OMWATSI W’ERIGHA 40
“Erisondola abandu bangyi eribana ekitunganene”
“Abakasondola abandu bangyi eribana ekitunganene basyakangabasania ng’esyongununu kera na kera.”—DAN. 12:3.
OLWIMBO 151 Akasyabirikira
EBIKENDIKANIBWAKO *
1. Ni myatsi yahi eyikatsemesaya eyo tulindirire omo Butabali bw’eMyaka Elfu Nguma?
EKIRO erilubuka lyasyatsuka hano h’oko kihugho omo butabali bw’eMyaka Elfu Nguma bwa Kristo, hakendisyabya obutseme bunene kutsibu! Abosi ababiriherya abanze babo bali n’engumbu y’erisyabalolako. Na Yehova naye ali n’engumbu y’eritasyabalolako. (Yobu 14:15) Terilengekania oko butseme obwasyabya oko kihugho omughulu abandu basyalubuka! Ngoko twalangira omo mwatsi owalaba, “abatunganene,” abo amena wabo abirisakwa omo kitabu ky’engebe, “basyalubuka oko ngebe.” (Emib. 24:15; Yoa. 5:29) Alinga abangyi b’oko banze betu bakendisyabya b’oko bakendisyalubuka eHarmagedoni yabilaba. * “Abatatunganene,” ng’abandu abatabana endambi eyitosire y’eriminya Yehova n’erimukolera butaleghula embere bahole, “basyalubuka oko lubanza lw’eritswerwa.”
2-3. (a) Ngoko kisakirwe omo Isaya 11:9, 10, n’ikangirirya linene kutsibu lyahi erikendisyabya oko kihugho? (b) Tukendikania okuki omo mwatsi ono?
2 Likendisyatolera abosi abakendisyalubuka ibakangiriribwa. (Isa. 26:9; 61:11) Neryo hakendisyabya endegheka nene y’erikangirirya abandu eyite yatabya aho ekihugho kikatatsukira. (Soma Isaya 11:9, 10.) Busanaki? Kundi likendisyatolera abatatunganene abakendisyalubuka ibigha oko Yesu Kristo, oBwami bw’oMungu, embanulo, obukulu bw’erina ly’oMungu, na busanaki oMungu yutolere eritabala. Nibya abatunganene nabo likendisyatolera ibakangiriribwa buhya-buhya oko myatsi eyo Yehova aghenda akabwira abandu eyilebirye erisonda liwe busana n’ekihugho. Abandi b’oko bataleghula abo, bahola kera eKinywa kya Yehova, eBiblia isikyekyahwa erihandikwa. Abosi haghuma, abatunganene n’abatatunganene, bakendisyigha myatsi mingyi.
3 Omo mwatsi ono tukendikania oko mabulyo ano: Omubírí mukulu w’erikangirirya oyu, akendisyakolwa ati? Bikendisyabya biti oko bakendisyaligha erikangirirya eryo n’oko bakendisyaghanalyo? Ebisubiryo by’oko mabulyo aya bitulebirye itwe bosi munabwire. Ngoko tukendilangira, amaminyereri awakaswekaya awali omo kitabu kya Danieli n’eky’Eribisulirwa, akendituwatikya eryowa ndeke ebikendisyabya abaholi bakalubuka. Okw’itsuka, tukanaye oko myatsi eyikaswekaya eyiri omo buminyereri bwa Danieli 12:1, 2.
“ABAGHOTSERE OMO LUTUTU . . . BASYABUKA”
4-5. Ekitabu kya Danieli 12:1 kikabugha kiti oko mughulu w’enduli hasyabyaki?
4 Soma Danieli 12:1. Ekitabu kya Danieli kikakanganaya emyatsi eyikwama-kwamene eyikaswekaya eyikendisyabya omo mughulu w’enduli. Ng’eky’erileberyako, Danieli 12:1 ikabugha yiti Mikaeli, ni bughambu Yesu Kristo, ‘akateghaya abandu [b’oMungu].’ Ekitswe ky’obuminyereri obo mokyatsuka eribererera oko 1914 omughulu Yesu ayirawa mo Mwami w’oBwami bw’oMungu bw’elubula.
5 Aliwe kandi, Danieli mwabwirwa ngoko Yesu “asyahangana” omughulu “hasyabya endambi y’obulighe obute bwatabya eritsuka omughulu ekihanda kyatsuka.” “Endambi y’obulighe” eyo ‘bw’obulighe bunene’ obukanibweko omo Matayo 24:21. Yesu asyahangana, kutse erilwira oko bandu b’oMungu, oko nduli y’endambi y’obulighe, ni bughambu oko Harmagedoni. Ekitabu ky’Eribisulirwa kikahula abandu aba mo “ndeko nene abakalua omw’endererya linene.”—Erib. 7:9, 14.
6. Ekikendisyahikira endeko nene enyuma w’obulighe bunene niki? Kanaya. (Ulebaye n’omwatsi “Amabulyo erilua oko basomi betu” owali omo gazeti eno owalebirye erilubuka oko ngebe oko kihugho.)
6 Soma Danieli 12:2. Hakendisyabyaki endeko nene yabisabuka oko mughulu w’endambi y’obulighe? Obuminyereri obu sibulikanaya okw’ilubuka ly’ekisosekanio, n’ibughambu abaghombe b’oMungu eritasyabuka bunya-kirimu oko mughulu w’enduli, ngoko twabya tukabugha kera. * Aliwe bukakanaya okw’ilubuka ly’abaholi erikendisyabya omo kihugho kihya-kihya. Busanaki tukabugha tutya? Ekinywa “olututu” kine n’omo Yobu 17:16. Ekinywa ekyo kikasonda eribugha kiti “eyisinda.” Ekyo kikakanganaya ndeke-ndeke ngoko Danieli 12:2 yikakanaya okw’ilubuka erikendisyabya oko kihugho ebiro by’enduli byabilaba n’enyuma w’amalwa w’eHarmagedoni.
7. (a) Erilubuka “busana n’engebe y’erikota” ni bughambuki? (b) Busanaki erilubuka eri “lyowene” kulenga eryakera?
7 Neryo ikwa, twangowa tuti ebinywa ebiri omo Danieli 12:2, ebikabugha biti abandi basyabuka “busana n’engebe y’erikota”? Ekyo ni bughambu, abasyalubukibwa n’erihikira eriminya oMungu, kutse erilola embere erimuminya, n’erisikya Yehova na Yesu omo butabali bw’emyaka 1 000, oko nduli basyabana engebe y’erikota. (Yoa. 17:3) Eri lyasyabya ‘erilubuka eryowene’ kulenga eryakera eryo bandu balebe balubukako. (Ebr. 11:35) Busanaki? Kundi abalubukibawa kera, mobasyahola.
8. Abandi bandu basyalubuka “busana n’erihemuka n’esyonye sy’erikota” omo nzira yahi?
8 Aliwe, s’ibughambu abosi abakendisyalubuka bakendisyaligha erikangiriribwa na Yehova. Obuminyereri obuli omo Danieli bukakanganaya ngoko abaghuma ba kubo basyalubuka “busana n’erihemuka n’esyonye sy’erikota.” Kundi bakendisyakangania omutima w’eritendisikya amakangirirya ayo, amena wabo syendisyasakwa omo kitabu ky’engebe kandi sibendisyabana engebe y’erikota. Omo mwanya w’ekyo, basyabana “esyonye sy’erikota,” ni bughambu basyatoghotibwa. Kwesi Danieli 12:2 ikakanaya oko ekyasyahikira oko nduli abosi abakendisyalubukibwa erikwamana n’ebyo bakendisyakola babilubukibwa. * (Erib. 20:12) Abaghuma bakendisyabana engebe y’erikota; n’abandi sibendisyabanayo.
‘ERISONDOLA ABANDU BANGYI ERIBANA EKITUNGANENE’
9-10. Enyuma w’obulighe bunene hakendisyabya ekindi kyahi, kandi ni bahi bo “basyakangabasania ng’erihenia ly’ekyanya”?
9 Soma Danieli 12:3. Ni kindi kyahi ekyasyabya “endambi y’obulighe” yabilaba? Eritomeka oko biri omo Danieli 12:2, omulondo wa 3 akakanaya oko mwatsi owakendisyabya enyuma sy’obulighe bunene.
10 Ni bahi bo “basyakangabasania ng’erihenia ly’ekyanya”? Ebinywa bya Yesu ebiri omo Matayo 13:43 bikatuwatikaya eriminya nga ni bahi: “Oko mughulu oyo abatunganene omo meso w’oMungu basyakangabasania ng’eryuba omo Bwami bwa Tata wabo.” Omughulu Yesu abugha ebinywa ebyo, abya akakania oko “bana b’Obwami,” ni bughambu abaghala babo abahirirwe kw’amaghuta abakendisyatabala haghuma naye omo Bwami bw’elubula. (Mat. 13:38) Busana n’ekyo Danieli 12:3 kitokekene kutsibu iyabya iyikakanaya oko bahirirwe kw’amaghuta n’oko mubírí ogho bakendisyakola omo Butabali bw’eMyaka Elfu.
Abandu 144 000 bakendisyakola haghuma na Yesu bakasondola omubírí w’erikangirirya owakendisyakolwa omo myaka 1 000 (Lebaya enungu 11)
11-12. Omo myaka 1 000, abandu 144 000 bakendisyakola mubírí wahi?
11 Abahirirwe kw’amaghuta “basyasondola abangyi eribana ekitunganene” kyo bati? Abahirirwe kw’amaghuta bakendisyakola haghuma na Yesu erisondola omubírí w’erikangirirya owakendisyakolwa hano h’oko kihugho omo myaka 1 000. Abandu 144 000 bakendisyatabala haghuma na Yesu n’eribya bahereri. (Erib. 1:6; 5:10; 20:6) Kwesi, bakendisyakola oko mubírí w’“erilamya ebihanda”—n’eriwatikya abandu erihikira erihika-hikana. (Erib. 22:1, 2; Ezek. 47:12) Bwasyabya butseme bunene oko bahirirwe kw’amaghuta!
12 Ni bahi bo bakendisyabya omo mighanzo y’“abangyi” abasyakolibwa okw’ibana ekitunganene? Omo mighanzo eyi muli abakendisyalubukibwa n’abakendisyabala oko Harmagedoni haghuma n’abana abakendisyabutirwa omo kihugho kihya-kihya. Oko nduli y’emyaka 1 000, abikalani bosi b’oko kihugho bakendisyabya ibabirihika-hikana. Neryo amena wabo asyahandikwa kera na kera omo kitabu ky’engebe omo bwino butsira omo kreyo mughulu wahi?
ERILENGWAKO LY’ENDULI
13-14. Abandu bosi abahika-hikene abakendisyabya oko kihugho bakendisyatolera erikolaki embere bahabawe engebe y’erikota?
13 Litolere itwibuka ngoko erihika-hikana lisa lyo litendisyaleka omundu inyahabwa engebe y’erikota. Tulengekanaye oko Adamu na Eva. Babya bahika-hikene, aliwe erihabwa engebe y’erikota babya batolere ibakangania ngoko basikirye Yehova Mungu. Nikwa eky’obulighe, mobatamusikya.—Rom. 5:12.
14 Abasyabya oko kihugho oko nduli y’emyaka 1 000 bakendisyabya omo mibere eyiri yiti? Abosi bakendisyabya bandu abahika-hikene. Abandu abahika-hikene abo banemwendisyayisogha eribya oko luhande lw’obutabali bw’oMungu ko kera na kera? Kutse abaghuma ba kubo bakendisyayitwa nga Adamu na Eva—abaleghula nomo banabya bahika-hikene? Likendisyatolera amabulyo aya inyabana eby’erisubirya kugho. Nikwa ati?
15-16. (a) Abandu bakendisyahabwa akanya k’erikangania ngoko ni bataleghula oko Yehova mughulu wahi? (b) Erilengwako ly’enduli likasyaluira moki?
15 Sitani akendisyabohwa omo myaka 1 000. Oko mughulu oyo, syendisyabya n’obutoki bw’eritebya omundu wosi-wosi. Aliwe, oko nduli y’emyaka 1 000, Sitani akendisyaboholwa. Akendisyasonda eritebya abandu abahika-hikene. Omughulu w’erilengwako eryo, abandu bosi abahika-hikene bakendisyabya n’akanya k’erikangania ndeke-ndeke nga banasikirye erina ly’oMungu n’obutabali bwiwe. (Erib. 20:7-10) Ebyo bakendisyakola oko mughulu oyo byo bikendisyakangania amena wabo ng’anatolere erihandikwa omo kitabu ky’engebe kera na kera kutse iyehe.
16 Abandi, abatasibwe mighanzo, bakendisyakola nga Adamu na Eva. Bakendisyaghana obutabali bwa Yehova. Basyahikirwa naki? Ekitbu kya Eribisulirwa 20:15 kikatubwira kiti: “Omundu oyutawite erina erisakire omo kitabu ky’engebe, mwaguswa omo ngetsi y’omuliro.” Abandu abo bakendisyatoghotibwa kera na kera. Aliwe abandu bangyi abahika-hikene bakendisyasabuka okw’ilengwako ly’omwiso eryo. Neryo amena wabo akendisyasakwa kera na kera omo kitabu ky’engebe.
“OKO MUGHULU W’ENDULI”
17. Omumalaika mwabwira Danieli ati oko muguhulu wetu hakendisyabya myatsi yahi? (Danieli 12:4, 8-10)
17 Kikatsemesaya kutsibu erighanirya oko myatsi eyikendibya omo biro ebikasa! Aliwe, kandi omumalaika mwabwira Danieli y’emyatsi milebe y’omughaso eyilebirye omughulu wetu ono ni bughambu, “omughulu w’enduli.” (Soma Danieli 12:4, 8-10; 2 Tim. 3:1-5) Omumalaika mwabwira Danieli ati: “Eriminya [ly’ekwenene] lyasyakanyirira.” Abandu b’oMungu bangowire ndeke ebinywa by’obuminyereri ebiri omo kitabu eki. Omumalaika mwatomekako ati omo mughulu ono “ababi basyakola nabi, isihali mundu mubi oyowasyaminya.”
18. Abandu babi bakisiya ibahikirwa naki?
18 Munabwire ababi bakabya nga sibalisuyirawa busana n’ebibi byabo. (Mal. 3:14, 15) Aliwe Yesu akisiya iniatswera abandu abasosekanibwe n’esyombene n’erisololabo okw’abakasosekanibawa n’esyombuli. (Mat. 25:31-33) Ababi aba sibendisyabala oko bulighe bunene kandi nibya sibendisyalubuka batoke eryikala omo kihugho kihya-kihya. Amena wabo syendisyabya omo “kitabu ky’eryibuka” ekikanibweko omo Malaki 3:16.
19. Eno y’endambi okw’itwe ey’erikolaki, kandi busanaki? (Malaki 3:16-18)
19 Eno y’endambi okw’itwe y’erikangania ngoko situli omo babi. (Soma Malaki 3:16-18.) Yehova anemuhindania “obusoki [buwe]” bw’embaghane ni bughambu abandu b’obughuli bunene omo meso wiwe. Ahate eritika-tika twanzire itwabya ba kubo.
Tukendisyatsema kutsibu tukalangira Danieli, abanze betu, n’abandi bangyi ‘bakalubuka’ omo kihugho kihya-kihya busana n’erighabo lyabo eryabiryahulwa! (Lebaya enungu 20)
20. Oko nduli, Yehova mwalagha Danieli yoki, kandi busanaki ulindirire eribererera ly’omulaghe oyo?
20 Kwenene, tuli omo mighulu ey’embaghane. Aliwe n’eyindi myatsi eyikaswekaya kutsibu ikisiya iyahika. Lino-lino tukendilangira obubi bwosi bukalusibwaho. Enyuma w’aho tukendilangira eribererera ly’omulaghe ogho Yehova aha Danieli ono: “Wasyalubuka oko nduli y’emigulu busana n’erigabo lyawe eryabiryahulwa.” (Dan. 12:13) Unalindirire n’engumbu nene ekiro Danieli n’abanze baghu, “basyalubuka”? Byamabya bitya ukole ekyosi-kyosi ekyo wangatoka lino utoke eribya mutaleghula. Aho, ighukendiyiketera ngoko erina lyaghu likendibya irinasakirwe omo kitabu kya Yehova eky’engebe.
OLWIMBO 80 “Ulenge, ulebaye Yehova kw’ali mubuya”
^ Omwatsi ono alimo eriminya lyetu lihya-lihya erilebirye omubírí munene w’erikangirirya owate atakolwa owakanibweko omo Danieli 12:2, 3. Tukendilangira omubírí oyo ng’akendisyabya mughulu wahi kandi nga ni bahi bo bakendisyasangira kugho. Kandi tukendilangira endegheka eyo nga yasyateghekania yiti abakendisyabya oko kihugho busana n’erilengwako ly’enduli erikendisyabya oko nduli y’oButabali bwa Kristo obw’emyaka 1 000.
^ Alinga abataleghula abahola oko biro by’enduli bo bakendisyatsuka erilubuka neryo ibakwama-kwamana ngoko baghenda bakahola bunyuma-nyuma. Byamabya bitya abakalubukibawa ibakendisyatoka erikokya abandu abo basi. Nomo yangabya ini nzira yahi eyikendisyakolesibwa, Amasako akabugha ati hakendisyabya ‘eritondeka’ oko bakalubukira elubula, na busana n’ekyo tukalengekanaya tuti abakendisyalubukira oko kihugho nabo bakendisyalubuka omw’itondeka.—1 Kor. 14:33; 15:23.
^ Eri n’iminya lihya-lihya erik’imaya omwanya w’eriminya lya kera eriri omo Sikiliza Unabii wa Danieli! esura 17, n’omo Mnara wa Mlinzi w’ekiro 1 Omwisi 7, 1987, aka. 21-25.
^ Aliwe ebinywa, “abatunganene” “n’abatatunganene” ebiri omo Emibiri 24:15 NWT, n’ebinywa “abakola emibiri mibuya” n’ebinywa “abakola ebibi” ebiri omo Yoane 5:29 bikakanaya oko mibere eyo abakendisyalubukibwa babya nayo embere bahole.
