Abalawi baghuma abatabya bahereri babya bawite esindi kasi, ng’eribya baputu kutse abalembya. Babya ibakasondolawa n’omukulu w’ehekalu. Philo, Omuyahudi mughuma oyukahandika emyatsi mwakania oko syokasi sy’abalembya abo ati: “Abaghuma b’oko [Balawi] abo ibakateghaya olukyo lw’eringiriramo, abandi omo [kibugha ky’ehekalu] embere sy’ahabuyirire batoke erikakirya oyutatolere eringira omo hekalu n’omo angabya isyasi kutse inyakakolerera. Abandi ibakakombolana eritimba-timba oko hekalu omwitungyi n’omo kiro ibanemuteya.”

Abaputu aba ibakanasabawa eriwatikya oko Sanhedrini. Ekyo kyo kyabya kitunga ky’Abayahudi kighuma kisa ekyo Abaroma balighira eribya n’ebimano by’amalwa.

Ebyo Joachim Jeremias ahandika bikakanganaya ngoko ekiro abaputu bayahamba Yesu, “Yesu mwabulyabo nga mubatamuhamba busanaki ekiro abya omo hekalu akakangirirya. (Mat. 26:55) Abaputu ko batabya bakakolera oko hekalu, Yesu syangabulirye eribulyo eryo.” Omuhandiki mughumerera oyo akalengekanaya ati abalembya abatumawa eriyahamba Yesu embere syaho, nabo babya baputu ababya bakateya ehekalu. (Yoa. 7:32, 45, 46) Enyuma syaho, eSanhedrini muyatuma omukulu w’ehekalu haghuma n’abaputu balebe eriyaleta abakwenda ba Yesu oko Sanhedrini. Kandi, alinga bo bakurira omukwenda Paulo eyihya y’ehekalu.—Emib. 4:1-3; 5:17-27; 21:27-30.