Jack na Marie-Line babirikolera haghuma omo mubírí w’omughulu wosi eritsuka omwaka 1988. Kusangwa basibwe ngoko bakabeghera luba emibere eyo bakahindana nayo, babiriligha eritumwa kangyi-kangyi eriyakolera omo Guadeloupe n’omo Guyane française. Lino ebihugho bibiri ebyo biri omo busondoli bw’ebetheli ye France. Leka tubulaye Jack na Marie-Line amabulyo malebe.

Ni kyahi ekyabahira mw’omuhwa w’eringira omo mubírí w’omughulu wosi?

Marie-Line: Omughulu nabya inikine mulere e Guadeloupe, kangyi-kangyi ingatulira na mama waghe eritsuka omo tututu erihika omwigholo. Mama abya Mwimiri wa Yehova oy’uwite omuhwa munene. Nianzire abandu, neryo nabere nabugha akalasi, omo mwaka 1985, munatsuka obupainia.

Jack: Omughulu nabya inikine mulere, ingasiba n’abalikyetu abali omo mubírí w’omughulu wosi abanzire omubírí w’eritulira. Ingakola obupainia bw’obuwatikya omughulu tuli omo konze. Ebiro by’eposo n’ebye Yenga, ihakanayira itwaghenda omo mutoka eriyatulira n’abandi bapainia omo biharo byabo. Itukatulira eritsuka omo tututu erihika omwigholo—neryo itwaya yitsemesya oko ngetse. Ebiro ebyo, itukatsema kundu!

Biro bike nabitahya Marie-Line omo mwaka 1988, munayibwira nyiti, ‛Situwite ebikatukakiraya, busanaki sitwangakola bingyi omo mubírí wetu w’eritulira?’ Naghe munabya mupainia nga Marie-Line. Enyuma w’omwaka mughuma, twabilua oko kalasi k’abapainia, mutwasombolwa eribya bapainia b’embaghane. Mutwatumwa omo biharo mbiriri-mbiriri e Guadeloupe embere sy’eritumwa omo Guyane française.

Mwabiritumwa omo biharo bingyi emyaka eyalaba. Ni kyahi ekyabiribawatikya eribeghera emibere mihya-mihya eyo mukahindana nayo?

Marie-Line: Abaghala betu oko Betheli ye Guyane française babya ibanasi ngoko erisako eryo twanzire kutsibu ni Isaya 6:8. Neryo ibakabya batubirikira, ibakatsuka omw’itsanga netu bati, “Mun’ibukire erisako lyenyu eryo mwanzire kutsibu?” Itukalutwaminya kandi ngoko tukatumawa ehandi, neryo itwabugha tuti, “Itwe ba Bano! Mututume!”

Isitulilinganisaya omubírí wetu muhya-muhya n’owa kera kundi ikyanganaleka itwatatsemera  omubírí owo bamatuha. Kandi itukayikasa eriyira abaghala n’abali betu mo bira betu.

Jack: Kera, abira betu ibakanasonda eritukakirya erihuma kundi banzire bati tusighale nabo. Aliwe twabere twalua e Guadeloupe, mughala wetu mughuma mwatw’ibukya ebinywa bya Yesu ebiri omo Matayo 13:38: “Eririma ky’ekihugho.” Neryo tukabya twatumwa ehandi, tukibuka ngoko tukine omw’irima lighumerera, ehosi-hosi aho twangabya ituli. Eky’omughaso munene b’abandu n’ekiharo!

Omughulu tukahika omo kiharo kihya-kihya, tukalangira ngoko abandi abaliyo banatsemire. Neryo tukayikasa eribya ng’ibo. Ebyalya byanganabya ebyo tutabeghere, aliwe tukalya ebyo bakalya kandi itwanywa ebyo bakanywa, n’eriyiteya oko makoni. Tukayikasa eritendibugha muhanda oko mubírí wosi-wosi owo tukahabawa.

Marie-Line: Kandi tukigha bingyi oko balikyetu ab’eyo twamahika. Ng’ibuka ekyabya twabere twahika omo Guyane française. Embula yabya iyinemuwa kutsibu, neryo mutwalengekania tuti tukendiyatulira yabikya. Aliwe mwali wetu mwanibulya ati, “Tunemwendiyatulira?” Munasweka, namamubulya niti, “Tuti?” Mwabugha ati, “Imaya omwavuli waghu, tughende oko binga byetu.” Neryo mun’igha erighendya ekinga omo byala bighuma ininayiswikire omwavuli omo bindi. Ko nitigha ekyo, sinangabere ngayatulira omo biro by’embula!

Mwabirihuma nga ngendo 15. Munawite ebyo mwangabwira abandi oko mwatsi w’erihuma?

Marie-Line: Erihuma linawite amaligho walyo. Ukanza uti ngambe iwabana enyumba eyo wangayowamo buholo omughulu ukalua omw’itulira.

Jack: Nibeghere eritasyahira erangyi omo nyumba eyo twamahumiramo. Baghala betu b’oko betheli bamabya ibanasi ngoko sitwendibyamo biro bingyi, ihakanayira endambi ibatsanga naghe bati, “Jack, lero isiwahira omo nyumba eyo mw’eyindi rangyi!”

Marie-Line abiriminya ndeke erisenga ebindu! Akahira ebindu omo hisanduku n’erihandika kuhyo ati “eby’ekinabiro,” “eby’ekati,” “eby’omo mafika,” n’ebindi. Neryo tukabya twahika eyo tukaya, kik’oloba eriminya aho obuli kindu kitolere eribya. Akahandika obuli kindu ekiri omo buli kasanduku tutoke eribana ekyo tulaghireko.

Marie-Line: Kundi twabirigha eritondeka emyatsi yo ndeke, kikatwanguhira eritsuka omubírí w’eritulira.

 Mukateghekanaya endambi yenyu yo muti mutoke ‘eriberererya ndeke omubírí wenyu w’eritulira’?—2 Tim. 4:5.

Marie-Line: Tukaluhuka omo kiro kye Kwanza n’eriteghekania emihindano. Eritsuka omo kiro ky’Akabiri, tukaya omo mubírí w’eritulira.

Jack: N’omo tusabirwe erilabya esyosaha silebe omwitulira obuli Mwisi, situlitulira busana n’esyosaha. Eky’omughaso munene omo ngebe yetu ly’eritulira. Tukatsuka omubírí w’eritulira tukanalua eka erihika aho tukendisubira eka.

Marie-Line: Omughulu tukaghenda oko picnic, ngaghenda n’esyotrakte. Abandu balebe bakasa aho tuli n’eritusaba ebitabu, n’omo sitwetababwira ngoko tuli Bimiri ba Yehova. Busana n’ekyo tukayiteghaya oko myambalire n’emibere yetu. Abandu bakalangira ebindu ng’ebyo.

Jack: Kandi tukatulira omwibya bakalani babuya. Ngabiraya ebipapuro ebiri omo butala n’erikuma-kuma ebiti ebikatoghonga n’eryutabyo oko kyabu. Abo tuhimbire nabo bakalangira ekyo kandi ihakanayira ibatubulya bati, “Mwangananzondera eBiblia?”

Kangyi-kangyi imukatulira omo biharo by’ehali. Ni mwatsi wahi owo mwalabamo owo mutemwangibirirwa?

Jack: Omo Guyana, si ky’olobire erihika omo biharo bilebe. Kangyi-kangyi itukaghenda ebilometre 600 oko yenga nguma kandi omo syondaki esituwene. Sitwendisyibirirwa ekiro twabungira omo mulongo we St. Élie, omo musitu we Amazon. Mutwabugha esyosaha nyingyi erisala twahikayo, mutwaghenda omo mutoka owakalaba n’ahate endaki eyitulire (4x4) n’omo bwato obukatibita kutsibu. Abandu bangyi b’eyo ini batakuli b’ehoro. Erikangania erisima lyabo busana n’ebitabu byetu, abandi mubatuha ehihande hy’ehoro bakawatikya omubírí wetu! Omw’igholo-gholo, mutwabakangania enguma y’oko syovideo sy’endondeko ya Yehova. Abangyi mubalebyayo.

Marie-Line: Lino-lino, Jack mwasabirwe eriyalabya omukania w’Eryibuka oluholo lwa Yesu omo mulongo we Camopi. Erihikayo, mutwabugha esyosaha ini omo bwato b’omotere oko Lusi Oyapock. Mutwatsemera omughulu oyo wo kutsibu.

Jack: Ikikalire erilaba aho amaghetse akaghenda luba-luba, abandu ibanganasisira ibahika omo kisalala. Kwenene, ikikatsemesaya erilangira ebisalala. Kyabya kitolere oyukaghendaya obwato inyaminya erilaba aho amaghetse akaghenda luba-luba. Aliwe mutwatsema erilangira aho amaghetse akaghenda luba-luba. Nikwa oko bandu nga 50 abahika oko muhindano w’Eryibuka oluholo lwa Yesu, abandu 6 basa bo babya Bimiri ba Yehova, imune n’Abaamerika-bahindi!

Marie-Line: Abakiri balwana bamayitsinga erikola bingyi omo mubírí wa Yehova banganayilangirira oko myatsi mibuya ng’eyi. Omughulu uli omo mibere ng’eyo ukayiketera Yehova, n’erikirirya lyaghu likawata. Tukayilangirira obuwatikya bwa Yehova mughulu mungyi.

Mwabirigha emibughe mingyi. Kinolobire okw’inywe erigha emibughe?

Jack: Iyehe! Munigha emibughe eyo kundi kyabya kitolere. Nabya ingasondola Akaleberyo k’Omuteya omo Sranantongo * nibya isindinatalabya n’ekitsweka ky’obusomi bwe Biblia! Munabulya omughala wetu mughuma nga mubakan’owa ebyo nilue ngabugha. Mwabugha ati, “Muhakanabya ebinywa bilebe ebyo tutalyowa, aliwe muwukasondola ndeke.” Abana mubaniwatikya kutsibu. Nanabya nataluka eribugha ndeke abana ibakanibwira, aliwe abakulu isibalinibwira kindu. Abana mubaleka in’igha bingyi.

Marie-Line: Omo kiharo kighuma, ingasondala amafunzo omo Kifaranza, Ekiportigale, n’omo Sranantongo. Mwali wetu mughuma mwambwira ati nibye ngatsuka erisondola abigha ab’omubughe ogho nitasi ndeke neryo inabughira oko ab’omubughe ogho niasi ndeke. Munalangira ngoko erihano eryo ni ry’amenge.

Kiro kighuma, nabya n’amafunzo w’erisondola, enguma omo Sranantongo n’eyindi omo Kiportigale. Nabere natsuka erisondola efunzo y’akabiri,  mwali wetu oyo nabya naye mwabugha ati, “Marie-Line, alinga hane omwatsi owateghendeka!” Munaminya ngoko nandimukania n’omukali we Brezil omo Sranantongo omo mwanya w’erikania naye omo Kiportigale!

Tunasi ngoko abandu b’eyo mwabirikolera babanzire kutsibu. Mumwatoka muti eribya n’obwira obuwene n’abalikyetu?

Jack: Erisako ly’ Emisyo 11:25 likabugha liti: “Omutima [w’erihitya] asyanenehibwa.” Tukasiba n’abandi n’eribawatikya. Okw’isugha Ekisenge ky’Obwami, abalikyetu balebe ibakanibwira bati: “Lekera ekyo ky’abatuliri.” Aliwe naghe ngasubiraya niti: “Naghe niri mutuliri. Neryo hamabya omubírí w’erikola, naghe ng’anza erikola kugho.” N’omo hakanabya endambi obuli mundu inianza eribya iyuwene, tubeghere eriyibukya ngoko ekyo sikitolere eritukakirya erikolera abandi b’ebibuya.

Marie-Line: Tukayikasa erikangania abaghala n’abali betu ngoko tubatsomene. Omo nzira eyo, itukaminya omughulu bamalagha oko mundu oyo wangabawatikya erilembera abana babo kutse eriyendabo oko kalasi. Neryo tukateghekanaya endambi yetu yo ndeke tutoke eriwatikya. Omo nzira eyi, tukabya n’obwira obuwene haghuma n’abandi, itwabya itunayiteghekire eribawatikya omughulu bamalagha oko buwatikya.

Ni miyisa yahi eyo mwabiribana busana n’erikolera eyiri obwagha bungyi?

Jack: Omubírí w’omughulu wosi abirituletera obutseme. Twabiribana akanya k’erilangira ebihangikwa bya Yehova bingyi. N’omo hanabya emyatsi milebe eyikalire, tuwite emitima eyitekene kundi tunasi ngoko tunawite obuwatikya bw’abandu b’oMungu ehosi eyo twangabya.

Inikine mulwana, omo Mwisi 7, 1981 munahirwa omo ngomo omo Guyane française busana n’eritendibya oko luhande lulebe omo myatsi y’ekipolitike. Isindilengekanaya ngoko hane ekiro ngendisyasubayo ng’omumisyonere n’eritoka erikola akasi k’eribya ngayabana abali omo ngomo. Oko kwenene, Yehova ni mwenge, abiritutsumula kutsibu!

Marie-Line: Ekyo ngatsemera kutsibu ly’erikolera abandi. Tutsemire eribya omo mubírí wa Yehova. Kandi kyabirileka itwabya n’endwa eyuwene. Hakanabya endambi, Jack inyabugha ati tukokaye mughala wetu n’omukali wiwe ababunikire mutima erirya haghuma netu. Kangyi-kangyi ingasubiraya niti, “Naghe, ekyo kyo ninalwe ngalengekaniako!” Itukasisira itwabirilengekania kighuma.

Jack: Lino-lino, mubalangire omo mubiri waghe mw’akasere k’eprostate. N’omo Marie-Line syalyanza eriowa ekyo, ngamubwira niti: “Mwanzwa waghe, namabihola omungya, ‘inamahola luba basi.’ Aliwe ingendibya inamahola ndeke, ininasi ngoko munakolera Yehova omo ngebe yaghe yosi, kandi ekyo kikaleka inatsema.”—Enz. 25:8.

Marie-Line: Yehova abirituha emibírí mingyi n’erituwatikya erikola ebyo tutabya tukalengekania tuti twanganatoka. Twabiribana ebibuya bingyi omo ngebe yetu. Busana n’eriyiketera Yehova, ehosi aho endondeko yiwe yasyatusaba eriya, ho tunemwendisyaya!