bughumerera, aliwe ikwe bosi tuli b’omughaso omo meso wa Yehova.
16. Ni rihano lyahi ly’omukwenda Paulo eryo litolere itwakolesya?
16 Omo mwanya w’eriyilingirirania n’abandi Bakristo, litolere itwakolesya erihano lino ely’omukwenda Paulo elyasondolawa n’ekirimu kibuyirire: “Obuli mundu alenge omubiri wuwe iyowene, neryo iniabana ekyʼeriyihalambira mugo, butsira erilingiriraniago nʼomubiri wʼogundi mundu.”—Gal. 6:4.
17. Twamakwama erihano lya Paulo itukendibana endundi yahi?
17 Twamakwama erihano lya Paulo eryasondolawa n’ekirimu kibuyirire n’eritendiyilingirirania n’abandi itwanganatsuka erilangira ebutoki bwetu obo bandi batawite. Eky’erileberyako, omusyakulu mulebe anganabya isyalilabaya emikania yiwe yo ndeke oko kinara, aliwe inyakakola ndeke omubírí w’eriyira bigha. Kutse anganabya isyalitondeka emyatsi yo ndeke ng’abandi basyakulu omo ndeko, aliwe inyasibwe mo mulisya ow’olwanzo oyo abatuliri bakayowa bwiranda erisyasaba amanaho w’eBiblia. Kutse kandi, anganabya inyasibwe mo mwenge. (Ebr. 13:2, 16) Tukabya twabiminya ndeke obutoki bwetu, ekyo kikaleka itwatsemera ebyo tukakola omo ndeko, kandi isitwendisonda eritsura abaghala betu abawite obutoki obo tutawite.
18. Twangakolaki eribya batuliri babuya?
18 Nomo twangabya n’omwanya wahi omo ndeko, obuli mughuma w’okwitwe atolere inyalola embere omo mubírí wiwe, n’erikulya obutoki bwiwe. Erituwatikya omo mubírí wetu, Yehova akabya inyanemutubegherya erilabira endondeko yiwe. Eky’erileberyako, omo muhindano wetu w’omokati-kati ky’eyenga, tukabegheribawa ngoko twangabya batuliri babuya. Unemuyikasa erikolesya amahano awo tukabana omo muhindano oyo kwehi?
19. Wangakolaki utoke eritolera eriya oko Kalasi k’Abatuliri b’oBwami?
19 Eribegheribwa erindi ery’uwene eryo Yehova anemukolesya k’Akalasi Akabatuliri b’Obwami. Abakaya oko kalasi ako, b’abaghala n’abali betu abali omo mubírí w’eritulira w’omughulu wosi kandi ababirihinda emyaka 23 erihika oko 65. Wanganalengekania uti sikyangatokekana okw’iwe eriya oko kalasi ako. Aliwe, omo mwanya w’erisonda ebyangakukakirya eriya oko kalasi ako, sondaya eriminya busanaki utolere eriya oko kalasi ako. Neryo utsuke erikola emyatsi eyangakuwatikya eritolera eriya oko kalasi ako. Wamabiyikasa, Yehova enyakendikuwatikya, n’ekikalangirika nga sikyangatokekana, ikikenditokekana okw’iwe.
KOLESAYA OBUTOKI BWAGHU ERIHIMBA ENDEKO
20. Erisako ery’ Abanya Roma 12:6-8 likatukangirirayaki?
20 Esomo y’akasatu eyo tukigha omo ky’erileberyako ekyo Paulo akolesaya ikabanika omo Abanya Roma 12:6-8. (Soma.) Kandi hano, Paulo amakangania ngoko obuli mundu omo ndeko awite obutoki bw’iwe. Aliwe akahira omuwato oko mwatsi owakubagha ati, litolere itwakoleswa obutoki bwetu erihimba endeko.
21-22. Twamighaki oko mughala wetu Robert bana Felice?
21 Terilengekania oko ky’erilebelyako ekya mughala wetu oyo tukendihula mo Robert. Enyuma sy’erikolera omo kindi kihugho, mwabirikirwa erikolera oko beteli y’ekihugho kyabo. Nomo banamubwira ambu erimuha oghundi mubírí sibugha ambu mwakataluka oko mubírí owalwe akakola, mughala wetu Robert akabugha ati: “Munabugha emisi ngalengekania niti alinga sinasi erikola omubírí. Muhanabya n’endambi n’amasonda erileka omubírí w’eBeteli.” Mughala wetu mwasubirati obutseme bwiwe? Omusyakulu mulikyabo mwamw’ibukya ngoko Yehova akatubeghereya omo mubírí mulebe embere, imw’itwatoka erikola ndeke omubírí owakatuha lino. Mughala wetu Robert mwalangira ngoko litolere inyaleka erilengekania oko myatsi eyakera, aliwe, atolere erihira amalengekania wiwe w’oko ebyakakala lino.
22 Mughala wetu Felice Episcopo naye mwalola oko mwatsi owali ng’oyu. Iye n’omukali wiwe mubasoma oko Kalasi k’Egileadi omo 1956 neryo mubatumwa mo balebererya b’omutimbo omo Bolivia. Omo 1964, mubabuta omwana. Felice akabugha ati: “Mukyanilitohera eriligha omwatsi oyo. Alinga munabugha nga mwaka ininemuyitsweba busana n’omwatsi oyo. Aliwe Yehova mwaniwatikya eribindula amalengekania waghe, n’eriligha eribya mubuti.” Naghu ukanayowa nga Robert kutse Felice kwehi? Naghu wabiribunika mutima kusangwa sighulisyakola omubírí owo wabya ukakola kera? Byamabya iko biri bitya, nawu wanganabana obutseme wamabibindula amalengekania waghu n’erihiragho oko mubírí owo ukakola lino ow’erikolera Yehova n’abaghala benyu. Ubye n’ebingyi by’erikola ukakolesya obutoki bwaghu eriwatikya abandi, neryo iwukendibana obutseme ukahimba abandi omo ndeko.
23. Litolete itwayihiriraho endambi y’erikolaki, kandi tukendikania okuki omo mwatsi ow’akwamire?
23 Obuli mughuma w’okwitwe ni w’obughuli embere sya Yehova. Yehova anzire iwabya mughuma w’oko kihanda kiwe. Twamayihiriraho endambi y’erilengekania ngoko twangawatikya abaghala n’abali betu omo ndeko n’eriyikasa erikola tutya, sitwangalangira nga situwite omwanya omo ndeko! Nikwa tuli n’amalengekania wahi oko bandi omo ndeko? Twangakangania tuti ngoko tukatsemerabo? Tukendikania oko mwatsi w’omughaso oyo omo mwatsi ow’akwamire.
OLWIMBO 24 Mwase oko kitwa kya Yehova
^ par. 5 Obuli mundu wosi ananzire inyayowa ngoko Yehova amwanzire. Aliwe oko sindi ndambi tukanayibulaya nga tunawite mughaso. Omwatsi ono akendituwatikya eriminya ngoko obuli mundu anawite omwanya w’omughaso omo ndeko.
^ par. 3 ERIKANIA OKO KINYWA: Omwanya owo tuwite omo ndeko ya Yehova, w’omubírí ow’erihimba bunya-kirimu endeko. Erihimba endeko bunya-kirimu siriseghemere esyofranga esyo tuwite, ekihanda kyetu, emibere oyo twakuliramo kutse akalasi ako twasoma.
^ par. 62 ERIKANIA OKO SYOPITSA: Esyopitsa esisatu syosi sikakanganaya ebikakoleka embere sy’omuhindano, omughulu w’omuhindano, n’enyuma s’omuhindano w’endeko. Epitsa 1: Omusyakulu anemukokya omugheni n’obutseme, mughala wetu mulwana anemukengereghesania ebyuma by’omulenge, na mwali wetu anemukania n’oghundi mwali wetu oyukekeluhire. Epitsa 2: Abalwana n’abakulu, abosi banemusonda erisubirya oko Akaleberyo k’Erigha. Epitsa 3: Omulume n’omukali wiwe banemuwatikya eryerya Ekisenge ky’oBwami. Koyo anemuwatikya omwana wiwe erihira omutsango wiwe omo kasanduku akemitsango. Mughala wetu mulere anemulebya ekitsapo, n’oghundi mughala wetu anemukerya mwali wetu oyukekeluhire.
