Omo 1 Abanya Korinto 15:8, Paulo mwabugha ati: “N’enyuma w’abandi bosi mwanyihulukira nibya, ng’oyukabutawa omw’ibulikirwa.” Kera, itukabugha tuti Paulo angabya iniabya akakania oko mwatsi ogho ayilangirira omughulu abana enzoli ya Yesu inyane omo lukengerwa lwiwe lw’elubula. Kyabya ng’abirihabwa olukengerwa lw’eributwa kutse erilubukibwa oko ngebe y’ekirimu embere sy’endambi, esyokarne nyingyi embere omuhanda w’erilubuka oyo abye. Aliwe, enyuma sy’eritsopolya omulondo oyu, motukalebaya iritolere itwatasyalebya buhya-buhya ngoko twabya twasi omulondo oyo.

Ni kwenene omo mulondo oyu Paulo akakanaya oko ebyabya omughulu abya Mukristo. Aliwe, ibwa asond’ibugha atiki omughulu abugha ati “abutawa omw’ibulikirwa”? Eby’erisubirya ni bingyi.

Eribinduka liwe lyabya omo mibere y’eritsumbukania kandi ey’obulumi. Omwana oyukabutawa isyalyaghonerya ebiro, kangyi-kangyi akatsumbukanaya. Saulo (oyo enyuma ahulawa mo Paulo) abya akaya eDamasiki eriy’endererya aBakristo ababyayo, neryo abya isyalindirire eribana enzoli ya Yesu oyo wabirilubukibwa. Eribinduka rya Paulo moritabya erikatsumbukanaya okw’iye musa, aliwe kandi moryabya erikatsumbukanaya n’oko Bakristo ababya akateghekania eriy’endererya n’eryaghalya omo muyi oyo. Kandi, Paulo eribindula obwikirirya bwiwe mwabana obulumi kundi mwanaherya obutoki bw’erilangira omo biro bilebe.​—Emib. 9:1-9, 17-19.

Mwabinduka oko “ndambi eyitatolere.” Ekinywa kya kera ky’eKigiriki ekikabindulawa mo “oyukabutawa ebiro isibyebyaghonera” kyanganatasyabindulwa mo “oyukabutawa oko ndambi eyitatolere.” E Bible de Jerusalem yikabindulakyo yitya: “Kyabya nga monabutwa oko mughulu hatabya oyulindirire ekyo.” Paulo abinduka eribya Mukristo, Yesu inyabirisuba elubula. Paulo iye mwatabya ng’abakanayako omo milondo y’aho nyuma kundi iye mwatalola oko Yesu inyabirilubuka embere asube elubula. (1 Kor. 15:4-8) Yesu erimuhulukira, moryaha Paulo y’akanya ako k’erimulolako, nomo lyanabya oko “ndambi eyitatolere.”

Abya akayikaniako omo nzira y’eriyikehya. Abandi basomi bakabugha bati ekinywa ekyo Paulo akolesaya hano, kirimo akali ng’akasekereryo. Ekyo kyamabya ikyo kyabya omo bulengekania bwa Paulo, inyabya akakangania ngoko syatolere olusunzo olw’ahabawa. Nibya, mwabugha ati: “Ingye indi muke oko bakwenda bosi, kandi sinyitolere eriahulwa mo mukwenda, kusangwa monendererya endeko y’oMungu. Nikwa nyiri ngoko nyine busana n’olukogo lw’oMungu.”​—1 Kor. 15:9, 10.

Neryo, kikabya Paulo ng’abya akakania oko mibere ey’eritsumbukania eyo Yesu amuhulukiramo, eribinduka liwe eribya Mukristo oko ndambi eyiteyo, kutse eribya isyabya atolere eribana enzoli eyo busana n’emibere yiwe y’obunya-kirimu. Nomo kyangabya inyabugha atya busanaki, kilangirikire ngoko Paulo mwalangira omwatsi oyo mo w’obughuli. Ekyo mokyaleka inyikirirya ndeke-ndeke ngoko Yesu abirilubukibwa erilua oko baholi. Kyo kyaleka omughulu abya akatulira abandi okw’ilubuka lya Yesu, inyabya akakania kangyi-kangyi oko ekyamuhikira eki.​—Emib. 22:6-11; 26:13-18.