1. Yesu mwabugha atiki oko bihembo by’elubula?

EMYATSI mibuya yosi siyirilolawako. Nibya, ebihembo eby’obughuli bunene, sibirilolawako. Omo makangirirya w’oko Kitwa, Yesu mwakania oko bihembo by’elubula ebiwite obughuli bunene kutsibu kulenga ebindu by’ekinya-mubiri. Neryo mwasyabugha ati: “Ahali ebindu byawe, ho mutima wawe asyabya nibya.” (Mt. 6:19-21) Omutima wetu akatukuna erikwamirira ebindu ebyo tukalangiramo by’obughuli kutse ebyo tutsomene kundu. Tukayibikira “ebindu elubula” omw’ibya n’erina eryuwene, kutse emighendere eyuwene embere sy’oMungu. Yesu mwabugha ati, ebihembo ng’ebyo sibyangaheribwa kutse er’ibwa n’ahake.

2. (a) Ngoko kiri omo 2 Abanya Korinto 4:17, 18, Paulo akatubwira ati tukwamirire emyatsi yahi? (b) Tukendikania okuki omo mwatsi ono?

² Omukwenda Paulo akatubwira ati ‘tukwame emyatsi eyitelolawako.’ (Soma 2 Abanya Korinto 4:17, 18.) Omo myatsi eyitelolawako eyo muli n’ebindu bibuya ebyo tukendisyabana omo kihugho kihya-kihya ekyo oMungu akasyaleta. Omo mwatsi ono, tukendikania oko bihembo bibuya bini ebitelolawako ebyo twanganabana erilua lino, ni bughambu, obwira obuwene haghuma n’oMungu, ekihembo ky’omusabe, obuwatikya bw’ekirimu kibuyirire, n’obuwatikya obukalua elubula obo tukabana omo mubiri wetu w’eritulira. Kandi tukendilangira nga twangakangania tuti ko tukasima Yehova busana n’ebihembo by’obughuli ebitelolawako ebyo.

3. Ekihembo kikulu ekitelolawako ni kyahi, kandi niki kyo kikatuwatikaya eribanakyo?

³ Ekihembo kikulu ekitelolawako b’obwira obuwene haghuma na Yehova Mungu. (Esyo. 25:14) Kikatokekana kiti oko Mungu eribya mwira w’abandu abatahikahikene kandi inyasighala inyanabuyirire? Ekyo kikatokekana busana n’endihi eyikabohola ya Yesu “oyukalusaya ebibi by’ekihugho” by’abandu bosi. (Yn. 1:29) Nibya, embere Yesu ahole, Yehova abya inyanasi ngoko Yesu akendisyasighala mutaleghula erihika oko luholo atoke erilamya abandu bosi. Ekyo kyo kyaleka oMungu inyabya mwira w’abandu ababyaho Kristo isyalyahola.—Rom. 3:25.

4. Teka eby’erileberyako by’abandu ababyaho embere sya Kristo ababya bira b’oMungu.

⁴ Terilengekania oko balume balebe ababya bira b’oMungu ababyaho embere sya Kristo. Abrahamu abya mulume oyo wabya n’obwikirirya obuwatire kutsibu. Emyaka eyilabire oko 1000 Abrahamu inyabirihola, Yehova mwamwahulamo “omwira” wiwe. (Isa. 41:8) Ekyo kikakanganaya ngoko omwira wa Yehova n’omw’angahola akabya inyakine mwira wiwe. Embere sya Yehova, Abrahamu abya ng’omundu oyuliho. (Lk. 20:37, 38) Oghundi ni Yobu. Yehova mwakania ndeke oko Yobu embere sy’abamalaika bosi. Yehova mwamwahulamo ‘omundu oyuhikene n’oyutunganene, oyukakenga oMungu n’erihutatira [erisagha] ebibi.’ (Yobu 1:6-8) Danieli naye mwakolera Yehova butaleghula omo myaka nga 80 omo kihugho ekirimo abatemuramaya. Yehobva mwamulangira ati? Ngendo isatu abamalaika mubakangania omusyakulu oyo ngoko ni mundu ‘oyukasimawa kutsibu’ n’oMungu. (Dan. 9:23; 10:11, 19) Twanganayiketera ngoko Yehova akakandira kutsibu erilubukya abira biwe bosi ababirihola.​—Yobu 14:15.

5. Omundu amanza eribya n’obwira obuwene na Yehova, litolere inyakolaki?

⁵ Munabwire ni bandu bangahi abatahikahikene bo bali n’obwira obuwene na Yehova? Ni bangyi kutsibu. Tukaminya ekyo kundi abandu bangyi abo; abalume, abakali, n’abana omo kihugho kyosi banemukangania omo mikolere yabo ngoko banzire eribya bira b’oMungu. “Obwira bwiwe [obwa Yehova] buli haghuma n’abatunganene.” (Emis. 3:32) Obwira obu bukatokekana busana n’erikirirya lyabo omo ndihi eyikabohola ya Yesu. Busana n’embanulo eyo, twanganabya bira ba Yehova kandi twanganayiherera okw’iye n’eribatisibwa. Omughulu tukakola tutya, tukayighunga oko syomiliyoni sy’Abakristo ababiriyiherera oko Mungu n’eribatisibwa abawite “obwira obuwene kundu” haghuma n’Omundu mukulu kutsibu omo kihugho n’ekyanya kyosi!

6. Twangakangania tuti erisima busana n’ekihembo ky’eribya n’obwira haghuma n’oMungu?

⁶ Twangakangania tuti ngoko tukalangira obwira bwetu haghuma n’oMungu mo bw’obughuli? Nga Abrahamu na Yobu, ababya bataleghula oko Mungu omo myaka mingyi, netu litolere itwalola embere eribya bataleghula​—n’omo twangabya itwabiribugha biro bingahi itunemukolera Yehova omo mughulu mubi ono. Nga Danieli, litolere itwalangira obwira bwetu haghuma n’oMungu mo bw’obughuli kwilaba engebe yetu. (Dan. 6:7, 10, 16, 22) Erilabira obuwatikya bwa Yehova, twanganayiyinia oko buli mwatsi owakalire owakatuhikira neryo itwatoka erisighala bira ba Yehova mughulu wosi.​—Flp. 4:13, NWT.

7. (a) Ngoko kiri omo Emisyo 15:8, Yehova akalangira emisabe yetu yo ati? (b) Yehova akasubiraya ati oko misabe yetu?

⁷ Ekindi kihembo ekitelolawako w’omusabe. Abira kundu bakabya ibanemubwirana emyatsi eyo bakalengekanayako kandi ngoko bakayowa.  Obwira bwetu haghuma na Yehova nabo ko bune butya kwehi? Inga! Yehova akakanaya netu erilabira eKinywa kiwe, kandi omo mwakatubwira amalengekania wiwe kandi ngoko akayowa. Tukakanaya naye erilabira omusabe, kandi twanganamubwira amalengekania wetu n’ebiri omo mutima wetu. Yehova akatsema erihulikirira emisabe yetu. (Soma Emisyo 15:8.) Yehova syalihulikirira emisabe yetu lisa, aliwe, kandi akasubaya kuyo. Hakanabya endambi inyasubirya kuyo ko luba. Oko sindi ndambi kyanganatolera erihatikana erisaba busana n’omwatsi mulebe. Aliwe, tukabya itunayiketere ngoko akenditusubirya oko mughulu owatolere kandi omo nzira eyuwene. Kwenene, oMungu anganasubirya oko musabe wetu omo nzira eyo tulue situlengekenie. Eky’erileberyako, omo kanya k’eribughaho ekitsibu kilebe, anganatuha amenge n’akaghala “k’eriyiyinia.”​—1 Kor. 10:13.

8. Twangakangania tuti erisima lyetu busana n’ekihembo ky’obughuli bunene eky’omusabe?

⁸ Twangakangania tuti erisima lyetu busana n’ekihembo ky’obughuli bunene eky’omusabe? Enzira nguma w’omughulu tukakwama erihano lya Yehova ely’erisaba “butsira eriumbya.” (1 Tes. 5:17) Yehova syalitukasa erisaba. Aliwe, akasikaya obwiranda bwetu bw’eriyisombolera kandi akatubwira ati ‘tuyitsinge omw’isaba.’ (Rom. 12:12) Neryo, twanganakangania erisima lyetu omw’isaba ngendo nyingyi ebiro byosi. Kandi, tutolere itwahira omo misabe yetu mw’ebinywa ebikakanganaya erisima lyetu n’eripipa Yehova.​—Esyo. 145:2, 3.

9. Mughala wetu mughuma akalangira omusabe w’ati, naghu ukalangiragho wuti?

⁹ Ebiro ebyo twabiribugha itunemukolera Yehova n’eriyilangirira esyonzira esyo akasubirayamo emisabe yetu, bikaleka itwalola embere erisima busana n’ekihembo ky’omusabe. Tukanaye oko mughala wetu Chris oyo wabirikolera omo mubiri w’omughulu wosi hamabilaba emyaka 47. Akabugha ati: “Ngatsema eribuka omo tututu nitoke erisaba. Kikatsemesaya erikania na Yehova omughulu eryuba likahuluka oko ndambi eyo obuli kindu kikatsemesaya erilangira! Ekyo kikanikuna erimusima busana n’ebihembo biwe byosi, erihirako n’ekihembo ky’omusabe. Neryo ngabya nabisaba omo kiro, ngaghotsera ininatsemire kandi inine n’obunya-mutima obw’erire.”

10. Busanaki litolere itwalangira ekirimu kibuyirire ky’oMungu mo kihembo ky’obughuli bunene?

¹⁰ Ekirimu kibuyirire ky’oMungu ni kindi kihembo ekitelolawako ekyo tutolere erilangira mo ky’obughuli. Yesu mwabugha ati tubye tukasaba Yehova atuhe ekirimu kibuyirire. (Lk. 11:9, 13) Erilabira ekirimu kiwe kibuyirire, Yehova akatuha obutoki​—nibya ‘n’obutoki obulengire obo tuwiteko.’ (2 Kor. 4:7; Emib. 1:8) Busana n’obuwatikya bw’ekirimu ky’oMungu, twanganayiyinia omo maligho wosi-wosi awo twangabana.

11. Ekirimu kibuyirire kyanganatuwatikya kiti?

¹¹ Ekirimu kibuyirire kyanganatuwatikya erikola emibiri eyo tukahabawa omo mubiri w’oMungu. Ekirimu ky’oMungu kyanganuwania obutoki bw’erikola obo tuli nabo. Tunasi ngoko ebighuma ebyo tukabana omo mubiri w’oMungu bikatokekana busana n’obuwatikya bw’ekirimu kiwe.

12. Ngoko kiri omo Esyonyimbo 139:23, 24, twanganasaba ekirimu kibuyirire kituwatikaye erikolaki?

¹² Kandi tukakanganaya ngoko tukalangira ekirimu kibuyirire mo ky’obughuli bunene omughulu tukasaba tuti kituwatikaye eriminya amalengekania n’esyongumbu nyibi esiri omo mutima wetu. (Soma Esyonyimbo 139:23, 24.) Twamabikola ekyo, Yehova inyanganatuwatikya erilabira ekirimu kiwe, eriminya amalengekania n’esyongumbu nyibi esiri omo mutima wetu. Kandi, twamabilangira omo mutima wetu mw’amalengekania awatuwene kutse esyongumbu nyibi, litolere itwasaba ekirimu ky’oMungu kituwatikaye erilwa n’amalengekania kutse esyongumbu esyo. Twamabikola ekyo, Yehova inyakendilangira ngoko sitwanzire erikola omwatsi wosi-wosi owangaleka iniumbya erituwatikya erilabira ekirimu kiwe kibuyirire.​—Efe. 4:30.

13. Ekyangatuwatikya eribya n’erisima linene busana n’ekirimu kibuyirire niki?

¹³ Erilengekania buli oko myatsi eyo ekirimu kibuyirire kinemukola omo biro byetu bino kyanganatuwatikya eribya n’erisima linene busana n’ekihembo ekyo. Embere sy’eriya elubula, Yesu mwabwira abigha biwe ati: ‘Mwasyabana obutoki omughulu ekirimu kibuyirire kyasyabahikako. Kandi mwasyabya  batuli b’omwatsi waghe . . . erihika oko nduli-nduli sy’ekihugho.’ (Emib. 1:8) Ekyo kyo kinemukoleka munabwire. Busana n’obuwatikya bw’ekirimu kibuyirire, abaramya ba Yehova kwilaba emiliyoni munani n’ekitswe babirihindanibwa erilua omo kihugho kyosi. Kandi, tuli omo paradiso y’obunya-kirimu kundi ekirimu ky’oMungu kikatuwatikaya eribya n’emibere mibuya kundu ng’olwanzo, obutseme, obuholo, omutima w’erilindirira, olukogho, obubuya, obwikirirya, omutima molo, n’eriyikakirirya. Emibere eyo yikahulawamo “ekighuma ky’ekirimu kibuyirire.” (Gal. 5:22, 23, NWT) Ekirimu kibuyirire ni ka kihembo kibuya kundu!

14. Ni buwatikya bwahi obutelolawako obo tukabana omughulu tuli omo mubiri w’eritulira?

¹⁴ Tuwite ekindi kihembo ekitelolawako “eky’erikola haghuma” na Yehova, Yesu, n’abamalaika. (2 Kor. 6:1) Tukakola haghuma nabo omughulu tuli omo mubiri w’eritulira. Paulo mwakania okw’iye haghuma n’abakasangira omo mubiri oyo ati: ‘tuli bakoli haghuma n’oMungu.’ (1 Kor. 3:9, NWT) Omughulu tukatulira, tukabya itwamakola haghuma na Yesu. Wibuke ngoko Yesu abere abibwira abigha biwe ati “muyire abigha oko bihanda byosi,” mwabugha ati: “Indi haghuma nenyu.” (Mt. 28:19, 20) Nikwa, tukakola n’abamalaika tuti? Ni muyisa munene erisondolwa n’abamalaika tukatulaghania “engulu yuwene y’erikota . . . oko bandu ab’ikere omo kihugho”!​—Erib. 14:6.

15. Teka eky’erileberyako eky’omo Biblia ekikakanganaya ngoko Yehova akatuwatikaya omo mubiri wetu w’eritulira.

¹⁵ Obuwatikya obukalua elubula obo, bukatuwatikaya erikolaki? Omughulu tukabiba embuto y’omwatsi w’oBwami, esindi mbuto sikatoghera omo mitima eyuwene neryo isyalasa. (Mt. 13:18, 23) Oyukaleka embuto eyo iyalasa n’erihetya ebighuma nindi? Yesu akabugha ati sihali oyo wangabya mwigha wiwe “Tata . . . atalyamuleta.” (Yn. 6:44) EBiblia yikateka eky’erileberyako oko mwatsi oyo. Ter’ibuka omughulu Paulo ahubiraya ekikumula ky’abakali ehihya w’omuyi we Filipi. EBiblia yikabugha oko Ludia, omughuma w’oko bakali abo, yiti: “Omukama mwamwibukya omo mutima wiwe eriowa emyatsi eyo Paulo abugha.” (Emib. 16:13-15) Nga Ludia, Yehova abirileta amamiliyoni w’abandi bandu.

16. Nindi yutolere eripipwa busana n’ebighuma ebyuwene ebyo tukabana omo mubiri w’eritulira?

¹⁶ Nindi yutolere eripipwa busana n’ebighuma ebyuwene ebyo tukabana omo mubiri w’eritulira? Paulo mwasubirya oko ribulyo eryo akahandikira endeko ye Korinto ebinywa bino: ‘Ingye nahera embuto, Apolo mutulira kuyo kw’amaghetse, nikwa oMungu yo waleka embuto iyalasa. Neryo omuheri w’embuto, n’oyukutulira kuyo kw’amaghetsi sibeghasaki. Ni Mungu yukalasayayo.’ (1 Kor. 3:6, 7) Nga Paulo, netu litolere itwapipa Yehova busana n’ebibuya byosi ebyo twangabana omo mubiri w’eritulira.

17. Twangakangania tuti ko tukasima busana ‘n’erikola haghuma’ n’oMungu, Kristo, n’abamalaika?

¹⁷ Twangakangania tuti ngoko tukasima busana n’ekihembo ‘ky’erikola haghuma’ n’oMungu, Kristo, n’abamalaika? Twanganakola ekyo, omw’ikola ekyosi-kyosi ekyo twangatoka eribwira abandi b’oko ngulu mbuya. Hali esyonzira nyingyi esy’erikoleramo omwatsi oyo; ng’eritulira “embere sy’abandu, kandi omo yindi nyumba n’omo yindi nyumba.” (Emib. 20:20) Abangyi bakatsemera eritulira kitsumbukirania. Bakabya bamahindana omundu oyo batasi, bakamuramukaya n’omuhwa n’eriyikasa eritsuka omukania naye. Omundu amabitsemesibwa n’omukania, omo menge abatuliri bakamubwira oko mwatsi w’oBwami.

18-19. (a) Tukutulira tuti oko mbuto y’ekwenene kw’amaghetse? (b) Teka eky’erileberyako ekikakanganaya ngoko Yehova awatikaya omwigha mulebe w’eBiblia.

 ¹⁸ Kundi tuli bakoli haghuma n’oMungu, siritolere itwahera lisa embuto y’ekwenene, aliwe kandi, litolere itutulira kuyo kw’amaghetse. Omundu amanzisibwa, tutolere itwayikasa erimusubira kutse itwasondya oghundi mundu oyo wangamusubira n’eritsukisya naye efunzo y’eBiblia. Erigha naye eBiblia likabya linemulola embere, tukatsema tukalangira ngoko Yehova akawatikaya omwigha w’eBiblia erihindula amalengekania.

¹⁹ Lengekanaya oko ky’erileberyako kya Raphalalani, omusaki oyo wikere omo Afrika y’endina. Mwatsemera emyatsi eyo abya ak’igha omo funzo yiwe y’eBiblia. Aliwe mukyamukalako eriligha ebyo Ekinywa ky’oMungu kikabugha oko mwatsi w’erikania n’abaholi. (Ebih. 18:10-12) Lyolo-lyolo, mwaleka oMungu abindule amalengekania wiwe. Ebiro bikalola embere, mwaleka obusaki, n’omo oyo wanabya omubiri ogho abya awite. Yo Raphalalani, oyuwite emyaka 60 munabwire akabugha ati: “Ngasima Abimiri ba Yehova bo kutsibu kundi mubaniwatikya omo nzira nyingyi; ng’eriniwatikya eribana oghundi mubiri. Ekikulu kutsibu, ngasima Yehova kundi mwanyiwatikya erikola esyombinduka omo ngebe yaghe. Lino niri Mwimiri wiwe oyubatisibwe kandi ninemusangira omo mubiri w’eritulira.”

20. Ukayisogha kundu erikolaki?

²⁰ Omo mwatsi ono, twamabikania oko bihembo bini eby’obughuli ebitelolawako. Ekihembo kikulu oko byosi lw’olusunzo lw’eribya n’obwira obuwene na Yehova. Ekyo kikaleka itwabana ebindi bihembo by’obughuli ebitelolawako​—erikania naye omo musabe, eriyilangirira obuwatikya bw’ekirimu kiwe kibuyirire, n’eribana obuwatikya obukasira elubula omo mubiri wetu w’eritulira. Tuyisoghe kundu erilola embere erikangania erisima busana n’ebihembo by’obughuli bunene ebitelolawako ebyo. Kandi, isitwaleka eribya tukasima Yehova busana n’eribya Mwira mubuya.