YOMARA n’abaghala babo babiri, ye Marcelo na Hiver, bikere omo mulongo muke e Guatemala. Yomara mwatsuka erigha eBiblia n’Abimiri ba Yehova. Enyuma waho, abaghala babo nabo mubatsuka erigha. Aliwe habya olubanza. Abosi basatu babya ndime-time, kandi isibangatoka erisoma abihandiko by’esyondime-time. Neryo, oyo wabya akigha nabo iniakabasomera emyatsi y’erigha n’emilondo eyiri omo buli somo.

N’emihindano nayo yabya lundi lubanza. Isibangatoka eriyikolya oko mihindano kundi ikikasaba esyodakika 40 erihika oko Kisenge ky’Obwami ekiri hakuhi. Aliwe, abaghala betu b’omo ndeko mubabya bakabatwala oko mihindano yosi. N’omughulu batsuka erilabya ebipindi oko muhindano w’omo kati-kati k’eyenga, abaghala betu mubabya bakawatikyabo erihamba omo bwenge emyatsi eyiri omo bipindi byabo.

Oko Mwisi 5, 2019, emihindano muyatsuka eribya omo mulongo wabo. Abapainia babiri, omulume na mukali wiwe, babya ibabirihumira omo mulongo oyo. Mubalandamirira erikangirirya Yomara n’abaghala babo erisoma n’erihandika ebihandiko by’esyondime-time. Mubakola batya nomo nabo sibabya basibyo. Mubasonda ebitabu ebirimo ebihandiko by’esyondime-time neryo mubigha ngoko omundu angakangiriryabyo.

Omo misi mike, Yomara n’abaghala babo mubatoka erisoma ebihandiko by’esyondime-time. a Ekyo mukyabawatikya erilola embere erikula bunya-kirimu. Lino, Yomara, Marcelo, na Hiver ni bapainia b’omughulu wosi. Marcelo ni mughombe muwatikya. Banemukolera Yehova yo kutsibu biro byosi. Omuhwa wabo abiritula n’oko bandi.

Yomara, Marcelo, na Hiver bakasima kutsibu endeko busana n’eribawatikya. Yomara akabugha ati: “Eritsuka ekiro twasungana n’Abimiri ba Yehova, babiritukangania olwanzo lw’ekwenene.” Marcelo naye akabugha ati: “Omo ndeko yetu, tuwite abira abuwene. Kandi tuli omo kihanda ky’omo kihugho kyosi ekiri m’olwanzo.” Yomara n’abaghala babo bakakandira ekiro ekihugho kikendisyabya paradiso.​—Esy. 37:10, 11; Isa. 35:5.