OMWATSI W’ERIGHA 10
Olwanzo oko Yehova n’erikangania erisima bikendikukuna eribatisibwa
“Ekyanganikakirya eribatisibwa ni kyahi kwehi?”—EMIB. 8:36.
OLWIMBO 37 Erikolera Yehova n’omutima wosi
EBIKENDIKANIBWAKO *
1-2. Ngoko kiri omo Emibiri 8:27-31, 35-38, ekyakuna Omunya-Etiopia eribatisibwa niki?
UNANZIRE eribatisibwa n’eribya mwigha wa Kristo? Olwanzo n’erikangania erisima byabirikuna abandu bangyi erikola batya. Tulebaye eky’erileberyako ky’omukulu mughuma oyo abya akakolera omwami-mukali owe Etiopia.
2 Omunya-Etiopia oyu abere abigha omo Masako ngoko atolere eribatisibwa, mwaluniabatisibwa. (Soma Emibiri 8:27-31, 35-38.) Ekyamukuna niki? Alinga mwatsemera emyatsi eyo abya akasoma omo Kinywa ky’oMungu; kundi abya akasoma emilondo milebe omo kitabu kya Isaya inyanemughenda omo kigari kiwe. Neryo Filipo abere abikania naye, Omunya-Etiopia mwasima kutsibu abilangira ebyo Yesu abirikola busana naye. Nikwa, ekyaleka Omunya-Etiopia oyu inyaghenda e Yerusalema niki? Ni busana, abya iniabiritsuka erikangania olwanzo oko Yehova. Tukaminya ekyo kyo tuti? Abya iniabiritsuka eriramya Yehova e Yerusalama. Alinga abya iniabirileka ekisomo ekyabyamo, neryo iniabiringira omo kihanda kighuma kisa ekyabya ikyabirihererwa oko Mungu w’ekwenene. Kundi abya anzire Yehova, mwayisogha eritwa ekindi kika ky’omughaso ekyo, eky’eribatisibwa n’eribya mwigha wa Kristo.—Mat. 28:19.
3. Ekyangakakirya omundu eribatisibwa ni kyahi? (Lebaya akasanduku “ Omutima waghu asosire ekitaka ky’omuhanda wahi?”)
3 Eryanza Yehova lyanganakukuna eribatisibwa. Aliwe kandi, olwanzo lwanganakukakirya erikola utya. Luti? Lengekanaya oko eby’erileberyako ebi. Wangananza abandu b’omo kihanda kyaghu n’abira baghu abatikirirye bo kutsibu, neryo wanganasagha uti wamabibatisibwa ibakendikupona. (Mat. 10:37) Kutse wangananza emitsye milebe eyo unasi ngoko oMungu aponire, neryo wanganalangira nga kikalire eriyihighula oko mitsye eyo. (Esyo. 97:10) Kutse wanganabya imuwakula omwibuka ebiro bikulu by’ebisomo by’amabehi. Wanganabya iwukinanzire emyatsi eyo mwabya mukakola kera omo biro bikulu ebyo. Ekyo, kyanganaleka iwalangira nga kikalire eritendikwama emitsye kutse esyodesturi esyo Yehova aponire. (1 Kor. 10:20, 21) Neryo litolere iwayibulya: “Nindi kutse ni kyahi kyo nianzire kutsibu?”
OYO LITOLERE ITWANZA KUTSIBU
4. Eky’omughaso munene kutsibu ekitolere erikukuna eribatisibwa ni kyahi?
4 Uwite emyatsi mingyi eyuwene eyo wanganza n’eyangaleka iwakangania erisima. Eky’erileberyako, nibya embere utsuke erigha n’aBimiri ba Yehova, kwa muhwa wabya iwabirianza eBiblia yo kutsibu. Kandi alinga wabya iwabiribya n’olwanzo oko Yesu. Neryo lino kundi wabiriminya aBimiri ba Yehova, wangananza erilabya endambi haghuma nabo. Aliwe eryanza emyatsi eyuwene ng’eyo sibughambu kikendilukyakukuna eriyiherera oko Yehova n’eribatisibwa. Eky’omughaso munene kutsibu ekitolere erikukuna eribatisibwa l’olwanzo lwaghu oko Yehova. Wamabyanza Yehova kulenga ebindi bindu byosi, siwangaligha ekindi kindu kutse oghundi mundu akukakiraye erimukolera. Olwanzo oko Yehova lukendikukuna eribarisibwa kandi lukendikuwatikya erisighala mutaleghula okw’iye wabibatisibwa.
5. Tukendikania oko mabulyo wahi?
5 Yesu mwabugha ati tutolere itwanza Yehova n’omutima wetu wosi, n’enafsi yetu yosi, n’obulengekania bwetu bosi, n’amaka wetu wosi. (Mar. 12:30) Wangatoka eryanza n’erisikya Yehova yo kutsibu utya wuti? Erilengekania oko lwanzo lunene olo Yehova awite okw’itwe kikenditukuna erimwanza. (1 Yoa. 4:19) Omundu abibya n’olwanzo oko Yehova, ni yindi myatsi yahi eyo atolere erikola? *
6. Ngoko kiri omo Abanya Roma 1:20, ni nzira nguma yahi eyangakuwatikya erigha oko Yehova?
6 Wighe oko Yehova erilabira ebihangyikwa biwe. (Soma Abanya Roma 1:20; Erib. 4:11) Lengekanaya buli oko miti n’esyonyama ebyo Yehova ahangyika n’erilangira ngoko bikakanganaya kw’awite amenge. Lengekanaya hake ngoko omubiri waghu abumbire omo nzira ey’eriswekya kundu. (Esyo. 139:14) Lengekanaya n’oko kaghala ako Yehova ahira omo lyuba lyetu, aliwe uminye ngoko elyuba ni ngununu nguma nyisa y’oko syomiliare sy’esyongununu. * (Isa. 40:26) Wamalengekania oko bihangyikwa bya Yehova, ekyo kikendikukuna erimusikya kutsibu. Aliwe, eriminya ngoko Yehova awite amenge n’akaghala kanene ni mwatsi mughuma w’oko myatsi mingyi eyangakuwatikya eritsuka obwira naye. Erikulya olwanzo lwaghu oko Yehova n’eribya mwira wiwe, litolere iwaminya eyindi myatsi okw’iye.
7. Eryanza Yehova yo kutsibu, litolere iwaligha mwatsi wahi?
7 Litore iwikirirya ngoko Yehova akwanzire kwenene. Kikanakukalako eriligha ngoko Omuhangyiki w’olubula n’ekihugho anasi k’uneho kandi kw’akutsomene? Byamabya bitya, w’ibuke ngoko Yehova “syali hali oko buli mughuma w’okw’itwe.” (Emib. 17:26-28) Yehova “[akalebaya] omo mitima yosi,” kandi ngoko Dawidi abwira Solomono, akakulagha ati “wamamusonda-sonda, asyabanika okw’iwe.” (1 Emy. 28:9) Kwenene, uk’igha eBiblia yo lino kundi, ngoko Yehova akabugha, ‘nabirikuleta okw’ingye.’ (Yer. 31:3) Wamaminya ndeke emyatsi eyo Yehova abirikukolera, olwanzo lwaghu okw’iye nalo ilukendiwata.
8. Wangakangania wuti erisima lyaghu busana n’olwanzo lwa Yehova?
8 Enzira nguma eyo twangakanganiryamo erisima lyetu oko Yehova ry’erikania naye omo musabe. Olwanzo lwaghu oko Yehova lukendikula wamabya ukamubwira ebikakuhanga-hangaya n’erimusima busana n’ebyo akakukolera. Kandi erilangira ngoko Yehova akasubiraya oko misabe yaghu kikendiwatya obwira bwaghu naye. (Esyo. 116:1) Ekyo kikendileka iwikirirya ngoko akakuhulikirira. Aliwe, eribya mwira wa Yehova litolere iwaminya ng’akalangira emyatsi y’ati. Kandi litolore iwaminya ebyo anzire iwakola. Enzira nguma nyisa eyangakuwatikya eriminya ebyo, ry’erigha eKinywa kiwe, eBiblia.
Enzira eyuwene eyangatuwatikya eriyitunda hakuhi n’oMungu n’eriminya ekyo anzire itwakola ry’erigha eBiblia (Lebaya enungu 9) *
9. Wangakangania wuti ngoko wanzire eBiblia?
9 Wighe eryanza eKinywa ky’oMungu, eBiblia. EBiblia nyisa yo yiri mw’ekwenene oko Yehova n’erisonda liwe okw’iwe. Ukakanganaya ngoko wanzire eBiblia omwisomayo biro byosi, omwiteghekania ebyo mukendigha n’oyukakwighisaya eBiblia, n’erikolesya ebyosi ebyo ukigha. (Esyo. 119:97, 99; Yoa. 17:17) Unawite eprograme y’erisoma eBiblia iwuwene? Ukanakwamayo ndeke omwisoma eBiblia obuli kiro?
10. Ni kindi kyahi ekikaleka eBiblia iyabya y’omughaso munene?
10 Ekindi ekikaleka eBiblia iyabya y’omughaso munene ni busana yirimo emyatsi eyakanibawa n’abandu abayilangirira Yesu. Kyo kitabu kighuma kisa ekikabugha ekwenene oko myatsi eyo Yesu akukolera. Omughulu ukigha ebyo Yesu abugha n’ebyo akola, ekyo kyanganakukuna erisonda eribya mwira wiwe.
11. Ekyangakuwatikya eryanza Yehova niki?
11 Wighe eryanza Yesu, neryo olwanzo lwaghu oko Yehova lukendikula. Busanaki? Kundi Yesu mwakangania omo nzira eyihikahikene emibere ya Thatha wiwe. (Yoa. 14:9) Busana n’ekyo, wamigha emyatsi mingyi oko Yesu, iwukendiminya Yehova yo ndeke n’erimwanza. Lengekanaya ngoko Yesu abya akakwira obulighe abera, abakoni, n’abateyitoka; abandu ababya baghonerwe n’abandi. Kandi, lengekanaya oko mahano awatolere awo akakuha kandi ngoko amaisa waghu akabya ndeke wamakwama amahano ayo.—Mat. 5:1-11; 7:24-27.
12. Omughulu ukigha ebyo Yesu akukolera, ekyo kyanganakukuna erikolaki?
12 Olwanzo lwaghu oko Yesu lwanganakula omughulu ukalengekanaya kutsibu oko mwatsi owo Yesu akola amalolo wetu atoke erighanyirwa. (Mat. 20:28) Eriminya ngoko Yesu mwaligha erihola busana nawe, ekyo kyanganakukuna eribindula omutima n’erisaba obughanyiri bwa Yehova. (Emib. 3:19, 20; 1 Yoa. 1:9) Wamayikasa eryanza Yesu na Yehova, kwenene iwukendyanza eribya n’abandu abanzirebo.
13. Yehova abirikuhaki?
13 Wighe eryanza abandu abanzire Yehova. Abandu b’omo kihanda kyaghu n’abira baghu ba kera abatikirirye banganayibulya busanaki ukasonda eriyiherera oko Yehova. Nibya banganakughania erikola utya. Yehova akendikuwatikya; akendikuha ekihanda ky’abaghala n’abali betu b’omo ndeko. Wamasighala hakuhi n’ekihanda ky’obunya-kirimu ekyo, iwukendibana olwanzo n’obuwatikya obo ulaghireko. (Mar. 10:29, 30; Ebr. 10:24, 25) Endambi yanganahika, abandu b’omo kihanda kyaghu nabo ibatsuka eriramya Yehova haghuma nawe n’erisikya esyokanuni siwe.—1 Pet. 2:12.
14. Ngoko kiri omo 1 Yoana 5:3, wabiriyilangiriraki oko byalayiro bya Yehova?
14 Wighe erisikya n’erikolesya esyokanuni sya Yehova. Embere uminye Yehova, alinga wabya iwukaghendera oko byalayiro ebyo wanzire, aliwe lino ukalangira ngoko kyowene erighendera oko byalayiro by’oMungu. (Esyo. 1:1-3; soma 1 Yoane 5:3.) Terilengekania oko mahano awo eBiblia ikaha abalume, abakali, ababuti n’abana. (Efe. 5:22–6:4) Ekihanda kyaghu kyanabiribana obutseme busana n’erikolesya amahano ayo? Erikwama obusondoli bwa Yehova obulebirye erisombola abira bo ndeke, ekyo kyanabirikuwatikya eryuwania emibere yaghu? Une n’obutseme omo ngebe yaghu? (Emib. 13:20; 1 Kor. 15:33) Alinga wanganasubirya uti inga oko mabulyo ayo.
15. Wangakolaki wamabya iwulaghire oko buwatikya utoke erikolesya esyokanuni sy’eBiblia?
15 Oko kandi katambi, wangalangira nga kikalire eriminya ngoko wangakolesya esyokanuni sy’eBiblia esyo ukigha. Ekyo kyo kikaleka Yehova inyakolesya endondeko yiwe erikuha ebichapo ebiseghemere oko Biblia ebyangakuwatikya eriminya ekibi n’ekibuya. (Ebr. 5:13, 14) Omughulu ukasoma n’erigha ebichapo ebyo, ukalangira ngoko bikawatikaya kandi ngoko bitolere kundu, neryo wangananza eriyitunda hakuhi n’endondeko ya Yehova.
16. Yehova abiritondeka abandu biwe b’ati?
16 Wighe eryanza n’eriwatikya endondeko ya Yehova. Yehova abiritondeka abandu biwe omo syondeko; Mughala wiwe Yesu, yo Mutwe w’esyondeko syosi. (Efe. 1:22; 5:23) Yesu abirihiraho akatunga kake k’abalume abahirirwe kw’amaghuta basondole omubírí owo anzire inyakolwa lino. Yesu mwahula akatunga k’abalume ako mo “mugombe mutalegula n’ow’amenge,” kandi bakakola n’omuhwa omubírí wabo batoke erikuwatikya eriyitunda hakuhi n’oMungu n’erikuteya bunya-kirimu. (Mat. 24:45-47) Enzira nguma eyo omughome mutaleghula akakolesaya erikuteya ry’erihiraho abasyakulu b’endeko abatolere. Banganakusondola n’erikuteya. (Isa. 32:1, 2; Ebr. 13:17; 1 Pet. 5:2, 3) Abasyakulu banzire erikola ekyosi ekyo bangatoka erikusubya mutima omonda, n’erikuwatikya ulole embere eriyitunda hakuhi na Yehova. Aliwe, ekindi kindu ky’omughaso munene ekyo bangakukolera ry’erikuwatikya erikangirirya abandi baminye Yehova.—Efe. 4:11-13.
17. Ngoko kikanganibwe omo Abanya Roma 10:10, 13, 14, ekikaleka itwakangirirya abandi eriminya Yehova niki?
17 Watikaya abandi bighe eryanza Yehova. Yesu mwabwira abigha biwe ati bakangiriraye abandi eriminya Yehova. (Mat. 28:19, 20) Twanganakwama erihano eryo kusangwa tusabirwe erikola tutya. Aliwe, omughulu olwanzo lwetu oko Yehova lukakula, twanganayowa nga Petero na Yoane, ababugha bati: “Sitwangatoka erileka eribuga ebyo twabirilolako n’ebyo twabiriowa.” (Emib. 4:20) Twamawatikya omundu eriminya Yehova kikatuletera obutseme bunene. Terilengekania obutseme obo Filipo abya nabo abere abiwatikya omunya-Etiopia eriminya ekwenene eyiri omo Masako n’eribatisibwa! Omughulu ukakola nga Filipo n’erikwama erihano rya Yesu erikatusaba eritulira, ukakanganaya ngoko wanzire eribya mughuma w’oko Bimiri ba Yehova. (Soma Abanya Roma 10:10, 13, 14.) Neryo, alinga naghu iwanganayibulya ng’omunya-Etiopia uti: “Ekyanganikakirya eribatisibwa ni kyahi kwehi?”—Emib. 8:36.
18. Tukendisyakania okuki omo mwatsi owakwamire?
18 Ukendisyatwa ekika ky’omughaso munene omo ngebe yaghu omughulu ukasyayisogha eribatisibwa. Kundi ekyo ni kika ky’omughaso munene, litolere iwalengekana kutsibu oko mwatsi oyo. Utolere iwaminyaki oko lubatiso? Utolere iwakolaki embere n’enyuma sy’eribatisibwa? Tukendisubirya oko mabulyo ayo omo mwatsi owakwamire.
OLWIMBO 2 Erina lyaghu ni Yehova
^ par. 5 Abandu balebe abanzire Yehova bakayibulaya nga banatolere eribatisibwa n’eribya Bimiri ba Yehova. Naghu wamabya iwukanayibulaya utya, omwatsi ono akendikuwatikya eritasyalengekania oko myatsi milebe eyo wangakola eyangakuwatikya eribatisibwa.
^ par. 5 Obuli mundu awite ngoko ali, okw’ekyo, abandi banganakolesya ebiri omo mwatsi ono butsira erikwama ngoko bitondekire hano.
^ par. 6 Eriminya eyindi myatsi mingyi, lebaya ebroshua Uhai—Ulitokana na Muumba? n’ebroshua Maswali Matano Muhimu Kuhusu Chanzo cha Uhai.
^ par. 61 ERIKANIA OKO PITSA: Mwali wetu amaha e trakte y’omumbesa oyo amahindana naye akaghula ebindu.
