1. Ni mwatsi wahi wo twikirirye, kandi busanaki?

 UKABYA walangira amaligho awali omo kihugho munabwire, kikanakukalako erikirirya ngoko emyatsi yikendisyuwana? Ebihanda sibikyanzene nga kera. Abandu bangyi bakakulaya emibere y’eritsatsuha n’eritenditsomana abandi. Eriyiketera abawite ehamuli likalangirika oko bandu bangyi nga ni mwatsi owakalire. Aliwe, emibere eyi yanganaleka iwikirirya ngoko emyatsi yikendisyuwana. Busanaki? Kundi abandu banemuyighendya ngoko eBiblia yabya iyabiribugha embere oko “biro by’enyuma-nyuma.” (2 Tim. 3:1-5) Obuli mundu oyune mw’ekwenene, syangaghana erikirirya ngoko obuminyereri obu bunemubererera. N’eribererera lyabo, likakanganaya ngoko Kristo Yesu abiribya Mwami w’oBwami bw’oMungu. Aliwe, obu ni buminyereri bughuma busa b’oko maminyereri mangyi awalebirye oBwami. Eritasyasubira erigha buhya-buhya awandi maminyereri awabererera omo myaka yalaba, likendiwatya obwikirirya bwetu.

2. Tukendikania okuki omo mwatsi ono, kandi busanaki? (Ukanaye oko pitsa eyiri oko kijalada.)

² Omo mwatsi ono tukendilangira (1) obuminyereri obukatuwatikaya eriminya omughulu oBwami bwatsuka eritabala, (2) amaminyereri awakatuwatikaya eriminya ngoko Yesu abiribya Mwami w’oBwami bw’oMungu omo lubula, na (3) amaminyereri awakakanganaya esyonzighu sy’oBwami bw’oMungu  nga sikasyatoghotibawa siti. Tukendilangira ngoko amaminyereri ayo ahamba-hambene kutsibu ng’obwesa bw’ehihande mbiri-mbiriri ehikaminyisaya epitsa y’ekindu kighuma hyabimatanibwa haghuma, neryo akatukanganaya nga ni myatsi yahi yo yikendihika lino-lino erikwamana n’akalandari ka Yehova.

3. Obuminyereri obuli omo Danieli 7:13, 14 bukatukanganaya ndeke-ndeke omwatsi wahi?

³ Obuminyereri obuli omo Danieli 7:13, 14 bukatukanganaya ndeke-ndeke ngoko Kristo Yesu akasyabya Mutabali w’oBwami bw’oMungu oyuwene kundu. Abandu b’omo kihugho kyosi bakasyamukolera n’obutseme kandi oBwami bwiwe sibwendisyahwaho. Obundi buminyereri obuli omo kitabu kya Danieli, mobwabugha embere ngoko Yesu angatsukire eritabala omo Bwami obo oko nduli y’emighulu irinda. Kinatokekene eriminya omughulu Yesu atsuka eritabala?

4. Ukanaye erisako lya Danieli 4:10-17 nga likatuwatikaya liti eriminya omughulu owo Yesu angaberemo Mwami. (Ulebaye n’ebinywa ebiri ahikwa.)

⁴ Soma Danieli 4:10-17. “Emighulu irinda” yikasosekanaya omughulu w’emyaka 2 520. Omughulu oyo atsuka oko mwaka 607 E.M.W. omughulu Abababiloni balusaya omwami w’omwiso y’oko kitumbi ky’oBwami kya Yehova omo Yerusalema. Omughulu oyo ahwa oko 1914 M.W. omughulu Yehova asingaya Yesu​—“oyuwite eritswera”​—m’oMwami w’oBwami bw’oMungu. *​—Ezek. 21:25-27.

5. Obuminyereri obulebirye “emighulu irinda” bukatuwatikaya buti?

⁵ Obuminyereri obu bwangatuwatikya buti? Eriminya ndeke obuminyereri obulebirirye “emighulu irinda,” likatukanganaya ndeke-ndeke ngoko Yehova akaberereraya esyondaghane siwe sy’oko ndambi eyalengererawa. Yehova mwayisogha endambi ey’angasingirye Yesu m’oMwami. N’endambi eyo yabere yahika, Yehova mwakola eky’ayisogha. N’ekyo kikaleka itwaminya ngoko akasyaberereraya n’awandi mamiminyereri wosi oko ndambi ey’abiriyisogha. Inga, ekiro kya Yehova ‘sikyendisyamala!’​—Hab. 2:3.

6. (a) Ni myatsi yahi eyo tukalangira oko kihugho eyikakanganaya ngoko Kristo anemutabala omo lubula? (b) Obuminyereri obuli omo Eribisulirwa 6:2-8 bukakanganaya omwatsi oyo wo buti?

⁶ Omubírí wiwe w’oko kihugho abere akasonda erihwa, Yesu mwakania oko myatsi milebe eyangakolekire oko kihugho eyangawatikirye abigha biwe eriminya ngoko abiritsuka eritabala omo lubula. Emighuma y’oko myatsi eyakanayako w’amalwa, enzala, n’emisiki. Kandi mwabugha ati hasyabya ebihunzo kutse esyondwala esyangabere “ehandi n’ehandi”​—n’ekihunzo kya lino-lino ky’eKORONA ni ky’erileberyako. Emyatsi eyi ni kitswe ky’oko eyo eBiblia ikahula mo “ekiminyikalo” ky’erihika lya Kristo. (Mat. 24:3, 7; Luka 21:7, 10, 11) Enyuma sy’emyaka eyilabire oko 60 eyakwama oluholo lwiwe n’erisuba liwe elubula, Yesu mwabwira omukwenda Yoane y’esindi ngulu esikakanganaya kwenene ngoko emyatsi eyo yikasyahika. (Soma Eribisulirwa 6:2-8.) Emyatsi yosi eyi moyahika eritsuka oko 1914 omughulu Yesu asingibawa m’oMwami.

7. Busanaki emyatsi moyatsanda kutsibu oko kihugho omughulu Yesu abya Mwami?

⁷ Busanaki emyatsi moyatsanda kutsibu oko kihugho omughulu Yesu abya Mwami? Erisako ly’ Eribisulirwa 6:2 likakanganaya ngoko amalwa w’abya mwatsi w’erimbere ogho Yesu akola  abibya Mwami w’oBwami bw’oMungu. Mwalwa nandi? Mwalwa na Diabolo n’esyombinga siwe. Erikwamana n’ Eribisulirwa ekihande 12, Sitani mwakindwa, neryo iye n’esyombinga siwe mobaghuswa ahisi oko kihugho. Kundi abya ahitene kutsibu, Sitani mwatsuka erilwa n’abandu n’ekyo mokyaleta “obulighe oko kihugho.”​—Erib. 12:7-12.

8. Tukabana ndundi yahi omughulu tukalangira emyatsi eyikaberereraya amaminyereri awalebirye oBwami yikahika?

⁸ Amaminyereri aya angatuletera endundi yahi? Ebikalabika omo kihugho n’eribinduka ly’emibere y’abandu eryo tukalolako, lyangatuwatikirye eriminya ngoko Yesu abiribya Mwami. Neryo omo mwanya w’erihangya-hangya tukalangira abandu bakayitsomana ibo basa n’eribya batsibu, tuk’ibuka ngoko ebyo bakakola bikaberereraya obuminyereri bw’eBiblia. Obwami bw’oMungu bunemutabala! (Esy. 37:1) Kandi twanganalindirira emyatsi eritsanda kutsibu okw’aho oko kihugho, eHarmagedoni yikaseghera hakuhi kutsibu. (Mar. 13:8; 2 Tim. 3:13) Tune n’erisima Tata wetu w’elubula ow’olwanzo yo kutsibu busana n’erituwatikya eriminya ekikaleka ihabya amaligho mangyi omo kihugho kino?

9. Obuminyereri obuli omo Danieli 2:28, 31-35, bubughire butiki oko butabali b’omwiso obw’ekihugho kyosi, n’abo bwatsuka eritabala mughulu wahi?

⁹ Soma Danieli 2:28, 31-35. Netu kutya tunemulangira obuminyereri obu bukabererera munabwire. Enzoli ya Nebukadeneza moyakangania ebyangahikire “oko biro by’enyuma,” Yesu Kristo abitsuka eritabala. Obutabali bw’enduli bw’ekihugho kyosi obukakanibawako omo Biblia, obusosekanibwe “n’ebisando by’ekitswe ky’ekyuma n’eky’eribumba,” bwangabere  omo syonzighu sya Yesu oko kihugho. Obutabali bw’ekihugho kyosi obu bwabiritsuka eritabala. Mobwatsuka eritabala omughulu w’aMalwa w’eRimbere w’eKihugho kyosi, omughulu ekihugho ky’oBungeresa n’ekye Amerika byatsuka eriyihira omo bughuma obuwatire, Obungeresa n’oBuamerika. Kandi enzoli ya Nebukadeneza ey’ekisanamu moyakania oko myatsi ibiri eyilebirye obutabali bw’ekihugho kyosi obu, eyangalekire ibutasosa amatabali awatangirirabo.

10. (a) Ni myatsi yahi eyo obuminyereri bwa Danieli bwabya ibwabirikaniako eyo tunemuyilangirira munabwire oko butabali bw’ekihugho kyosi bw’oBungeresa n’eAmerika? (b) Litolere itwayiteya oko hatari yahi? (Lebaya ekisanduku “ Uyiteghaye oko ribumba!”)

¹⁰ Omwatsi w’erimbere, awandi matabali w’ekihugho kyosi awakanibweko omo nzoli, akasosekanibawa n’ebyuma ebikala-kalire, ng’ekyuma, esyamaghetsi, n’ebitsipa. Aliwe obughuma bw’oBungeresa n’eAmerika ibo bukasosekanibawa n’ekitswe ky’ekyuma n’eky’eribumba. Eribumba rikasosekanaya “abandu,” nibughambu abaghunda. (Dan. 2:43.) Munabwire, kiminyikere ndeke-ndeke ngoko abaghunda eribya n’eky’eribugha omo myatsi y’obutsakusi, erilwira okw’isingana ly’abandu, ebikumula ebikayisamambula, n’ebitunga ebikabughira abakoli, kikaleka abatabali b’obutabali bw’ekihugho kyosi obu ibataluka eriberererya ebyo banzire.

11. Obutabali bw’ekihugho kyosi bw’oBungeresa n’eAmerika eribya ibunemutabala likawataya liti erikirirya lyetu ngoko tuli omo biro by’enduli?

¹¹ Omwatsi w’akabiri, obutabali bw’oBungeresa n’eAmerika obukasosekanibawa n’ebisando by’oko kisanamu kinene, bo butabali bw’ekihugho kyosi bw’enduli obukakanibawako omo Biblia. Enyuma sy’obutabali obo, sihendisyasyabya obundi butabali bw’abandu. Omo mwanya w’ekyo, bukasyatoghotibawa n’oBwami bw’oMungu oko Armagedoni haghuma n’awandi matabali wosi w’abandu. *​—Erib. 16:13, 14, 16; 19:19, 20.

12. Obuminyereri bwa Danieli bukakanaya oko yindi myatsi yahi eyikatusikaya mutima n’erituha amaha?

¹² Obuminyereri obu bwangatuletera ndundi yahi? Obuminyereri bwa Danieli bukatukangiriraya n’eyindi myatsi eyikakanganaya ngoko tuli omo biro by’enduli. Habirilaba emyaka eyilabire 2 500 Danieli iniabiribugha omo buminyereri ati enyuma sy’eBabeli, hangasirisyabya awandi matabali ani w’ekihugho kyosi awangatulire oko bandu b’oMungu ko kutsibu. Kandi mwakangania ngoko obutabali bw’oBungeresa n’eAmerika bo bwangabere bw’omwiso bwa kugho. Ekyo kikaleka itwasika n’eribya n’amaha ngoko hakisiya hake oBwami bw’oMungu ibwatoghotya amatabali wosi w’abandu n’eritabala oko kihugho kyosi.​—Dan. 2:44.

13. “Omwami w’omunani” n’“abami ikumi” abakanibweko omo Eribisulirwa 17:9-12, bakasosekanayaki, n’obuminyereri obo bwabiribererera buti?

¹³ Soma Eribisulirwa 17:9-12. Busana n’ebyagha by’aMalwa w’eRimbere w’eKihugho kyosi, mohakoleka oghundi mwatsi owakolaya okw’ibererera ly’obundi buminyereri bw’eBiblia obulebirye ebiro by’enduli. Abatabali b’ekihugho mobanza erileta obuholo b’omo kihugho kyosi. Neryo omo Mwisi 1, 1920, mobahiraho eKitongole ky’eBihanda. N’enyuma waho omo Mwisi 10, 1945 oBughuma bw’eBihanda mobwakombolakyo. Ekitunga ekyo kikahulawa mo “mwami w’omunani.” Aliwe ekitunga ekyo si butabali bw’ekihugho kyosi. Amami w’ekipolitike awakawatikayakyo wakaleka ikyabya n’amaka. EBiblia ikasosekanaya amatabali ayo ‘n’abami ikumi.’

14-15. (a) Ekitabu ky’Eribisulirwa 17:3-5 kikabisulaki oko “Babeli Mukulu”? (b) Ni mwatsiki owakakoleka lino oko buwatikya bw’ebisomo by’amabehi?

¹⁴ Soma Eribisulirwa 17:3-5. Omo nzoli,  omukwenda Yoane mwalangira omumalaya, “Babeli mukulu,” oyukasosekanaya ebisomo byosi by’amabehi by’omo kihugho kyosi. Enzoli eyo yabiribererera yiti? Omo myaka mingyi ebisomo by’amabehi byabirikola haghuma n’amatabali w’ekihugho n’eriwatikyagho. Aliwe, hasigha hake Yehova iniahira omo mitima y’abatabali b’ekihugho mw’“erikola eriyisunza liwe.” Ekyo kikasyasira mo ki? Amatabali ayo, ni bughambu “abami ikumi” akasyabindukira ebisomo by’amabehi n’eribitoghotya.​—Erib. 17:1, 2, 16, 17.

¹⁵ Tukaminya tuti ngoko ebisomo by’amabehi bikisigha ibyatoghotibwa? Erisubirya oko ribulyo eryo, litolere itwibuka ngoko esyombande silebe sy’omuyi w’eBabeli ya kera, syabya siteghibwe n’amaghetse w’olusi lunene lwe Efurati. Ekitabu ky’Eribisulirwa kikasosekanaya abandu abakawatikaya Babeli Mukulu n’“amaghetsi” awakateghayayo. (Erib. 17:15) Aliwe kandi mokyabugha kiti amaghetsi ayo ang’umire, ni bughambu ebisomo by’amabehi by’omo kihugho kyosi byangaherirye abandu bangyi abakawatikayabyo. (Erib. 16:12) Obuminyereri obo bunemubererera lino kundi abandu bangyi sibakitsomene ekisomo kandi bakasonderaya ebisubiryo by’oko mabulyo wabo by’ahandi.

16. Eriminya ndeke amaminyereri awalebirye erihirwaho ly’oBughuma bw’eBihanda n’eritoghotibwa ly’eBabeli Mukulu lyangatuletera ndundi yahi?

 ¹⁶ Eriminya amaminyereri aya likatuletera ndundi yahi? Erihirwaho ly’oBughuma bw’eBihanda n’abandu bangyi eribya isibakitsomene ekisomo, bikakanganaya ngoko tuli omo biro by’enduli. Nomo abandu bangyi batakitsomene ebisomo, nibughambu amaghetse awakasosekanayako anemuma, enduli y’ebisomo by’amabehi siyendisyasira omo nzira eyo. Ngoko tunalyabugha, Yehova akendisyahira omo mitima ‘y’abami ikumi,’ ni bughambu amatabali awakawatikaya oBughuma bw’eBihanda, mw’“erikola eriyisunza liwe.” Amatabali akasyatoghotaya ebisomo by’amabehi omw’itsumbukania, n’omwatsi oyo akasyaswekaya abandu b’oko kihugho. * (Erib. 18:8-10) Eritoghotibwa ly’eBabeli Mukulu likasyasuka-sukanaya ekihugho kandi lyanganasyaletera amaligho. Aliwe abandu b’oMungu bakendisyabya n’emyatsi hakuhi ibiri eyikendisyaleka ibatsema. Enzighu y’erilua kera ya Yehova Mungu siyendisyasyabyaho kera na kera, n’erilamibwa lyetu oko kihugho kibi kino likasyabya iriri hakuhi-kuhi!​—Luka 21:28.

17-18. (a) Twangalola tuti embere eriwatya obwikirirya bwetu? (b) Tukendisyakania okuki omo mwatsi owakwamire?

¹⁷ Omo buminyereri, Danieli mwakangania ngoko “eriminya” ly’ekwenene “lyasyakanyirira.” Na kwenene lyabirikanyirira! Twamabyowa amaminyereri awalebirye omughulu wetu wo ndeke. (Dan. 12:4, 9, 10) Amaminyereri ayo eribya w’ekwenene rikaleka itwakulya erikenga Yehova lyo kutsibu, haghuma n’eKinywa kiwe ekyasondolawa n’ekirimu kibuyirire. (Isa. 46:10; 55:11) Neryo ulole embere eriwatya obwikirirya bwaghu omw’igha aMasako wo butumbya n’omw’iwatikya abandi eribya bira ba Yehova. Akendisyateya abosi abayiketere iye yo kundu n’eribaha “obuholo obuhikene.”​—Isa. 26:3.

¹⁸ Omo mwatsi owakwamire tukendisyakania kutsibu oko maminyereri awalebirye endeko y’eKikristo omo biro by’enduli. Ngoko tukendisyalangira, amaminyereri ayo nagho akakanganaya ndeke-ndeke ngoko tuli omo biro by’enduli. Tukendisyalangira eyindi myatsi eyikakanganaya ngoko Yesu oMwami wetu oyo wabiritsuka eritabala, anemusondola abakamukwama butaleghula.