Omulondo oyo akakanganaya emibere mwenda y’eKikristo: “Ekighuma ky’ekirimu kibuyirire ni: Olwanzo, obutseme, obuholo, omutima w’erilindirira, obolo, obubuya, obwikirirya, omutima molo, eriyikakirya.” Aliwe eyo misa si y’emibere mibuya eyo ekirimu kibuyirire ky’oMungu kyangatuwatikya erikulya.

Lebaya ebyo mukwenda Paulo ahandika omo milondo eyitangirire: “Neryo erikola lyʼomubiri . . . lyeri: erisingira, obukine, amaragane, erisaba esyosanamu, erilagula, obuyigu, erilwa, obuha, erihitana, erigabana, erikuba obuhaka, erikangirirya lyʼamabehi, eritsura, erikunda, eritamira, nʼemyatsi yosi eyiri ngʼeyi.” (Gal. 5:19-21) Alinga Paulo mwakania oko yindi mibere eyiri omo “mikolere y’omubiri.” Ng’emibere eyikanibweko omo Abanya Kolosai 3:5. Kutya abere abitondoghola emibere mwenda mibuya, mwabugha ati: ‘Sihali omugambo owakalwa n’emyatsi ng’eyi.’ Neryo, Paulo mwatakangania emibere mibuya yosi eyo ekirimu kibuyirire kyangatuwatikya erikulya.

Tukaminya ekyo omughulu tukasosekanaya ekighuma ky’ekirimu kibuyirire, n’ekighuma ky’ekirimu ky’ekyakakala ekyo omukwenda Paulo akanayako omughulu ahandikira endeko ye Efeso: “Ekighuma ky’ekyakakala y’emisindo yosi y’obubuya, n’eritunganene, n’ekwenene.” (Efe. 5:8, 9, NWT) Kwenene, “obubuya” ni kitsweka “ky’ekighuma ky’ekyakakala,” erihirako eritunganene n’ekwenene, aliwe kandi “obubuya” ni kitsweka kye “kighuma ky’ekirimu kibuyirire.”

Kandi omukwenda Paulo mwahana Timoteo ati akwamirire emibere ndatu mibuya eno: ‘eritunganene, erikenga oMungu, erikyirirya, olwanzo, erisika [eriyiyinia], erihehera [omutima molo]’. (1 Tim. 6:11) Aliwe emibere isatu misa ya kuyo (obwikirirya, olwanzo n’omutima molo) yo yiri omo “kighuma ky’ekirimu kibuyirire.” Aliwe, Timoteo abya alaghire oko buwatikya bw’ekirimu kibuyirire ky’oMungu erikulya n’eyindi mibere eyikanibweko: Eritunganene, erikenga oMungu, n’eriyiyinia.​—Langara n’ Abanya Kolosayi 3:12; 2 Petero 1:5-7.

Neryo erisako ly’ Abanya Galatia 5:22, 23 sirikanganirye emibere yosi y’eKikristo eyo tutolere erikulya. Ekirimu kibuyiyire ky’oMungu kyanganatuwatikya erikulya emibere mwenda eyikahulawamo “ekighuma ky’ekirimu kibuyirire.” Aliwe hali emibere mingyi eyo litolere itwabya nayo erikula bunya kirimu, ‘n’eriambala omundu muhya-muhya oyo wahangyikawa omo kisosekano ky’oMungu omo bitunganene n’omo kwenene.’​—Efe. 4:24