Eriha ehibwana hy’ebisikwiti
NICK oyo wikere omo muyi w’e Oregon, eAmerika mwahandika ati: “Oko nzuko y’omwaka 2014, monatsuka eribya ngalenderya ehibwana hyaghe hibiri hy’omo kiharo kikulu ky’omuyi ekyo nabya nyikeremo.” “Abimiri ibabeghere eribya omo kiharo kikulu ky’omuyi, ibanimene oho lutambi oko syoprezantware syabo. Ibakabya ibanambite ndeke, kandi babya ibabeghere erikerya n’erikangania obuli mundu y’obusu b’obutseme.
“Abimiri babya ibakatsemera abandu kandi ibakatsemera n’ehibwana hyaghe hibiri. Kiro kighuma, Elaine, oyo wabya inianimene hakuhi n’eprezantware, mwaha ehibwana hyaghe hibiri hy’ebisikwiti. Enyuma syaho, obuli ndambi eyo twabya tukahika hakuhi n’eprezantware, ehibwana ihikanza eriseghera hakuhi n’aBimiri busana n’erihabwa ebisikwiti byahyo.’
“Emisi milebe moyalaba. Ehibwana mohyatsemera ebisikwiti byahyo, naghe monatsemera emikania mikuhi-mikuhi haghuma n’aBimiri. Aliwe sinabya nanzire erikania nabo bingyi. Nabya n’emyaka eyilabire oko 70, kandi nabya n’eritika-tika oko ebyo aBimiri babya bikirirye. Kundi nabya inabiribunika mutima busana n’ebisomo bingyi by’eKikristo, monalengekania nyiti eriyighisya eBiblia ingyuwene lyo ryuwene.
“Oko mughulu oyo, monalangira abandi Bimiri omo biharo mbiriri-mbiriri by’omuyi, iban’imene ahali esyoprezantware. Nabo babya ibakatsemera abandu. Ebiro byosi ibakasubiraya oko mabulyo waghe erilabira eBiblia, n’ekyo mokyaleka inahika okw’iyiketerabo kutsibu.
“Kiro kighuma, Elaine mwanyibulya ati, ‘Unikirirye ngoko esyonyama ni kihembo ekyo twahabawa n’oMungu?’ Munasubirya nyiti, ‘Inga, nyinikirirye!’ Neryo Elaine mwanyisomera Isaya 11:6-9. Eritsuka aho, monatsemera erigha eBiblia, aliwe erihika aho nabya isindinanza erimya kutse erisoma ekitabu kyosi-kyosi ky’aBimiri.
“Omo biro ebyakwama, monatsemera emikania mikuhi-mikuhi aliwe eyiri n’omughaso haghuma na Elaine na Brent mwira wiwe. Mobanyihana bati nyisome ekitabu kya Matayo erihika oko ky’Emibiri ya Bakwenda nyitoke eriminya eribya Mukristo w’ekwenene nga ni bughambuki. Neryo monakwama erihano eryo. Mohatalaba biro bingyi, monaligha erigha eBiblia haghuma na Brent na Elaine. Aho ituli omo kati-kati k’omwaka 2016.
“Ingalindirira n’omuhwa ekiro kyaghe ky’erigha eBiblia obuli yenga n’emihindano oko Kisenge ky’oBwami. Monayilangira m’omundu w’emiyisa mingyi n’obutseme bunene busana n’erighisibwa ekwenene y’eBiblia. Enyuma sy’omwaka n’ebiro bike monabya Mwimiri oyubatisibwe. Lino omo lubwa lw’emyaka 79, nyiri n’erisima kutsibu ngoko nabiribana ekisomo ky’ekwenene. Yehova abirinyitsumula omw’inyingirya omo kihanda kiwe ky’omo kihugho kyosi.”
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
