Omo mibere eyo, endeko yitolere iyalangira endwa ya kera ngoko yabirihwaho omughulu omulume amalunga buhya-buhya n’erilangira endwa nyihya-nyihya nga yitolere erikwamana n’emighambo y’ eLeta. Eriminya ekikaleka itwabugha tutya, tulebaye ebyo Yesu abugha okw’ikatulana n’erilunga buhya-buhya.

Ngoko kisakirwe omo Matayo 19:9, Yesu mwakangania omwatsi mughuma musa owangaleka endwa iyahwa. Mwabugha ati: “Omundundi oyukakomola omukali wuwe, bite busana n’erisingira, akahikya ogundi mukali, iniakasingira.” Omo binywa bya Yesu, tukighamo (1) ngoko erisingira lisa w’omwatsi mughuma musa owo aMasako ahamulire eribughaho endwa omw’ikatulana na (2) ngoko omulume oyukakatulana n’omukali wiwe ahate ekikaleka ekihulikirirene n’aMasako n’erilunga n’oghundi mukali akakola obusingiri. *

Ebinywa bya Yesu bikakanganaya biti omulume oyukasingira n’erikatulana n’omukali wiwe ali n’obwiranda bw’erilunga buhya-buhya erikwamana n’aMasako? Si biri bitya omo mibere yosi. Omulume amakola obusingiri, omukali, oyute na kosa omo batahenie, akasombola nga akendighanyira omwira wiwe kutse iyehe. Amaghana erimughanyira n’emighambo y’eLeta iyaligha erikomolana eryo, ababiri bosi bali n’obwiranda erilunga buhya-buhya, emyatsi eyilebirye erikatulana yabihika oko nduli.

Oko lundi luhande, owoko batahenie oyute na kosa angananza erisighala omo ndwa na mwira wiwe, kandi anganabwira omwira wiwe ngoko anzire erimughanyira. Ibwa byangabya biti, omulume oyulyasingira amaghana obughanyiri bwa mukali wiwe neryo iniayasonda n’eribana ehamuli y’erikatulana erikwamana n’emighambo y’eLeta oko luhande lwiwe iyuwene? Kundi omukali anzire iniamughanyira n’endwa yabo iyalola embere, omulume oyo syali n’obwiranda erikwamana n’aMasako obw’erilunga buhya-buhya. Amabiyitsinga erikwama emibere eyitahulikirirene n’aMasako n’erilunga n’oghundi mukali omughulu ate n’obwiranda erikwamana n’aMasako obw’erikola atya, iniamakola obundi busingiri. Kandi aho abasyakulu b’endeko ibakenditolera ibakola akatunga akakatswera erisoha erilolo eryo.​—1 Kor. 5:1, 2; 6:9, 10.

Omughulu omulume oyute n’obwiranda bw’erilunga buhya-buhya erikwamana n’aMasako akatasyalunga, endeko yikalangira yiti endwa ya kera n’endwa nyihya? Erikwamana n’aMasako, endwa ya kera ikinaminyikere mo ndwa? Owoko batahenie oyute na kosa akine n’ehamuli y’erighanyira kutse erighana omwira wiwe wa kera? Endeko yikendilangira endwa nyihya-nyihya mo y’obusingiri?

Omughulu wa Kera, endeko iyikalangira endwa nyihya-nyihya eyo mo y’obusingiri omughulu owoko batahenie oyute na kosa akineho, syalyahikibwa, kutse syalyatakola obusingiri. Aliwe, Yesu mwatabugha kinywa ky’oko owoko abatahenie oyute na kosa omughulu akanaya okw’ikatulana n’erilunga buhya-buhya. Omo mwanya w’ekyo, mwakangania ngoko omulume oyukakatulana n’omukali wiwe isyahamulirwe n’aMasako n’erilunga  n’oghundi, iniamakola obusingiri. Omo mibere eyo, erikatulana n’erilunga buhya-buhya, eryo Yesu akanayako likabya kwenene omulume ng’alyasingira, neryo likabughaho endwa ya kera.

Omughulu omulume akakatulana n’omukali wiwe n’erilunga buhya-buhya, omukali wiwe w’embere, oyute na kosa, syakiri n’obutoki bw’erimughanyira kutse erimughana. Busana n’ekyo, syakisabirwe erikola eriyisogha erikalire ly’eriminya nga akendighanyira kutse erighana omulume wiwe wa kera. Kandi, nomo owoko batahenie oyute na kosa mw’angabya iniabirihola kutse iyehe, iniabirilunga buhya-buhya kutse iyehe, kutse eribya iniabirisingira kutse iyehe, ebyosi ebyo sibyangabindula emibere eyo endeko yikalangiramo endwa nyihya-nyihya. *

Omo ky’erileberyako ekyo tulyakanayako oho ndata, omulume mwakasingira, neryo mobakakatulana. Byangabya biti omulume amabya isyatasingira aliwe mwakahika okw’ikatulana erikwamana n’emighambo y’eLeta n’enyuma syaho amalunga buhya-buhya n’oghundi mukali? Kutse byangabya biti omulume amabya imwatasingira embere sy’erikatulana aliwe mwasingira enyuma sy’erikatulana n’erilunga buhya-buhya nibya omukali wiwe inianayiteghekire erimughanyira? Omo by’erileberyako byosi ebi, erikatulana n’erilunga buhya-buhya, ni busingiri, neryo bukabughaho endwa ya kera. Endwa nyihya-nyihya y’endwa eyasibwe n’emighamo y’eLeta. Ngoko kikanibweko omo Tour de Garde ye kiro 15 oMwisi 2, 1980, akayani 31, “hatya abiribya omo ndwa nyihya-nyihya na kandi syangatwayo n’erisubira omukali wiwe wa kera; endwa ya kera moyahwere omughulu w’erikatulana, obusingiri, n’erilunga buhya-buhya.”

Eribindula emyowire yetu y’omwatsi oyu sibugha tuti aBakristo sibakilangire obubuyirire bw’endwa kutse sibakilangire obulito bw’erilolo ly’obusingiri. Omulume oyukakatulana n’omukali wiwe isihali ekikaleka ekihulikirirene n’aMasako n’erilunga n’oghundi mundu isyali n’obwiranda bw’erikola atya erikwamana n’aMasako atolere inialaba omo katunga akakatswera busana amakola obusingiri. (Oyo amatahania naye buhya-buhya amabya ini Mukristo, naye atolere inialaba omo katunga akakatswera busana n’obusingiri.) Nomo endwa nyihya-nyihya eyo siyitolere erilangirwamo y’obusingiri, kwenene siyitasikya ebyalayiro by’oMungu ebilebirye endwa, kandi omo myaka mingyi omulume oyo syangatolera erihabwa emibírí y’embaghane y’omo ndeko erihika omughulu ow’abandu bakasyaleka erihitana busana n’erilolo eryakola kera kutse erileka erimulangira nga syatolere erisikibwa. Embere sy’erimuha omubírí wosi-wosi, abasyakulu b’endeko batolere ibalengekania oko mibere ya lino y’omukali wiwe wa kera oyo wanganabya imwaghalwa busana n’obutsweka, n’oko bana bosi abakine balere abanganabya ibabirisighanibwa n’omulume oyo wakola erilolo.​—Mal. 2:14-16.

Erilangira ebitsibu ebikabya busana n’erikatulana n’erilunga buhya-buhya isihali ekikaleka ekihulikirirene n’aMasako, Abakristo bakabya n’amenge omw’ikwama emibere ya Yehova n’erilangira endwa mo yibuyirire.​—Omug. 5:4, 5; Ebr. 13:4.