Busanaki embere Yesu ahole mwabugha ebinywa bya Dawidi ebiri omo Esyonyimbo 22:1?

Omo binywa eby’omwiso ebyo Yesu abugha embere ahole habya ebikabanika omo Matayo 27:46: ‘Mungu waghe, Mungu waghe, busanaki ukanyisighanaya kwehi?’ Omwibugha atya, Yesu mwaberererya ebinywa by’omuhandiki w’esyonyimbo yo Dawidi ebikabanika omo Esyonyimbo 22:1. (Mar. 15:34) Si mwatsi w’amenge eribugha tuti Yesu mwabugha ebinywa ebi kundi abya iniabiritwa amaha kutse kundi obwikirirya bwiwe mobwakeha ndambi nyilebe. Yesu abya inianasi ndeke ekyangalekire iniahola, kandi abya inyanayiteghekire erihola. (Mat. 16:21; 20:28) N’akandi abya inianasi ngoko oko ndambi y’oluholo lwiwe, Yehova angalekire erimuteya. (Yobu 1:10) Neryo Yehova mwasighira Yesu y’akanya k’erikangania ngoko angasighere mutaleghula mughulu wosi n’omo oluholo lwiwe lwangakalire luti.​—Mar. 14:35, 36.

Nikwa Yesu mwabugha ebinywa by’olwimbo olu byo busanaki? N’omo twangabya isitwasi ndeke-ndeke ekyaleka, tukanaye oko myatsi milebe eyangabya iyo yaleka. *

Omwibugha ebinywa ebi, Yesu abya akasonda erikangania ngoko Yehova syendikola ekyosi-kyosi omo luholo lwiwe? Lyabya litolere Yesu inialiha embanulo butsira obuwatikya bwa Yehova. Abya mundu kundu-kundu kandi lyabya litolere iniahola atya atoke “erihola busana n’abandu bosi.”​—Ebr. 2:9.

Omwibugha ebinywa bike by’omo lwimbo olo, Yesu abya anzire ati abandi balengekanaye oko lwimbo losi kwehi?  Omo biro ebyo abayahudi ibabeghere erihamba esyonyimbo nyingyi sy’omo mutwe. Omwibabukya omulondo mughuma w’omo lwimbo, ibanganalengekania aho n’aho oko lwimbo losi. Ekyo kyamabya ikyo kyabya omo bulengekania bwa Yesu, ikyangawatikirye abigha biwe Bayahudi eryibúka amaminyereri mangyi awali omo lwimbo olo awakakanaya oko myatsi eyilebirye oluholo lwiwe. (Esy. 22:7, 8, 15, 16, 18, 24) Kandi, emilondo y’oko mwiso w’olwimbo olo, yikapipa Yehova kandi yikakanganaya ngoko ni Mwami w’ebyosi.​—Esy. 22:27-31.

Omwibugha ebinywa bya Dawidi ebyo, Yesu abya akasonda erikangania ngoko syaliko lubanza kwehi? Embere ahole, e Sanedrini moyahandikirirya oko Yesu k’olubanza lw’eribugha ambu ni mutsumi. (Mat. 26:65, 66) E Sanedrini moyalua iyahindana omo kiro n’erilua iyasoha olubanza olo omo mibere eyitahambene n’emighambo n’ahake. (Mat. 26:59; Mar. 14:56-59) Omughulu Yesu abulaya ati: “Mungu waghe, Mungu waghe, busanaki ukanyisighanaya kwehi?” Anganabya iniabya asondire ati abandi balengekanaye ngoko mwatakola ekibi kyosi-kyosi kandi ngoko sihali ekyangaleka ibamwita.

Kandi Yesu asonda eryibukya abandi ngoko Yehova n’omo analeka Dawidi omuhandiki w’olwimbo luno aghalawe, sibughambu mwamughana? Eribulyo lya Dawidi molitakangania liti obwikirirya bwiwe bwabirikeha. Enyuma sy’eribulya eribulyo eryo, mwabugha ati abya ikirirye ngoko Yehova angalamirye abandu biwe, kandi Yehova mwalola embere erimutsumula. (Esy. 22:23, 24, 27) Kutya, nomo Yesu, “omughala wa Dawidi,” anaghalawa oko muti w’amaghali, sibughambu Yehova abya isyakimulighire.​—Mat. 21:9.

Yesu abya akakangania obwaghali buwe bunene aminyisaye ngoko lyabya litolere Yehova iniamulusyako obuteya Bwiwe atoke erikangania obutaleghula bwiwe? Eryaghalwa n’erihola ly’omughala w’oMungu siryabya omo erisonda liwe ry’erimbere. Mukyatolera busana Adamu na Eva mubayisamambula oko Mungu. Yesu mwatakola ekibi kyosi-kyosi, aliwe kyabya litolere iniaghalwa n’erihola atoke erisubirya oko mabulyo awo Sitani ahulukaya, n’eribya mbanulo eyitolere eriliha ekyo omundu aheraya. (Mar. 8:31; 1 Pet. 2:21-24) Ebyosi ebyo bitoke eriberera, Yehova mwalusaya obuteya bwiwe bw’oko Yesu oko katambi kake, engendo y’erimbere omo ngebe yiwe.

Yesu anabya akasonda eriwatikya abigha biwe erilengekania kutsibu oko ekyaleka Yehova inialigha ati ahole omo nzira eyo kwehi? * Yesu abya inianasi ngoko erihola atya ng’omukola nabi oko muti w’amaghali kyanganatwikalirye abandu bangyi. (1 Kor. 1:23) Abigha biwe nga balengekanaya kwenene oko ekyaleka iniahola, banganaminyire amaana w’ekwenene w’oluholo olo. (Gal. 3:13, 14) Bangamulangire m’oMulamya butsira ng’omukola nabi.

Yesu nomo angabya iniabugha ebinywa ebyo byo busana n’omwatsi wahi, abya inianasi ndeke ngoko ebyosi ebyamuhikira lyabya erisonda lya Yehova okwiye. Katambi kake abibugha ebinywa by’omo lwimbo olu, Yesu mwabugha ati: “Byamahwa!” (Yoa. 19:30; Luka 22:37) Inga, Yehova erimulusya k’obuteya bwiwe omo katambi kake, mokyaleka Yesu iniaberererya ndeke ebyosi ebyaleka inyatumwa erikola oko kihugho. Kandi mokyaleka iniaberererya ebyosi ebyabya bihandikirwe okwiye “omo Mighambo ya Musa n’ebitabu by’Abaminyereri n’omo Syonyimbo.”​—Luka 24:44.