1-2. (a) Amatabali malebe anemukola abandu ba Yehova b’ati, n’abandu ba Yehova bakakola bati? (b) Ery’endereribwa likaleta obutseme omo nzira syahi? (Ukanaye n’oko pitsa eyiri oko kijalada.)

 LINO omubírí wetu aghanisibwe kutse ali kw’ebikakiryo omo bihugho ebilabire oko 30. Omo bihugho bilebe bya kubyo, abatabali babirihira abaghala n’abali betu b’omo muliki. Babohawa busana mobakola amakosa? Iyehe, mobatakosera Yehova. Ekyo bakakola lyen’erisoma n’erigha eBiblia, erikanirya abandi oko ebyo bik’irirye, n’eriyahindana haghuma n’abaramya balikyabo. Kandi bakaghana eribya oko luhande lwosi-lwosi omo myatsi y’epolitike. Nomo bakan’endereribawa kutsibu batya, abaramya bataleghula aba sibetaleka eribya ibanaluyirirene embere sya Yehova *​—n’ibughambu, babirimakirira Yehova. Kandi bakakola batya ibanatsemire!

² Alinga wanabirilangira esyopitsa sy’abaghuma b’oko baghala betu batubaha abo ibanatsemire. Bakatsema kutsibu kusangwa banasi ngoko Yehova akabatsemera busana n’erisighala ibanaluyirirene okw’iye. (1 Emy. 29:17a) Yesu mwabugha ati: “Obutseme buli oko babiriendereribwa busana n’eritunganene . . . Mutseme, mutsange kutsibu kusangwa oluhembo lwenyu ni lungyi.”​—Mat. 5:10-12.

3. Ngoko kisakirwe omo Emibiri 4:19, 20, abakwenda mobakolaki omughulu bendereribawa oko karne k’erimbere, kandi ekyaleka ibakola batya niki?

³ Ebyo abaghala n’abali betu bakalabamo ko bine ng’ebyahikira abakwenda oko karne k’erimbere omughulu baghalibawa busana n’eritula omwatsi wa Yesu. Ngendo nyingyi abatsweri b’omo tribinali ngulu y’aBayahudi mobahana abakwenda “bati sibabughe kutse erikangirirya n’ahake omo lina lya Yesu.” (Emib. 4:18; 5:27, 28, 40) Abakwenda mobayira bati? (Soma Emibiri 4:19, 20.) Babya ibanasi ngoko oyo ‘wabahana ati bakangiriraye engulu yowene oko bandu, n’eritula omwatsi owalebirye Yesu’ ko yuwite ehamuli y’endata kutsibu. (Emib. 10:42) Neryo, esyombuyi syabo, ye Petero na Yoane, mobabugha bati litolere ibakenga oMungu kwilaba abatsweri abo n’eribugha bati sibendyumbya erikania oko Yesu. N’ibughambu, mobabya ng’abamabulya abatabali abo bati, ‘Mukasond’ibugha muti muwite ehamuli nene kulenga ey’oMungu?’

4. Ngoko kisakirwe omo Emibiri 5:27-29, abakwenda mobasighira aBakristo b’ekwenene b’eky’erileberyako kyahi, netu twangakwama tuti eky’erileberyako ekyo?

⁴ Abakwenda mobasighira aBakristo b’eky’erileberyako ekyuwene ekyo batolere erikwama, mobayisogha erikenga “oMungu kwilaba abandu.” (Soma Emibiri 5:27-29.) Abakwenda babere babihunzwa busana n’obutaleghula bwabo, mobalua omo tribinali “ibanemutsema bati oMungu akaghanzabo ng’abatolere erihemulwa busana n’erina lya Yesu,” kandi mobataleka eritulira!​—Emib. 5:40-42.

5. Tutolere erisubirya oko mabulyo wahi?

⁵ Eky’erileberyako ekyo abakwenda batusighira kikaleka itwayibulya amabulyo malebe. Ng’amabulyo awakwamire hano: Abakwenda bangatokire bati erikenga oMungu kwilaba abandu kandi ‘ibanemukenga abatabali b’ekihugho’? (Rom. 13:1) Netu munabwire ‘twangayolobeka tuti oko batabali n’ab’ehamuli’ ngoko Paulo abugha kandi itune bataleghula oko Mungu, oMutabali wetu mukulu?​—Tito 3:1.

6. (a) “Ab’ehamuli” abakanibweko omo Abanya Roma 13:1 ni bahi, netu litolere itwabakolera tuti? (b) Amatabali w’abandu ali ati?

⁶ Soma Abanya Roma 13:1. Ebinywa “ab’ehamuli” bikahula abawite ehamuli n’obutoki oko bandi. Litolere Abakristo ibakenga abawite ehamuli aba. Abatabali aba bakaleka ihabya ihane obuholo, ibaleka abandu ibakwama ebyalayiro, kandi hakanabya endambi ibalwira oko bandu ba Yehova. (Erib. 12:16) Busana n’ekyo, litolere itwabaha omusolo, engemu, erikenga, n’erisikya eryo bakatusaba. (Rom. 13:7) Aliwe, amatabali w’abandu ayo awite ehamuli, kundi Yehova yukalighiragho eribya nayo. Yesu mwakangania ekyo kyo ndeke-ndeke omughulu oMukafurnali w’eRoma ye Pontio Pilato amubulaya amabulyo. Pilato abere abugha ati awite ehamuli y’eribohola Yesu kutse ey’eribugha ati itibawe, Yesu mwamubwira ati: “Siwangabya n’ehamuli okw’ingye utalyahabawayo n’oMungu.” (Yoa. 19:11) Ehamuli y’abatabali bosi b’oko kihugho yinawite aho yitwirirye; ngoko eya Pilato yanabya.

7. Tukaghana erisikya amatabali w’abandu mughulu wahi, nabo litolere ibabya iban’ibukireki?

⁷ Abakristo batolere ibasikya emighambo y’abatabali eyitelwa n’emighambo y’oMungu. Aliwe sitwangowa abandu omughulu bakatusaba erikola ekyo oMungu akaghanisaya kutse omughulu bakaghanisaya ekyo oMungu akatusaba. Ng’eky’erileberyako, banganabugha bati abalwana b’ingire omo bulasi busana n’erilwira oko kihugho kyabo. * Kutse banganaghanisya erikolesya embindula yetu y’eBiblia n’ebitsapo ebiseghemereyo, kutse ibaghanisya omubírí w’eritulira n’eriramya lyetu. Abatabali bakabya bakolesya ehamuli yabo yo muhanda, ng’ery’endererya abigha ba Kristo, bakabya n’olubanza embere sy’oMungu. Yehova akabya inyanalangire!​—Omu. 5:8.

8. Hali eritendisosana lyahi omo kati-kati ka Yehova n’abatabali b’ekihugho?

⁸ Ekinywa “ab’ehamuli” kikamanyisaya “oyuwene, omukulu, n’ow’endata oko bandi.” Nomo ekinywa “ab’ehamuli” kikanakolesibawa oko matabali w’abandu, hane oyuwite ehamuli yosi, oyukahulawa mo “Owendata Kutsibu.” Ngendo nyingyi omo Biblia, Yehova akahulawa mo “Owendata Kutsibu.”​—Dan. 7:18, 22, 25, 27.

9. Omuminyereri Danieli mwalangiraki omo syonzoli?

⁹ Omuminyereri Danieli mwalangira esyonzoli esyakanganaya ndeke-ndeke ngoko Yehova yuwite ehamuli y’endata kutsibu kulenga abandi batabali bosi. Danieli mwatsuka erilangira esyonyama nene-nene ini esikasosekanaya amatabali w’ekihugho kyosi, awa kera na wa munabwire, n’ibughambu obutabali bw’aBanya-Babeli, obw’aBamedi n’aBapersia, obw’aBagiriki, n’obw’aBaroma n’obukatabala lino obw’oBungeresa n’eAmerika. (Dan. 7:1-3, 17) Neryo Danieli mwalangira Yehova inyanikere oko kitumbi kiwe ky’obwami kw’elubula busana n’eritswera. (Dan. 7:9, 10) Ebyo Danieli alangira enyuma sy’aho bitolere ibyakangirirya abatabali ba munabwire.

10. Ngoko kisakirwe omo Danieli 7:13, 14, 27, ni bahi bo Yehova akaha obutabali bw’ekihugho, n’ekyo kikatwighisayaki okw’iye?

¹⁰ Soma Danieli 7:13, 14, 27. OMungu mwasaghula abatabali b’ehamuli yosi n’obutoki bwosi n’erihabyo abandu abatolere, abali n’ehamuli n’obutoki kulenga obw’abatabali bw’abandu. Abahabawa obutabali ni bahi? Hali “oyusosire omughala w’omundu,” n’ibughambu  Yesu Kristo, n’“ababuyirire b’Owendata Kutsibu,” n’ibughambu abandu 144 000 “abasyatabala kera na kera.” (Dan. 7:18) Eribugha ekwenene, Yehova “y’Owendata Kutsibu,” kundi iye musa yuwite ehamuli y’erikola ekyo.

11. Ni kindi kyahi ekyo Danieli ahandika ekikanganaya ngoko Yehova ni w’endata kutsibu oko batabali b’abandu?

¹¹ Ebyo Danieli alangira omo nzoli bikakanganaya ngoko ebyo abugha embere ni by’ekwenene. Danieli mwabugha ati: “OMungu w’elubula akasingula abami kandi iniasingya abandi.” Kandi mwahandika ati “Owendata Kutsibu akatabala oko bwami bw’abandu, akahabo oko oyo anzire.” (Dan. 2:19-21; 4:17) Yehova ane atalusya h’omwami n’erihiraho oghundi? Inga!

12. Ulete eky’erileberyako ekikakanganaya ngoko Yehova mwalusya abami b’oko bwami kera.

¹² Yehova abirikangania ndeke-ndeke ngoko yuwite ehamuli y’endata kutsibu kulenga “abatabali b’ekihugho.” Tulebaye eby’erileberyako bisatu bino. Farao, omwami w’eMisiri mwayira abandu b’oMungu mo bakobe kandi mwaghana ngendo ngyingyi eribalusya mubo. Aliwe, oMungu mwalusya abandu biwe b’omo bukobe n’eritoghoterya Farao y’omo Ngetse y’Engula. (Eri. 14:26-28; Esy. 136:15) Omwami Belsasari ow’eBabeli mwakola erirya inene kutse ekisighi-sighi kandi amayihaghata “erilwa n’Omukama w’elubula” n’eripipa emiungu “y’ekitsipa n’esyamaghetse” omo mwanya w’eripipa Yehova. (Dan. 5:22, 23) Aliwe oMungu mwalusya omulume w’emiyihaghato oyo y’oko bwami. “Oko kiro ekyo, Belsasari,” n’obwami bwiwe mobahabwa oko Bamedi n’Abapersia. (Dan. 5:28, 30, 31) Omwami Herode Agripa w’erimbere ow’ePalestini mwita omukwenda Yakobo kandi amaboha n’omukwenda Petero inyanemuteghekania ati naye akendimwita. Aliwe Yehova mwakakirya Herode eriberererya omupango oyo. “Omulaika wa Yehova mwaswirya Herode,” neryo mwahola.​—Emib. 12:1-5, 21-23.

13. Ulete eky’erileberyako ekikakanganaya ngoko Yehova akinda abami abayihirire haghuma. (Ulebaye epitsa.)

¹³ Kandi Yehova abiriyikangania ngoko ni w’endata kutsibu nibya n’oko mami awayihirire omo bughuma. Mwalwira oko Baisraeli n’eribawatikya erikinda abami 31 b’aBanya-Kanana ababya omo bughuma n’eribalusyako ekiharo kinene ky’eKihugho eKyalaghawa.  (Yos. 11:4-6, 20; 12:1, 7, 24) Kandi Yehova mwawatikya aBaisraeli erikinda oMwami Beni-hadadi n’abandi bami 32 ababya haghuma naye omo malwa bakalwa n’eIsraeli.​—1 Bam. 20:1, 26-29.

14-15. (a) Omwami Nebukadeneza na Dario mobabugha batiki oko butabali bwa Yehova? (b) Omuhandiki w’esyonyimbo mwabugha atiki oko Yehova n’ekihanda kiwe?

¹⁴ Ngendo nyingyi, Yehova abirikangania ngoko yo W’endata Kutsibu! Omughulu oMwami Nebukadeneza w’eBabeli ayihamaya ‘busana n’amaka w’obutoki bwiwe na busana n’olukengerwa lw’erikangabasania liwe’ omo mwanya w’erikangania ngoko Yehova yutolere eripipwa, oMungu mwamuyira mo musire. Nebukadeneza abere alama, ‘mwapipa Owendata Kutsibu’ n’erikangania ngoko eritabala lya Yehova “n’itabala lya kera na kera.” Kandi mwabugha ati: “Sihali oyo wangakakirya ebyala biwe.” (Dan. 4:30, 33-35) Obutaleghula bwa Danieli bwabere bwalengwako, na Yehova abere amulamya oko muno w’esyondale, oMwami Dario mwabugha ati: “Abandu batitimane n’eryubaha embere sy’oMungu wa Danieli; kusangwa iye ni Mungu oyuliho, oyukotire kera na kera, n’obwami buwe ni bwami obutendisyaheribwa; n’eritabala liwe lyasyakota erihika oko nduli.”​—Dan. 6:7-10, 19-22, 26, 27.

¹⁵ Omuhandiki w’esyonyimbo mwahandika ati: “Yehova akayira esyombita sy’ebihanda mo buyira, akalimaya eriyisunza ly’abandu.” Kandi mwabugha ati: “Obutseme buli oko kihanda ekiwite oMungu mo Yehova; Obutseme buli oko bandu [abo] abiriyisogha mo bandu biwe.” (Esy. 33:10, 12) Kwesi tusingene eribya bataleghula oko Yehova!

16. Litolere itwabya n’eriyiketera lyahi omughulu “obulighe bunene” bukendisyahika, kandi ekyangaleka itwabya n’eriyiketera eryo niki? (Ulebaye epitsa.)

¹⁶ Twamabilangira ebyo Yehova akola kera. Nikwa, tulindirireki omo biro ebikasa? Twanganayiketera ngoko Yehova akendisyalamya  abaghombe biwe bataleghula omo mughulu w’“obulighe bunene.” (Mat. 24:21; Dan. 12:1) Akendisyakola ekyo omughulu ebihanda ebiyihirire haghuma, ebyasibwe mo Gogi wa Magogi bikisyalwa n’abandu biwe omo kihugho kyosi. Nomo byangabya ini bihugho 193 by’oBughuma bw’eBihanda, sibyendisyatoka erilwa n’owendata kutsibu n’emilondo yiwe y’elubula! Yehova akabugha ati: “Nasyayihamya, n’eriyihighula, n’eriyiminyisya omo meso w’ebihanda bingi. Nabo basyaminya ko ndi Yehova.”​—Ezek. 38:14-16, 23; Esy. 46:10.

17. Ebiblia yikabugha yiti niki kyo kikendihikira abami b’ekihugho, kandi yikabugha yitiki oko bakamakirira Yehova?

¹⁷ Eribambira lya Gogi likendisyakolya oko malwa w’omwiso aw’eHarmagedoni omughulu Yehova akasyatoghotaya, “abami b’ekihugho kyosi.” (Erib. 16:14, 16; 19:19-21) Aliwe, “abatunganene basyikala omo kihugho. N’abahikene basyasigala mukyo.”​—Emi. 2:21.

18. Abakristo b’ekwenene babiriyisogha erikolaki, kandi busanaki? (Danieli 3:28)

¹⁸ Omo biro bingyi, aBakristo bangyi b’ekwenene babirikola emyatsi eyangaleka ibaherya obwiranda bwabo n’erihira engebe yabo y’omo bwiko busana n’eryanza Yehova oMutabali wabo Owendata Kutsibu. Babiriyisogha eribya ibane bataleghula oko Yehova. Bali ng’abalume basatu abasighala bataleghula oko w’eNdata Kutsibu n’enyuma sy’aho amabalamya oko muliro owakaghulumira.​—Soma Danieli 3:28.

19. Yehova akendisyalebyaki akatswera abandu, n’ekyo kitusabire erikolaki lino?

¹⁹ Dawidi mwahandika oko mughaso w’erisighala mutaleghula oko Yehova ati: “Yehova ni mutsweri w’abandu bosi. Uwe Yehova unyitswere ndeke, Kusangwa sindi ko musango, kandi nyitunganene.” (Esy. 7:8) Kandi mwasyahandika ati: “Ekwenene n’eritunganene byawe binyiteghaye.” (Esy. 25:21) Engebe eyuwene ry’eribya mutaleghula oko Yehova, eritendilwika obutaleghula bwetu nomo twangahikirwa naki. Neryo itukendiyowa ng’omuhandiki w’esyonyimbo oyo wabugha ati: “Obutseme buli n’abo abakalendera butsira malolo [kutse abaluyirirene]. Abakakwama emighambo ya Yehova.”​—Esy. 119:1.