1. Niki kyo kikatuletera obutseme bunene?

 YEHOVA anzire itwabya n’obutseme. Tukyasi tutya kundi obutseme ni kitsweka ky’oko kighúma ky’ekirimu kiwe kibuyirire. (Gal. 5:22) Kusangwa erihitya likaletera obutseme bunene kwilaba erihabwa, tukabya n’obutseme bunene omughulu tukakola kutsibu omo mubírí w’eritulira n’eriwatikya abaghala n’abali betu b’omo nzira mbiriri-mbiriri.​—Emib. 20:35.

2-3. (a) Ngoko kikanganibwe omo Abanya Galatia 6:4, ni myatsi ibiri yahi eyikendituwatikya eritendiherya obutseme omo mubírí wa Yehova? (b) Tukendikania okuki omo mwatsi ono?

² Omo Abanya Galatia 6:4, omukwenda Paulo akakanaya oko myatsi ibiri eyikendituwatikya eritendiherya obutseme. (Soma.) Eky’erimbere, litolere itwaha Yehova y’ekyo tuwite ekyuwene kundu. Twamabibya tukamuha ekyo tuwite ekyuwene kulenga, itukendibya n’obutseme. (Mat. 22:36-38) Eky’akabiri, situtolere eriyilingirirania n’abandi. Ekyosi-kyosi ekyo twangatoka erikola erikwamana n’emibere y’omubiri wetu, ebyo twabirigha, kutse obutoki bwetu, litolere itwasima Yehova. Ebyosi ebyo tuwite, yo watuhabyo. Oko lundi luhande, abandi bamabibya bakabana ebighúma bingyi kutulenga omo kitswe kilebe ky’omubírí w’eritulira, litolere itwatsema ngoko banemukolesya obutoki bwabo erihalamba Yehova, butsira eriyikangania kutse busana n’erisondekania endundi yabo ibibene-bene. Neryo, omo mwanya w’eribya tukasingana nabo, litolere itwayikasa erighira oko ky’erileberyako kyabo.

³ Omo mwatsi ono tukendilangira ekyangatuwatikya omughulu tukabunika mutima kundi sitwangatoka erikola ekyo twanzire omo mubírí owo tukakolera Yehova. Kandi tukendilangira ngoko twangakolesya obutoki bosi-bosi obo twangabya nabo n’ekyo twang’igha oko ky’erileberyako ky’abandi.

4. Niki kyo kyangaleka abaghuma b’omw’itwe ibabunika mutima? Ulete eky’erileberyako.

⁴ Abaghuma b’oko baghombe ba Yehova sibangatoka erikola ebyosi ebyo banzire erimukolera busana n’erikekeluha kutse busana n’obulwere, neryo ekyo kyanganababuna mutima. Emibere eyo yo yahikira Carol. Mwabana olusunzo lw’eriyakolera eyiri obwagha bw’abatuliri. Oko mughulu oyo, mwasondola esyofunzo 35 n’eriwatikya abangyi eriyiha oko Yehova n’eribatisibwa. Omubírí w’eritulira wa Carol mwabuta ebighúma! Nikwa mwalwala kutsibu, n’endambi nene iniakalabaya y’omo nyumba yiwe. Carol akabugha ati: “Busana n’obukoni bwaghe sinangatoka erikola ebyo abandi bakatoka erikola, aliwe ngalangira nga sinyiri mutaleghula ng’abo. Sinangatoka erikola ekyosi ekyo nanzire erikola, n’ekyo kikanibuna mutima.” Carol anzire iniakolera Yehova y’ebyosi ebyo angatoka. Kwenene, ekyo kitolere erisimwa! Twangan’ikirirya ngoko oMungu wetu oyukakwira abandu b’obulighe akatsema kundi anemukola ekyuwene kundu ekyo angatoka.

5. (a) Litolere itwibukaki twamabibunika mutima busana n’ebyo tutetwangatoka erikola? (b) Ngoko kikanganibwe oko syopitsa, omo nzira yahi m’omughala wetu abya akakola ekyangatoka ekyuwene kundu omo mubírí wa Yehova mw’ebiro byosi?

⁵ Eribunika mutima lyamabya irikanakuhikira oko sindi ndambi busana n’ebyo utewangatoka erikola, uyibulaye utya: ‘Yehova akanyisabaki?’ Ekyo uwiteko ekyuwene kundu​—ekyosi-kyosi ekyo wangatoka omo mibere yaghu ya lino. Lengekanaya oko kino: Mwali wetu oyuwite emyaka 80 akabunika mutima kundi syangasyatoka erikola bingyi omo mubírí wa Yehova ngoko abya akakola omughulu abya n’emyaka 40. Akalengekanaya ati nomo anemukola ekyosi ekyo angatoka, sikiritsemesaya Yehova. Eyo ni na kwenene? Ulengekanaye kukyo. Mwali wetu oyu amabya imwaha Yehova y’ekyuwene kundu eky’abya awite omughulu abya n’emyaka 40, na lino anemumuha ekyuwene kundu omo myaka 80, syalyataleka n’ahake erikola ekyangatoka. Twamatsuka erilengekania tuti omubírí wetu syatosire eritsemesya Yehova, litolere itwayibukya ngoko Yehova yukayisogha ebitosire erimutsemesya. Twamabikola ekyo twangatoka ekyuwene kundu, Yehova iniakenditubwira ati: “Mwamakola ndeke!”​—Ulinganisaye na Matayo 25:20-23.

6. Twang’ighaki oko ky’erileberyako kya Maria?

⁶ Eribya n’obutseme likoloba kutsibu twamabya tukalengekania kutsibu okw’ebyo twangatoka erikola omo mwanya w’erilengekania okw’ebyo tutetwangatoka erikola. Lengekanaya oko mwali wetu oyukahulawamo Maria, oyukwire obukoni obukamukakiraya erikola bingyi omo mubírí wa Yehova. Oko nzuko mwabunika mutima n’eriyowa nga syawite mughaso. Aliwe mwalengekania oko mwali wetu w’omo ndeko oyutetoka erilua omo ngyingo busana n’obukoni, neryo Maria mwayisogha erimuwatikya. Maria akabugha ati: “Monayiteghekania eribya ngayatulira haghuma naye erilabira etelefone n’esyobaruha. Obuli ngendo eyo twabya tukakola haghuma, ingasuba eka inyinatsemire kandi inyinayowire ndeke kundi mongatoka eriwatikya mwali wetu.” Netu kutya twanganakanyia obutseme bwetu twamabya tukalengekania kutsibu okw’ebyo twangatoka erikola omo mwanya w’erilengekania okw’ebyo tutetwangatoka erikola. Aliwe, twangabugha tutiki twamabya itwanganakola bingyi okwaho kutse itukakola ndeke omo muhanda mulebe w’omubírí wa Yehova?

7. Omukwenda Petero mwaha Abakristo b’erihano lyahi eryangawatikya?

⁷ Omo baruha yiwe y’erimbere eyasondolawa n’akaghala k’oMungu, omukwenda Petero mwabwira aBakristo balikyabo ati bakolesaye obuli kihembo n’obutoki obo bawite busana n’erihimba abaramya balikyabo. Petero mwahandika ati: “Obuli mundu abirihabwa olusunzo [kutse ekihembo nwt] l’omusindo olukalua oko Mungu.  Mukolerane omo lusunzo olo ng’abateya b’olusunzo musindo-musindo oMungu akatuha.” (1 Pet. 4:10) Siritolere itwayikakirya erikolesya obutoki bwetu bosi busana n’erisagha tuti abandi bakenditutsura kutse bakendibunika mutima. Twamabiyikakirya erikola ekyosi ekyo twangatoka busana n’erisagha ngoko abandi bakendiyowa, aho itukendibya itwamaghana eriha Yehova y’ekyo tuwite ekyuwene kundu.

8. Erikwamana na 1 Abanya Korinto 4:6, 7, busanaki litolere itwayikakirya okw’iyihalamba busana n’obutoki bwetu?

⁸ Litolere itwakolesya obutoki bwetu bo ndeke-ndeke, aliwe litolere itwayiteya tukasyabya mw’emiyiheko busana nabo. (Soma 1 Abanya Korinto 4:6, 7.) Eky’erileberyako, wanganabya iwukabana bighúma binene omw’itsukisya esyofunzo sy’eBiblia sy’eka w’abandu. Siritolere iwayikakirya erikolesya obutoki obo! Aliwe ni ky’omughaso eryibuka ngoko siritolere eriyihalamba busana nabo. Tubughe tuti omo biro byalaba mowayilangirire omwatsi owakatsemesaya omo mubírí w’eritulira n’eritsukisya efunzo y’eBiblia. Wanzire kutsibu erikanirya ab’omo kikuto kyaghu ky’amahubiri b’omwatsi oyo. Aliwe, omughulu w’erihindana omo kikuto, oghundi mwali wetu anemukania eby’alyayilangirira akaha omundu y’egazeti. Mwakasighira omundu y’egazeti; iwe mukatsukisaya efunzo. Ukendiyira wuti? Unasi ngoko ekyo ulyayilangirira kikendisikya emitima y’ab’omo kikuto kyaghu ky’amahubiri, aliwe wanganasombola eribakanirya kukyo oko kandi katambi akatolere, kusangwa siwanzire omwali wetu oyulyasighira omundu y’egazeti akayowa nga syasi eritulira ngawe. Erikola utya n’ikangania obwenge. Aliwe nomo byangabya bitya isiwayikakiraya eritsukisya esyofunzo sy’eBiblia. Uwite obutoki​—ukolesayebo!

9. Litolere itwakolesya ebihembo byetu byo tuti?

⁹ Twibuke ngoko obutoki bosi-bosi obo twangabya nabo, ni kihembo ekyo Mungu atuha. Litolere itwakolesya ebihembo ebyo erihimba endeko butsira busana n’eriyikangania nga tulengire abandi. (Flp. 2:3) Omughulu tukakolesaya akaghala n’obutoki bwetu erikola erisonda ly’oMungu, tukabya n’ekikaleka itwabya n’obutseme​—butsira kusangwa tukakola bingyi kulenga abandi kutse kundi tukayikasa kulenga ibo, aliwe kundi tukakolesaya ebihembo byetu busana n’erihalamba Yehova.

10. Busanaki eriyilingirirania n’abandi siryuwene?

¹⁰ Omundu amatendiyiteya, inianganatoghera omo kitegho ky’erilingirirania eby’akatoka erikola ndeke n’ebyo oghundi atetoka erikola. Eky’erileberyako, mughala wetu mulebe anganabya iniakalabaya emikania yo ndeke. Obo b’obutoki obw’awite. Ibwa omo mutima wuwe, anganalengekania ati alengire oghundi mughala wetu oyute watoka  erilabya emikania yo ndeke. Aliwe, oghundi mughala wetu oyo anganabya iniasi erikokya abagheni bo ndeke, erikangirirya abana biwe, kute iniali n’omuhwa omw’itulira. Tukasima kundu eribya n’abaghala n’abali betu bangyi abali n’obutoki, abakakolesaya ebihembo byabo erikolera Yehova n’eriwatikya abandi!

11. Busanaki litolere itwayikasa erikwama eky’erileberyako kya Yesu?

¹¹ Nomo tunatolere eritendibya tukayilingirirania n’abandi, twanganabana endundi omw’ighira oko by’erileberyako by’abandi baghombe bataleghula ba Yehova. Eky’erileberyako ekyuwene ekyo twang’ighirako ni Yesu. Nomo tutahikahikene ngaye, twangan’ighira oko mibere yiwe eyuwene n’emyatsi mibuya eyakola. (1 Pet. 2:21) Tukabya twakola ekyosi ekyo twangatoka erikwama eky’erileberyako kiwe kyo ndeke, tukabya baghombe abuwene ba Yehova n’eribana ebighúma bingyi by’omo mubírí w’eritulira.

12-13. Twang’ighaki oko Mwami Dawidi?

¹² Omo Kinywa ky’oMungu muli eby’erileberyako bingyi by’abalume n’abakali abo twang’ighirako nomo banabya isibahika-hikene. (Ebr. 6:12) Terilengekania oko Mwami Dawidi, oyo Yehova ahulamo “mundu oyo nyanzire” kutse, ngoko eyindi mbindulikania y’eBiblia yikabindula ebinywa ebyo, “omundu oyukanyitsemesaya kutsibu.” (Emib. 13:22) Aliwe, Dawidi syabya ahika-hikene. Nibya mwakola amalolo awakalire. Nomo bine bitya, ni ky’erileberyako ekyuwene okw’itwe. Busanaki? Kusangwa abere ahabulwa, mwatasonda eriyilwirako. Omo mwanya w’ekyo, mwaligha erihano erikalire ery’ahabawa, kandi mwayikubya b’omo erilua omo mutima busana n’eby’akola. Busana n’ekyo, Yehova mwamughanyira.​—Esy. 51:3, 4, 10-12.

¹³ Twangan’ighira oko Dawidi omw’iyibulya tuti: ‘Ngabya nahabwa erihano ngayiwata nyiti? Nganalw’inaligha amakosa waghe, kutse nganasonda eriyilwirako? Nganatsweba abandi bo luba-luba? Nganayikasa kutsibu eritendisubirira amakosa waghe?’ Wanganayibulya amabulyo awali ng’ayo ukasoma omo Biblia m’omwatsi w’abandi balume n’abakali bataleghula. Amaligho wabo anasosire awaghu? Mobakangania emibere yahi eyuwene? Ukasoma oko buli mughombe, uyibulaye uti: ‘Nangabya nyiti ng’omughombe mutaleghula wa Yehova oyu?’

14. Twangabana ndundi yahi omw’iyiteghererya abaramya balikyetu?

¹⁴ Twanganabana endundi omw’iyiteghererya abandi baramya balikyetu, abalwana n’abakulire. Eky’erileberyako, wanganalengekania oko mundu mulebe w’omo ndeko yenyu oyukayiyinaya oko buligho bulebe​—kwa muhwa erihatikanwa n’abakatamba nabo erikola ebituwene, ery’endereribwa omo kihanda, kutse obukoni? Wanganabana oko  mundu oyo kw’emibere, eyuwene eyo wanganza erikulya? Omw’iyiteghererya eky’erileberyako kiwe ekyuwene, wangan’igha esyonzira esyangakuwatikya eriyiyinia omo maligho waghu. Tukasima kutsibu eribya n’eby’erileberyako by’obwikirirya ebiri ng’ebyo, ebyo twang’ighirako​—kwenene oyo ni mwatsi owangaleka itwatsema!​—Ebr. 13:7; Yak. 1:2, 3.

15. Paulo mwaleta erihano lyahi eryangatuwatikya erilola embere eribya n’obutseme omo mubírí owo tukakolera Yehova?

¹⁵ Erisangira oko buholo n’obughuma omo ndeko, litolere obuli mughuma w’okw’itwe inialeta ekyawite ekyuwene kundu. Tulebaye eky’erileberyako ky’Abakristo b’oko karne k’erimbere. Babya ibawite ebihembo n’emibírí mbiriri-mbiriri. (1 Kor. 12:4, 7-11) Aliwe ekyo mokitabaletera erisingana n’erighabana. Omo mwanya w’ekyo, Paulo mwabwira obuli mughuma ati akole ekyosi ekyabya kitolere busana “n’erihi[mba nwt] omubiri wa Kristo.” Paulo mwahandikira Abanya Efeso ati: “Obuli kitsuko kyamakola haghuma kikaleka omubiri gosi iniakola ndeke n’erikanya omo lwanzo.” (Efe. 4:1-3, 11, 12, 16) Abakola batya, mobasangira okw’ikulya obuholo n’obughuma omo ndeko​—emibere eyo tunemuyilangirira n’omo syondeko syetu sya munabwire.

16. Litolere itwayisogha kundu erikolaki? (Abaebrania 6:10)

¹⁶ Uyisoghe kundu eritendibya ukayilingirirania n’abandi. Omo mwanya w’ekyo, wighire oko ky’erileberyako kya Yesu n’eriyikasa erikwama emibere yiwe. Ubane endundi y’omo eby’erileberyako by’obwikirirya ebiri omo Biblia n’ebya lino. Omughulu unemulola embere erikola ekyuwene kulenga, uyiketere ngoko Yehova “syalikola kitatunganene, syangibirirwa omubiri wagu.” (Soma Abaebrania 6:10.) Ulolaye embere eribya n’obutseme omw’ikolera Yehova ighun’ikirirye ngoko akatsema akakulangira ukakola ekyosi ekyo wangatoka busana n’erimutsemesya.