Eky’obulighe, nabere nayira hakuhi emyaka 13, obwira bwaghe bwa hakuhi na Yehova mubwatsuka eriholoka. Ingalangira abakolo balikyaghe nga bawite obwiranda, naghe kutya nabya ngayisunza eribya n’obwiranda ng’obwabo. Munayowa nga nabirilitoherwa n’emighambo ya babuti n’esyokanuni sy’eKikristo, kandi munalengekania eriramya Yehova nga likaluhaya. Nomo nanabya ininikirirye ngoko Yehova aneho, munatsuka eriyowa nga sinyikiri hakuhi naye.

Mundaleka eritulira ly’olosi, aliwe ingatulira kwangu. Omughulu nabya ngayatulira, isindiyiteghekanaya n’ahake, neryo eritsukisya kutse erilolya omukania w’embere irikanyikalako. Ekyo mukyaleka inaherya obutseme bwaghe n’eritendibya ngabana ebighúma ebyuwene by’omo mubírí w’eritulira, neryo emibere eyo muyaleka inapona omubírí w’eritulira wo kutsibu. Nibya inganayibulaya nyiti ‘omundu angatoka ati eribya akatulira oko buli yenga, n’oko buli mwisi?’

Omughulu nayira emyaka 17, munanza eriyisondola ingyuwene-wene. Neryo munasenga ebindu byaghe, namalua eka, n’erihumira e Australie. Ababuti baghe erilangira ngoko namabasighania mubaghalwa  kutsibu. Mubahangya-hangya, aliwe mubalengekania bati ngendilola embere erikolera Yehova.

Nabere nahika e Australie, erikolera Yehova munakehya lyo kutsibu. Munatsuka eribula oko mihindano. Munatwa obwira n’abalwana n’abambesa ababya n’emibere eyiri ng’eyaghe abakatsemera eriya oko mihindano kw’erigholo righuma n’erigholo erikwamire ibayanywa n’erisatira omo bara. Nabere nayiteghererya ebyo nabya ngakola, munalangira ngoko ekisando kyaghe kighuma kyabya omo kwenene n’ekindi omo kihugho, aliwe isihali aho ngayowa mbolere.

Habere habilaba hakuhi emyaka ibiri, munahindana omo katambi kake n’omwali wetu mughuma oyo waniwatikaya butaminya eritsuka erilengekania engebe yaghe nga yikalolaya hayi. Nabya omo nyumba mo haghuma n’abali betu basimbi batano, neryo mutwakokya omulebererya w’omutimbo n’omukali wiwe yo Tamara, erisyapanga omo nyumba yetu mo yenga nguma. Omughulu iba wiwe abya akateghekania emyatsi y’endeko, yo Tamara mwabya akalabya endambi yo haghuma n’itwe bambesa n’eriseka netu. Munatsemera emibere eyo. Abya mundu oyukatsomana abandi kandi erikania naye iryolobire. Munasweka erilangira omundu oyuwite bingyi by’erikola omo mubírí wa Yehova ngoko anganabya mundu oyo abandi bakatsemera erilabya endambi yo haghuma naye.

Tamara abya mundu oyutsanga-tsangire. Olwanzo lwiwe oko kwenene n’oko mubírí w’eritulira ilukakuna abandi erikola. Iniakatsema erikolera Yehova n’omutima wiwe wosi, ibwa ingye ininaponire erimukolera n’omubírí muke buyira. Amalengekania wiwe awuwene n’obutseme bwiwe bw’ekwenene mubyatula kutsibu oko ngebe yaghe. Eky’erileberyako kiwe mukyaleka inalengekania oko kwenene y’omughaso eno: Yehova anzire ati itwe bosi itwamukolera “n’eriyisyandira” kandi “n’esyonyimbo sy’obutseme.”​—Esyo. 100:2.

Munatsemera obutseme obo Tamara abya nabo, aliwe eribana obutseme obo, lyabya litolere inabinduka omo myatsi minene-minene. Nomo hanalaba biro, oko nduli munatsuka eribinduka omo myatsi  mike-mike. Munatsuka eribya ngayiteghekania okwitulira, n’eribya mupainia muwatikya omo mighulu milebe. Emibere eyo muyaniwatikya erikehya obuba bwaghe kandi muyaleka inayikirirya. Kandi Kusangwa munabya ngakolesya eBiblia yo kutsibu omo mubírí w’eritulira, munatsemeragho kutsibu. Munalwa inabya ngakola obupainia buwatikya b’obuli mwisi.

Munatsuka eribya n’obwira n’abandu b’olubu losi ababya bakakwama ekwenene yo ndeke kandi ibanzire omubírí w’erikolera Yehova. Eky’erileberyako kyabo mukyaniwatikya erilengekania omwatsi w’omughaso munene omo ngebe yaghe nga ni wahi n’eritsuka erisoma eBiblia y’obuli kiro. Munatsuka eritsemera omubírí w’eritulira wo kutsibu, n’oko nduli namabya mupainia w’omughulu wosi. Engendo y’erimbere omo myaka mingyi, munabya n’obutseme n’eriyowa mbolere omo ndeko.

Enyuma sy’omwaka mughuma, munahindana na Alex, omulume w’olukogho, oyo wanzire Yehova yo kwenene n’omubírí w’eritulira. Abya mughombe muwatikya w’omo ndeko kandi iniabiribugha emyaka 6 y’omo bupainia b’omughulu wosi. Nibya Alex abya iniabirilabya mughulu mulebe w’eyiri obwagha bunene bw’abatuliri omo kihugho kye Malawi. Eyo, mwakola omubírí wo haghuma n’abamisionere ababya eky’erileberyako ekyuwene okwiye kandi mubamuhira m’omuhwa w’eriyitsinga erihira emyatsi y’oBwami y’embere.

Omo mwaka 2003, ingye na Alex mutwalunga, n’erilua oko mughulu oyo tunemulola embere erikola omubírí w’omughulu wosi. Twabirigha emyatsi mingyi eyuwene, Yehova naye abiritutsumula omo nzira nyingyi.

Omo mwaka 2009, mutwatumwa mo bamisionere omo kihugho kike ky’omo bitsira bye Indonesie ekikahulawa mo Timor-Leste. Omwatsi oyo mwatusisirya kutsibu, mutwalindirira eriyayo lyo kutsibu aliwe itune n’eryubaha, ebyosi kughuma. Enyuma sy’emisi itano, mutwahika e Dili, omuyi mukulu w’ekihugho.

 Erihuma mulyabindula engebe yetu y’omo nzira nyingyi. Lyabya litolere itwabeghera emibere mihya-mihya, omubughe, akalyo, n’amaisa mahya-mahya. Omo mubírí w’eritulira, itubeghere erihindana n’abera kutsibu, abandu abasi erisoma hake kutse abatasi erisoma n’ahake, n’abatsurumire. Kandi itukalangira abandu bangyi abali kw’esyongolu oko mubiri n’omo mutima busana n’amalwa n’emyatsi y’obwiti. *

Omubírí w’eritulira abya w’eriswekya! Eky’erileberyako, kiro kighuma munahindana n’omumbesa w’emyaka 13 oyukwire obulighe, yo Maria. * Habya ihamabilaba emyaka mike mama wiwe iniabirihola, kandi isyalisungana na baba wiwe yo ngendo nyingyi. Yo Maria abya isyasi ng’ali oko kyahi ng’abana bangyi b’omo lubu lwiwe. Ng’ibuka ngendo nguma mwalira akanikanirya ebiri oko mutima wiwe. Aliwe, monitowa ndeke ebyo abya akabugha kundi isindinatoka eribugha omubughe wiwe wo ndeke. Munasaba Yehova aniwatikaye erimusikya mutima, kandi munatsuka erimusomera amasako awakasubaya mutima omonda. Omo myaka milebe eyakwama, munalangira ekwenene yikabindula emighendere ya Maria, ngoko akalangirika, kutya n’engebe yiwe. Mwabatisibwa, na lino akasondolaya amafunzo w’eBiblia. Lino, Maria awite ekihanda kinene ky’eKikristo kandi akayowa ngoko anzirwe.

Yehova anemutsumula omubírí w’eritulira w’omo Timor-Leste. Omo abatuliri bangyi ababiribatisibwa omo myaka 10 eyalaba, abangyi bamubo bakakola ng’abapainia, baghombe bawatikya kutse basyakulu b’endeko. Abandi bakakolera oko biro ey’eribindula ebitabu kandi bakawatikaya erilusya akalyo k’omutima k’omo mibughe y’ewabo. Munatsema kutsibu eribowa bakimba oko mihindano, erilangira esyonyusu syabo esiri m’obutseme, n’eribalangira bakakula omwibya n’obwira n’oMungu.

Amaisa wetu omo Timor-Leste abya asighene kutsibu na w’omo Australie, aliwe sinabya nilengekenie eribya n’engebe eyiri m’obutseme bunene yitya. Esindi ndambi, itukaghenda omo katoka kake akoswire mw’abandu, ikane mw’amahere mabisi, n’ebitu by’esisagha erilua omo soko. Ebindi biro, itukasondolaya efunzo y’eBiblia y’omo nyumba nyike eyiri m’omutsafu, ekihuhania n’eryuhuhirira, n’esyongoko isinemulaba-laba. Aliwe, nomo hanabya amaligho, ingalengekanaya nyiti, ‘Ono ni mwatsi mukulu!’

Omughulu ngalengekanaya oko ebyabirilaba, ngabya n’erisima linene oko babuti baghe busana n’eriyikasa lyabo erinikangirirya esyonzira sya Yehova, n’eriniwatikya n’omo mughulu nabya ngakolera Yehova yo butsira muhwa. Emisyo 22:6 moyabererera omo mwatsi waghe. Yo baba na mama bakatutsemera ingye na Alex; bali n’obutseme erilangira ngoko tukakolesibawa na Yehova. Eritsuka oko mwaka 2016 tune omo mubírí w’obulebererya omo mutimbo w’ekiharo ekye Beteli ya Australasia.

Erikirirya ngoko muhanabya omughulu owo nalangiramo omubírí w’eritulira ng’akalire lyanganakala. Lino nianzire omubírí w’eritulira! Nabirilangira ngoko n’omo hane ebibuya n’ebitsibu omo ngebe, obutseme bw’ekwenene bukasira omwikolera oMungu n’omutima wosi. Kwenene, emyaka 18 eyamabilaba itunemukolera Yehova kughuma na Alex y’emyaka y’obutseme bunene omo ngebe yaghe. Nabirilangira ngoko ebyo omuhandiki w’esyonyimbo yo Dawidi abugha oko Yehova ni kwenene: “Abosi abakakusaghirako batseme; bayitsangure ebiro byosi. . . . Kandi abakakwanza basyakutsemerako.”​—Esy. 5:11.