1-2. Yehova abiritukingulira enzira y’eringira omo kihanda kiwe ati, kandi busanaki?

YEHOVA abiritukokya eribya omo kihanda ky’abaramya biwe. Ekyo ka kikatsemesaya! Abali omo kihanda kiwe ekyo ni bandu ababiriyiherera oko Mungu kandi abawite obwikirirya omo ndihi eyikabohola ya Mughala wiwe. Tuli omo kihanda ky’obutseme. Tuwite engebe eyuwene lino, kandi tuli n’obutseme kundi tuwite amaha w’erisyabyaho kera na kera​—omo lubula kutse oko kihugho Paradiso.

² Kundi atwanzire, Yehova mwatukingulira enzira y’eringira omo kihanda kiwe, n’omo kyanabya kikalire okwiye erikola atya. (Yoa. 3:16) ‘Mutwaghulwa omo bughuli.’ (1 Kor. 6:20) Erilabira endihi eyikabohola, Yehova mwaleka ikyatokekana okwitwe eribya n’obwira obuwene naye. Tuwite olukengerwa lw’eribirikira omundu mukulu kulenga abosi omo kihugho n’omo kyanya kyosi mo Thatha. Kandi ngoko tulyalangira omo mwatsi owalaba, Yehova yo Thatha oyuwene kulenga abosi.

3. Twanganayibulya amabulyo wahi? (Lebaya n’akasanduku ‘ Yehova Ananiasi?’)

³ Ng’omuhandiki mughuma w’eBiblia, twanganayibulya: ‘Nasyaliha Yehova yoki busana n’ebibuya byosi ebyo abirinikolera?’ (Esyo. 116:12) Ekisubiryo oko libulyo eryo kyeki: sihali ekyo twangaliha Thatha wetu w’elubula. Aliwe olwanzo lwiwe okwitwe lukatukuna erimwanza. Omukwenda Yoane mwahandika ati: “Tukanza kusangwa oMungu mwatsuka eritwanza.” (1 Yoa. 4:19) Twangakangania Thatha wetu w’elubula ngoko tumwanzire omo nzira syahi?

4. Ngoko kiri omo Yakobo 4:8, busanaki litolere itwayikasa eriyitunda hakuhi na Yehova?

⁴ Yehova anzire itwayitunda hakuhi naye n’eribya tukakania naye. (Soma Yakobo 4:8.) Akatuhana ati ‘tuyitsinge omwisaba,’ kandi akatuhulikirira mughulu wosi. (Rom. 12:12) Syaliluha erituhulikirira kandi akabya inyanayiteghekire erituhulikirira. Netu tukamuhulikirira omwisoma eKinywa kiwe, eBiblia, n’erisoma ebitabu ebikatuwatikaya eriowa eBiblia yo ndeke. Kandi tukamuhulikirira omughulu tukakwama emihindano y’eKikristo yo ndeke. Abana eribya bakakania n’ababuti babo likabawatikaya eribya bira babo. Kutya, eribya tukakania na Yehova likatuwatikaya eriyitunda hakuhi naye.

5. Twangatasyuwania tuti emisabe yetu?

⁵ Terilengekania oko mibere eyo ukakanayomo n’oMungu. Yehova anzire itwamubwira ebyosi ebiri oko mutima wetu omo musabe. (Esyo. 62:8) Litolere itwayibulya eribulyo lino: ‘Emisabe yaghe ni y’endatandata, nganabya nga ngasubirira omo myatsi mighumerera, kutse nganabugha ebinywa ebikalua omo mutima?’ Twikirirye ngoko wanzire Yehova yo kutsibu, kandi ngoko wanzire obwira bwaghu naye bubye ibunawatire. Busana n’ekyo, litolere iwabya ukakania naye mughulu wosi. Umubwire ebyo utewangabwira abandi. Umubwire ebikakutsemesaya n’ebikakuhanga-hangaya. Uyiketere ngoko wanganamusaba obuwatikya.

6. Litolere itwakolaki tutoke erisighala hakuhi na Thatha wetu w’elubula?

⁶ Twamanza tuti tusighale hakuhi na Thatha wetu w’elubula, litolere itwabya tukamusima mughulu wosi. Tukalighirana n’omuhandiki w’esyonyimbo oyw’ahandika ati: “Wabiritukolera emibírí mingyi y’eriswekera, iwe [Yehova Mungu] waghe, wabirituteghekanirya emyatsi mingyi, sihali omundu oyuli ng’awe. Kumbe namalenga eriahulayo sinangatoka erighanzayo!” (Esyo. 40:5) Situlikanganaya erisima emwisi syetu lisa, tukakanganaya erisima lyetu omo binywa n’omo mikolere. Ekyo kikaleka itwabya mbaghane kutse tofauti n’abandu bangyi munabwire. Tuli omo kihugho ekiri mw’abandu abatekanganaya erisima oko ebyo oMungu akabakolera. Kwenene, abandu eribya abatesima ni kighuma ky’oko myatsi eyikakanganaya ngoko tuli omo “biro by’enyuma-nyuma.” (2 Tim. 3:1, 2) Isitwanatabya ng’abandu abo!

7. Yehova anzire itwakolaki, kandi busanaki?

⁷ Ababuti sibalianza abana babo eribya bakasokongolana, aliwe bakanza ibabya bira. Kutya, Yehova naye anzire abaramya biwe ibabya n’obwira obuwene. Kwenene, erianzana likaleka itwaminyikala mo Bakristo b’ekwenene. (Yoa. 13:35) Tukalighirana n’omuhandiki w’esyonyimbo oyw’ahandika ati: “Ni ky’eriswekera, kandi ni kibuya, abandu b’[oMungu] bamikala haghuma ng’abana abasubeneko!” (Esyo. 133:1) Erianza abaghala n’abali betu tukakanganaya Yehova ngoko tumwanzire. (1 Yoa. 4:20) Kikatsemesaya kutsibu eribya omo kihanda ky’abaghala n’abali betu ‘abanzene n’abali n’emitima eyihehere’!​—Efe. 4:32.

8. Erikwamana ne 1 Yoane 5:3, eky’erimbere ekikatukuna eryowa Yehova niki?

⁸ Yehova akasaba abana eriowa ababuti babo, netu akatusaba erimwowa. (Efe. 6:1) Tutolere itwamwowa kundi iye yo Muhangyiki wetu, yukaleka itwabyaho, kandi ni w’amenge kulenga abandu bosi. Aliwe, eky’erimbere ekikaleka itwowa Yehova ni busana tumwanzire. (Soma 1 Yoane 5:3.) Hali emyatsi mingyi eyikaleka itwowa Yehova, aliwe syalitukasa erimwowa. Yehova mwatuha ekihembo  ky’obwiranda bw’eriyisombolera, busana n’ekyo akatsema omughulu tukamwowa busana n’erimwanza.

9-10. Busanaki ni ky’omughaso eriminya ebyalayiro by’oMungu n’erisikyabyo?

⁹ Ababuti banzire abana babo ibabya omo buholo. Kyo kikaleka ibahiraho ebyalayiro ebilebirye emighendere, ebyangaletera abana babo b’endundi. Abana bamakwama ebyalayiro ebyo, bakakanganaya ngoko bayiketere ababuti babo kandi ngoko babasikirye. Ni ky’omughaso munene kutsibu eriminya ebyalayiro bya Thatha wetu w’elubula n’erisikyabyo omo ngebe yetu. Omughulu tukasikaya ebyalayiro ebyo, tukakanganaya Yehova ngoko tumwanzire n’erimusikya, kandi tukabana endundi. (Isa. 48:17, 18) Aliwe, abatekwama ebyalayiro by’oMungu, oko nduli bakayiletera ebitsibu.​—Gal. 6:7, 8.

¹⁰ Twamabya n’engebe eyikatsemesaya Yehova, tukayiteghaya oko myatsi eyangatuhutalya kinya-mubiri, omo mutima, n’eyangatsandya obwira bwetu n’oMungu. Yehova anasi ebyuwene ebyo tuyitaghire. Mwali wetu oyw’ikere e Amerika oyukahulawamo Aurora, akabugha ati, “Ninasi ngoko eriowa Yehova likaleka mughulu wosi engebe yetu iyabya iyinuwene.” Ekyo ka ni kwenene! Naghu wanabiribana endundi busana n’erikwama obusondoli bwa Yehova ob’olwanzo?

11. Omusabe akatuwatikaya ati?

¹¹ Omusabe akatuwatikaya eribya bowa, nibya n’omughulu kikalire erikola tutya. Hakanabya endambi ikyatukalako eriowa Yehova  kundi situhikahikene, aliwe litolere mughulu wosi itwayikasa erimwowa. Omuhandiki w’esyonyimbo mwalirira oMungu ati: “Unyihanganaye omo kirimu ky’eriowa.” (Esyo. 51:12) Mwali wetu Denise, omupainia w’omughulu wosi, akabugha ati, “Omughulu kinikalireko erisikya ekyalayiro kya Yehova, ngasaba oMungu anihe amaka w’erikola ebyuwene.” Twikirirye ngoko mughulu wosi Yehova akasubiraya oko misabe eyiri ng’eyo.​—Luka 11:9-13.

12. Erikwamwana n’Abanya Efeso 5:1, tutolere itwakolaki?

¹² Soma Abanya Efeso 5:1. Kundi tuli “bana banze” ba Yehova, tukayikasa erimugherererya kutse erimwigha. Tukigha emibere yiwe omwibya n’olwanzo, olukogho, n’erighanyira abandi. Omughulu abandu abatasi oMungu bakalangira emighendere yetu eyuwene, kyanganabakuna erisonda erigha bingyi okwiye. (1 Pet. 2:12) Ababuti Bakristo batolere ibakolera abana babo ngoko Yehova akatukolera. Bamakola batya, abana babo bangananza eribya ibibene n’obwira obuwene na Thatha wetu w’elubula.

13. Twangakolaki tutoke eribya n’obutubaha?

¹³ Omwana akayihalamba busana na thatha wiwe kandi akatsema erikania naye. Netu kutya, tukayihalamba busana na Thatha wetu w’elubula, Yehova, kandi twanzire abandi nabo ibigha erimuminya. Tukayowa omo mitima yetu ng’oMwami Dawidi, oyw’ahandika ati: “Nasyayihalamba omo [Yehova].” (Esyo. 34:2)  Nikwa omundu amabya ini mukutu? Angabana obutubaha bw’ati? Tukabana obutubaha omughulu tukalengekanaya oko butseme obo Yehova angabya nabo twamakania okwiye, n’endundi eyo abandi bangabana omwigha erimuminya. Yehova akendituha obutubaha obo tuyitaghire. Mwawatikya abalikyetu b’oko kighonye ky’erimbere eribya n’obutubaha, netu akendituwatikya.​—1 Tes. 2:2.

14. Busanaki ni ky’omughaso erikola oko mubírí w’eriyira abigha?

¹⁴ Yehova syawite akasololo, kandi akatsema omughulu tukakanganaya abandi b’olwanzo, n’omo bangabya omo mibere yahi kutse n’omo bangabya ba hayi. (Emib. 10:34, 35) Enzira nguma eyuwene eyo twangakanganiriamo abandi b’olwanzo ly’eribatulira engulu mbuya. (Mat. 28:19, 20) Eritulira abandi b’engulu mbuya lyangaberereryaki? Abakatuhulikirira banganuwania engebe yabo lino n’eribya n’amaha w’erisyabana engebe ya kera na kera omo biro ebikasa.​—1 Tim. 4:16.

15-16. Ni myatsi yahi eyikaleka itwabya n’obutseme?

¹⁵ Yehova ni Thatha w’olwanzo, neryo anzire ekihanda kiwe ikyabya n’obutseme. (Isa. 65:14) N’omo twangabya itunemulaba omo maligho, hali myatsi mingyi eyangaleka itwabya n’obutseme lino. Eky’erileberyako, twikirirye kwenene ngoko Thatha wetu w’elubula atwanzire kutsibu. Tuwite eriminya ly’ekwenene ery’eKinywa ky’oMungu, eBiblia. (Yer. 15:16) Kandi tuli omo kihanda ky’embaghane ikirimo abandu abanzire Yehova, abanzire ebyalayiro biwe, kandi abanzene.​—Esyo. 106:4, 5.

¹⁶ Twangabya n’obutseme mughulu wosi kundi twasi ngoko engebe yikasyuwana kutsibu omo biro ebikasa. Twasi ngoko hakisiya hake Yehova inyalusyaho obubi bosi, kandi ngoko omo butabali b’oBwami bwiwe, ekihugho kikendisyaswabya Paradiso. Tuwite amaha awuwene ngoko abandu ababirihola bakendisyalubuka n’eritasyasungana n’abandu abo babya b’anzire. (Yoa. 5:28, 29) Ka bukasyabya butseme bunene! N’eky’omughaso munene, twikirirye kwenene ngoko omo biro ebiri hakuhi obuli mundu omo lubula n’oko kihugho akendisyaha Thatha wetu w’olwanzo olukengerwa, eripipa, n’eriramya eryo atolere.