1. Dawidi mwabya omo mibere yahi eyikalire?

DAWIDI abya inianemutibita busana n’omundu oyo wabya akasonda erimwita. Sauli, omwami w’obutoki owe Israeli, abya iniabiriyisogha kundu erimwita. Dawidi abere alagha oko kalyo, mwimana omo muyi we Nobu, amasaba mw’emikati itano misa. (1 Sam. 21:1, 3) Enyuma syaho, iye n’abalume biwe mobabisama omo mwangalu kutse ekyuna ekikabya omo ribwe rinene. (1 Sam. 22:1) Ekyaleka Dawidi iniabanika omo mibere eyo niki?

2. Sauli mwayihira ati omo bwiko obukalire? (1 Samweli 23:16, 17)

² Sauli mwatsura Dawidi yo kutsibu kundi abandu bangyi babya ibamwanzire n’erimuhalamba busana n’erisinga amalwa mangyi. Kandi Sauli mwaminya ngoko Yehova abirimughana busana n’eritendimowa kandi ngoko Yehova abirisombola Dawidi erisyabya mwami omo mwanya wiwe. (Soma 1 Samweli 23:16, 17.) Sauli iniakine mwami we Israeli, abya n’abasuda bangyi n’abandu bangyi ababya oko luhande lwiwe, neryo Dawidi abya atolere eritibita busana n’erisagha bakasyamwita. Kwenene, Sauli anganakakirye oMungu eriyira Dawidi mo mwami? (Isa. 55:11) EBiblia siyiribugha okw’ekyo, aliwe twanganaligha omwatsi ono: Sauli abya iniakayihira omo bwiko obukalire. Abakalwa n’oMungu bakataluka mughulu wosi!

3. Nomo anabya omo mibere eyikalire Dawidi mwatakolaki?

³ Dawidi abya mulume oyukayikehaya. Yutayisombolera eribya mwami we Israeli. Yehova yo wamusombola. (1 Sam. 16:1, 12, 13) Sauli mwapona Dawidi yo kutsibu. Aliwe Dawidi mwatatsweba Yehova busana n’obwiko obo abyamo; kutse mwatayilungumula busana n’eribya n’akalyo kake, kutse busana  n’eribya akabisama omo mwangalu w’eribwe linene. Omo mwanya w’ekyo, alinga omughulu abya abiseme omo mwangalu oyo, w’omughulu ahandika olwimbo oluwene olw’eripipa olulimo ebinywa ebiri omo risako erihanganire omwatsi ono: “Abakasonda-sonda Yehova sibebula kindu kibuya.”​—Esy. 34:10.

4. Tukendikania oko mabulyo wahi, kandi busanaki ni w’omughaso?

⁴ Munabwire hakanayira omughulu abaghombe bangyi ba Yehova ibatabana akalyo akatosire kutse ebindi bindu ebyo balaghireko omo maisa wabo. * Kwenene ekyo mokyahikire oko baghombe bangyi ba Yehova kutsibu-tsibu omo mughulu w’ekihunzo ono. Kandi emyatsi ko yinemwendilola yitya embere erikala kutsibu omughulu tunemughenda tukaseghera hakuhi “n’obulighe bunene.” (Mat. 24:21) Omughulu tunemulengekania oko myatsi eyo, muleke tusubiraye oko mabulyo ani ano: Omo nzira yahi Dawidi “mwatabula kindu kibuya”? Busanaki litolere itwigha eritsemera ebindu ebyo tuwiteko? Busanaki twanganikirirya tuti Yehova akasyatuwatikya? Kandi munabwire twangayiteghekania tuti oko biro ebikasa?

5-6. Esyonyimbo 23:1-6 sikatuwatikaya siti eriminya Dawidi ng’asond’ibugha atiki omughulu abugha ati abaghombe b’oMungu “sibangabula kindu kibuya”?

⁵ Dawidi asond’ibugha atiki omughulu abugha ati abaghombe ba Yehova “sibendisyabula kindu kibuya?” Twanganaminyakyo omw’ilengekania oko binywa ebiri ng’ebyo ebikabanika omo Esyonyimbo 23. (Soma Esyonyimbo 23:1-6.) Dawidi akatsuka esyonyimbo esyo omo binywa bino: “Yehova ni mulisya waghe. Sindiendisyabula kindu.” Omo yindi milondo y’olwimbo olo, Dawidi akakanaya oko myatsi eyikaletera kwenene endundi y’erikota, ni bughambu emiyisa mingyi y’eribya n’obwira n’oMungu eyabana busana n’eriligha Yehova mo mulisya wiwe. Yehova mwamusondola “omo nzira eyitunganene,” kandi mwataleka eriwatikya Dawidi omo mighulu eyuwene n’eyituwene. Dawidi mwaminya ngoko amaisa wiwe omo “lulisiryo  lw’ebiti bibisi” lwa Yehova syendisyabya butsira maligho. Oko ndambi silebe, alinga angabunikire mutima, “ng’oyukalendera omo musya w’omwirimya owakalire,” kandi angabere n’esyonzighu nyingyi. Aliwe kundi Yehova abya Mulisya wiwe, Dawidi “mwatubaha ebibi.”

⁶ Nikwa ekisubiryo ky’oko ribulyo ryetu: Omo nzira yahi mo Dawidi mwatabula “kindu kibuya”? kyakino. Abya n’obuli kindu ekyabya alaghireko atoke erisighala hakuhi na Yehova. Syabya ikirirye ati eribya n’obutseme litolere iniabya n’ebindu bingyi by’ekinya-mubiri. Dawidi mwakangania erisima busana n’ebyo Yehova abya akamuha. Emyatsi y’omughaso munene okw’iye yabya eribana emiyisa n’obuteya bw’oMungu wiwe.

7. Erikwamana ne Luka 21:20-24, ni maligho wahi awo aBakristo b’oko karne k’erimbere abe Yudea balabamo?

⁷ Ebinywa bya Dawidi ebyo bikatuwatikaya erilangira ngoko ni ky’omughaso munene okw’itwe eriminya ngoko siritolere erilangira ebindu by’ekinya-mubiri mo by’omughaso munene kutsibu. Kwenene twanganatsemera ebindu by’ekinya-mubiri ebyo tuwite, aliwe situtolere eribilangira mo by’omughaso munene omo ngebe yetu. Eyo yabya kwenene y’omughaso eyo aBakristo b’oko karne k’erimbere ababya eYudea babya batolere ibaminya. (Soma Luka 21:20-24.) Yesu mwahanabo ngoko hakasyabya omughulu owo omuyi we Yerusalema ‘angatimbirweko n’emilondo y’amalwa.’ Ekyo kyabere kyahika, molyatolera ‘ibasaghire oko bitwa.’ Okw’ibo erisagha lyangabakolirye oko mulamo, aliwe bangasighire ebindu bingyi by’enyuma. Emyaka milebe embere, Akaleberyo k’Omuteya mokabugha katya: “Mobasighania amalima n’amanyumba, nibya mobatakuma-kuma n’ebindu ebyabya omo manyumba wabo. Busana n’eriyiketera obuteya n’obuwatikya bwa Yehova, mobahira eriramya liwe ly’embere oko buli mwatsi owangalangirikire nga wo w’omughaso.”

8. Ni somo yahi eyitolere erilengekanibwako kutsibu eyo twang’igha oko ebyahikira aBakritso b’oko karne k’erimbere abe Yudea?

⁸ Ni somo yahi eyitolere erilengekanibwako kutsibu eyo twang’igha oko ebyahikira aBakritso b’oko karne k’erimbere abe Yudea? Akaleberyo k’Omuteya akabiriahulwa mokabugha kati: “Omo mughulu owakasa hanganasyabya erilengwako erikasyakanganaya nga tukalangira ebindu by’ekinya-mubiri nga ni by’omughaso omo lulengo lwahi; byo by’omughaso munene; kutse omulamo owo abosi abali oko luhande lwa Yehova basyabana wali n’omughaso? Omughulu enduli ikasyahika kyanganasyatusaba eriyiyinia oko maligho n’eriligha eriherya ebindu bilebe. Tukasyabya itunayiteghekenie erikola ekyosi ekyo twangatoka, ngoko aBakristo b’oko karne k’erimbere abasagha erilua eYudea bakola.” *

9. Erihano rya Paulo oko Baebrania lyamakuwatikya liti?

⁹ Wanganalengekania ngoko abya mwatsi owakalire oko Bakristo abo eritsuka amaisa mahya-mahya w’omo kiharo ekyo batabeghere? Mokyabasaba obwikirirya eriyiketera ngoko Yehova akasyabawatikya eribana ebyo balaghireko. Aliwe, babya ibanawite ebyangabawatikya. Emyaka itano embere Abaroma batimbe oko muyi we Yerusalema, omukwenda Paulo mwaha aBaebrania b’erihano eryuwene rino: “Simukwamirire erianza esyofranga, nikwa mutsemere ebyo muwite. Kusangwa oMungu abiribugha ati: ‘Sindiendisyakuleka na kera, kandi sindiendisyakusighania n’ahake.’ Kikaleka itwabugha butsir’yubaha tuti: ‘Yehova ni muwatikya waghe, sindiendisyubaha. Kwe abandu banganyikolaki?’” (Ebr. 13:5, 6) Ahate eritika-tika mokyoloba oko abakolesaya erihano rya Paulo, eritsemera ebike ebyo babya bawite omo bwikalo bwabo buhya-buhya. Mob’ikirirye ngoko Yehova angabawatikirye eribana ebyo balaghireko. Ebinywa bya Paulo bikaleka  itwikirirya ngoko netu twamabiyiketera Yehova iniakendituha ebyo tulaghireko.

10. Ni “rikumbo” ryahi kutse esiri eyo Paulo atukumbulira?

¹⁰ Paulo mwaha Timoteo y’erihano eriri ng’eryo, netu kutya erihano eryo linatulebirye. Mwahandika ati: “Neryo, twamabya n’akalyo n’eky’eriyiswika, tutsemere [ebindu] ebyo.” (1 Tim. 6:8) Ekyo kikasond’ibugha kiti sitwangatsemera akalyo akuwene, enyumba eyuwene kutse erighula olukimba luhya-luhya oko katambi kalebe? Ekyo sikyo Paulo asonda eribugha. Hano Paulo akabugha ati litolere itwatsemera kutse eritosheka n’ekindu kyosi-kyosi ky’ekinya-mubiri ekyo tuwiteko. (Flp. 4:12) Eryo ryo ryabya “erikumbo” rya Paulo. Ekindu kyetu ky’omughaso munene b’obwira bwetu haghuma n’oMungu, butsira ekindu kyosi-kyosi ky’ekinya-mubiri ekyo tuwiteko.​—Hab. 3:17, 18.

11. Ni mwatsi wahi owalebirye eritsemera ebyo tuwiteko owo twam’igha omo binywa ebyo Musa abwira Abaisraeli?

¹¹ Ebyo tukalengekanaya tuti tulaghireko byanganabula erisosana n’ebyo Yehova asi ko tulaghireko. Tulengekanaye oko ebyo Musa abwira Abaisraeli enyuma sy’eribugha emyaka 40 y’omo mbwarara: ‘Kusangwa Yehova oMungu wenyu abiribatsumula omo byosi ebyo mwabirikola. Abiriminya olughendo lwenyu omo mbwarara nene eyi. Emyaka makumi ani eyi Yehova Mungu wenyu mwabya nenyu; simulitabula kindu.’ (Ebi. 2:7) Omo myaka 40 eyo, Yehova mwaha Abaisraeli b’amana mo kalyo.  Esyongyimba syabo, ni bughambu esyongyimba esyo balua nasyo eMisiri mositakula n’ahake. (Ebi. 8:3, 4) Nomo byanabya bitya Abaisraeli balebe mobatatsemera ebindu ebyo, Musa mwibukya Abaisraeli ngoko babya ibanawite oko byosi ebyo babya balaghireko. Yehova akenditsema twam’igha eritsemera ebyo tuwiteko, ni bughambu eritsemera nibya n’ebindu bike ebyo akatuha, eriminya ngoko ni miyisa yiwe n’eribya tukamuha ewasingya busana nabyo.

12. Niki kyo kikakanganaya ngoko Dawidi abya iniayiketere Yehova, butsira akaghala kiwe iyuwene-wene?

¹² Dawidi abya asi ngoko Yehova ni mutaleghula kandi ngoko akawatikaya kundu abosi abamwanzire. Omughulu ahandika Esyonyimbo 34, Dawidi mwalangira omo meso w’obwikirirya “omumalaika wa Yehova akamuteya.” (Esy. 34:7) Alinga Dawidi mwasosekania omumalaika wa Yehova n’omusuda oyukahira ekambi yiwe y’omo kiharo kilebe atoke eribya akayiteghererya esyonzighu mughulu wosi. Nomo iyuwene-wene anabya mulume w’amalwa oyukalire, Yehova mwamulagha erisyabya mwami, aliwe Dawidi mwatayiketera obutoki bwiwe bw’erighusa eribwe kutse erikolesya omuyali omughulu w’erilwa n’enzighu. (1 Sam. 16:13; 24:12) Dawidi mwayiketera oMungu, inikirirye ngoko omumalaika wa Yehova ‘akalamaya abakamubaha.’ Kwenene, munabwire situliyilindirirako eriteghibwa omo nzira y’ekitiko-tiko. Aliwe tunasi ngoko abosi abakayiketera Yehova nomo bangahola bakasyabana engebe y’erikota.

13. Omughulu Gogi wa Magogi akasyabambira abandu b’oMungu, busanaki kikasyalangirika eritusinga nga lyolobire, nikwa busanaki situtolere erisyubaha? (Ulebaye epitsa eyiri oko kijalada.)

¹³ Omo biro ebiri hakuhi, eriyiketera lyetu ngoko Yehova awite obutoki bw’erituteya likasyalengawako. Omughulu Gogi wa Magogi, ni bughambu emilondo y’ebihanda, asyabambira abandu b’oMungu, engebe yetu yikasyabya nga yiri omo bwiko. Likasyatolera itwabya n’erikirirya ngoko Yehova ali n’obutoki kandi ngoko akasyatulamya. Omo meso w’ebihanda, tukasyalangirika ng’embuli eyitawite ow’erilwira kuyo, nga situwite ow’erituteya. (Ezek. 38:10-12) Sitwendisyayira oko bindu by’amalwa, kandi tukasyabya isitubegheribwe erilwa. Abandu b’ebihanda basyalengekania bati kyolobire okw’ibo eritusinga. Sibendisyalangira ekyo tukalangira omo meso wetu w’obwikirirya​—ni bughambu emilondo y’abamalaika bangyi ababiritimbya ekambi yabo y’oko bandu b’oMungu, ibanayiteghekire eribalwirako. Ibo sibawite ameso w’obwikirirya. Bakasyasisira kutsibu omughulu abamalaika bakasyatulwirako!​—Erib. 19:11, 14, 15.

14. Ni myatsi yahi eyo twangakola lino eriyiteghekania oko biro ebikasa?

¹⁴ Twangakolaki lino eriyiteghekania busana n’ebiro ebikasa? Eky’erimbere, litolere itwabya n’amalengekania awuwene oko bindu by’ekinya-mubiri, itunasi ngoko kiro kighuma tukasyabisighania enyuma. Eky’akabiri, litolere itwatsemera ebyo tuwiteko kandi litolere itwabya n’obutseme bunene busana n’obwira bwetu haghuma na Yehova. Twamaminya oMungu yo ndeke, itukendiyiketera kundu obutoki bwiwe bw’erituteya omughulu Gogi wa Magogi akasyalwa netu.

15. Ni myatsi yahi eyahikira Dawidi iniakine mulwana eyamwibukaya ngoko Yehova akendilola embere eribya akamuwatikya?

¹⁵ Tulebaye ebindi ebyawatikaya Dawidi kandi ngoko byangatuwatikya netu eriyiteghekania okw’isyakinda amaligho. Dawidi mwabugha ati: “Ulenge, ulebaye Yehova kw’ali mubuya!  Obutseme buli oko mundu oyukamusaghirako.” (Esy. 34:8) Ebinywa ebyo bikakanganaya ngoko Dawidi mwaminya kw’atolere iniayiketera obuwatikya bwa Yehova. Dawidi abya iniakayiketera Yehova, n’oMungu wiwe mwatamulekerania n’ahake. Omughulu abya mulwana, Dawidi mwalwa n’oMufilistini yo Goliati n’eribwira omulume w’obutoki bw’amalwa oyo ati: “Munabwire Yehova akandikuhira omo byala byage.” (1 Sam. 17:46) Enyuma syaho, omughulu Dawidi abya akakolera omwami Sauli, yo Sauli mwasondekania kangyi-kangyi erimwita. Aliwe “Yehova abya haghuma” na Dawidi. (1 Sam. 18:12) Kundi Dawidi abya inyabiriyilangirira kera obuwatikya bwa Yehova, mwaminya ngoko angamuwatikirye omo maligho wiwe.

16. ‘Twangalenga’ obubuya bwa Yehova b’omo nzira syahi?

¹⁶ Twamabiyiketera obusondoli bwa Yehova bo lino, itukendilola embere eriyiketera obutoki bwiwe bw’erisyatuwatikya omo biro ebikasa. Erisaba omukulu wetu w’omubírí y’ekonze busana n’eriya oko muhindano munene w’omutimbo kutse ow’ekiharo kutse erisaba eribindula eprograme yetu y’omubírí busana n’eriya oko mihindano yetu yosi n’erilabya endambi nene y’omo mubírí w’eritulira likasaba obwikirirya n’eriyanzira lyetu. Omukulu wetu w’omubírí amaghana ekyo tukamusaba neryo itwaherya omubírí, tunawite obwikirirya ngoko Yehova syendisyatusighania n’eritulekerania n’ahake kandi ngoko akasyalola embere erituha ebyo tulaghireko? (Ebr. 13:5) Abangyi abali omo mubírí w’omughulu wosi banganakania ekikakanganaya ngoko Yehova mwabawatikya omughulu babya balaghire kutsibu oko buwatikya bwiwe. Yehova syalireghula.

17. Erisako lyetu ly’omwaka we 2022 ni ryahi, kandi litolere busanaki?

¹⁷ Omughulu tuli na Yehova oko luhande lwetu, sihali ekyangaleka itwasagha ebikasyahuluka omo biro ebikasa. OMungu wetu syendisyatulekerania n’ahake omughulu tukayitsinga erihira oBwami bwiwe bw’embere omo maisa wetu. Eritwibukya ngoko litolere itwayiteghekania lino busana n’ebiro ebikalire ebikasa n’eriyiketera ngoko Yehova syendisyatulekerania n’ahake, Ekyaghanda Ekikasondola mokikasombola erisako ly’ Esyonyimbo 34:10 mo risako ly’omwaka we 2022: “Abakasonda-sonda Yehova sibebula kindu kibuya.”