1. Embere omundu atsuke erihimba enyumba, litolere iniakolaki?

TERILENGEKANIA oko mundu oyukasonda erihimba enyumba. Anasi ndeke omuhanda w’enyumba eyo anzire erihimba. Anemwendiluniayaghula ebindu ebyo alaghireko n’eritsuka obuhimbe? Iyehe. Embere atsuke, hane omwatsi w’omughaso owo atolere inyakola. Litolere inyaminya esyofranga esyo enyumba yiwe ikendisaba. Busanaki? Kundi anzire eriminya ng’anawite esyofranga esyangabugha enyumba eyo. Amabitsuka eriminya ndeke esyofranga esy’angusulya enyumba eyo, inyanganabugha obuhimbe by’enyumba yiwe.

2. Ngoko kiri omo Luka 14:27-30, embere sy’eribatisibwa, litolere iwalengekania kutsibu okuki?

² Olwanzo lwaghu oko Yehova n’erimukangania erisima byanabiritsuka erikukuna erilengekania okw’ibatisibwa? Kyamabya kitya, utolere iwakola ng’omulume oyukasonda erihimba enyumba. Tukabugha tutya busanaki? Tulebaye ebinywa bya Yesu ebiri omo Luka 14:27-30. (Soma.) Yesu abya akakania oko ebyo omundu atolere erikola imwabya mwigha wiwe. Twamanza eribya bigha biwe, litolere itwayiyinia omo myatsi milebe eyikalire n’erileka erikola ebindu bilebe. (Luka 9:23-26; 12:51-53) Busana n’ekyo, embere sy’eribatisibwa, litolere iwalengekania kutsibu oko myatsi eyangakuhikira enyuma sy’eribatisibwa. Aho, ukendibya iwamabiyiteghekania ndeke erikolera oMungu butaleghula wabibya Mukristo oyubatisibwe.

3. Tukendikania okuki omo mwatsi ono?

³ Kinatolere eribya mwigha wa Kristo oyubatisibwe? Inga! Olubatiso lukatuha akanya k’eribana emiyisa minene lino, n’omo biro ebikasa. Tukanaye oko mabulyo malebe w’omughaso awalebirye olubatiso. Erikola tutya likendikuwatikya erisubirya oko libulyo, “Ninatolere eribatisibwa”

4. (a) Eriyiherera ni bughambuki? (b) Ngoko kiri omo Matayo 16:24, omundu ‘eriyighana’ iyuwenewene ni bughambuki?

⁴ Eriyiherera ni bughambuki? Embere sy’eribatisibwa, litolere iwayiherera. Omughulu ukayiherera, ukasaba Yehova erilua oko mutima n’erimubwira uti ukendikolesya engebe yaghu erimukolera kera na kera. Omughulu ukayiherera oko Mungu, ‘ukayighana’ iwuwenewene. (Soma Matayo 16:24.) Aho ukabya iwamabibya wa Yehova, kandi olo ni lusunzo lunene. (Rom. 14:8) Ukamubwira ngoko eritsuka ekiro ekyo, omwatsi w’omughaso omo ngebe yaghu akendibya erimukolera butsira erikola ebyo wanzire. Eriyiherera lyaghu ni ndaghane eyo ukalagha oMungu. Yehova syalitukuna erikola endaghane eyo. Aliwe twabikola endaghane eyo, akatusaba eriberereryayo.​—Esyo. 116:12, 14.

5. Eriyiherera n’eribatisibwa bisighene biti?

⁵ Eriyiherera n’eribatisibwa bisighene biti? Eriyiherera lyaghu ni mwatsi waghu iwe musa na Yehova. Aliwe, olubatiso lukakolawa embere sy’abandu, kangyi-kangyi oko mihindano minene-minene. Omughulu ukabatisibawa, ukakanganaya abandi ngoko wabiriyiherera oko Yehova. * Kwesi, olubatiso lwaghu lukaleka abandi ibaminya ngoko wanzire Yehova n’omutima waghu wosi, n’enafsi yaghu yosi, n’obulengekania bwaghu bosi, n’akaghala kaghu kosi, kandi ngoko wabiriyisogha kundu erimukolera kera na kera.​—Mar. 12:30.

6-7. Ngoko kisakire omo 1 Petero 3:18-22, ni myatsi ibiri yahi eyikakanganaya ngoko olubatiso ni lw’omughaso munene?

⁶ Kwenene, nina ky’omughaso eribatisibwa? Terilengekania oko binywa ebiri omo 1 Petero 3:18-22. (Soma.) Obwato mubwakangania abandu ngoko yo Noa abya n’erikirirya oko Mungu, kutya olubatiso lwaghu lukakanganaya abandu ngoko wabiriyiherera oko Yehova. Nikwa, kwenene nina ky’omughaso eribatisibwa? Inga! Petero mwakangania ekikaleka olubatiso ilwabya lw’omughaso. Eky’erimbere, busana “n’erilama lyenyu.” Olubatiso lwanganatulamya twamabikangania omo mikolere yetu ngoko twikirirye Yesu, n’erikirirya ngoko mwahola busana netu, mwalubukibwa n’eriya elubula, kandi lino ikere oko ‘luhande lwa mali lw’oMungu.’

⁷ Eky’akabiri, olubatiso lukaleka iwabya “n’obunya-mutima obuwene.” Omughulu tukayiherera oko Mungu n’eribatisibwa, tukatsuka obwira bw’omughaso munene haghuma naye. Kundi twabiribindula emitima yetu n’erikiriya endihi eyikabohola kutse embanulo, oMungu akatughanyira amalolo wetu. Neryo twanganayira obunya-mutima obuwene embere siwe.

8. Enzumwa ngulu eyitolere erikukuna eribatisibwa ni yahi?

⁸ Enzumwa ngulu eyitolere erikukuna eribatisibwa ni yahi? Kundi ukigha eBiblia yo kutsibu, wabiriminya emyatsi mingyi oko Yehova, ngoko ali kandi ngoko akalangira emyatsi. Ebyo wabirigha okw’iye mubyatula oko mutima waghu n’erikukuna erimwanza kutsibu. Enzumwa ngulu eyitolere erikukuna eribatisibwa, l’olwanzo lwaghu oko Yehova.

9. Ngoko kiri omo Matayo 28:19, 20, eribatisibwa omo lina ly’Ise n’ery’oMughala n’ery’ekirimu kibuyurire ni bughambuki?

⁹ Ekindi ekyangakukuna eribatisibwa y’emyatsi eyo wabirigha oko Biblia na lino unikiriryeyo. Lebaya ekyo Yesu abugha omughulu ahiraho ekyalayiro ky’eriyira abigha. (Soma Matayo 28:19, 20.) Ngoko Yesu abugha abakabatisibawa batolere ibabatisibwa omo lina ‘ly’Ise n’ery’oMughala n’ery’ekirimu kibuyirire.’ Ekyo ni bughambuki? Litolere iwikirirya n’omutima waghu wosi amakangiriya  w’ekwenene y’eBiblia awalebirye Yehova; Mughala wiwe Yesu; n’ekirimu kibuyirire. Amakangiriya w’ekwenene ayo awite akaghala kanene neryo anganatula oko mutima waghu ko kutsibu. (Ebr. 4:12) Tukanaye oko makangiriya ayo.

10-11. Ni makangirirya wahi awo wabirigha n’erikirirya okw’Ise?

¹⁰ Terilengekania omughulu wigha okw’Ise amakangirirya w’ekwenene awakwamire ano: “Erina riwe ni Yehova,” iye “yuli endata kutsibu oko kihugho kyosi,” kandi iye musa yo ‘Mungu w’ekwenene.’ (Esyo. 83:18; Isa. 37:16) Yo Muhangyiki wetu, kandi ‘erilamya ni rya Yehova.’ (Esyo. 3:8; 36:9) Mwakola endegheka y’eritulamya erilua omo rilolo n’oluholo n’erituha amaha w’engebe y’erikota. (Yoa. 17:3) Eriyiherera n’eribatisibwa lyaghu bikendikangania ngoko uli mughuma w’oko Bimiri ba Yehova. (Isa. 43:10-12) Ukendibya mughuma w’oko bandu b’omo kihanda ky’abaramya eky’omo kihugho kyosi, abawite obutseme bw’eribirikirwa omo lina ly’oMungu, n’abakaminyisaya erina eryo oko bandi.​—Esyo. 86:12.

¹¹ Ka ni lukengerwa eriminya ebyo eBiblia yikakangiriraya okw’Ise! Erikirirya amakangirirya w’obughuli ayo kikaleka omutima waghu inyakukuna eriyiherera oko Yehova n’eribatisibwa.

12-13. Ni makangirirya w’ekwenene wahi awo wabirigha n’erikirirya oko Mughala?

¹² Muwayowa wuti omughulu wigha oko Mughala amakangirirya w’ekwenene awakwamire ano? Yesu yo mundu w’akabiri w’omughaso munene omo kihugho n’omo kyanya kyosi. Omwanza liwe mwaherera engebe yiwe mo ndihi eyikabohola busana netu. Twamabikangania omo mikolere yetu ngoko twikirirye endihi eyikabohola kutse embanulo, amalolo wetu anganaghanyirwa, itwabya n’obwira obuwene haghuma na Yehova n’eribana engebe y’erikota. (Yoa. 3:16) Yesu yo Muhereri wetu Mukulu. Anzire inyatuwatikya eribana endundi eyikasira omo mbanulo n’eribya n’obwira obuwene haghuma n’oMungu. (Ebr. 4:15; 7:24, 25) Kundi iye yo Mwami w’oBwami b’oMungu, Yehova akendisyamukolesya eriyira erina riwe mo libuyirire, eribughaho obubi bosi n’erileta emiyisa ya kera na kera omo kihugho Paradiso ekikasa. (Mat. 6:9, 10; Erib. 11:15) Yesu yo ky’erileberyako ekyo tutolere erikwama. (1 Pet. 2:21) Mwatusighira eky’erileberyako omwikolesya engebe yiwe erikola erisonda ly’oMungu.​—Yoa. 4:34.

¹³ Wamikirirya ebyo eBiblia yikakangiriraya oko Yesu, ekyo kikaleka iwanza oMwana mwanzwa w’oMungu. Olwanzo olo lukakukuna erikolesya engebe yaghu erikola erisonda ly’oMungu ngoko Yesu akola. Neryo, ekyo kikakuhira mw’omuhwa w’eriyiherera oko Yehova n’eribatisibwa.

14-15. Ni makangirirya w’ekwenene wahi awo wabirigha n’erikirirya oko kirimu kibuyirire?

¹⁴ Muwayowa uti omughulu wigha oko kirimu kibuyirire amakangirirya w’ekwenene awakwamire ano? Ekirimu kibuyirire si mundu, aliwe ni kaghala ak’oMungu akakolesaya. Yehova mwakolesya ekirimu kiwe kibuyirire erisondola abalume abo akolesaya erihandika eBiblia, kandi ekirimu kibuyirire kikatuwatikaya eriminya n’erikolesya ebyo tukasoma omo Biblia. (Yoa. 14:26; 2 Pet. 1:21) Erilabira ekirimu kibuyirire Yehova akatuha “obutoki bunene.” (2 Kor. 4:7) Ekirimu kibuyirire kikatuha akaghala akakatuwatikaya eritula engulu mbuya, erikinda erilengwako, eritendihangya-hangya n’eriyiyinia omo maligho. Kikatuwatikaya erikangania “ekighuma ky’ekirimu kibuyirire.” (Gal. 5:22, NWT) Abandu abakayiketera iye n’abakamusaba ekirimu kiwe erilwa oko mutima, oMungu akabaha ekirimu kiwe bweghu-bweghu.​—Luka 11:13.

 ¹⁵ Kikasikaya mutima kundu eriminya ngoko Abaramya ba Yehova banganayiketera ekirimu kiwe kibuyirire kibawatikaye erikolera oMungu! Wamabiligha amakangirirya w’ekwenene awo wabirigha oko kirimu kibuyirire, iwukendibya n’omuhwa w’eriyiherera oko Mungu n’eribatisibwa.

16. Twamabighaki omo mwatsi ono?

¹⁶ Ukatwa ekika ky’omughaso omo ngebe yaghu omughulu ukayisogha eriyiherera oko Mungu n’eribatisibwa. Ngoko twamabilangira, litolere iwayiyinia n’eriligha eriherya emyatsi milebe. Aliwe emiyisa eyo ukasyabana yilengire kutsibu ebyo wangaherya. Olubatiso lwanganakulamya, kandi lwanganakuwatikya eribya n’obunya-mutima obuwene embere sy’oMungu. Olwanzo lwaghu oko Yehova Mungu lo lutolere ilwabya kindu kikulu ekikakukuna eribatisibwa. Kandi litolere iwikirirya n’omutima waghu wosi amakangirirya w’ekwenene awo wabirigha okw’Ise, oMughala n’oko kirimu kibuyirire. Erikwamana n’ebyo twamabilangira; wangasubirya utiki oko libulyo lino: “Ninatolere eribatisibwa?”

17. Ni myatsi yahi eyo omundu atolere erikola embere sy’eribatisibwa?

¹⁷ Wamalangira uti unatolere eribatisbwa, ahate eritikatika wabirikola emyatsi milebe utoke erikulya obwira bwaghu haghuma na Yehova. * Kundi ukigha eBiblia y’obiro byosi, wabiriminya emyatsi mingyi oko Yehova n’oko Yesu. Wabirikulya erikirirya lyaghu. (Ebr. 11:6) Uyiketere kutsibu emyatsi eyo Yehova abirilagha omo Biblia, kandi w’ikirirye ngoko endihi eyikabohola ya Yesu yanganakulamya erilua omo rilolo n’omo luholo. Wabiribindula omutima waghu n’eritsira amalolo; wabiriyikubya b’omo busana n’amalolo owo wakola, kandi wabirisaba Yehova y’obughanyiri. Wabiribindula engebe yaghu; wabirileka emibere yaghu mibi ya kera n’eritsuka erikola emyatsi eyikatsemesaya oMungu. (Emib. 3:19) Uli n’omuhwa munene w’erikanirya abandi oko myatsi eyo w’ikirirye. Muwatolera eribya mutuliri oyutabatisibwe neryo muwatsuka eriyatulira haghuma n’endeko. (Mat. 24:14) Yehova akakutsemera kundi wabirikola emyatsi y’omughaso eyo. Muwatsemesya omutima wiwe wo kutsibu.​—Emi 27:11.

18. Ni yindi myatsi yahi eyo utolere erikola embere sy’eribatisibwa?

¹⁸ Embere ubatisibawe, hane eyindi myatsi eyo utolere erikola. Ngoko tunalyalangira oho mbere, litolere iwayiherera oko Mungu. Iwakania naye omo musabe erilua oko mutima kandi ahate oghundi mundu, n’erimulagha ngoko ukendikolesya engebe yaghu erikola erisonda liwe. (1 Pet. 4:2) Neryo ubwire omuratibu w’akatunga k’abasyakulu ngoko wanzire eribatisibwa. Akendisombola abasyakulu balebe bahindane naghu. Isiwasagha erihindana nabo. W’ibuke ngoko abasyakulu  abuwene abo bakwasi kandi bakwanzire kutsibu. Bakenditsopolya haghuma naghu amakangirirya w’omusingi w’eBiblia owo wabirigha. Banzire eriminya ndeke ng’unikirirye amakangirirya ayo n’erilangira ng’unasi endundi y’eriyiherera n’eribatisibwa. Bamabilangira bati utolere, ibakendikubwira ngoko wanganabatisibwa oko muhindano munene owali hakuhi.

19-20. Ni myatsi yahi eyo litolere iwakola enyuma sy’eribatisibwa, kandi wangakolayo wuti?

¹⁹ Enyuma sy’eribatisibwa, utolere erikolaki? * W’ibuke ngoko eriyiherera ni ndaghane kandi Yehova akakusaba eriberereryayo. Neryo, wabibatisibwa, litolere iwaberererya endaghane eyo wakola omughulu wayiherera. Wangakola ekyo kyo wuti?

²⁰ Sighala hakuhi n’endeko yaghu. Wabibatisibwa mo Mukristo, ukabya mughuma w’oko “kihanda ky’abalikyetu b’omo kihugho kyosi.” (1 Pet. 2:17) Abaghala n’abali betu b’omo ndeko ni kihanda kyaghu ky’obunya-kirimu. Wamabya ukaya oko mihindano mughulu wosi, ukendiwatya obwira bwaghu haghuma nabo. Ubye ukasoma ekinywa ky’oMungu ebiro byosi n’erilengekania kukyo ko kutsibu. (Esyo. 1:1, 2) Wabisoma ekitsweka kilebe omo Biblia, wimaye akatambi k’erilengekania kutsibu oko ebyo wamabisoma. Aho, ekinywa ky’oMungu ikikenditula oko mutima waghu. “Ubye ukasaba.” (Mat. 26:41) Emisabe yaghu eyikalwa oko mutima yikendikuwatikya eriyitunda hakuhi na Yehova. ‘Ulole embere erisonda oBwami.’ (Mat. 6:33) Wanganakola ekyo omwihira omubírí w’eritulira w’embere omo ngebe yaghu. Omughulu ukatulira butsiryumbya, obwikirirya bwaghu bukasighala ibunawatire kandi wanganawatikya abandi eribana enzira eyikakolaya oko ngebe y’erikota.​—1 Tim. 4:16.

21. Eribatisibwa likendikuha akanya kahi?

²¹ Eriyisogha eriyiherera oko Yehova n’eribatisibwa wo mwatsi w’omughaso munene kutsibu owo wangakola omo ngebe yaghu. Kwenene si kyolo erikola utya. Nikwa, kinatolere kwehi? Inga! Emyatsi yosi eyikalire eyo wangalolako omo kihugho kino ‘yanguhire kandi ni y’akatambi kake.” (2 Kor. 4:17) Aliwe, eribatisibwa likendikuha akanya k’eribya n’engebe eyuwene lino, “n’engebe y’ekwenene,” omo biro ebikasa. (1 Tim. 6:19, NWT) Busana n’ebyo, ulengekanaye buli, kandi usabe busana n’erisubirya lyaghu oko libulyo lino: “Ninatolere eribatisibwa?”