1-2. (a) Kutsibu-tsibu tukibuka omwanze wetu oyo wabirihola yo mughulu wahi? (b) Yesu mwatsukisyaki omo righolo ry’ekiro ekyatangirira oluholo lwiwe?

NOMO hangabya ihabirilaba biro bingahi abanze betu ibabirihola, tukinibukirebo. Tukibukabo kutsibu-tsibu omughulu ekiro ekyo bahola kikahika.

² Obuli mwaka, tukabya haghuma n’esyomiliyoni sy’abandu b’omo kihugho kyosi abakahindana busana n’eryibuka oluholo lw’omundu oyo twanzire kutsibu​—Yesu Kristo. (1 Pet. 1:8) Tukahindana haghuma eryibuka oyo waherera engebe yiwe mo mbanulo atoke eritulamya oko rilolo n’oluholo. (Mat. 20:28) Yesu abya anzire ati abigha biwe ibabya bakibuka oluholo lwiwe. Omo righolo ry’ekiro ekyatangirira oluholo lwiwe, mwatsukisya akalyo k’erigholo ak’embaghane n’eribugha ati: “Mukole mutya erinyibuka.” *​—Luka 22:19.

3. Omo mwatsi ono tukendikania okuki?

³ Abandu bake b’omo abakahika oko muhindano w’eryibuka oluholo lwa Yesu bakayiketera erisyikala elubula. Aliwe n’amamiliyoni w’abakayiketera erisyikala oko kihugho nabo bakahika oko muhindano oyo. Omo mwatsi ono, tukendikania oko bikaleka abandu b’omo bihyo bibiri byosi ibabya n’engumbu nene y’erihika oko Muhindano w’Eryibuka Oluholo lwa Yesu obuli mwaka. Kandi tukendilangira ngoko tukabana endundi omw’ihika oko muhindano oyo. Tutsuke twakania oko myatsi milebe eyikaleka abahirirwe kw’amaghuta ibabya bakahika kugho.

4. Niki kyo kikaleka abahirirwe kw’amaghuta ibalya oko mukati n’eripulya oko divai oko Muhindano w’Eryibuka Oluholo lwa Yesu?

⁴ Obuli mwaka abahirirwe kw’amaghuta bakahika oko Muhindano w’Eryibuka Oluholo lwa Yesu; bakalya oko mukati n’eripulya oko divai. Busanaki bakalya oko mukati n’eripulya oko divai omo nzira eyitolere? Erisubirya okw’ekyo, tulebaye ekyakoleka omo righolo ry’omwiso ly’engebe ya Yesu y’oko kihugho. Babere babilya akalyo k’Epasaka, Yesu mwatsukisya omuhindano owabiriminyikala mo Kalyo k’Erigholo k’Omukama. Mwalabya omukati n’edivai oko bakwenda bataleghula 11 n’eribabwira ati balye n’eripulya. Yesu mwakania nabo oko syondaghane ibiri​—erilaghana lihya-lihya n’erilaghana busana n’oBwami. * (Luka 22:19, 20, 28-30) Esyondaghane esyo mosyaleka ikyatokekana oko bakwenda n’abandi bandu abaghanzirwe erisyabya bami n’abahereri omo lubula. (Erib. 5:10; 14:1) Abakisighalire b’oko bahirirwe kw’amaghuta basa, * abali omo syondaghane ibiri esyo, bo bangalya oko mukati n’eripulya oko divai oko Muhindano w’Eryibuka Oluholo lwa Yesu.

5. Abahirirwe kw’amaghuta basi mwatsi wahi okw’iyiketera eryo babirihabwa?

⁵ Hane oghundi mwatsi owakaleka abahirirwe kw’amaghuta ibabya n’engumbu nene y’erihika oko Muhindano w’Eryibuka Oluholo lwa Yesu: Erikola omuhindano oyo likabaha akanya k’erilengekania oko eriyiketera lyabo. Yehova abiribaha eriyiketera erikaswekaya​—eribana engebe y’omo lubula eyitehonda n’eyitehola, eritabala haghuma na Yesu Kristo oyo walubukibawa oko baholi n’abandi 144 000, n’ekikulu oko byosi, erilola oko Yehova Mungu! (1 Kor. 15:51-53; 1 Yoa. 3:2) Abahirirwe kw’amaghuta banasi ngoko babiribirikirwa eritsemera olusunzo olo l’omo lubula. Aliwe erilighirwa eringira omo lubula, batolere erisighala bataleghula erihika oko luholo. (2 Tim. 4:7, 8) Erilengekania okw’iyiketera lyabo ly’elubula likaletera abahirirwe kw’amaghuta b’obutseme bunene kutsibu. (Tito 2:13) Tubughe tutiki oko “sindi mbuli”? (Yoa. 10:16) Ni myatsi milebe yahi yo yikaleka ibahika oko Muhindano w’Eryibuka Oluholo lwa Yesu?

6. Niki kyo kikaleka esindi mbuli isyabya sikahika oko Muhindano w’Eryibuka Oluholo lwa Yesu obuli mwaka?

⁶ Esindi mbuli sikahika oko Muhindano w’Eryibuka Oluholo lwa Yesu, nikwa sibalirya oko mukati n’eripulya oko divai, aliwe bakabya ibanatsemire eribya kugho. Omwaka we 1938, wo mughulu abawite eriyiketera ly’erisyikala oko kihugho babirikirawa engendo yabo y’erimbere erihika oko Muhindano w’Eryibuka Oluholo lwa Yesu. Akaleberyo k’Omuteya k’ekiro 1 oMwisi 3, 1938, mokabugha kati: “Akendibya mwatsi mubuya kandi owatolere oko [esindi mbuli] eribya bakabya oko mihindano eyo n’erilangira ebikakoleka. . . . Asyabya mughulu w’obutseme okw’ibo nabo.” Ngoko abalyakokibawa oko ndwa bakatsemera erilangira ngoko efete yikakoleka, esindi mbuli sikatsema eribya oko Muhindano w’Eryibuka Oluhola lwa Yesu bakalangira ebikakoleka.

7. Niki kyo kikaleka abakahulawamo esindi mbuli ibalindirira omukania w’Eryibuka Oluholo lwa Yesu n’omuhwa?

⁷ Abakahulawa mo esindi mbuli nabo bakalengekanaya okw’iyiketera lyabo. Bakalindirira omukania w’Eryibuka Oluholo lwa Yesu n’omuhwa, kundi akakanaya kutsibu okw’ebyo Yesu n’abandu 144 000 abakasyatabala haghuma naye bakasyakolera abandu bataleghula omo Butabali bw’Emyaka Elfu Moya. Omw’ikwama  obusondoli bw’oMwami wabo Yesu Kristo, abami b’omo lubula abo bakasyawatikya eriyira ekihugho mo paradiso n’eriwatikya abandu eribya abahikahikene. Erilengekania okw’ibererera ly’amaminyereri w’eBiblia omo biro ebikasa ng’awali omo Isaya 35:5, 6; 65:21-23; ne Eribisulirwa 21:3, 4, ni mwatsi owakatsemesaya kundu oko mamiliyoni w’abandu abakatungerera oMuhindano w’Eryibuka oLuholo lwa Yesu. Bakawataya eriyiketera lyabo ly’ebiro ebikasa n’eriyisogha lyabo kundu eritendileka erikolera Yehova, omw’ilengekania ngoko ibo haghuma n’abanze babo bakasyabya omo kihugho kihya ekyo.​—Mat. 24:13; Gal. 6:9.

8. Ni ghundi mwatsi wahi owakaleka esindi mbuli isyahika oko Muhindano w’Eryibuka Oluholo lwa Yesu?

⁸ Tulebaye oghundi mwatsi owakaleka esindi mbuli isyahika oko Muhindano w’Eryibuka Oluholo lwa Yesu. Banzire erikangania olwanzo lwabo n’obuwatikya bwabo b’oko abahirirwe kw’amaghuta. Ekinywa ky’oMungu kyabya ikyabiribugha embere ngoko abahirirwe kw’amaghuta n’abawite eriyiketera ly’erisyikala oko kihugho bakasyakola haghuma omo bughuma. Nikwa bati? Muleke tukanaye oko eby’erileberyako bilebe.

9. Obuminyereri obuli omo Zekaria 8:23 bukakanganaya buti ngoko abakahulawamo esindi mbuli bakayowa busana n’abahirirwe kw’amaghuta?

⁹ Soma Zekaria 8:23. Obuminyereri obu bukakanganaya ndeke-ndeke ngoko abakahulawamo esindi mbuli bakayowa busana n’abaghala n’abali babo abahirirwe kw’amaghuta. Ebinywa “Omuyuda” na “nawe [inywe nwt]” bikakanaya oko kihyo kighumerera​—abahirirwe kw’amaghuta abakisighalire. (Rom. 2:28, 29) “Abandu ikumi abakalua oko bihanda by’obuli mubuge” bakasosekanaya esindi mbuli. ‘Bakahamba,’ ni bughambu bakamakirira butaleghula abahirirwe kw’amaghuta, bali omo bughuma haghuma nabo omw’iramya ery’erire. Neryo, eribya haghuma nabo omo righolo ly’Eryibuka Oluholo lwa Yesu, abakahulawamo esindi mbuli bakakanganaya ko bamakirire oko abahirirwe kw’amaghuta ko kutsibu.

10. Yehova mwakolaki eriberererya obuminyereri obuli omo Ezekieli 37:15-19, 24, 25?

¹⁰ Soma Ezekieli 37:15-19, 24, 25. Yehova mwaberererya obuminyereri obu omw’ileta abahirirwe kw’amaghuta n’esindi mbuli erikola haghuma omo bughuma obutebwangatwika. Obuminyereri bukanirye oko miti ibiri. Abayiketere erisyikala omo lubula basosekanibwe n’omuti “busana na Yuda” (ekihanda ekyabya kikasombolwamo abami be Israeli), n’abayiketere erisyikala oko kihugho basosekanibwe n’omuti “wa Efuraimu.” * Yehova mwamatania ebihyo bibiri bitoke eribya muti “mughuma.” Ekyo ni bughambu bakakola omo bughuma omw’ikwama obusondoli bw’Omwami wabo mughuma, Kristo Yesu. Obuli mwaka abahirirwe kw’amaghuta n’esindi mbuli bakahika oko Muhindano w’Eryibuka Oluholo lwa Yesu butsira nga bihyo bibiri ebisighene, aliwe nga “kihangulo kiguma” bakasondolwa “n’omulisya muguma.”​—Yoa. 10:16.

11. Abandu abasosekanibwe ‘n’esyombuli’ abakanibweko omo Matayo 25:31-36, 40 bakawatikaya bati kutsibu-tsibu abaghala babo Kristo?

¹¹ Soma Matayo 25:31-36, 40. Omo musyo ono “esyombuli” sikasosekanaya abatunganene omo biro by’enduli abawite amaha w’erisyikala oko kihugho​—ni bughambu, esindi mbuli. Bakawatikaya butaleghula abakisighalire b’oko baghala babo Kristo abahirirwe kw’amaghuta kutsibu-tsibu omw’ibawatikya eriberererya omubírí munene kutsibu ow’eritulira n’eriyira abigha omo kihugho kyosi.​—Mat. 24:14; 28:19, 20.

12-13. Abakasosekanibawa n’esindi mbuli bakawatikaya abaghala babo Kristo abahirirwe kw’amaghuta omo sindi nzira syahi?

¹² Obuli mwaka omo mayenga awatangirire  oMuhindano w’Eryibuka Oluholo lwa Yesu, abakahulawamo esindi mbuli bakawatikaya abaghala babo Kristo omughulu bakasangira oko mubírí w’eritulira w’embaghane w’omo kihugho kyosi ow’eribirikira abandu abanzisibwe b’oko Muhindano oyo. (Ulebaye akasanduku “ Unemuyiteghekania busana n’omughulu w’Omuhindano w’Eryibuka Oluholo lwa Yesu owakasa?”) Kandi bakayiteghereraya nga banabiribana ebyosi ebilaghirweko busana n’Omuhindano w’Eryibuka Oluholo lwa Yesu, nomo hate hangabya oyukalya oko mukati n’eripulya oko divai omo ndeko yabo. Abakahulawamo esindi mbuli bali n’engumbu nene y’eriwatikya abaghala babo Kristo omo nzira esiri ng’esyo. Esindi mbuli esyo sinasi ngoko Yesu akalangira ebyo sikakolera abaghala babo abahirirwe kw’amaghuta nga bakakolabyo busana naye iyuwene-wene.​—Mat. 25:37-40.

¹³ Ni yindi myatsi yahi yo yikaleka itwe bosi, nomo twangabya n’eriyiketera lyahi, itwahika oko Muhindano w’Eryibuka Oluholo lwa Yesu?

14. Yehova na Yesu mobatukangania olwanzo lunene lo bati?

¹⁴ Tukasima kutsibu busana n’olwanzo olo Yehova na Yesu batukanganaya. Yehova abiritukangya olwanzo lwiwe l’omo nzira nyingyi. Aliwe enzira ngulu eyo atukanganirayamo olwanzo lwiwe ly’erituma Mughala wiwe mwanzwa aghalawe n’erihola busana netu. (Yoa. 3:16) Na Yesu naye mwakangya olwanzo lunene omw’iherera engebe yiwe omwanza liwe busana netu. (Yoa. 15:13) Sitwangatoka n’ahake eriliha Yehova na Yesu busana n’olwanzo olo batukanganaya. Aliwe twanganakangania erisima lyetu omo nzira y’emighendere yetu y’obuli kiro. (Kol. 3:15) Kandi tukahika oko Muhindano w’Eryibuka Oluholo lwa Yesu kundi twanzire erilengekania oko lwanzo lwabo okw’itwe n’erikangania kutya ko tubanzire.

15. Busanaki abahirirwe kw’amaghuta n’esindi mbuli abosi bakalangira embanulo mo y’omughaso munene kutsibu?

¹⁵ Tukasima kutsibu busana n’ekihembo ky’embanulo. (Mat. 20:28) Embanulo ni y’omughaso munene kutsibu oko bahirirwe kw’amaghuta kundi yikaleka eriyiketera lyabo erwuwene kundu iryatokekana. Busana n’obwikirirya bwabo omo buhere obo Yesu ateka, Yehova abiribayira mo batunganene kandi abiribayira mo baghala biwe. (Rom. 5:1; 8:15-17, 23) N’esindi mbuli nasyo sikasima busana n’embanulo. Kundi bikirirye obuhere obo Yesu ateka, bawite emighendere ey’erire embere sy’oMungu, banganamukolera omo hekalu yiwe, kandi bawite eriyiketera ly’erisyalua kutse erilama ‘okw’endererya linene [bulighe bunene].’ (Erib. 7:13-15) Enzira nguma eyo abahirirwe kw’amaghuta n’esindi mbuli bakakanganaya mw’erisima lyabo ly’eribya bakahika oko Muhindano w’Eryibuka Oluholo lwa Yesu obuli mwaka.

16. Ni ghundi mwatsi wahi wakaleka itwahika oko Muhindano w’Eryibuka Oluholo lwa Yesu?

¹⁶ Oghundi mwatsi owakaleka itwahika oko Muhindano w’Eryibuka Oluholo lwa Yesu ni busana twanzire ery’owa Yesu. Nomo twangabya n’eriyikitera lyahi omo biro ebikasa, obuli mughuma w’okw’itwe anzire erisikya ekyalayiro kino ekyo Yesu aleta omo righolo eryatsukisayamo Omuhindano w’Eryibuka Oluholo lwiwe: “Mukole mutya busana n’erinyibuka.”​—1 Kor. 11:23, 24.

17. Eryibuka Oluholo lwa Yesu likatuwatikaya liti eriyitunda hakuhi na Yehova?

¹⁷ Tukayitunda hakuhi na Yehova. (Yak. 4:8) Ngoko tulyalangira, Eryibuka Oluholo lwa Yesu likatuha akanya k’erilengekania okw’iyiketera eryo Yehova abirituha n’erilengekania buli oko lwanzo olo atukanganaya. (Yer. 29:11; 1 Yoa. 4:8-10) Tukabya twalengekania okw’iyiketera  lyetu ly’ekwenene oko biro ebikasa n’oko lwanzo oluteleghula lwa Yehova okw’itwe, tukanza Yehova yo kutsibu n’eriwatya obwira bwetu haghuma naye.​—Rom. 8:38, 39.

18. Erilengekania buli oko eky’erileberyako kya Yesu kikatukuna erikolaki?

¹⁸ Likatukuna erigha erikwama eky’erileberyako kya Yesu. (1 Pet. 2:21) Omo biro ebitangirire Omuhindano w’Eryibuka Oluholo lwa Yesu, tukayitsinga kutsibu erisoma esyohistoria esikakanaya oko biro by’omwiso-mwiso bya Yesu oko kihugho, oluholo lwiwe, n’erilubuka liwe. Neryo omo righolo ry’Eryibuka Oluholo lwa Yesu, omukania akatwibukaya olwanzo lwa Yesu okw’itwe. (Efe. 5:2; 1 Yoa. 3:16) Omughulu tukasoma ebilebirye eky’erileberyako kya Yesu ky’eriyiherera n’erilengekania kukyo ko buli, tukabya n’omuhwa w’erilendera “ngoko Kristo alendera.”​—1 Yoa. 2:6.

19. Twangasighala tuti omo lwanzo lw’oMungu?

¹⁹ Tukatsemera kutsibu erisighala omo lwazo lw’oMungu. (Yuda 20, 21) Tukayibika omo lwanzo lw’oMungu omw’ikola ekyosi ekyo twangatoka tutoke erimw’owa, eriyira erina liwe mo ribuyirire, n’eritsemesya omutima wiwe. (Emi. 27:11; Mat. 6:9; 1 Yoa. 5:3) Omuhindano w’Eryibuka Oluholo lwa Yesu akatuhira m’omuhwa w’eribyaho obuli kiro omo mibere eyangaleka itwabya nga tukabwira Yehova tuti, ‘Nanzire erisighala omo lwanzo lwaghu mo kera na kera!’

20. Ni myatsi yahi eyuwene eyikaleka itwahika oko Muhindano w’Eryibuka Oluholo lwa Yesu?

²⁰ Nomo eriyiketera lyetu lyangabya erisyikala kera na kera omo lubula kutse oko kihugho, hali emyatsi eyuwene eyikaleka itwahika oko Muhindano w’Eryibuka Oluholo lwa Yesu. Obuli mwaka omughulu tukahindana haghuma ekiro ekyo, tukibuka oluholo lw’omundu oyo twanzire kutsibu, Yesu Kristo. Ekikulu oko byosi, tukibuka aritegheko rikulu ry’olwanzo​—olwanzo olo Yehova atukanganaya omw’iha Mughala wiwe mo mbanulo. Omwaka ono, Omuhindano w’Eryibuka Oluholo lwa Yesu akendibya omo Tano, kiro 15 oMwisi 4, 2022. Twanzire Yehova na Mughala wiwe, neryo omo kiro ky’eryibukamo oluholo lwa Yesu, ekindu kyosi-kyosi sikitolere kikabya ky’omughaso munene okw’itwe kulenga eribya oko Muhindano w’Eryibuka Oluholo lwa Yesu.