1. Litolere itwalangira ekihembo ky’erisaba Yehova kyo tuti?

 TWABIRIHABWA ekihembo ky’obughuli bunene kutsibu​—erihikira oMuhangyiki w’olubula n’ekihugho y’omo musabe. Terilengekania okw’eki: Twanganabwira Yehova y’ebiri oko mitima yetu, oko ndambi yosi-yosi n’omo mubughe wosi-wosi nibya isitutalaghana naye. Twanganasaba Tata wetu w’olwanzo itune omo lupitali kutse omo muliki, itunikirirye ngoko akendituhulikirira. Tukalangira ekihembo ekyo mo ky’obughuli bunene kutsibu.

2. Omwami Dawidi mwakangania ati kw’akalangira ekihembo ky’omusabe mo ky’obughuli bunene?

² Omwami Dawidi iniakalangira omusabe mo kihembo ky’obughuli. Mwimbira Yehova ati: “Wangirire erisaba lyage ng’obukwa obukakumba ndeke.” (Esy. 141:1, 2) Omo mughulu wa Dawidi obukwa bubuyirire obo abahereri babya bakakolesya omw’iramya ly’ekwenene, ibukateghekanibawa ndeke kutsibu. (Eril. 30:34, 35) Dawidi eryahula obukwa, likakanganaya ngoko abya anzire erighanirya kutsibu oko ebyo akendibwira Tata wiwe w’elubula omo musabe. Netu ko tunayisunzire tutya. Twanzire emisabe yetu iyatsemesya Yehova.

3. Litolere itwayiwata tuti omughulu tukasaba Yehova, kandi busanaki?

³ Omughulu tukasaba Yehova litolere itwakangania erisikya linene. Terilengekania oko syonzoli esikaswekaya esyo Isaya, Ezekieli, Danieli, na Yoane balangira. Nomo esyonzoli esyo sinasighene, hane omwatsi mughuma owo sisosenemo. Esyosi sikakanganaya Yehova ko ni Mwami w’olukengerwa lunene kundu. Isaya mwalangira “Yehova inianikere oko kitumbi  ky’obwami, ekiri endata, n’ekiyisumbire endata.” (Isa. 6:1-3) Ezekieli mwalangira Yehova inianikere oko mutoka wiwe w’elubula, iniatimbireko “ekikakangabasanaya . . . ng’ekisosekanio ky’ekima.” (Ezek. 1:26-28) Danieli mwalangira “omukulu w’ebiro” iniambite esyongyimba nyeru-nyeru n’ebirimi by’omuliro ibinemulua omo kitumbi kiwe ky’obwami. (Dan. 7:9, 10) Na Yoane mwalangira Yehova inianikere oko kitumbi ky’obwami ekitimbireko ekima ekisosire ng’eribwe ly’ezumaridi. (Erib. 4:2-4) Tukabya twalengekania oko lukengerwa lunene kutsibu lwa Yehova, tukalangira ngoko mwatuha ekihembo ky’obughuli bunene eky’erimuhikira omo musabe, kandi ngoko litolere itwamusaba omw’isikya linene kutsibu. Aliwe ni myatsi yahi yo litolere itwahira omo misabe?

4. Ebinywa ebitsukire omusabe w’erilangirirako ebiri omo Matayo 6:9, 10, bikatw’ighisayaki?

⁴ Soma Matayo 6:9, 10. Omw’ikangirirya liwe ly’oko kitwa, Yesu mwakangirirya abigha biwe ngoko bangasaba omo nzira eyikatsemesaya oMungu. Yesu abere abibwira abigha biwe ati “ko musabe mutya” mwahula emyatsi y’omughaso eyilebirye erisonda lya Yehova. Emyatsi eyo y’eno: Eriyira erina liwe mo libuyirire; eryasa ly’oBwami bw’oMungu obukendisyatoghotya esyonzighu sy’oMungu; n’emiyisa ey’abiriteghekania busana n’abandu n’ekihugho. Twamahira emyatsi eyiri ng’eyo y’omo misabe yetu, itukakanganaya ngoko erisonda ly’oMungu ni ry’omughaso munene okw’itwe.

5. Linatolere erisaba busana n’emyatsi eyitulebirye?

⁵ Omo kihande ekikwamire ky’omusabe, Yesu mwakangania ngoko ni mwatsi atolere erisaba busana n’emyatsi eyo tulaghireko. Twanganasaba Yehova tuti atuhe akalyo ketu k’obuli kiro, atubuyire amalolo wetu, atuteghaye okw’ilengwako n’eritulamya oko mubi. (Mat. 6:11-13) Omughulu tukasaba Yehova busana n’emyatsi eyo, tukamukanganaya ngoko tunasi ko tulaghire oko buwatikya bwiwe kandi ngoko twanzire erimutsemesya.

6. Omo misabe yetu tutolere erisaba busana n’emyatsi eyiri omo musabe w’erilangirirako misa? Kanaya.

⁶ Yesu mwatabwira abigha biwe ati babye bakasubirira omo binywa by’omusabe  w’erilangirirako. Omo yindi misabe yiwe, Yesu iniakanahira mw’emyatsi mbiriri-mbiriri ey’abya alaghireko oko ndambi eyo. (Mat. 26:39, 42; Yoa. 17:1-26) Netu kutya, twanganasaba busana n’ekyosi-kyosi ekitulebirye. Omughulu tukasonda eriyisogha omwatsi mulebe, twanganasaba Yehova y’amenge n’obuyiteghererya. (Esy. 119:33, 34) Omughulu tukasonda eritsuka omubírí owakalire, twanganasaba Yehova tuti atuwatikaye eriminya ngoko twangakolagho. (Emi. 2:6) Ababuti banganasabira abana babo, abana banganasabira ababuti babo, n’itwe bosi twanganasabira abigha betu b’eBiblia n’abosi abo tukatulira. Aliwe, emisabe yetu siyitolere ikabya y’erisaba Yehova y’obuwatikya lisa.

7. Busanaki litolere itwabya tukapipa Yehova omo misabe yetu?

⁷ Litolere itwabya tuk’ibuka eribya tukapipa Yehova omo misabe yetu. OMungu wetu y’utolere eripipwa kutsibu. “Ni mubuya kandi akabuyira.” Kandi ni “w’erighanyira n’ow’olwanzo, syalihitana luba, ni w’obwenge [awite olwanzo olutereghula], ebiro byosi syaliregula.” (Esy. 86:5, 15) Kwesi, litolere itwapipa Yehova busana n’emibere yiwe na busana n’ebyo akatukolera.

8. Twanganasima Yehova busana n’emyatsi milebe yahi? (Esyonyimbo 104:12-15, 24)

⁸ Eritomeka okw’ibya tukapipa Yehova omo misabe yetu, litolere itwabya tukamusima busana n’ebindu bibuya bingyi eby’akatuha. Eky’erileberyako, twanganamusima busana n’amawa mangyi aw’esyorangyi mbiriri-mbiriri esikatsemesaya, busana n’emihanda mina-mina ey’akalyo akasihire, na busana n’obutseme bw’eribya n’obwira obuwene haghuma n’abira betu. Tata wetu oyutwanzire akatuha ebindu ebi n’ebingyi okw’aho tutoke eritsema. (Soma Esyonyimbo 104:12-15, 24.) Ekikulu kulenga, tukasima Yehova busana n’erituha amakangirirya awakawataya obwikirirya, kandi akatuha n’amaha awuwene kundu busana n’ebiro ebikasa.

9. Niki kyo kyangatuwatikya eryibuka erisima Yehova? (1 Abanya Tesalonike 5:17, 18)

⁹ Twangan’ibirirwa bweghu-bweghu erisima Yehova busana n’eby’akatukolera. Ekyangakuwatikya eribya uk’ibuka niki? Wanganabya ukahandika ebyo wabirisaba Yehova, neryo  iwabya ukalebya Yehova ng’abirisubirya ati oko misabe eyo. Neryo iwamusaba busana n’erimusima busana n’obuwatikya bwiwe. (Soma 1 Abanya Tesalonike 5:17, 18.) Terilengekania oko mwatsi ono: Abandi bamatuha ewasingya tukatsema n’eriminya ko batwanzire. Yehova naye akatsema omughulu tukibuka erimusima abisubirya oko misabe yetu. (Kol. 3:15) Aliwe hane oghundi mwatsi mukulu ow’akatukuna eriha oMungu wetu y’ewasingya.

10. Ngoko kisakirwe omo 1 Petero 2:21, busanaki litolere itwasima Yehova busana n’erituma Yesu y’oko kihugho?

¹⁰ Soma 1 Petero 2:21. Litolere itwasima Yehova kundi mwatuma Mughala wiwe mwanzwa busana n’erisyatukangirirya. Erigha engebe ya Yesu rikaleka itwaminya oko Yehova ko myatsi mingyi, n’eriminya ngoko twangamutsemesya. Twamikirirya obuhere bwa Kristo, itwanganabya n’obwira obuwene kandi obuwatire na Yehova n’eribya omo buholo naye.​—Rom. 5:1.

11. Busanaki tukasaba erilabira erina lya Yesu?

¹¹ Tukasima Yehova kundi twanganamusaba erilabira Mughala wiwe. Yehova akasubiraya oko misabe yetu erilabira Yesu. Yehova akahulikirira n’erisubirya oko misabe eyikalaba omo rina lya Yesu. Yesu mwabugha ati: “Nasyakola obuli mwatsi ogo mwasyabulya omo lina lyage, Tata apipawe omu Mugala.”​—Yoa. 14:13, 14.

12. Ni ghundi mwatsi wahi w’angaleka itwasima Yehova busana na Mughala wiwe?

¹² Yehova akabuyira amalolo wetu busana n’obuhere bw’obughuli obukabohola. Amasako akahula Yesu mo “muhereri mukulu busana netu” kandi ati “ikere oko luhande lw’amali lw’ekitumbi ky’oMwenye oBukulu omo lubula.” (Ebr. 8:1) Yesu ni “mbuyi yetu [muwatikya wetu] uku Tata.” (1 Yoa. 2:1) Tukasima Yehova yo kutsibu busana n’erituha oMuhereri Mukulu oyukatughanyira busana n’eritendihika-hikana lyetu kandi “oyukatwimira”! (Rom. 8:34; Ebr. 4:15) Eriyiherera lya Yesu lisa lyo likatutokesaya itwe bandu tutahika-hikene erihikira Yehova y’omo misabe. Ahate eritika-tika, ukaligha ngoko litolere itwasima Yehova yo kutsibu busana n’ekihembo eky’abirituha, ekya Mughala wiwe mwanzwa!

13. Omo kiro embere ahole, Yesu mwakangania ati ngoko anzire abakwenda biwe?

¹³ Omo kiro embere w’erihola liwe ibwabirira, Yesu mwalabya ndambi nene, akasabira abigha biwe oko Tata wiwe ati ‘ateghayebo oko mubi.’ (Yoa. 17:15) Ekyo mokyakangya ngoko Yesu abya anzirebo kundu! Nomw’anabya asi ngoko akasond’ighalwa kutsibu; mwahangya-hangya kutsibu busana n’abakwenda biwe.

14.Twangakangania tuti ko twanzire abaghala n’abali betu?

¹⁴ Netu litolere itwigha emibere ya Yesu. Siritolere erisaba busana n’ebitulebirye bisa. Aliwe, litolere itwabya tukasabira n’abaghala n’abali betu. Twamakola tutya tukabya itwamasikya ekyalayiro kya Yesu eky’eryanzana n’erikangania Yehova ngoko twanzire abo tuli nabo omo bwikirirya. (Yoa. 13:34) Erisabira abaghala n’abali betu likabaletera endundi. EBiblia ikatubwira yiti “erisaba ly’omutunganene likatoka mwatsi munene.”​—Yak. 5:16.

15. Abaghala n’abali betu balaghire oko misabe yetu ko busanaki?

¹⁵ Litolere itwasabira abaghala n’abali betu kundi banemuhikirwa n’amaligho mangyi.  Twanganasaba Yehova tuti abawatikaye erihanda omutima omo syondwala, omughulu hamabya ebitsinduli, amalwa omo kihugho kyabo, ery’endereribwa, n’awandi maligho. Twanganasabira n’abaghala n’abali betu abakayiherera eriwatikya abali omo bwagha. Wanganabya ighunasi abalikyetu balebe ababirihikirwa n’amaligho awasosene nayo. Kyamabya kitya, uhule amena wabo omughulu ukasabirabo. Tukakangaya ko twanzire abaghala betu bo kutsibu omughulu tukasaba Yehova tuti abawatikaye erisika.

16. Busanaki litolere erisabira abakasondola omo ndondeka?

¹⁶ Abakasondola omo ndondeka bakatsema twamabasabira n’emisabe eyiri ng’eyo yikabaletera endundi. Omukwenda Paulo abya inianasi ekyo. Mwahandika ati: “Nage, munyisabire, oMungu ambe ebinywa by’eribugha omugulu ngakumbula obuno bwage omo bulume-lume eriminyisya abandu b’erikumbo lyʼEngulu Yowene.” (Efe. 6:19) Ko bine bitya na munabwire kundi tuwite abaghala betu bangyi abakasondola omo ndondeka abakakolera Yehova n’omuhwa. Twamabisaba Yehova tuti abawatikaye omo mubírí wabo, tukabya itwamabakangya olwanzo.

17-18. Ni mighulu yahi yo twanganasabwamo erisaba embere sy’abandi, kandi ngambe itwibuka mwatsi wahi?

¹⁷ Hakanayira itwasabwa erimanira abandi b’omo musabe. Eky’erileberyako, mwali wetu oyukasondola efunzo yiwe anganasaba oghundi mwali wetu oyulyamukwamanisya ati asabe. Oghundi mwali wetu oyo anganabya isyasi omw’igha yo ndeke, neryo anganasombola erilabya omusabe w’omwiso. Ekyo ikikendileka iniaminya eby’erihira omo musabe ebilebirye omw’igha.

¹⁸ Mughala wetu anganasombolwa busana n’erisaba oko muhindano w’omubírí w’eritulira kutse ow’endeko. Abaghala betu abakahabawa akanya ako, litolere ibibuka omuhindano ng’alebiryeki. Omusabe si y’enzira y’erihana endeko kutse erilabya emilaghe. Oko mihindano mingyi y’endeko esyodakika itano syo sihirirweho busana n’olwimbo n’omusabe, neryo siritolere omughala wetu oyukasaba iniabugha “binywa…bingyi” kutsibu-tsibu amabya iwo w’erimbere.​—Mat 6:7.

19. Niki kyo kikendituwatikya eribya itunayiteghekire oko kiro kya Yehova eky’eritswera?

¹⁹ Litolere itwayira omusabe mo mwatsi w’embere omo ngebe yetu, kusangwa ekiro kya Yehova eky’eritswera kinemuseghera hakuhi. Oko mwatsi oyo, Yesu mwabugha ati: “Nikwa mutegaye emigulu yosi, nʼerisaba, mutoke eribana akagala kʼeribala emyatsi yosi eyi eyikasonda erihika, nʼerihangana embere syʼOmugala wʼOmundu.” (Luka 21:36) Inga, erisaba butumbya likandileka obwikirirya bwetu ibwawata n’eribya itunayiteghekire oko kiro ky’oMungu eky’eritswera ekiri hakuhi.

20. Ebinywa byetu byangabya biti ng’obukwa obukakumba ndeke?

²⁰ Twamabighaki? Tukalangira ekihembo ky’omusabe mo ky’obughuli bunene. Emyatsi y’omughaso munene eyo twangabya tukasabira y’eyilebirye erisonda lya Yehova. Kandi tukasima Yehova busana na Mughala wiwe n’oBwami bwiwe. Tukasabira n’aBakristo balikyetu. Na kandi, twanganasaba busana n’ebyo tulaghireko kinya-mubiri n’ebyangatuwatikya eribya n’obwikirirya obuwatire. Omughulu tukalengekanaya kutsibu oko by’erihira omo misabe yetu, tukakanganaya ko tukalangira ekihembo ky’omusabe mo ky’obughuli. Ebinywa byetu ibikendibya ng’obukwa obukakumba ndeke embere sya Yehova​—‘obutseme’ okw’iye.​—Emi. 15:8.