Omulaghe owo Yesu abya akakangirirya abya mulaghe w’obuholo. Aliwe kiro kighuma mwabwira abakwenda biwe ati: ‘Simuganiraye muti nasa n’erileta Obuholo omo kihugho; mondasa erileta Obuholo, nikwa omuyali. Kusangwa nasa n’erikatisania omundu n’ise, n’omwali na nyinya wuwe, na mwaliana na nyinyi-byala wuwe.’ (Mat. 10:34, 35) Yesu asond’ibugha atiki?

Yesu syabya asondire erighabania ebihanda, aliwe abya asi ngoko amakangirirya wiwe anganaleka ebihanda ibyaghabana. Neryo, abanzire eribya bigha ba Kristo n’eribatisibwa litolere ibaminya ngoko kyanganahika abatunga babo ibatatsemesibwa n’eriyisogha lyabo. Bamaby’endereribwa n’omwanze kutse oghundi mundu w’oko kihanda oyut’ikirirye ikyanganabakalako erisighala bataleghula oko makangirirya wa Kristo.

EBiblia ikabwira Abakristo yiti ‘babye n’obuholo oko bandu bosi.’ (Rom. 12:18) Aliwe amakangirirya wa Yesu anganabya ng’“omuyali” omo bihanda bilebe. Eki kikabya omughulu omundu mughuma omo kihanda akaligha amakangirirya wa Yesu abandi ibaghaniregho. Ekyo kyamabibya, abandu b’omo kihanda ibobene-bene bakayiyira mo “esyonzigu” sy’oyuk’igha ekwenene.​—Mat. 10:36.

Abigha ba Kristo abali omo bihanda ebighabane omo myatsi y’ekisomo, oko ndambi silebe kikatolera ibayisogha nga bakenditsemesya Yehova na Yesu kutse nga bakenditsemesya ab’oko kihanda kyabo. Eky’erileberyako, abatunga abat’ikirirye banganasondekania eribakasa erikola oko kisendebele kilebe ky’ekisomo. “Aho likatolera ibayisogha nga bakenditsemesya ndi.” Yesu mwabugha ati: “Oyo wanzire ise kutse nyinya kwilaba ngye syanyitolere.” (Mat. 10:37) Eribugha ekwenene, Yesu syabya akasond’ibugha ati eritolera eribya mwigha wiwe, litolere abigha biwe ibanza ababuti babo bo kuke. Aliwe, abya akakangania ngoko litolere erihira obuli kindu omo mwanya wakyo. Abatunga abat’ikirirye bamabitwendererya busana n’erikolera Yehova, situlyumbaya eryanzabo, aliwe tukaminya ngoko olwanzo lwetu oko Yehova lo lutolere ilwabya embere.

Ahate eritika-tika, ery’endereribwa n’abandu b’ekihanda kyanganaluma kutsibu. Aliwe, abigha ba Yesu bakibuka ebinywa biwe bino: “Omundu oyuteheka [omuti wiwe w’amaghali] n’erinyikwama sianyitolere.” (Mat. 10:38) Omo bindi binywa, Abakristo bakalangira ery’endereribwa n’ab’oko kihanda mo maligho agho abigha ba Yesu bakaligha eriyiyiniako. Kandi, bakayiketera ngoko abatunga babo abat’ikirirye bakasyabinduka n’eryanza eryigha emyatsi eyiri omo Biblia.​—1 Pet. 3:1, 2.