1. Erisonda lya Yehova ni lyahi munabwire?

 MUNABWIRE oMungu asondire ati engulu mbuya y’oBwami iyatulaghanibwa omo kihugho kyosi. (Mar. 13:10; 1 Tim. 2:3, 4) Yehova yo mwenye mubírí oyu, kandi ni mubírí w’omughaso munene, kyaleka iniahagho Mughala wiwe mwanzwa asondolegho. Kundi Yesu yo musondoli, twanganayiketera ndeke-neke ngoko omubírí w’eritulira akendikolwa ngoko Yehova asondire embere enduli yihike.​—Mat. 24:14.

2. Omo mwatsi ono tukendikania okuki?

² Omo mwatsi ono tukendilangira Yesu ng’anemukolesya ati “omugombe [wiwe] oyutelegula n’ow’amenge” eriha aboghombe biwe b’amakangirirya awakalua omo Kinywa ky’oMungu, n’eribateghekania oko mubírí munene kutsibu ow’eritulira. (Mat. 24:45) Kandi tukendilangira ekyo obuli mughuma w’okw’itwe angakola atoke eriwatikania na Yesu n’omughombe mutaleghula.

3. Yesu abirihabwa ehamuli yahi?

³ Yesu anemusondola omubírí w’eritulira. Ekyangaleka itwikirirya omwatsi oyo niki? Habere ihakisiya hake iniasuba elubula, Yesu mwahindana haghuma n’abigha biwe balebe oko kitwa ky’eGalilaya. Mwababwira ati: “Ehamuli yosi nabirihabwayo omo lubula n’omo kihugho.” Ulebaye eby’abugha enyuma syaho: “Neryo mugende, muyire abiga oko bihanda byosi.” (Mat. 28:18, 19) Neryo ni bughambu, omo bindu eby’abirihabwa, Yesu mwahabwa n’ehamuli y’erisondola omubírí w’eritulira.

4. Busanaki twangan’ikirirya ngoko erihika na lino Yesu akinasondola omubírí w’eritulira?

 ⁴ Yesu mwabugha ati omubírí w’eritulira n’ow’eriyira abigha akendisyakolwa “o[m]o bihanda byosi” kandi ati akendisyabya haghuma n’abigha biwe “ebiro byosi erihika okw’ihwererera ly’emighulu.” (Mat. 28:20) Ebinywa ebyo bikakanganaya ngoko omubírí w’eritulira angalolire embere erihika omo biro byetu inianemusondolwa na Yesu.

5. Tukawatikaya tuti eriberererya Esyonyimbo 110:3?

⁵ Yesu mwatasagha ati hangabulire ab’erikola omubírí w’eritulira okw’ihwererera ly’emighulu. Mwaminya ngoko ebinywa bino by’obuminyereri eby’omuhandiki w’Esyonyimbo byangabererere: “Abandu bawe basyayiha uk’uwe ekiro wasyalwa n’esyonzigu syawe.” (Esy. 110:3) Wamabya iwunemusangira oko mubírí w’eritulira, inibughambu unemuwatikya Yesu n’omughombe mutaleghula kandi unemuwatikya eriberererya obuminyereri obo. Omubírí kwenene anemukoleka, aliwe hane amaligho.

6. Obuligho bughuma obo abatuliri b’oBwami bakahindana nabo munabwire ni bwahi?

⁶ Obuligho bughuma obo abatuliri bw’oBwami bakahindana nabo ly’ery’endereribwa. Abakayisamambula okw’ikirirya, abasondoli b’ebisomo, n’abandu b’epolitike, babirileka abandu bangyi ibabya n’amalengekania awatuwene oko mubírí wetu. Abatunga betu, abandu abo twasi, n’abo tukakola nabo omubírí, bakatebibawa n’emyatsi y’amabehi eyo, neryo banganatukasa erileka erikolera Yehova n’erileka eritulira. Omo bihugho bilebe, esyonzighu syetu sikubahisaya abaghala n’abali betu, sikalwa nabo, sikabahamba, nibya n’eribaghusa omo muliki. Ekyo sikirituswekaya. Yesu mwabugha ati: “Ebihanda byosi byasyabakwa obusu busana n’erina lyage.” (Mat. 24:9) Eribya itunemukwamwa tutya, likakanganaya ngoko Yehova atulighire. (Mat. 5:11, 12) Sitani yukakuna abandu eritupona. Aliwe Yesu awite akaghala kanene kutsibu kulenga Sitani! Omo buwatikya bwa Yesu engulu yowene yinemuhika oko bandu b’ebihanda byosi. Tulebaye ebikakanganaya omwatsi oyo.

7. Ni bihi ebyo ukayilangirira ebikakanganaya ngoko Eribisulirwa 14:6, 7 rinemubererera?

⁷ Obundi buligho obo itwe batuliri b’oBwami tukahindana nabo, y’emibughe eyitasosene. Omw’ibisulirwa eryo Yesu aha omukwenda Yoane, mwakangania ngoko omo mughulu wetu emibughe eyitasosene siyangakakirye engulu yowene. (Soma Eribisulirwa 14:6, 7.) Kikatokekana kiti? Tunemuha abandu bangyi ngoko twangatoka b’akanya k’erihulikirira omwatsi w’oBwami. Munabwire, abandu erilua omo kihugho kyosi banganasoma emyatsi eyilebirye eBiblia y’oko site yetu ye enternete jw.org, kundi emyatsi eyo yikabanikako omo mibughe eyilabire oko 1 000! Ekyaghanda Ekikasondola mokyalighira eribindula ekitabu Tsemera engebe kera na kera!, ekitabu kyetu kikulu ekyo tukakolesaya eriyira abigha omo mibughe eyilabire oko 700! Amakangirirya awakalua omo Kinywa k’yoMungu akasungika omo nzira y’esyovideo busana n’abatsiha, n’ebitabu by’amasako awakasomawa omo minwe busana n’esyondimetime. Tunemulangira amaminyereri w’eBiblia kw’akabererera. Abandu “abakalua oko bihanda by’obuli mubuge” banemw’igha “omubughe ow’erire” w’ekwenene y’eBiblia. (Zek. 8:23; Sef. 3:9, NWT) Ebyosi ebi bikatokekana omo busondoli bwa Yesu Kristo.

8. Erihika lino, omubírí wetu w’eritulira abiributa bighuma byahi?

⁸ Munabwire abandu abalabire oko miliyoni 8 erilua omo bihugho 240 bane omo ndondeka ya Yehova, n’obuli mwaka amakumi  w’amaelfu w’abandu banemubatisibwa! Aliwe eky’omughaso kulenga n’emighanzo, y’“omundu muhya-muhya,” ni bughambu emibere y’eKikristo eyo abigha bahya-bahya aba bakakanganaya. (Kol. 3:8-10) Abangyi babya basingiri, abanzire amalwa, abawite akasololo, n’abanzire ekihugho kyabo, aliwe babirileka. Obuminyereri obuli omo Isaya 2:4 bunemubererera; ‘sibakiyiyisaya amalwa.’ Tukabya twayikasa eryambala omundu muhya-muhya, tukawatikaya abandu eryasa omo ndondeka ya Yehova, kandi tukakanganaya ngoko tukakwama omusondoli wetu Kristo Yesu. (Yoa. 13:35; 1 Pet. 2:12) Ebyo bikatokekana kundi Yesu akatuha obuwatikya obo tulaghireko.

9. Ngoko kisakirwe omo Matayo 24:45-47, Yesu mwabugha ati oko biro by’enduli hangabereki?

⁹ Soma Matayo 24:45-47. Yesu mwabugha ati oko biro by’enduli angahirireho “omughombe oyutelegula n’ow’amenge” abye akaha abandu biwe b’amakangirirya awakalua omo Kinywa ky’oMungu. Na kwenene omughombe oyo anemukola kutsibu munabwire. Omusondoli wetu abirikolesya akakuto kake k’abalume abahirirwe kw’amaghuta babye bakaha abandu b’oMungu n’abakanzisibawa n’ekwenene b’“akalyo [amakangirirya] oko mughulu atolere.” Abalume abo sibaliyilangira mo batabali b’obwikirirya bw’abandi. (2 Kor. 1:24) Aliwe, bakabya ibanasi ngoko Yesu Kristo yo “musondoli n’omukulu” w’abandu biwe.​—Isa. 55:4.

10. Oko bitabu ebikanganibwe oko syopitsa ni kyahi kyo kyaleka iwaligha eritsuka erikwama enzira eyikakolaya oko ngebe y’erikota?

¹⁰ Eritsuka oko mwaka 1919, omughombe oyuteleghula abiriteghekania ebitabu mbiriri-mbiriri ebikaha abakanzisibawa n’omwatsi w’ekwenene b’akanya k’erimbere erigha ekwenene eyikalua omo Kinywa ky’oMungu. Omo 1921, omughombe mwateghekania ekitabu  La Harpe de Dieu eriwatikya abanzisibwe n’ekwenene erigha amakangirirya w’eBiblia aw’eritsukirako. Emighulu ikaghenda ikabinduka, ebindi bitabu mobyateghekanibwa. Ni kitabu kyahi kyo kyakuwatikaya eriminya n’eryanza Tata wetu w’elubula? Ky’ekitabu “Que Dieu soit reconnu pour vrai;” Kweli Iongozayo Kwenye Uzima wa Milele; Unaweza Kuishi Milele Katika Paradiso Duniani; Ujuzi Uongozao Kwenye Uhai Udumuo Milele; Biblia Inafundisha Kabisa Nini?; EBiblia Yikatukangirirayaki?; kutse ekitabu kyetu kihya-kihya, Tsemera Engebe Kera na Kera! Ebitabu byosi ebyo byateghekanibawa busana n’erikangirirya abandu b’eBiblia, nabyo byabya iby’ebyo tulaghireko oko mughulu byahandikawa.

11. Busanaki itwe bosi tulaghire oko makangirirya awakalua omo Kinywa ky’oMungu?

¹¹ Abakatsuka eryigha ekwenene sibo basa bobalaghire oko makangirirya awakalua omo Kinywa ky’oMungu awawatire. Itwe bosi tulaghire kugho. Omukwenda Paulo mwahandika ati: “Akalyo [akawatire] ni k’abandu bakulu.” Paulo mwatomekako ati twamabikolesya amakangirirya awakalua omo Kinywa ky’oMungu itukenditoka “erisombola ekibuya n’ekibi.” (Ebr. 5:14) Omo mighulu eyikalire eno, erisikya esyokanuni sya Yehova siryolobire kundi abandu bangyi babeghere erikola emyatsi y’engyingo eyihya w’endwa. Aliwe Yesu akayikasa erituha amaka agho tulaghireko erilabira akalyo akawatire ak’amakangirirya w’eKinywa ky’oMungu. Akalyo ako kakalua omo Biblia, eKinywa ky’oMungu ekyasondolawa n’ekirimu kibuyirire. Omughombe mutaleghula akateghekanaya n’erighaba akalyo aka omw’ikwama obusondoli bwa Yesu.

12. Nga Yesu, twabiriha erina ly’oMungu lyo lukengerwa tuti?

¹² Twabiriha erina ly’oMungu ly’olukengerwa olo ritolere, nga Yesu. (Yoa. 17:6, 26) Eky’erileberyako, oko mwaka 1931 motwimya erina erikalua omo Masako ery’Abimiri  ba Yehova, n’ekyo mokyakangania ngoko tukalangira erina ly’oMungu mo ly’omughaso munene kutsibu kandi ngoko twanzire eryahulwa mulyo. (Isa. 43:10-12) N’eritsuka oko Mwisi 10 w’omwaka oyo, erina ly’oMungu likabya oko kijalada ky’obuli gazeti eno. Kandi, E Tafsiri ya Ulimwengu Mupya yabirisubya erina ly’oMungu aho litolere omo Kinywa kiwe. Situli ng’ebisomo ebikayahula mo by’eKikristo ebyabirilusya erina lya Yehova ly’omo syombindule syabo nyingyi sy’eBiblia!

13. Niki kyo kikaleka iwikirirya ngoko Yesu anemukolesya “omugombe oyuteleghula n’ow’amenge” munabwire? (Yoane 6:68)

¹³ Erilabira “omughombe oyutereghula n’ow’amenge,” Yesu abiritsukisya oko kihugho kw’endondeka ey’embaghane busana n’erilolya eriramya ly’ekwenene ly’embere. Ukayowa wuti busana n’endondeka eyo? Wanganabya iwukayowa ng’omukwenda Petero oyo wabwira Yesu ati: “Mukama twasyaya ukundi kwehi? Uwe uwite ebinywa by’engebe y’erikota.” (Yoa. 6:68) Netu twangabere hayi munabwire nga twalighana eringira omo ndondeka ya Yehova? Erilabira endondeka eyo, Kristo akabya inianikirirye ngoko tunemuhabwa ebyosi ebyo tulaghireko tutoke eribya balateghula oko Mungu. Kandi akatubegheraya tutoke erikola omubírí wetu w’eritulira wo ndeke. N’akandi akatuwatikaya eribya “bandu bahya-bahya” tutoke eritsemesya Yehova.​—Efe. 4:24.

14. Omughulu w’ekihunzo ky’ekorona, eribya omo ndondeka ya Yehova molyakuletere ndundi yahi?

¹⁴ Yesu akasondola abandu biwe n’amenge omo mighulu eyikalire. Endundi y’obusondoli obo moyalangirikire ndeke-ndeke ekihunzo ky’eKORONA kikatsuka. Omughulu abandu bangyi babya omw’ihandabuka busana n’eribula  eky’erikola, Yesu mwayikasa tubane obusondoli obwangatuteya. Motwahanwa eribya tukambala ehikaswika obuno n’enindo omughulu tuli ahali abandu bangyi n’eritendisegheranako. Mobibukya abasyakulu eribya hakuhi n’obuli mundu w’omo ndeko n’eribya ibanasi ebyo balaghireko ebilebirye obuteya, obukale n’obwira bwabo n’oMungu. (Isa. 32:1, 2) Motwabere tukabana n’obundi busondoli n’emyatsi eyikasikaya mutima erilabira emyatsi mihya y’Ekyaghanda Ekikasondola.

15. Omo mughulu w’ekihunzo mobatuhere busondoli bwahi obulebirye emihindano n’omubírí w’eritulira, n’ekyo mokyaletire bighuma byahi?

¹⁵ Omughulu w’ekihunzo mobatuhere obusondoli obukakanganaya ngoko twangakola emihindano n’omubírí w’eritulira. Motwalw’itwatsuka erikwama emihindano y’endeko n’emihindano minene-minene omo nzira eye enternete. Kandi twanganabugha tuti eritulira lyetu lyosi motwabere tukakolesya esyobaruha kutse etelefone. Yehova mwatuhere emiyisa busana n’eriyikasa lyetu. Esyongulu sy’esyo Beteli nyingyi esikatuhikira mosyakangania ngoko emighanzo y’abatuliri moyakanyire omo biharo byabo. Kwenene, abandu bangyi babiriyilangirira emyatsi eyikasikaya mutima omo mughulu ono.​—Ulebaye akasanduku “ Yehova akatsumula omubírí wetu w’eritululira.”

16. Tuyiketere mwatsi wahi?

¹⁶ Abandi banganabya imobanalangira endondeka nga yamalabya oko kateho omughulu w’ekihunzo. Aliwe kangyi-kangyi, mokyalangirika ndeke-ndeke ngoko obusondoli obo tukahabawa ni bw’amenge. (Mat. 11:19) Tukabya twaghanirya oko nzira y’olwanzo eyo Yesu akasondolamo abandu biwe, tukayiketera ngoko nomo hangabyaki, Yehova na Mughala wiwe mwanzwa bakasyabya ibane netu.​—Soma Abaebrania 13:5, 6.

17. Yesu eribya musondoli wetu, rikaleka iwayowa wuti?

¹⁷ Tutsemire kundu Yesu eribya musondoli wetu! Tuli omo ndondeka eyitaghabene nomo yinemo abandu abakasira omo bihanda, ebihugho, n’emibughe ebisigha-sighene. Tukahabawa amakangirirya mangyi awakalua omo Kinywa ky’oMungu kandi tukabegheribawa ndeke erikola omubírí w’eritulira. Obuli mughuma w’okw’itwe anemukangiriribwa ngoko angabya mundu muhya-muhya, kandi tunemwigha eryanzana. Tunasingene eriyihalamba busana n’eribya na Yesu m’omusondoli wetu!