1. Lyabya lisabireki embere omundu ayakanaye n’omwami we Perse?

TERILENGEKANIA oko kino: tubughe tuti wikere omo kihugho kye Perse hamabilaba emyaka hakuhi 2 500. Uwite omwatsi mulebe owo wanzire erikania n’omwami w’ekihugho, neryo iwaya eyiri obwikalo bw’omwami e Susani. Isiwangatahika ahali omwami amabya isyatakulighira. Wamahika ahali omwami isyetakubirikira iwanganaherya engebe yaghu!​—Esiteri 4:11.

2. Yehova anzire itwayowa tuti omughulu tukakanaya naye?

² Tukasima kutsibu kundi Yehova syali ng’omwami we Perse oyo! Yehova ni mukulu kutsibu kulenga omwami wosi-wosi w’oko kihugho, aliwe akatukokaya erikania naye oko ndambi yosi-yosi. Anzire itwakania naye butsiryubaha. Eky’erileberyako, n’omo Yehova awite amena w’olukengerwa nga Muhangyiki Mukulu, Mutoki w’Ebyosi, na Mutabali Mukulu, akatukokaya erikania naye omw’ikolesya ekinywa “Thatha” ekyo tukakolesaya kangyi-kangyi. (Mat. 6:9) Tutsemire kutsibu erilangira ngoko Yehova anzire itwayowa hakuhi naye!

3. Busanaki tusingene eribirikira Yehova mo “Thatha,” kandi omwatsi ono akendikania okuki?

³ Tusingene eribirikira Yehova mo “Thatha,”​—kundi yo nzuko y’engebe yetu. (Esyo. 36:9) Kundi Yehova yo Thatha wetu, litolere itwamwowa. Twamabikola ebyo akatusaba, itukendisyabana emiyisa mibuya. (Ebr. 12:9) Emiyisa eyo yikahiramo engebe y’erikota, omo lubula kutse oko kihugho. Tunemutsemera n’eyindi miyisa munabwire. Omo mwatsi ono tukendilangira ekikakanganaya ngoko Yehova ni Thatha wetu w’olwanzo lino n’ekyangaleka itwikirirya ngoko syendisyatulekerania omo biro ebikasa. Tutsuke erilangira ekyangaleka itwikirirya ngoko Thatha wetu w’elubula atwanzire kutsibu kandi ngoko atutsomene.

4. Busanaki abandu balebe bakalengekanaya bati kikalire erilangira Yehova mo Thatha wabo?

⁴ Kinakalire okwiwe erilangira Yehova mo Thatha waghu? Omughulu abandu balebe bakayilinganisaya na Yehova, bakalengekanaya bati si b’omughaso embere siwe. Sibaliligha ngoko oMungu Mutoki w’ebyosi anganatsomana obuli mughuma wa kubo. Aliwe, Thatha wetu w’olwanzo syanzire tukabya n’amalengekania ng’ayo. Abirituha engebe kandi anzire itwabya n’obwira naye. Mwabya abikania oko mwatsi w’ekwenene ono, omukwenda Paulo mwakangania abandu be Atene ababya bakamuhulikirira ngoko “oMungu syali hali oko buli mundu.” (Emib. 17:24-29) OMungu anzire obuli mughuma w’okwitwe iniayowa buholo eriyitunda hakuhi naye ngoko omwana syalisagha eriyitunda hakuhi na baba wiwe oyumwanzire n’erimutsomana.

5. Ebyo mwali wetu Mukristo ayilangirira bikatw’ighisayaki?

⁵ Kyanganakala oko bandi erilangira Yehova mo Thatha wabo, kundi abo thatha wabo mubabakangania olwanzo luke kutse mubatanzwa n’eritsomanwa n’ahake. Langira ebyo omwali wetu Mukristo akabugha: “Thatha waghe abya mutsibu kundu. Omughulu n’atsuka erigha eBibilia mukyanikalako eriyowa hakuhi na Thatha w’elubula. Aliwe, nabere naminya Yehova, emyatsi muyabinduka.” Naghu ukanayowa utya? Wamabya iwukanayowa utya, isiwabunika mutima. Endambi yikendisyahika iwatsuka erilangira Yehova mo Thatha oyuwene kundu.

6. Ngoko kiri omo Matayo 11:27, ni nzira nguma yahi eyo Yehova akolesaya erituwatikya erimulangiramo Thatha wetu w’olwanzo?

⁶ Enzira nguma eyo Yehova akolesaya erituwatikya erimulangiramo Thatha w’olwanzo, mwaligha ebinywa bya Yesu n’emyatsi ey’akola bihandikawe omo Biblia. (Soma Matayo 11:27.) Yesu mwakangania omo nzira eyihikahikene emibere ya Thatha wiwe neryo abya asingene eribugha ati: “Oyo wamanilangira iniamalangira Thatha.” (Yoa. 14:9) Kangyi-kangyi Yesu inyakakanaya oko Yehova nga Thatha. Omo syo Enjili ini sisa, Yesu mwakolesya ekinywa “Thatha” hakuhi ngendo 165 akakania oko Yehova. Busanaki Yesu mwakania oko Yehova ngendo nyingyi atya? Ekighuma eky’oko ebyaleka ni busana abya anzire abandu ibikirirya ngoko Yehova ni Thatha w’olwanzo.​—Yoa. 17:25, 26.

7. Tukighaki oko Yehova omwilangira ngoko akolera Mughala wiwe?

⁷ Langira ebyo tukigha oko Yehova omwilangira ngoko akolera mughala wiwe Yesu. Mughulu wosi Yehova inyakahulikirira emisabe ya Yesu. Abya isyalihulikirira emisabe ya Yesu lisa aliwe inyakasubiraya kuyo. (Yoa. 11:41, 42) N’omo alaba omo bitsibu ebiri biti, Yesu mwayilangirira olwanzo n’obuwatikya bwa Thatha wiwe.​—Luka 22:42, 43.

8. Yehova mwawatikya Yesu omo nzira syahi?

⁸ Yesu abya inyanasi ngoko Thatha wiwe yo nzuko kandi yo muteya w’engebe yiwe omughulu abugha ati: “Nyiriho busana na Thatha.” (Yoa. 6:57) Yesu mwayiketera Thatha wiwe yo kutsibu, na Yehova mwamuha ebyo abya alaghireko kinya-mubiri. Eky’omughaso kutsibu, Yehova mwawatikya Yesu erisighala mutaleghula okw’iye.​—Mat. 4:4.

9. Yehova mwakangania Yesu yw’ati ngoko abya Thatha w’olwanzo n’oyumutsomene?

⁹ Kundi Yehova ni Thatha w’olwanzo, mwakola kutsibu Yesu aminye ngoko Thatha wiwe anemumuwatikya. (Mat. 26:53; Yoa. 8:16) N’omo Yehova mwatateya Yesu oko ebyosi ebyangamuhutalya, Mwamuwatikya erihanda omutima. Yesu abya inianasi ngoko ebitsibu ebyo angalabiremo byangabere by’omughulu  mukuhi. (Ebr. 12:2) Yehova mwakangania ngoko anzire Yesu omwihulikirira emisabe yiwe, omwimuha ebyo alaghireko, omwimukangirirya, n’omwimuwatikya. (Yoa. 5:20; 8:28) Tulangire ngoko Thatha wetu w’elubula akatuwatikaya ngoko awatikaya Yesu.

10. Ngoko kiri omo Esyonyimbo 66:19, 20, Yehova akakanganaya ati ngoko atwanzire?

¹⁰ Yehova akahulikirira emisabe yetu. (Soma Esyonyimbo 66:19, 20.) Syanzire tukamusaba ngendo nge, aliwe akatubwira ati tumusabe butumbya. (1 Tes. 5:17) Twanganasaba oMungu wetu oko ndambi yosi-yosi n’omo twangabya hayi. Syangaluha erituhulikirira; mughulu wosi akabya inyanayiteghekire erituhulikirira. Tukabya twaminya ngoko Yehova akahulikirira emisabe yetu, tukamwanza kutsibu. Omuhandiki w’esyonyimbo mwabugha ati ‘nyanzire Yehova kusangwa akahulikirira erisaba lyaghe.’​—Esyo. 116:1.

11. Yehova akasubiraya ati oko misabe yetu?

¹¹ Thatha wetu syalihulikirira emisabe yetu lisa, aliwe akasubiraya kuyo. Omukwenda Yoane akatukanganaya ndeke-ndeke ngoko “Obuli kindu ekyo tukabulaya omwisonda liwe, akatwowa.” (1 Yoa. 5:14, 15) Kwenene, Yehova anganasubirya oko misabe yetu omo nzira eyo tutalengekenie. Anasi ebyo tulaghireko oko kwenene, busana n’ekyo oko sindi ndambi syalisubiraya oko ndambi eyo tulwe twanzire; akanza itwalindirira.​—2 Kor. 12:7-9.

12-13. Thatha wetu w’elubula akatuha ebyo tulaghireko omo nzira syahi?

¹² Yehova akatuha ebyo tulaghireko. Akakola eby’anzire obuli thatha inyakola. (1 Tim. 5:8) Akaha abana biwe ebyo balaghireko kinya-mubiri. Syanzire tukahangya-hangya busana n’akalyo, esyongyimba kutse busana n’obwikalo. (Mat. 6:32, 33; 7:11) Kundi ni Thatha w’olwanzo, Yehova abiriyiteghekania erituha ebyosi ebyo tukendisyalaghako omo biro ebikasa.

¹³ Eky’omughaso munene, Yehova akatuha ebyo tulaghireko bunya-kirimu. Erilabira Ekinywa kiwe, abiritubwira iye nga nindi, erisonda liwe oko bindu ebyo ahangyika, busanaki mwatuhangyika, n’ebikasyabya omo biro ebikasa. Mwakangania kw’atutsomene omughulu akolesaya ababuti betu kutse oghundi mulikyetu erituwatikya erimuminya. Kandi anemulola embere erituwatikya eribya bira biwe erilabira abasyakulu b’endeko abawite olwanzo n’erilabira abaghala n’abali betu abakulire bunya-kirimu. Kandi, Yehova akatukangiriraya erilabira emihindano yetu y’eKikristo, eyo tukighira haghuma n’abaghala n’abali betu. Omo nzira esyo twamabikaniako n’omo sindi, Yehova akakanganaya ngoko ni Thatha oyutsomene obuli mughuma w’okwitwe.​—Esyo. 32:8.

14. Yehova akatubegheraya busanaki, kandi akakola ekyo ky’ati?

¹⁴ Yehova akatubegheraya. Itwe situli nga Yesu kundi situhikahikene. Neryo omwitubegherya, Thatha wetu w’olwanzo akatukunga omughulu kyamatolera. Ekinywa kiwe kikatubwira kiti: “Yehova akakunga oyo anzire.” (Ebr. 12:6, 7) Yehova akatukunga omo nzira nyingyi. Eky’erileberyako, omwatsi mulebe owo tulyasoma omo Kinywa kiwe kutse owo tulyahulikirira oko mihindano anganaleka itwaminya ngoko litolere itwabindula emikolere n’amalengekania wetu. Kutse itwabana obuwatikya obo tulaghireko erilabira abasyakulu b’endeko. N’omo angakolesya enzira yahi eritukunga, mughulu wosi Yehova akatukunga busana n’olwanzo.​—Yer. 30:11.

15. Yehova akatuteghaya omo nzira syahi?

¹⁵ Yehova akatuwatikaya tutoke eriyiyinia omughulu tukalengawako. Ngoko thatha w’olwanzo akawatikaya abana biwe omughulu bakalaba omo maligho, Thatha wetu  w’elubula Yehova akatuwatikaya omughulu tukalengawako. Akatuha ekirimu kiwe kibuyirire kituteghaye oko kindu kyosi-kyosi ekyangatsandya obwira bwetu naye. (Luka 11:13) Kandi Yehova akatuwatikaya omughulu tukahanga-hangaya. Eky’erileberyako, akatuha amaha awuwene. Amaha awo tuli nagho omo biro ebikasa akatuwatikaya eriyiyinia omughulu tukalaba omo maligho. Terilengekania oko kino: n’omo twangabana amaligho awali ati, Thatha wetu w’olwanzo akendisyabughaho ekindu kyosi-kyosi ekikatwaghalaya. Amaligho wosi awo tukalabamo, ni w’omughulu mukuhi, aliwe emiyisa eyo Yehova akatuha ni ya kera na kera.​—2 Kor. 4:16-18.

16. Omughulu Adamu aghana eriowa Thatha wiwe w’olwanzo muhabyaki?

¹⁶ Tukayilangirira olwanzo lwa Yehova omo nzira eyo asohamo olubanza olwahika omughulu Adamu aghana erimw’owa. Omughulu Adamu aghana eriowa Thatha wiwe w’elubula, mwaherya omwanya wiwe n’ow’olubuto lwiwe omo kihanda ky’obutseme kya Yehova. (Rom. 5:12; 7:14) Aliwe, Yehova, mwasondya enzira y’eriwatikyamo abana ba Adamu.

17. Adamu abere abighana eriowa oMungu, Yehova mwalaghaki aho n’aho?

¹⁷ Yehova mwasuyira Adamu, aliwe mwalagha eriwatikya olubuto lwa Adamu. Mwalagha aho n’aho ati abandu abakowa bakendisyasuba omo kihanda kiwe. (Enz. 3:15; Rom. 8:20, 21) Yehova mwakola ekyo erilabira endihi eyikabohola y’omwana wiwe mwanzwa, Yesu. Omwiherera omwana wiwe busana netu, Yehova mwakangania ngoko atwanzire kutsibu.​—Yoa. 3:16.

18. Busanaki twanganikirirya ngoko Yehova syalileka eritughanza mo bana biwe n’omo twangakola erilola erikalire?

¹⁸ N’omo tuli bandu abatahikahikene, Yehova anzire itwabya omo kihanda kiwe, kandi syaliyowa  nga kikalire okwiye erituwatikya. Twanganamukosera, aliwe mughulu wosi Yehova akabya inyanayiketere ngoko tukendikokotya obwira bwetu naye. Yesu mwakangania ngoko Yehova anzire abana biwe kundu omwilabira olughano kutse ehadisi ey’omwana muhererya. (Luka 15:11-32) Omo lughano olo, thatha abya inyane n’amaha ngoko omwana wiwe akendisyasubula. Omughulu omwana asuba eka, thatha mwamukokya n’obutseme bunene. Twamabya imutwakola erilolo erikalire, aliwe itwabindula omutima wetu, twanganikirirya ngoko Thatha wetu w’olwanzo Yehova anayiteghekenie eritasyatukokya omo kihanda kiwe.

19. Yehova akendisyakokotya ati ebitsibu ebyaluira oko Adamu?

¹⁹ Thatha wetu akendisyakokotya ebitsibu byosi ebyaluira oko Adamu. Enyuma sy’erilolo lya Adamu, Yehova mwayisogha erisombola omo bandu, abandu 144,000 abakasyabya bami n’abahereri omo lubula haghuma na Mughala wiwe. Yesu haghuma n’abakasyatabala naye bakendisyawatikya abandu abakowa eribya abahikahikene omo kihugho kihya-kihya. Bamasighala bowa enyuma sy’erilengwako ely’enduli, oMungu akendisyabaha engebe ya kera na kera. Neryo Thatha wetu akendisyatsema erilangira ekihugho kikusulamo abaghala n’abali biwe abahikahikene. Kwenene akendisyabya mughulu w’obutseme bunene!

20. Yehova abirikangania ngoko atwanzire omo nzira syahi, kandi tukendighaki omo mwatsi ow’akwamire?

²⁰ Yehova abirikangania ngoko atwanzire kundu. Ni Thatha oyuwene. Akahulikirira emisabe yetu n’erituha ebyo tulaghireko kinya-mubiri na bunya-kirimu. Akatubegheraya n’erituwatikya. Kandi akendisyatukolera emyatsi eyuwene omo biro ebikasa. Kikatutsemesaya eriminya ngoko Thatha wetu atwanzire kandi ngoko atutsomene! Omo mwatsi ow’akwamire tukendigha ngoko itwe bana biwe twangakangania ngoko tukasima busana n’olwanzo lwiwe.