1. Omukania owalabibawa oko muhindano munene w’oko 1935 mwawatikyati omulwana mughuma?

OMULWANA oyuwabya awite emyaka 18 mwabatisibwa oko 1926. Ababuti biwe babya baghuma b’oko bigha b’eBiblia kutse Abimiri ba Yehova ngoko babya bakahulwa oko myaka eyo. Babya bawite abana b’obulume basatu n’ab’obukali babiri, abo bakulaya kandi mubakangiriryabo erikolera Yehova na Yesu Kristo. Obuli mwaka, omulwana mutaleghula oyo mwabya akalya oko mukati ng’abandi bigha b’eBiblia n’erinywa oko divai omughulu w’Akalyo k’Erigholo k’Omukama. Aliwe, amaha wiwe w’omo biro ebikasa mwabinduka omughulu akwama omukania owakabugha ati “Endeko Nene.” Omukania oyo alabibawa na mughala wetu J. F. Rutherford oko muhindano munene omo Washington, D.C., U.S.A. oko 1935. Abigha b’eBiblia mubighaki oko muhindano munene oyo?

2. Omo mukania wiwe, Mughala wetu Rutherford mwakania oko kwenene yahi?

² Omo mukania oyo, Mughala wetu Rutherford mwakania oko bangabere “kikumula kinene” (KJ), kutse “endeko nene,” eyikahulawa omo Eribisulirwa 7:9. Erihika aho abigha b’eBiblia babya bakalengekania bati, endeko nene eyi ni kikumula ky’abandu abangayire elubula, aliwe abawite obwikirirya buke kulenga aBakristo abahirirwe kw’amaghuta. Mughala wetu Rutherford mwakangania erilabira Amasako ngoko endeko nene siyirisombolawa eriya elubula, aliwe sy’esindi mbuli sya Kristo * esikasyalama ‘omwendereribwa linene’ kutse obulighe bunene, n’eribyaho kera  na kera oko kihugho. (Erib. 7:14) Yesu mwabugha ati: “Ni wite esindi mbuli esite sy’omo butsunga obu; litolere inaletasyo nibya, nasyo syasyowa omulenge wage; syasyabya ekihangulo kiguma n’omulisya muguma.” (Yoa. 10:16) Abandu abakasosekanibawa n’esyombuli b’aBimiri ba Yehova abataleghula abawite amaha w’erisyabya oko kihugho Paradiso ko kera na kera. (Mat. 25:31-33, 46) Tulebaye amakangirirya mahya-mahya aya, ngoko abindula engebe y’abandu ba Yehova bangyi, erihiramo n’omulwana w’emyaka 18 oyo tulyakanayako oko nzuko.​—Esy. 97:11; Emi. 4:18.

3-4. Oko muhindano munene we 1935 abandu bangyi mubaminyaki oko maha wabo, kandi busanaki?

³ Oko katambi akate kangibiriranwa ak’omo muhindano oyo, omubuyi mwabulya abahulikiriri ati: “Abosi abawite amaha w’erisyabya kera-kera oko kihugho bahangane?” Oyowayilangirira omwatsi oyo akabugha ati, abandu banene oko nusu y’abahulikiriri 20 000 mubahangana. Mughala wetu Rutherford mwabugha ati: “Eyi, y’endeko nene!” Enyuma syaho, obuli mundu omo muhindano oyo mwayitsangura n’obutseme. Abahangana mubalangira ngoko babya isibasombolirwe erisyaya elubula. Mubaminya ngoko si babya bahirirweko amaghuta erilabira ekirimu kibuyirire ky’oMungu. Ekiro ekyakwama eky’omuhindano, Abimiri bahya-bahya, 840 mubabatisibwa mo Bimiri ba Yehova, n’abangyi ba kubo babya ini b’oko sindi mbuli.

⁴ Enyuma sy’omukania, omulwana oyo tulyakanayako n’abandi bandu bangyi, mubaleka erirya oko mukati n’erinywa oko divai omughulu w’Akalyo k’Erigholo k’Omukama. Abangyi mubayowa ng’omughala wetu mughuma oyowabugha omwiyikehya ati: “Omuhindano w’Eryibuka Oluholo lwa Yesu oko 1935 mwabya w’enduli ogho nalya oko mukati n’erinywa oko divai. Munaminya ngoko amaha w’eriya elubula syabukibawa omwingye erilabira ekirimi kibuyirire kya Yehova; munaminya ngoko niri n’amaha awerisyabyaho kera na kera oko kihugho n’erisangira oko mubírí w’eriyira ekihugho mo paradiso.” (Rom. 8:16, 17; 2 Kor. 1:21, 22) Eritsuka aho, ab’omo ndeko nene banemukanya kandi banemukola haghuma n’aBakristo abahirirwe kw’amaghuta abakiri oko kihugho. *

5. Yehova ali n’amalengekania wahi oko abakaleka erirya oko mukati n’erinywa oko divai omughulu w’Eryibuka Oluholo lwa Yesu?

⁵ Enyuma sy’omwaka 1935, Yehova mwalangira ati abaleka erirya oko mukati n’erinywa oko divai omughulu w’Akalyo k’Erigholo k’Omukama? Tubughe tutiki oko Mwimiri wa Yehova oyubatisibwe munabwire, oyukalya oko mukati n’erinywa oko divai omughulu w’Akalyo k’Erigholo k’Omukama, neryo inyaminya ngoko syahirirwe kw’amaghuta erilabira ekirimu kibuyirire? (1 Kor. 11:28) Abandu balebe mubabya bakalya oko mukati n’erinywa oko divai kundi mubatowa ndeke amaha wabo. Aliwe bakabya babiminya kwenene-kwenene ngoko mubayiteba, bakaleka erirya oko mukati n’erinywa oko divai neryo ibalola embere erikolera Yehova butaleghula. Oko kwenene Yehova akendisyabahira omo mighanzo y’esindi mbuli. Nomo sibakirya oko mukati n’erinywa oko divai, bakinakwama omuhindano w’eryibuka Akalyo k’Erigholo k’Omukama kundi bakakanganaya kutsibu erisima lyabo busana n’ekyo Yehova na Yesu babakolera.

6. Yesu mwabwira abamalaika ati bakoleki?

⁶ Kundi obulighe bunene buli hakuhi, ni ky’omughaso eriminya ebyo Eribisulirwa esura 7  yikatasyakanaya oko Bakristo abahirirwe kw’amaghuta n’oko ndeko nene y’esindi mbuli. Yesu mwabwira abamalaika ati, balolaye embere erihambirira amahunga ani w’eritsandya. Sibatolere erilwika amahunga ayo erihika aho aBakristo abahirirwe kw’amaghuta bakasyahirawa kw’ekiminyikalo, nibughambu eriliwa na Yehova ngoko ni bataleghula. (Erib. 7:1-4) Ekihembo ekikahabawa abaghala babo Yesu, abahirirwe kw’amaghuta, ry’eribya bami n’abahereri haghuma naye omo Bwami bw’elubula. (Erib. 20:6) Yehova, Yesu n’abamalaika bakasyatsema erilangira abahirirwe kw’amaghuta 144 000 bakabana ekihembo kyabo ky’omo lubula.

7. Ngoko kiri omo Eribisulirwa 7:9, 10, ni bahi abo Yoane alangira omo nzoli, kandi babya bakakolaki? (Lebaya epitsa eyiri oko kijalada.)

⁷ Enyuma sy’erikania oko abami n’abahereri 144 000, Yoane mwalangira ekindi kindu ekitsemesirye, “endeko nene” eyiryasabuka oko Harmagedoni. Ekikumula ky’erimbere kisighene n’ekyakabiri, kundi ekyakabiri kirimo abandu banene abatawite mighanzo. (Soma Eribisulirwa 7:9, 10.) Bambite “esyokanzu nyeru-nyeru,” ekyo kikakanganaya ngoko “bakayihigula” oko kihugho kya Sitani, n’erisighala bataleghula oko Mungu na Kristo. (Yak. 1:27) Banemubirikira omo mulenge muli bati, mubalamibwa busana n’ebyo Yehova na Yesu bakola. Kandi bawite oko mitahi y’amabondo omo byala byabo, ekyo kikakanganaya ngoko balighire Yesu mo Mwami wabo oyo Yehova abirihiraho.​—Linganisaya Yoane 12:12, 13.

8. Eribisulirwa 7:11, 12 yikatubwiraki oko kihanda kya Yehova ky’elubula?

⁸ Soma Eribisulirwa 7:11, 12. Abali elubula babere balangira endeko nene mubayowa bati? Yoane mwalangira abosi abali omo lubula ibatsemire kandi ibanemupipa oMungu bakalangira ab’omo ndeko nene. Ekihanda kya Yehova ky’elubula kikendisyatsema kikalangira eribererera ly’enzoli eyi omughulu endeko nene bakendisyasabuka oko bulighe bunene.

9. Ngoko kiri omo Eribisulirwa 7:13-15, ab’omo ndeko nene banemukolaki lino?

⁹ Soma Eribisulirwa 7:13-15. Yoane akabugha ati abandu b’omo ndeko nene “babiryerya esyo kanzu syabo, n’eriyirasyo mo nyeru-nyeru omo musasi we Kyana k’embuli.” Ekyo kikakanganaya ngoko bawite obunya-mutima obwerire, kandi balighirwe na Yehova. (Isa. 1:18) Ni Bakristo ababiriyiherera oko Yehova n’eribatisibwa, kandi bawite obwikirirya obuwatire omo mbanulo ya Yesu, kandi bawite obwira obuwene haghuma na Yehova. (Yoa. 3:36; 1 Pet. 3:21) Batolere erimana embere sy’ekitumbi ky’oBwami ky’oMungu “bakamukolera omo musibo n’omo kiro” omo butala bw’ehekalu yiwe y’obunya-kirimu yoko kihugho. Na lino bali n’omuhwa w’eritulira n’eriyira abigha kusangwa oBwami b’oMungu ky’ekindu ky’omughaso omo ngebe yabo.​—Mat. 6:33; 24:14; 28:19, 20.

10. Abomo ndeko nene bikiriryeki, kandi basyalangira omulaghe wahi akabererera?

¹⁰ Endeko nene y’abakalua omo bulighe bunene, banikirirye ngoko Yehova akendilola embere eribatsomana kusangwa “oyo wikere oko kitumbi ky’obwami asikala omo katikati kabo.” Endaghane eno eyo ab’omo sindi mbuli bakalindirira yikendisyabererera: “oMungu asyasangula emisonia yosi oko meso wabo, kandi oluholo silwendisyaswabyaho, erisusumana kutse eririra kutse eryagalwa.”​—Erib. 21:3, 4.

11-12. (a) Ngoko kiri omo Eribisulirwa 7:16, 17 ni miyisa yahi eyo ab’omo ndeko nene bakasyabana? (b) Ni kyahi ekyo ab’omo sindi mbuli batolere ibakola omughulu w’Eryibuka Oluholo lwa Yesu, kandi busanaki?

¹¹ Soma Eribisulirwa 7:16, 17. Abaghombe ba Yehova bangyi munabwire bakwire enzala, kusangwa sibawite esyofranga esitosire esy’erighula akalyo oko balayireko, kandi bakaghalawa busana n’amaligho awakaletawa n’amalwa. Abandi bane omo muliki  busana n’obwikirirya bwabo. Aliwe, ab’omo ndeko nene batsemire kundu kundi banasi ngoko bakendisyabya basabuka eritoghotibwa ly’ekihugho kino, bakasyabya n’akalyo kangyi ak’ekinya-mubiri n’ako bunya-kirimu erilua oko Yehova. Omughulu w’eritoghotibwa ly’ekihugho kibi kino kya Sitani, ab’omo ndeko nene bakendisyalama “erihuhana” erikalua oko kinigha kya Yehova ekyo akendisyutulira oko bihanda. Enyuma sy’obulighe bunene erihwa, Yesu akendisyasondola abakasyasabuka oko kihugho n’eritwalabo eyiri ‘amaghetse wʼengebe’ y’erikota. Wanamalangira ngoko abomo ndeko nene bawite amaha mabuya! Omo mamiliyare w’abandu ababirikala oko kihugho, abomo ndeko nene bakasyabana akanya akeritendisyasyahola kera na kera!​—Yoa. 11:26.

¹² Ab’omo sindi mbuli bawite amaha awuwene awakaleka ibasima Yehova na Yesu! N’omo Yehova mwatasombolabo eriyikala elubula, ananzirebo ngoko anzire abahirirwe kw’amaghuta. Abahirirwe kw’amaghuta n’ab’omo sindi mbuli, abosi bakapipa oMungu na Kristo. Enzira nguma eyo bakakoleramo batya ry’erihika oko Kalyo k’Erigholo k’Omukama.

13-14. Busanaki ni ky’omughaso itwe bosi eribya tukahika oko muhindano w’Eryibuka Oluholo lwa Yesu?

¹³ Omo myaka ya lino-lino, hakuhi mundu mughuma oko bandu 1 000 abakahika oko muhindamo w’Eryibuka Oluholo lwa Yesu yukalya oko mukati n’erinywa oko divai. Ekyo nibughambu omo syondeko nyingyi simuli omundu n’omughuma oyukalya oko mukati n’erinywa oko divai omughulu w’Eryibuka Oluholo lwa Yesu. Abandu bangyi abakahika oko muhindano w’Eryibuka Oluholo lwa Yesu, bali n’amaha w’erisikala oko kihugho. Busanaki bakahika oko muhindano w’Akalyo k’Erigholo k’Omukama? Bakahika ngoko omundu akanahika oko ndwa y’omunywani wiwe. Abanywani bakahika oko ndwa erikangania olwanzo n’erisikya lyabo oko balunga. Ab’omo sindi mbuli bakahika oko muhindano w’Eryibuka Oluholo lwa Yesu, kundi banzire erikangania Yesu n’abahirirwe kw’amaghuta b’olwanzo n’erisikya lyabo. Ab’omo sindi mbuli bakahika oko muhindano w’Eryibuka Oluholo lwa Yesu erisyakangania erisima lyabo oko mbanulo eyikaleka ikyatokekana okw’ibo erisyabyaho kera na kera oko kihugho.

 ¹⁴ N’oghundi mwatsi w’omughaso owakaleka ab’omo sindi mbuli ibahika oko muhindano w’Eryibuka Oluholo lwa Yesu, ly’erisikya ekyalayiro kya Yesu. Omughulu Yesu atsukisaya akalyo ako ak’embaghane haghuma n’abakwenda biwe abataleghula, mwabwirabo ati: ‘Mubye mukakola mutya busana nʼerinyibuka.’ (1 Kor. 11:23-26) Abandu balebe aboko bahirirwe kw’amaghuta ibakine oko kihugho, ab’omo sindi mbuli bakendilola embere erihika oko muhindo w’Akalyo Akerigholo k’Omukama. Kandi ab’omo sindi mbuli, bakakokaya obuli mundu erihika oko muhindano w’Eryibuka Oluholo lwa Yesu haghuma n’abo.

15. Twangapipa tuti oMungu na Yesu oko muhindano w’Eryibuka Oluholo lwa Yesu?

¹⁵ Oko muhindano w’Eryibuka Oluholo lwa Yesu, tukabana akanya k’eripipa oMungu na Yesu omughulu tukimba n’erisaba haghuma. Omukania w’Eryibuka Oluholo lwa Yesu owo mwaka ono akendibya n’omutwe owakabugha ati: “Ukanganaye erisima busana n’eky’oMungu na Kristo babirikukolera!” Omukania oyo akendileka iwabya n’erisima linene oko lwanzo olo Yehova na Yesu bakukanganaya. Neryo omughulu omukati n’edivai bikalaba, bikatwibukaya ebyo bikasosekanaya​—nibughambu omusasi wa Kristo n’omubiri wiwe. Kandi tukibuka ngoko Yehova mwaligha Mughala wiwe erihola omo mwanya wetu tutoke eribana engebe. (Mat. 20:28) Obuli mundu oyo wanzire Tata wetu w’elubula na Mughala wiwe bakenditsema erihika oko Muhindano w’Eryibuka Oluholo lwa Yesu.

16. Abahirirwe kw’amaghuta n’esindi mbuli basosene omo nzira yahi?

¹⁶ Omo nzira nyilebe abahirirwe kw’amaghuta n’esindi mbuli basosene. Yehova anzire abahirirwe kw’amaghuta n’esindi mbuli omo lulengo lughumerera. Tukaminya ekyo kundi mwaghula abahirirwe kw’amaghuta n’esindi mbuli oko bughuli bughumerera, nibughambu engebe ya Mughala wiwe mwanzwa. Eritendisosana omo kati k’esindi mbuli n’abahirirwe kw’amaghuta liri omo amaha wabo. Aliwe abomo bikuto byosi bibiri ebyo batolere ibasighala bataleghula oko Mungu na Kristo. (Esy. 31:23) Kandi twibuke ngoko akaghala k’oMungu kanganakola n’amaka maghumerera okw’itwe bosi. Nibughambu, Yehova akaha obuli mughuma w’okw’itwe y’akaghala kiwe kabughirire akalaghireko nomo twangabya oko bahirirwe kw’amaghuta kutse esindi mbuli.

17. Abahirirwe kw’amaghuta bakalindiriraki n’omuhwa?

¹⁷ Abakristo abahirirwe kw’amaghuta sibalibutawa n’amaha aw’erisikala elubula. OMungu yukahira amaha ayo w’omo mitima yabo. Bakalengekanaya oko maha wabo ayo, bakasaba busana nagho kandi bakalindirira n’omuhwa erisyabana  ekihembo kyabo ky’omo lubula. Sibasi omubiri wabo w’obunya-kirimu ng’akandisyabya ati omo lubula. (Flp. 3:20, 21; 1 Yoa. 3:2) Aliwe bakalindirira erisyahindana na Yehova, Yesu abamalaika nabandi abahirirwe kw’amaghuta. Bakalindilira n’omuhwa eribya haghuma nabo omo Bwami bw’elubula.

18. Ab’omo sindi mbuli bakalindiriraki n’omuhwa?

¹⁸ Ab’omo sindi mbuli bakatsemera amaha wabo aw’erisikala oko kihugho kera na kera. (Omug. 3:11) Obuli mundu ayitaghire omwatsi oyo. Bakalindirira n’omuhwa omughulu bakendisyawatikya eribindula ekihugho kyosi mo paradiso. Bakalindirira n’omuhwa erisyahimba amanyumba wabo, erisyalima ehilima hyabo ehyuwene, n’erisyabuta n’erikulya abana ab’emibiri eyihika-hikene. (Isa. 65:21-23) Bakalindirira n’omuhwa erisyaminya buli ekihugho​—n’ebitwa, emisitu n’esyo ngetse​—kandi n’erigha bingyi oko bihangyikwa bya Yehova. N’ekinene oko byosi, bakatsema kutsibu eriminya ngoko obwira bwabo haghuma na Yehova bukendisyalola embere eriwata.

19. Omuhindano w’Eryibuka Oluholo lwa Yesu akatuha akanya k’erikolaki, kandi akendisyakolwa mughulu wahi oko mwaka ono?

¹⁹ Yehova abiriha obuli mughuma w’oko baghombe biwe y’amaha awuwene omo mughulu owakasa. (Yer. 29:11) Omuhindano w’Eryibuka Oluholo lwa Yesu akatuha itwe bosi akanya k’eripipa oMungu na Kristo oko ebyo batukolera ebikendisyaleka itwabana engebe y’erikota. Omuhindano w’Eryibuka Oluholo lwa Yesu w’omuhindano w’embaghane w’obuli mwaka oko Bakristo b’ekwenene. Oko mwaka ono, omuhindano oyo akendisyakolwa omo poso, Ekiro 27 oMwisi 3, 2021 eryuba lyabilenga. Abangyi bikere omo biharo ebirimo obwiranda, ekyo kikendisyaleka ibahika oko muhindano oyo. N’abandi bakendisyakola omuhindano oyo n’omo banemwendereribwa. N’abandi bakasyakolera omuhindano oyo w’omo ngomo. Yehova, Yesu abamalaika n’abahirirwe kw’amaghuta abali elubula bakabalebya, twamabasunzira muhindano mubuya w’Eryibuka Oluholo lwa Yesu!