Tulebaye eBiblia nga yikasubiraya yiti oko mabulyo ayo.

Emibiri y’Abakwenda 24:15 hakabugha hati ‘hasyabya erilubuka ly’abatunganene n’abatatunganene.’ Abatunganene b’abandu ababya bakowa oMungu embere bahole, neryo amena wabo anasakirwe omo kitabu ky’engebe. (Mal. 3:16) Abatatunganene b’abandu abatabana akanya akatosire k’erigha oko Yehova embere bahole, neryo amena wabo syasakirwe omo kitabu ky’engebe.

Yoane 5:28, 29 yikakanaya oko bikuto bibiri ebighumerera ebikanibweko omo Emibiri y’Abakwenda 24:15. Yesu mwabugha ati “abakola emibírí mibuya basyalubuka oko ngebe, n’abakola ebibi basyalubuka oko lubanza lw’eritswerwa.”  Abatunganene mobakola emibírí mibuya embere bahole. Bakendisyalubukira oko ngebe kusangwa amena wabo akinasakirwe omo kitabu ky’engebe. Aliwe, abatatunganene mobakola ebibi embere bahole. Bakendisyalubuka oko lubanza lw’eritswerwa. Amena wabo syalyatasakwa omo kitabu ky’engebe, bakendisyalaba omw’itswerwa, n’ibughambu eriyiteghererya emikolere yabo. Omo mughulu oyo, bakendisyabana akanya k’erigha oko Yehova n’amena wabo erisakwa omo kitabu ky’engebe.

Eribisulirwa 20:12, 13 hakabugha hati abosiabakendisyalubukibwa likendisyatolera ibakwama “emyatsi eyisakire omo bitabu” by’erilinga, n’ibughambu, emighambo eyikendisyaghenderwako omo kihugho kihya-kihya. Abatendisyakwamayo bakendisyalusibwaho.​—Isa. 65:20.

Danieli 12:2 hakabugha hati abaghuma b’oko baghotsere omo lututu lw’ekitaka basyabuka “abandi busana n’engebe y’erikota, nikwa abandi busana n’erihemuka n’esyonye sy’erikota.” Omulondo oyu akakanaya okw’itswerwa ly’enduli ly’abakendisyalubukibwa. Bakendisyabana​—“engebe y’erikota” kutse “erihemuka n’esyonye sy’erikota.” Neryo oko nduli y’emyaka 1 000, abaghuma basyabana engebe y’erikota n’abandi ibatoghotibwa kera na kera.​—Erib. 20:15; 21:3, 4.

Tulebaye eky’erileberyako. Abakendisyalubukibwa abali omo bikuto bibiri ebyo, banganasosekanibwa n’ababunga abanzire eryikala omo kindi kihugho. Abatunganene banganasosekanibwa n’ababunga abakahabawa ebipapura ebikabalighira eritumikira omo kindi kihugho kutse ebikabalighira erikalamo ebikaleka ibaminywa omo kihugho ekyo oko lulengo lulebe n’eribya bwiranda erikala mukyo. Aliwe, abatatunganene bali ng’ababunga abakalighirawa erikala omo kindi kihugho omo biro bike. Emihanda ibiri y’ababunga abo batolere ibakangania ngoko banayiteghekire erikwama emighambo y’omo kihugho ekyo imo balighirwa eribya ndulani sya mukyo. Kutya, abatatunganene abakendisyalubukibwa likendisyatolera ibasikya emighambo ya Yehova n’erikangania ko ni batunganene imo balighirwa erisighala omo Paradiso. Kandi ababunga bangabya imobahabwa ebipapura by’eribalighira erikala omo kindi kihugho omo mughulu muli kutse mukuhi, oko nduli abaghuma bakalighirawa eribya ndulani sya mukyo n’abandi ibatibitwako. Ekyo kikakwamana n’emibere balyayitwamo omo kihugho kihya-kihya ekyo. Kutya, eritswerwa ly’enduli oko bakendisyalubukibwa erisighala kutse erilusibwa omo kihugho kihya-kihya, likendisyakwamana n’obutaleghula bwabo na ngoko basyayitwa omo kihugho kihya-kihya.

Yehova ni Mungu w’erighanyira kandi ow’obulingirirania, ow’eribanza litunganene. (Ebi. 32:4; Esy. 33:5) Busana n’olwanzo akendisyalubukya abatunganene n’abatatunganene. Aliwe kandi, akendisyanza abosi ibakwama esyokanuni siwe sy’endata esilebirye ekibuya n’ekibi. Abakendisyamwanza n’erikwama esyokanuni siwe basa bo bakendisyalighirwa erisighala omo kihugho kihya-kihya.