ERIHANGYA-HANGYA lyanganabya ng’obulito bunene oko mutima wetu. (Emi. 12:25) Omwibyaho lyaghu unewatayowa muhanda busana n’erihangya-hangya? Unewatayowa nga siwangasyatoka erihanda omutima? Byamabya bitya, uminye ngoko ute iwuwene. Kyabirihikira abangyi bw’omwitwe eriyowa isibakiri n’akaghala, erihangya-hangya, n’eribunika mutima busana n’emyatsi mbiriri-mbiriri. Eky’erileberyako, abaghuma babiribya batsungi b’omulwere omo kihanda kyabo, abandi babiriholerwa n’omundu oyo banzire, n’abandi babiryaghalwa busana n’ekitsinduli kilebe. Nikwa niki kyo kyangatuwatikya erihanda omutima omughulu twamahangya-hangya? *

Eriyiteghererya kutsibu eky’erileberyako ky’oMwami Dawidi kyanganatuwatikya erigha bingyi oko mwatsi w’erihanda omutima omughulu twamahangya-hangya. Dawidi mwahikirwa n’emyatsi mingyi eyikalire omo ngebe yiwe, nibya n’engebe yiwe moyabya omo bwiko. (1 Sam. 17:34, 35; 18:10, 11) Ekyawatikaya Dawidi erihanda omutima omughulu abya akahangya-hangya niki? Twangakwama tuti eky’erileberyako kiwe?

Dawidi mwahikirwa n’amaligho mangyi oko mughulu mughumerera. Terilengekania oko ebyamuhikira omughulu abya akasagha oMwami Sauli oyo wabya akasonda erimwita. Omughulu Dawidi haghuma n’abalume biwe basuba eZiklagi bakalua oko malwa, mobeya esyonzighu isyabiriba ebindu byabo, erihisya amanyumba wabo, n’erinyegha ebihanda byabo. Dawidi mwayiwata ati? “Dawidi n’abandu ababya naye, mobasumba emilenge yabo, mobalira, erihika okw’iluha ndeke.” Abandu ba Dawidi mobamutomekera erihangya-hangya kusangwa mobabugha bati “bamwite omo mabwe.” (1 Sam. 30:1-6) Omo mughulu mughumerera oyo Dawidi mwahikirwa n’emyatsi isatu eyikalire: Ekihanda kiwe kyabya omo bwiko, abalume biwe bamasonda erimwita, n’oMwami Sauli abya inianemumukwamirira. Terilengekania Dawidi ng’amwabya n’erihangya-hangya lingahi!

Enyuma syaho Dawidi mwakolaki? Aho n’aho Dawidi “mwayibanira maka omo Yehova oMungu wuwe.” Dawidi anganabya imwakola atya omo nzira yahi? Tunasi ngoko Dawidi abya abeghere erisaba Yehova y’obuwatikya n’erilengekania ngoko Yehova abya akamuwatikya embere. (1 Sam. 17:37; Esy. 18:2, 6) Dawidi mwaminya ngoko atolere iniabulya Yehova ng’asondire iniakola ati, neryo mwabulya Yehova ng’atolere iniakolaki. Dawidi abere abibana obusondoli bwa Yehova, mwalw’iniakola aho n’aho. Busana n’ekyo, Yehova mwamutsumula iye haghuma n’abandu biwe kandi mobalamya ebihanda byabo n’erisubana n’ebindu byabo. (1 Sam. 30:7-9, 18, 19) Wanamalangira emyatsi isatu eyo Dawidi akola? Mwasaba Yehova y’obuwatikya, mwalengekania oko ebyo Yehova abya iniabirimukolera, n’erikwama obusondoli bwa Yehova. Twangakwama eky’erileberyako kya Dawidi kyo tuti? Tulebaye esyonzira isatu.

1. Usabe. Oko ndambi yosi-yosi eyo twamatsuka erihangya-hangyamo, twanganasaba Yehova y’obuwatikya n’amenge. Erimubwira ebyosi ebikatuhanga-hangaya lyanganatuwatikya eriyowa ndeke. Kutse twanganasaba omusabe mukuhi wo bukutu-kutu erikwamana n’emibere eyo tulimo oko ndambi eyo. Obuli ndambi eyo tukasaba Yehova y’obuwatikya, tukakanganaya ngoko tuyiketere Iye nga Dawidi oyo wabugha ati: “Yehova ni muhanganiri waghe n’ahabambire haghe. Omulamya wage ni Mungu wage n’omuhanganiri wage ogo nga sayira.” (Esy. 18:2) Omusabe, kwenene akanatuwatikaya kwehi? Mwali wetu omupainia oyukahulawamo Kahlia akabugha ati:  “Ngabya nabisaba, ngayowa omo buholo. Omusabe akangwatikaya eribya n’obulengekania obuli ng’obwa Yehova, n’eriwatya eriyiketera Yehova yo kutsibu.” Kwenene, omusabe ni kihenbo ekiri n’obutoki ekyo Yehova abirituha ekikatuwatikaya erihanda omutima omughulu erihangya-hangya likatuhikira.

2. Ulengekanaye ngoko Yehova akuwatikaya embere. Omughulu ukalengekanaya oko myatsi eyabirikuhikira, wangan’ibuka ngoko mowatoka erihanda omutima w’omo maligho busana n’obuwatikya bwa Yehova? Neryo tukabya twalengekania ngoko Yehova atuwatikaya kandi ngoko awatikaya n’abandi baghombe biwe ba kera, tukayowa omo buholo bunene n’eriyiketera Yehova likakula kutsibu. (Esy. 18:17-19) Omusyakulu w’endeko oyukahulawamo Joshua akabugha ati: “Nyiwite oko liste ry’emisabe eyo Yehova abirinyisubiryako.” “Ekyo kyabiringwatikya eryibuka emighulu eyo nasabamo Yehova y’omwatsi mulebe naye mwamba ekyo nabya nyilaghireko.” Inga, omughulu tukalengekanaya buli oko ebyo Yehova abiritukolera, tukabana akaghala kahya-kahya k’erihanda omutima omughulu twamahikirwa n’amalengekania w’erihangya-hangya.

3. Ekyo utolere erikola. Embere tuyisoghe eky’erikola omo mwatsi mulebe, twaganakwesa-kwesa omo Kinywa ky’oMungu tutoke eribana m’obusondoli obutolere kutsibu. (Esy. 19:7, 11) Abandu bangyi babirilangira ngoko omughulu bakakwesa-kwesa emyatsi y’oko risako lilebe, bakatoka eriminya ndeke ngoko erisako eryo rihulikirirene n’engebe yabo. Omusyakulu w’endeko oyukahulawamo Jarrod akabugha ati: “Erikwesa-kwesa emyatsi likanyiwatikaya eriminya oko risako kw’emyatsi mingyi n’eriminya ekyo Yehova akambwira. Ekyo kikanyiwatikaya erikirirya kwenene ebyo ngasoma neryo ngatoka erikwama obusondoli bwiwe.” Omughulu tukasondekanaya obusondoli bwa Yehova b’omo Masako n’erikwamabo, kikatolobera eribya n’obuholo n’obutseme omughulu tukahanga-hangaya.

Dawidi mwaminya ngoko amasonda erihanda omutima omughulu abya akahangya-hangya, abya alaghire oko buwatikya bwa Yehova. Mwatsemera kutsibu obuwatikya bwa Yehova neryo ekyo kyo kyaleka iniabugha ati: “OMungu wage akaleka inasingana. Iye ni Mungu oyukamba amaka.” (Esy. 18:29, 32) Twanganalangira amaligho wetu ng’akalire kutsibu kandi nga syangatahwa kutse nibya nga sitwangatatoka erihanda omutima. Aliwe busana n’obuwatikya bwa Yehova, twanganahanda omutima omo buli mwatsi wosi owakalire kutsibu! Kwenene, omughulu tukasaba Yehova y’obuwatikya, omughulu tukalengekanaya oko ebyo abiritukolera, n’omughulu tukakwama obusondoli bwiwe, twanganayiketera ngoko akendituha akaghala n’amenge ebyo tulaghireko tutoke erihanda omutima omughulu tukahanga-hangaya!