OMO mughulu w’aMalwa w’aKabiri w’ekihugho kyosi, omukulu mughuma w’abasuda b’obutabali bw’aBanazi mwabwira ekikumula ky’aBimiri ba Yehova omo mulenge w’erikarama ati “omw’inywe mwamabibanika omundu n’omughuma oyukaghana eriyalwa n’ekihugho ky’eBufarasa kutse eky’eBungereza, eryo inywe bosi imukitawa!” Nomo abaghala betu banabya hakuhi n’abasuda Banazi abawite oko syombundu, mohatabya mughala wetu n’omughuma oyo waleghula. Kwenene obo bwabya butubaha! Eki ni ky’erileberyako ekyuwene ekikakanganaya amalengekania agho aBimiri ba Yehova bali nagho oko malwa: Situlirigha erilwa oko malwa w’ekihugho kino. Nibya n’omughulu bakabugha bati bakenditwita, tukaghana eribya oko luhande losi-losi omo malwa w’ekihugho kino.

1. ABANDU B’OMUNGU BOSI BABYA OMO KIHUGHO KIGHUMA KISA

Kera, Yehova mwasombola abandu biwe erilua omo kihanda kighuma kisa​—eky’eIsraeli. Mwahula aBaisraeli mo “bindu byage erilua omo bihanda byosi.” (Eri. 19:5) Kandi oMungu mwahabo ekihugho kyabo-kyabo. Neryo omughulu oMungu abya akababwira ati bayalwe n’ebindi bihanda, isibaliyalwa kutse eriy’ita abaramya balikyabo. *

 Munabwire, abaramya b’ekwenene bakalua “oko buli kitunga, n’ebihanda byosi, n’abandu bosi, n’emibughe yosi.” (Erib. 7:9) Abandu b’oMungu bamabya bakaya oko malwa, ibakendibya bakalwa​—n’abaramya balikyabo kutse​—er’itabo.

2. YEHOVA IYUKAHAMULIRA ABAISRAELI ERIYALWA

Kera, Yehova iyukahamula omughulu, n’ekyangaleka iryatolera aBaisraeli ibaya oko malwa. Ng’eky’erileberyako, oMungu mwahamulira aBaisraeli eriberererya eritswera liwe ly’oko Banya Kanana, ababya basibwe ngoko bakaramaya esyombinga, ababiriyikoberya omo by’obusingiri, kandi ngoko bakaherera abana babo. Yehova mwabwira aBaisraeli ati balusaye emyatsi mibi eyo y’omo Kihugho eKyalaghalawa ikasyabatsandya. (Law. 18:24, 25) ABaisraeli babere bikala omo Kihugho eKyalaghawa, oko sindi ndambi oMungu inyakabalighira eriyalwa atoke eribalamya oko syonzighu esyabya sikaghalyabo. (2 Sam. 5:17-25) Aliwe, Yehova isyalirigha ati aBaisraeli bayihamulire eriyalwa. N’omughulu babya bakakola batya, ibakahikirawa n’ebitsibu ebikalire.​—Emig. 14:41-45; 2 Emy. 35:20-24.

Munabwire, Yehova syahamulire abandu eriya omo malwa. Abandu bakaya oko malwa busana n’erisonda lyabo-lyabo butsira ery’oMungu. Banganayalwa bakanza erinenehya ekihugho kyabo, kutse batoke eribana esyofranga, kutse busana n’erikanyirirya amalengekania malebe w’epolitike. Nikwa twangabugha tutiki oko bakabugha bati bakalwa omo rina ly’oMungu, kutse bati bakateghaya ekisomo kyabo, kutse bati bak’ita esyonzighu sy’oMungu? Yehova akendisyateya abaramya biwe n’eritoghotya esyonzighu siwe omo malwa w’omo biro ebikasa​—nagho w’amalwa w’eHarmagedoni. (Erib. 16:14, 16) Omo malwa ayo, emilondo y’oMungu yikasyabyamo abalwi biwe b’elubula basa, abandu abakamuramaya sibendisyabya omo milondo eyo.​—Erib. 19:11-15.

3. ABAISRAELI ISIBAL’ITA ABAKAKANGANAYA OBUTALEGHULA OKO MUNGU

Kera, Abaisraeli ibakaghanyira abakakanganaya obutaleghula oko Mungu n’er’ita abo oMungu abugha  ati batolere erihola basa. Tulebaye eby’erileberyako bibiri. Yehova nomo anahamulira aBaisraeli eritsandya omuyi w’eYeriko, mobat’ita Rahabu n’ekihanda kiwe busana n’obwikirirya bwiwe. (Yos. 2:9-16; 6:16, 17) Enyuma sy’aho, abikalani bosi b’omo muyi w’eGibeoni mobabalibwa kundi mobakangania ko bakengire oMungu.​—Yos. 9:3-9, 17-19.

Munabwire, omughulu abandu bakalwa, sibebalaya abakakanganaya obwikirirya. Nibya n’oko sindi ndambi, abandu abateko lubanza bak’itawa omo malwa w’ekihugho omughulu kikalwa n’ekindi.

4. ABAISRAELI IBASABIRWE ERIKWAMA EBYALAYIRO BY’OMUNGU EBILEBIRYE AMALWA

Kera, Yehova mwasaba abasuda Baisraeli erilwa erikwamana n’ebighenderwako biwe. Ng’eky’erileberyako, oko ndambi silebe oMungu inyakabwirabo ati omughulu mukayitunda hakuhi n’omuyi erilwa nagho “mwasyahabo omwatsi w’obuholo.” (Ebi. 20:10) Kandi Yehova mwabwira aBaisraeli ati ibateya obuyonzo omo syokambi syabo n’erikwama esyokanuni siwe sy’emighendere eyuwene. (Ebi. 23:9-14) Abasuda b’omo bihugho ebyabya bitimbire oko Israeli ibabeghere erinyegha abakali omo biharo ebyo balyakinda, aliwe Yehova iniakaghanaya aBaisraeli erikola batya. Omuisraeli isyangatayira omukali munyewa mo mukali wiwe hatehalaba omwisi mughuma enyuma sy’erikinda ekiharo ky’eyo alyamulusaya.​—Ebi. 21:10-13.

Munabwire, ebihugho bingyi byabiriligha ebyalayiro by’omo kihugho kyosi eby’erisondola amalwa. Ebyalayiro ebyo bihirirweho busana n’eriteya abikalani, aliwe eky’obulighe, ebihugho bikaketa ebyalayiro ebyo byo kangyi-kangyi.

5. OMUNGU INIAKALWIRA OKO BANDU BIWE KANDI INIAKABYA NABO OMO MALWA

Kera, Yehova iniakalwira oko Baisraeli kandi kangyi-kangyi iniakabawatikaya erikinda omo nzira eyikaswekaya. Eky’erileberyako, Yehova mwawatikya aBaisraeli b’ati erikinda omuyi w’eYeriko? Omo busondoli bwa Yehova aBaisraeli “mobabuya olukanda lunene, n’oluhimbo molwaterera ahisi,” neryo erihamba omuyi mulyoloberabo. (Yos. 6:20) Mobakinda n’aBaamori bo bati? “Yehova mwagusa kubo kw’amabwe manene-manene awakalua elubula . . . Abahola omo matwa babya bangi kwilaba abo Baisraeli bita omo muyali.”​—Yos. 10:6-11.

ABAKRISTO B’EKWENENE NI BANDU B’OBUHOLO

Ngoko twanamabilangira, emibere eyo tulimo munabwire, yisighene kutsibu n’ey’aBaisraeli. Aliwe, siy’emyatsi eyo tutasosenemo n’aBaisraeli misa yo yikaleka itutaya oko malwa. Hane n’eyindi. Ng’eky’erileberyako, oMungu mwabugha embere ati abandu abakakwama amakangirirya wiwe “sibendisyaswayigisya amalwa,” kwesi eriya kugho, sibangakolalyo n’ahake. (Isa. 2:2-4) N’ekindi, Kristo mwabugha ati abigha biwe ‘si b’ekihugo’; sibangabya oko luhande losi-losi omo malwa w’ekihugho.​—Yoa. 15:19.

Kristo mwasaba abigha biwe erikola n’ebingyi okw’aho. Mwabwirabo ati bayihighule oko malengekania awangaleka ibahitana oko bandi, ibabya n’ekinigha, kutse erilwa. (Mat. 5:21, 22) Kandi, mwasaba abigha biwe ati babye “abakahira obuholo” n’eryanza esyonzighu syabo.​—Mat. 5:9, 44.

Nikwa netu? Twanganabya isituli m’omutima w’eriya oko malwa wosi-wosi, aliwe twanganabya itune mw’amalengekania awangaleka omo ndeko imwabya eriponana n’erighabana? Litolere itwayikasa tutoke eriyihighula oko malengekania ng’ayo.​—Yak. 4:1, 11.

Omo mwanya w’eriyingirya omo malwa w’ebihanda, tukayikasa erihiraho obuholo n’olwanzo omo kati-kati ketu. (Yoa. 13:34, 35) Tuyisoghe kundu eritendibya n’oluhande olo tweghemereko tukalindirira omughulu Yehova akendibughaho amalwa wosi kera na kera.​—Esy. 46:9.