1. Eribya “n’obwagha bw’oMungu,” n’ibughambuki, kandi obwagha obo bukaleka itwabya n’obutseme buti?

 OBUTSEME bw’ekwenene si ry’eritsanga-tsanga buyira erikabya oko katambi kake neryo kandi iryahwa. Omundu anganabya nabo omo ngebe yiwe yosi. Ati? Omo makangirirya wiwe w’oko kitwa, Yesu mwabugha ati: “Obutseme buli oko basi ko bali n’obwagha bw’oMungu.” (Mat. 5:3) Yesu abya inyanasi ngoko abandu mobahangyikwa n’engumbu nene y’eriminya n’eriramya oMuhangyiki wabo, Yehova Mungu. Ekyo n’ibughambu “obwagha bw’oMungu [bw’obunya-kirimu].” Kandi, kundi Yehova ni “Mungu w’omuyisa [w’obutseme],” n’abaramya biwe nabo banganabya n’obutseme.​—1 Tim. 1:11.

2-3. (a) Yesu mwabugha ati ni bandi bahi bo bangabya n’obutseme? (b) Tukendikania okuki omo mwatsi ono, na busanaki ni ky’omughaso?

² Eritendibya n’amaligho wosi-wosi kyo kyangaleka itwatsema? Iyehe. Omo makangirirya wiwe w’oko kitwa, Yesu mwabugha ekindi ekikaswekaya. Mwabugha ati ‘abali n’obulighe’​—kwamuhwa abakayowa muhanda busana n’amalolo agho bakola kutse kundi bakahangahangaya busana n’amaligho awakalire, banganabana obutseme. Yesu mwabugha ati ‘n’abakendereribawa busana n’eritunganene’ kutse ‘abakatsumawa’ busana n’erikwama Kristo banganatsema. (Mat. 5:4, 10, 11) Aliwe kitokekene kiti eribya n’obutseme bw’ekwenene ighune omo mibere eyiri ng’eyo?

³ Yesu abya akakangania ngoko si y’emibere eyuwene eyo omundu alimo yo yikamuletera obutseme bw’ekwenene, aliwe  obutseme bw’ekwenene bukasa omughulu tukaberereraya obwagha bwetu bw’eriminya oMungu n’eriyitunda hakuhi naye. (Yak. 4:8) Twangakola ekyo kyo tuti? Omo mwatsi ono, tukendikania oko bindu bisatu ebyangatuwatikya eribana obutseme bw’ekwenene.

4. Twamabya itwanzire eribana obutseme bw’ekwenene, omwatsi w’erimbere ogho litolere itwakola ni wahi? (Esyonyimbo 1:1-3)

⁴ EKY’ERIMBERE: Twamabya twanzire eribya n’obutseme bw’ekwenene, litolere itwabya tukasoma eBiblia, n’eriyighisyayo. Abandu balaghire oko kalyo k’ekinya-mubiri batoke eribyaho, n’esyonyama kutya. Aliwe abandu basa bo bangalya akalyo k’obunya-kirimu. Kandi ekyo kyo batolere erikola. Kyo kyaleka Yesu iniabugha ati: “Omundu siendisyabyaho busana n’obundu ibobwene, nikwa busana n’obuli kinywa ekikalua omo buno bw’oMungu.” (Mat. 4:4) Neryo, situtolere tukalabya ekiro, buts’irisoma eKinywa ky’oMungu eky’obughuli, eBiblia. Omuhandiki w’esyonyimbo mwabugha ati: ‘Obutseme buli n’omundu oyo emigambo ya Yehova ni butseme bwiwe, oyukighayo omo musibo n’omo kiro.’​—Esyonyimbo 1:1-3.

5-6. (a) Twangan’igha omo Biblia moki? (b) Erisoma eBiblia lyangatuwatikya liti?

⁵ Kundi Yehova atwanzire, abirihira omo Biblia mw’emyatsi eyangaleka itwabya n’engebe eyiri mw’obutseme. Erilabira eBiblia, tukaminya ng’anzire engebe yetu iyabya yiti. Tuk’igha ngoko twangayitunda hakuhi naye n’ekyo twangakola atoke erighanyira amalolo wetu. Kandi tukaminya emyatsi eyuwene eyo abiritulagha omo biro ebikasa. (Yer. 29:11) Emyatsi  eyo tukigha omo Biblia, yikaleka itwatsema kutsibu!

⁶ Tunasi ngoko eBiblia, yiri mw’amahano awangatuwatikya omo ngebe. Twanganabana obutseme omw’ikwama amahano ayo. Wamabunika mutima busana n’amaghaniryo w’engebe, ulabaye endambi nene ukasoma eKinywa kya Yehova n’erighanirya kukyo. Yesu mwabugha ati: “Obutseme buli oko bakowa ekinywa ky’oMungu n’erikolakyo.”​—Luka 11:28.

7. Ekyangakuwatikya eribana endundi omo myatsi eyo ukasoma omo Kinywa ky’oMungu niki?

⁷ Omughulu . . . ekinywa ky’oMungu n’erikolakyo ukasoma eKinywa ky’oMungu, ngambe iwabya n’endambi y’eritsemera ebyo ukasoma. Eky’erileberyako kya kino. Omundu iniakuhukira ebyalya ebyo wanzire. Aliwe kundi uwite bingyi by’erikola, kutse kundi ukahangahangaya busana n’emyatsi mingyi, iwatomengerabyo luba-luba butsira eryowa obusi bwabyo. Neryo wabibugha erirya, iwalangira ngoko mukalya luba-luba, neryo mughutitowa obusi bw’akalyo ako. Ekyo kyanganakuhikira n’omughulu ukasoma eBiblia. Esindi ndambi, wanganasoma luba-luba neryo ighutatsemera ebiri omo omwatsi ogho ukasoma. Usondaye endambi y’eritsemera ebyo ukasoma omo Kinywa ky’oMungu, ubye nga unalangire omo bulengekania mw’ebikalaba omo busomi bwaghu, ulengekanaye oko milenge y’abakanibweko, n’erilengekania oko ebyo wamabisoma. Wamakola utya, ighukenditsema kutsibu.

8. “Omughombe oyutereghula n’ow’amenge” anemuberererya ati omubírí wiwe? (Ulebaye n’ebinywa ebiri ahikwa.)

⁸ Yesu abirihiraho “omugombe oyuteregula n’ow’amenge” erituha akalyo k’obunya-kirimu oko mughulu atolere, kandi tukalisibawa ndeke bunya-kirimu. * (Mat. 24:45) Omughombe akakolesaya Amasako awasondolawa n’ekirimu kibuyirire akateghekania akalyo k’obunya-kirimu ako. (1 Tes. 2:13) Akalyo k’obunya-kirimu ako kakatuwatikaya eriminya amalengekania wa Yehova awasakirwe omo Biblia. Kyo kikaleka itwasoma Akaleberyo k’Omuteya ne Amuka n’eyindi myatsi eyiri oko jw.org. Kandi tukateghekanaya emihindano ey’obuli yenga. N’akandi tukakwama eprograme eye JW Teledifizyo. Twamabya n’omubere w’erigha n’erisoma eBiblia, ekyo ikikendituwatikya erikola omwatsi w’akabiri owangaleka itwabya n’obutseme.

9. Omwatsi w’akabiri owakaleka itwabana obutseme bw’ekwenene ni wahi?

⁹ EKY’AKABIRI: Eribya n’obutseme, litolere itwasikya esyokanuni sya Yehova. Omuhandiki w’esyonyimbo mwabugha ati: “Obutseme buli n’abo abakubaba Yehova, abakakwama ebihano biwe!” (Esy. 128:1) Eryubaha Yehova ly’erimusikya kutsibu n’eritendikola omwatsi owangamuhitania. (Emi. 16:6) Tukayikasa erilola embere erikwama esyokanuni sya Yehova esilebirye ekibuya n’ekibi esikanibweko omo Biblia. (2 Kor. 7:1) Twamabikola emyatsi eyo Yehova anzire n’eritendikola eyo aponire itukenditsema.​—Esy. 37:27; 97:10; Rom. 12:9.

10. Ngoko kisakirwe omo Abanya Roma 12:2, tuli n’omubírí wahi?

¹⁰ Soma Abanya Roma 12:2. Omundu anganaminya ngoko Yehova yuli n’ehamuli y’eriyisogha ngoko ekindu kirebe ni kibuya kutse ni kibi, aliwe atolere iniayisombolera ng’akendikwama esyokanuni sy’oMungu kutse iyehe. Ng’eky’erileberyako omundu anganaminya ngoko eLeta yabirihiraho emighambo y’erighendya omutoka kutse etuku-tuku. Aliwe anganabya isyanzire erikwama emighambo eyo, n’ekyo ikyaleka iniatibitya omutoka  kutse etuku-tuku yo kutsibu. Tukakanganaya omo mikolere yetu ko twikirirye ngoko erikwama esyokanuni sya Yehova y’enzira eyuwene y’engebe. (Emi. 12:28) Ekyo kyo Dawidi aby’ikirirye, kyo kyaleka iniabugha oko Yehova ati: “Wasyanyikangya enzira y’engebe, embere sy’obusu bwawe hali obutseme oboswire, kandi hakuhi nawe hali ebitsange bya kera na kera.”​—Esy. 16:11.

11-12. (a) Omughulu tukahanga-hangaya kutse omughulu tubunikire mutima, litolere itwayiteya okuki? (b) Erisako erya Abanya Filipi 4:8 lyangatuwatikya liti omughulu tukasombola eby’eriyitsemesyamo?

¹¹ Omughulu tukahanga-hangaya kutse omughulu tubunikire mutima, twanganayowa itulaghire oko mwatsi mulebe owangatuwatikya eritendisyalengekania oko myatsi eyilue ikaleka itwahanga-hangya. Ekyo kyowene, aliwe litolere itwayiteya okw’ikola omwatsi ogho Yehova aponire.​—Efe. 5:10-12, 15-17.

¹² Omo baruha eyo omukwenda Paulo ahandikira aBakristo b’eFilipi, mwabugha ati balole embere eryosulya omo malengekania wabo mw’emyatsi y’“ebitunganene, ebibuyirire, ebyanganzwa, [n’]eby’erisimwa.” (Soma Abanya Filipi 4:8.) Nomo Paulo atanabya akakania oko myatsi y’eriyitsemesyamo omughulu ahandika ebinywa ebi, eby’ahandika byanganatuwatikya tukasombola emyatsi y’eriyitsemesyamo. Uterikola kino: Omo mulondo, ahali ekinywa “emyatsi,” uhireho “esyonyimbo,” “esyofilme,” “ebitabu,” kutse “ebitsange by’esyovideo.” Erikola utya, lyanganakuwatikya eriminya ebyangaliwa omo meso wa Yehova n’ebitebyangaliwa. Twanzire erikwama esyokanuni sya Yehova esy’endata kutsibu omo ngebe yetu. (Esy. 119:1-3) Neryo, kundi tukendibya itwabiribya n’obunya-mutima obuwene, ikikendituwatikya erikola ekindu ky’akasatu ekyangaleka itwabya n’obutseme omo ngebe yetu.​—Emib. 23:1.

13. Ekindu ky’akasatu ekyangatuwatikya eribya n’obutseme bw’ekwenene ni kyahi? (Yoane 4:23, 24)

¹³ EKY’AKASATU: Uhire eriramya Yehova ly’omo mwanya w’erimbere omo ngebe yaghu. Yehova yo watuhangika, neryo busana n’ekyo litolere itwamuramya. (Erib. 4:11; 14:6, 7) Litolere itwalangira eriramya Yehova “omo kirimu n’omo kwenene,” n’ibughambu erimuramya omo nzira eyo anzire, mo mwatsi mukulu kutsibu omo ngebe yetu. (Soma Yoane 4:23, 24.) Twanzire ekirimu kibuyirire ky’oMungu ikyatusondola omw’iramya lyetu neryo iryatoka erihambana n’ekwenene eyiri omo Kinywa kiwe. Tutolere itwahira erimuramya ly’embere omo ngebe yetu nomo twangabya ituli omo kihugho eyo omubírí wetu aghanisibwe. Erihika lino, abaghala betu abalabire oko 100 bane omo muliki busana n’eribya Bimiri ba Yehova. * Nomo bine bitya, banemuyikasa erisaba, eriyighisya, n’erikanirya abandi b’oko Mungu n’oBwami bwiwe ibanatsemire! Twanganatsema omughulu bakatutsuma n’eritwendererya. Twanganatsema kundi itunasi ngoko Yehova ane haghuma netu kandi ngoko akendisyatuhemba.​—Yak. 1:12; 1 Pet. 4:14.

14. Ekyahikira mughala wetu mulwana owe Tajikistan niki, kandi kyamuhikira busanaki?

¹⁴ Ebyo abandi baghala n’abali betu babirilolako bikakanganaya ngoko twamakola emyatsi isatu eyo twamabikaniako, itukendibya n’obutseme nomo twangabya omo mibere eyiri yiti. Tulebaye ekyahikira mughala wetu w’eTajikistan yo Jovidon Bobojonov busana n’erighana eringira omo busuda omughulu ayira emyaka 19. Oko kiro 4, Omwisi 10, 2019, mobamulusya ewabo, bamamuhira omo muliki,  n’erimwaghalya ng’omukola-nabi. Omwatsi oyo mwaminywa omo bihugho bingyi. Mwaswiribwa bakasonda erimukuna bati akole erilaghana ly’eribya musuda. Enyuma sy’aho mobamuhirako omusango n’erimutwala omo kambi y’amaghali erihika ekiro omusondoli w’ekihugho ekyo amughanyira n’eribugha ati aboholawe. Omo biro byosi ebyo, Jovidon mwasighala mutaleghula kandi mwabya inianatsemire. Mwatoka ekyo ky’ati? Mwatibirirwa obwagha bwiwe bw’obunya-kirimu.

15. Omughulu Jovidon abya omo muliki inyakayirisaya ati bunya-kirimu?

¹⁵ Omughulu Jovidon abya omo muliki, abya inianemuyirisya bunya-kirimu, nibya n’omughulu abya isyawite oko Biblia kutse oko bitabu byetu ebihambene nayo. Mwatoka ati? Abalikyetu b’eyo abya aboherwe ibakamuletera akalyo neryo ibakahandika erisako ly’obuli kiro oko ngunza eyo bahekire mw’akalyo. Busana n’ekyo, iniakatoka erisoma eBiblia n’erighanirya kuyo k’obuli kiro. Abere aboholwa, mwateka erihano lino oko bandu abate balaba omo maligho awakalire: “Ni ky’omughaso erikolesya obwiranda bwaghu bo ndeke utoke eriminya Yehova yo kutsibu omughulu ukasoma eKinywa kiwe n’ebitabu ebiseghemerekyo.”

16. Jovidon mwahira obulengekania bwiwe b’oko myatsi yahi?

¹⁶ Mughala wetu oyu inyakaghendera oko  syokanuni sya Yehova. Mwatabya akalengekania oko syongumbu nyibi kutse nibya mwatakola emyatsi eyituwene. Aliwe mwabya akalengekania oko myatsi eyo Yehova akalangira mo y’omughaso. Jovidon mwabya akatsemera obubuya bw’ebihangyikwa. Obuli ngyakya, inyakabuka inyowa ehinyunyu hik’imba. Omo kiro inyakatungerera omughenda n’esyongununu. Mwabugha ati: “Ebihembo ebyo Yehova abirituha ebyo, mobyaleka inatsema kandi mobyanyisubya mutima omo nda.” Omughulu tukatsemera ebyo Yehova akatuha eby’ekinya-mubiri n’eby’obunya-kirimu, tukabya n’obutseme, n’obutseme obo bukaleka itwabana akaghala k’eriyiyinia.

17. Ebinywa ebiri omo 1 Petero 1:6, 7 byangakolesibwa biti oko mundu oyuli omo mibere eyiri ng’eya Jovidon?

¹⁷ Kandi Jovidon mwahira eriramya Yehova ly’embere omo ngebe yiwe. Abya inyanasi ngoko litolere inyamakirira oko Mungu wiwe. Yesu mwabugha ati: “Wasyaramya Yehova Mungu waghu, iwamukolera iyowene.” (Luka 4:8) Abasuda n’abakulu babo babya banzire Jovidon iniabugha ati syakiri Mwimiri wa Yehova. Omo mwanya w’ekyo, omo musibo n’omo kiro inyakasaba kutsibu, akasaba Yehova amuwatikaye eritendileghula n’eritendighana obwikirirya bwiwe. Jovidon nomo anakolerawa muhanda mwasighala mutaleghula. Busana n’ekyo atsemire busana n’eribya n’ekindu ekyo atabya awiteko embere sy’erihambwa, eriswiribwa, n’erihirwa omo muliki​—n’ibughambu obwikirirya obwabirilengwako.​—Soma 1 Petero 1:6, 7.

18. Twangalola tuti embere eribya itunatsemire?

¹⁸ Yehova anasi ebyo tulaghireko tutoke eribya n’obutseme bw’ekwenene. Wamakolesya ebindu bisatu ebikaletera obutseme bw’ekwenene wanganabya ighunatsemire ukalaba omo maligho awakalire. Naghu iwanganabugha uti: “Obutseme buli oko kihanda ekiwite Yehova mo Mungu wabo!”​—Esy. 144:15.