1. Yehova abirituha amaha wahi?

 YEHOVA abirituha amaha aghuwene kutsibu aw’engebe y’erikota. Abandi bawite amaha w’erisyikala omo lubula ini bihangikwa by’ekirimu ebiwite obutahola. (1 Kor. 15:50, 53) N’abandi bangyi bawite amaha w’erisyabya kera na kera oko kihugho ibanahika-hikene kandi ibane omo butseme. (Erib. 21:3, 4) Tukalangira amaha wetu mo w’obughuli, nomo twangabya itulindirire engebe y’erikota omo lubula kutse oko kihugho.

2. Amaha n’ibughambuki?

² Ekinywa “amaha,” ngoko kikolesibwe omo Biblia, n’ibughambu “erilindirira ngoko emyatsi eyuwene yikendibya.” Tuyiketere ngoko ebyo tulindirire omo biro ebikasa bikendisyabererera kundi Yehova yukatuha amaha ayo. (Rom. 15:13) Tunasi eby’abiritulagha kandi tunasi ngoko syalibugha amabehi. (Emig. 23:19) Tunasi ngoko Yehova anzire kandi ali n’obutoki bw’eriberererya ebyosi ebyo abiritulagha. Neryo, amaha wetu sy’imanire oko myatsi eyo tukalengekanayako kutse oko myatsi eyo twanzire iyabya; aliwe imanire oko ebyo tuyiketere ko ni kwenene.

3. Omo mwatsi ono tukendikania okuki? (Esyonyimbo 27:14)

³ Tata wetu w’elubula atwanzire kandi anzire itwayiketera ye. (Soma Esyonyimbo 27:14.) Twamabya n’eriyiketera Yehova erisikire, itukenditoka eriyiyinia omo maligho, kandi itukendibya n’obutubaha n’obutseme nomo twangahikirwa naki. Tulebaye amaha wetu ng’akatuteghaya ati. Tukenditsuka erilangira amaha wetu ng’ali ati ng’engomo y’obwato kandi ng’akakira kutse  ekikeke ekikateghaya omutwe. N’enyuma sy’aho tukendilangira nga twangawatya amaha wetu wo tuti.

4. Amaha ali ati ng’engomo y’obwato? (Abaebrania 6:19)

⁴ Omo baruha eyo omukwenda Paulo ahandikira Abaebrania, mwasosekania amaha wetu n’ekindu ekikasikaya obwato. (Soma Abaebrania 6:19) Kundi omukwenda Paulo inyabeghere erighenda omo bwato, abya inyanasi ngoko engomo y’obwato yikawatikayabo eritendisegha-seghana. Kiro kighuma ekihunga ekikalire mokyalaba Paulo inyane omo bwato. Omo kihunga ekyo mwalangira abandu abakaghendaya obwato bakakyimirya omo maghetse mw’engomo y’obwato, bukasyayiswirya oko mabwe. (Emib. 27:29, 39-41) Ng’engomo y’obwato eyo, amaha wetu akatuwatikaya eritendiseghera hali oko Yehova omughulu tukahikirawa n’amaligho awali ng’ekihunga. Amaha wetu awasikire akatuwatikaya eribya itunatekene omughulu tukalaba omo maligho awakalire kusangwa tukabya itunikirirye ngoko emyatsi yikendyuwana. Wibuke ngoko Yesu mwabugha ati tukendisy’endereribwa. (Yoa. 15:20) Neryo erighanirya oko ebyo Yehova abiritulagha, likatuwatikaya eritendileka erimukolera.

5. Amaha mwawatikya Yesu y’ati akayilindirira okw’ihola?

⁵ Tulebaye amaha nga mwawatikya Yesu y’ati erisighala mutaleghula nomo anabya inyanasi ngoko akendihola oluholo lubi. Oko Pentekote 33 M.W., omukwenda Petero mwabugha ebinywa ebikabanika omo kitabu ky’Esyonyimbo ebikakanganaya erisika n’eriyiketera eryo Yesu abya nalyo: “Omubiri waghe asyabana amaha, kusangwa siwendisyasigha ekirimu kyaghe [omw’isinda], kutse siwendisyaleka Omubuyirire wawe erilola okw’ihonda. Wabirinyiminyisya esyonzira sy’engebe, Kandi embere syawe wasyanyigulya [wasyanyusulya] n’obutseme.” (Emib. 2:25-28; Esy. 16:8-11) Nomo Yesu anabya asi ngoko akendihola, abya inianasi ndeke-ndeke ngoko oMungu akendimulubukya kandi ngoko asyabya n’obutseme bw’eritasyabya haghuma na Tata wiwe w’elubula.​—Ebr. 12:2, 3.

6. Mughala wetu mwabugha atiki oko maha?

⁶ Amaha wetu w’eKristo abiriwatikya aBakristo balikyetu bangyi eriyiyinia. Eky’erileberyako kighuma ni mughala wetu mutalegula yo Leonard Chinn oyo wabya ikere omo kihugho ky’OBungeresa. Omo Malwa w’eRimbere w’eKihugho mwahirwa omo muliki busana n’erighana eribya musuda. Omo misi ibiri mwahirwa omo kyumba kiwe mw’iyuwene n’enyuma sy’aho mobamwaghalya kutsibu omw’imuha ekasi eyikalire. Mwahandika ati “Ebyo nalolako mobyanyiwatikya erilangira ngoko tulaghire oko maha tutoke eriyiyinia. Yesu, abakwenda, abaminyereri n’emilaghe eyiri omo Biblia, ni by’erileberyako ebyangatuwatikya. Emyatsi yosi eyo, yikatuha amaha awasikire w’ebiro ebikasa kandi yikatuwatikaya eriyiyinia.” Amaha mwabya ng’engomo y’obwato oko Leonard, netu kw’anganabya atya okw’itwe munabwire.

7. Amaligho akasikaya ati amaha wetu? (Abanya Roma 5:3-5; Yakobo 1:12)

⁷ Amaha wetu akasika twabilaba omo malengwako n’eriyilangirira obuwatikya bwa Yehova n’eriliwa naye. (Soma Abanya Roma 5:3-5; Yakobo 1:12.) Neryo amaha wetu akawata kulenga omughulu twowa engulu mbuya. Sitani anzire amaligho wetu iniatubughamo akaghala, aliwe erilabira obuwatikya bwa Yehova, twanganakinda obuligho bosi-bosi.

8. Amaha wetu ali ati ng’ekikeke ekikateghaya omutwe? (1 Abanya Tesalonika 5:8)

⁸ EBiblia ikasosekanaya amaha wetu n’akakira  kutse ekikeke ky’oko mutwe. (Soma 1 Abanya Tesalonika 5:8.) Omusuda akambala ekikeke ky’oko mutwe busana n’eriteya omutwe wiwe. Tukalwa na Sitani, litolere itwateya amalengekania wetu. Akakolesaya emyatsi mingyi eyangatulengako n’eyangatsandya amalengekania wetu. Ngoko ekikeke kikateghaya omutwe w’omusuda, amaha wetu akateghaya amalengekania wetu tutoke eribya itune bataleghula oko Yehova.

9. Ekikahikira abandu abate n’amaha niki?

⁹ Amaha wetu w’engebe y’erikota akendituwatikya erikola n’amenge n’eriyisogha ndeke. Aliwe amaha wetu amatendisika kandi twamaleka esyongumbu syetu sy’omubiri sisondole amalengekania wetu, ekyo ikyanganaleka itwibirirwa amaha wetu w’engebe y’erikota. Tulebaye ekyahikira aBakristo balebe ababya bikere omo muyi wa kera w’eKorinto. Eriyiketera lyabo omo mulaghe mukulu w’oMungu n’ibughambu omulaghe w’erilubuka moryahwa. (1 Kor. 15:12) Paulo mwabugha ati abatikirirye erilubuka bakabyaho busana n’eriberererya esyongumbu syabo lisa. (1 Kor. 15:32) Munabwire abatawite amaha omo milaghe y’oMungu bakabyaho busana n’eriberererya esyongumbu syabo lisa, n’eriyitsemesya ngoko bangatoka. Itwe situli ng’abo kundi tuyiketere emilaghe ya Yehova y’ebiro ebikasa. Amaha wetu ali ng’ekikeke ekikateghaya omutwe kundi akateghaya amalengekania wetu kandi akatuwatikaya eritendibya n’emibere eyangatsandya obwira bwetu haghuma na Yehova.​—1 Kor. 15:33, 34.

10. Amaha angatuteya ati oko malengekania awatatolere?

¹⁰ Kandi amaha wetu anganaleka itwatalengekania tuti sitwangatoka eritsemesya Yehova n’ahake. Ng’eky’erileberyako, abandi ibanganalengekania bati: ‘Sinyiri omo abekendisyabana engebe y’erikota. Sinyiri omo batunganene. Sihali ekiro ekyo ngendisyatoka erikwama esyokanuni sya Yehova ngoko asondire.’ Wibuke ngoko Elifazi mwabwira Yobu y’ebinywa ebiri ng’ebyo. Elifazi mwabugha ati: “Omundu niki, ati abye mubuya kwehi?” Mwabugha n’oko Mungu ati: “Lebaya, sialiyiketera ababuyirire buwe; ega, n’ekyanya si kibuya omo meso wuwe.” (Yobu 15:14, 15) Ayo ni mabehi! Wibuke ngoko Sitani yo wanzire iwalengekania utya. Anasi ngoko wamabya ukalengekania utya ighukendiherya amaha. Kwesi litolere iwaghana amalengekania awali ng’ayo n’erikasa obwenge b’oko milaghe ya Yehova. Isiwabya n’eritika-tika lyosi-lyosi ngoko anzire iwabyaho kera na kera kandi ngoko akendikuwatikya erihikira omwatsi ogho ulandimirire oyo.​—1 Tim. 2:3, 4.

11. Busanaki litolere itwalindirira butaluha eribererera ly’amaha wetu?

¹¹ Eribya n’amaha awasikire si mwatsi molomolo mughulu wosi. Twanganaluha tukalindirira eribererera ly’emilaghe y’oMungu. Aliwe, kundi Yehova iye ni wa kera na kera, enzira yiwe y’erilangiramo endambi siyisosene n’eyetu. (2 Pet. 3:8, 9) Akendisyaberererya ebyo abirilagha omo nzira eyitolere, aliwe anganaberereryabyo ngoko tutalindirire. Niki kyo kyangatuwatikya erilola embere eribya n’amaha awasikire tunemulindirira butaluha ekiro Yehova akendisyaberererya esyondaghane siwe?​—Yak. 5:7, 8.

12. Ngoko kisakirwe omo Abaebrania 11:1, 6, obwikirirya bukatuwatikaya buti eribya n’amaha?

¹² Twamabya itune hakuhi na Yehova amaha wetu iniakendibya inyanasikire, kundi Yehova yukendisyaberererya ebyo tuhirireko amaha. EBiblia ikakanganaya ndeke-ndeke ngoko eritoka eribya n’amaha litolere itw’ikirirya ngoko Yehova ane kandi “kw’akahemba abakamusonda-sonda.” (Soma Abaebrania 11:1, 6.) Twamikirirya ngoko Yehova aneho,  itukendiyiketera ngoko akendisyaberererya ebyosi ebyo abiritulagha. Tulebaye ekyo twangakola tutoke eriwatya obwira bwetu haghuna na Yehova neryo tuhike ikw’ibya n’amaha awasikire.

13. Twangayitunda tuti hakuhi n’oMungu?

¹³ Usabe Yehova n’eriminya ekinywa kiwe. Nomo tutetwangalangira Yehova, twanganayitunda hakuhi naye. Twanganakania naye erilabira omusabe itunasi ngoko akenditw’owa. (Yer. 29:11, 12) Twanganahulikirira oMungu omughulu tukasoma eKinywa kiwe n’erighanirya kukyo. Omughulu tukasoma oko mibere eyo Yehova atsomanamo abaghombe biwe bataleghula ba kera, amaha wetu akalola embere eriwata. Ebyosi ebisakirwe omo Kinywa ky’oMungu “byasakawa busana n’eritukangirirya. Neryo aMasako akatuha eriyitsingirira n’erihanda omutima, itwatoka eribya n’amaha.”​—Rom. 15:4.

14. Busanaki litolere itwaghanirya oko ebyo Yehova abirikolera abandi?

¹⁴ Ughaniraye oko nzira esyo Yehova aberererayamo esyondaghane siwe. Tulebaye ekyo oMungu akolera Abrahamu na Sara. Babya ibamabihika omo myaka eyo batebangasyabuta. Aliwe, mobabuta omwana ngoko oMungu anabalagha. (Enz. 18:10) Abrahamu mwayiwata ati? EBiblia ikabugha yiti: Abrahamu abya ikirirye ngoko akendisyabya “tata w’ebihanda bingyi.” (Rom. 4:18) Abrahamu nomo anabya isyasi omulaghe oyo ng’akisyabererera ati, abya inianayiketere ngoko Yehova akendisyaberereryagho. Omulume mutaleghula oyo mwataluhira busa. (Rom. 4:19-21) Emyatsi eyiri ng’eyo yikaleka itwayiketera mughulu wosi ngoko Yehova akendisyaberererya emilaghe yiwe nomo yanganalangirika nga siyangatokekana oko malengekania w’abandu.

15. Busanaki litolere itwabya tukaghanirya oko ebyo Yehova abiritukolera?

¹⁵ Ughaniraye oko ebyo Yehova abirikukolera.  Ughaniraye oko ndundi eyo wabiribana omw’ibererera ly’esyondaghane esiri omo Kinywa ky’oMungu. Eky’erileberyako, Yesu mwabugha ati Tata wiwe akendisyakuha ebyo ulaghireko omo ngebe. (Mat. 6:32, 33) Kandi Yesu mwabugha ati wamabisaba Yehova y’ekirimu kiwe kibuyirire, inyakendikuhakyo. (Luka 11:13) Yehova abiriberererya emilaghe eyo. Alinga, wangan’ibuka eyindi milaghe eyikulebirye eyo Yehova abiriberererya. Ng’eky’erileberyako, akalagha ati akendikughanyira, akendikukirania, n’erikulisya bunya-kirimu. (Mat. 6:14; 24:45; 2 Kor. 1:3) Wamabighanirya oko ebyo oMungu abirikukolera, eriyiketera lyaghu omo ebyo akendisyakola omo biro ebikasa irikendiwata.

16. Busanaki amaha ni kihembo ky’obughuli bunene?

¹⁶ Amaha wetu w’engebe y’erikota ni kihembo ky’obughuli ekyo oMungu abirituha. Tulindirire ebiro ebikasa ebyuwene, kandi tuyiketere kundu ngoko bikendisyahika. Amaha ayo ali ng’enanga kutse engomo y’obwato, akatuwatikaya erisika itwatoka eriyiyinia omo maligho, omw’endereribwa nibya n’eritendisagha oluholo. Ali ng’ekikeke ekiri oko mutwe wetu, ekikateghaya obulengekania bwetu tutoke eriyiteya oko bituwene n’erimakirira ebyuwene. Amaha wetu awahambene n’eBiblia ayo, akatuwatikaya eriyitunda hakuhi n’oMungu kandi akatuwatikaya eriminya ngoko atwanzire kutsibu. Tukabana endundi nene twamabiyitsinga eribya n’amaha awawatire n’awasikire.

17. Busanaki amaha wetu akatuletera obutseme?

¹⁷ Omo baruha eyo omukwenda Paulo ahandikira Abanya Roma, mwababwira ati “Mutseme omo maha.” (Rom. 12:12) Paulo abya inianganatsema kundi abya inyanikirirye ngoko amabisighala mutaleghula iniakendisyabana engebe y’erikota y’omo lubula. Netu twanganatsema omo maha wetu kundi twikirirye ndeke-ndeke ngoko Yehova akendisyaberererya emilaghe yiwe. Ngoko omuhandiki w’esyonyimbo anahandika: “Obutseme buli n’omundu . . . Oyukayiketera Yehova Mungu wiwe, . . . Oyukaberereraya esyondaghane siwe ebiro byosi.”​—Esy. 146:5, 6.