Abakristo balebe bakakolesaya enzira nyihya-nyihya y’ekielektronike erikania n’abandu ab’omo kihanda kyabo kutse n’abandi Bimiri ba Yehova. Aliwe, oMukristo oyukulire atolere inyabya inyanibukire erihano lino: “Omundu wʼobulengekania amalangira ebibi, akayibisa; nikwa abakiru bakatwangana ibagalwa busana nʼekyo.”​—Emi. 27:12.

Tutsemire kundi Yehova anzire erituteya. Neryo, sitwanzire eriyighunga oko bakaleta erighabana n’oko babirihighitwa omo ndeko abakaleta emyatsi ey’eritwikalya. (Rom. 16:17; 1 Kor. 5:11; 2 Yoa. 10, 11) Abandu balebe abakayighunga n’endeko banganabya isibalisikaya ebyalayiro ibiri omo Biblia. (2 Tim. 2:20, 21) Omughulu tukasombola abira, twibuke kino. Kyanganakala erisombola abira abuwene twamabirondyabo omo nzira y’ekielektronike.

Ni ky’omughaso eriyiteya kutsibu oko mwatsi w’erisombola abira abuwene twamabya omo bikuto ebirimo bandu bangyi abakatumirana esyo mesage omo nzira y’ekielektronike. Abakristo balebe babiringira omo bikuto ebirimo abandu bangyi, n’ekyo kikalwiramo ebighuma ebituwene. Mughala kutse mwali wetu angayiteya ati oko kikuto ekirimo abandu abalabire oko mia moya kutse elfu moya? Sikitokekene eriminya ndeke obuli mundu kandi eriminya emibere y’obunya-kirimu y’abali omo kikuto ekyo. Lengekanaya oko bihandikire omo risako ly’Esyonyimbo 26:4 erikabugha liti: “Sindisiba n’abandu batya-batya, kandi sindiriga erigenda n’abatebya.” Ekyo kyamakangania ngoko ni ky’amenge erikanirania erilabira esyo mesage omo nzira y’ekielektronike n’abandu abo twasi.

Nibya n’omo kikuto eky’erikanirania erilabira esyo mesage ekirimo abandu bake, oMukristo atolere inyalengekania oko ndambi eyo akalabaya amwikola atya n’abandu abo akakaniranaya nabo. Situtolere eriyowa nga tusabirwe erisubirya oko syo mesage, nomo syangabya isiri siti kutse nga syangatwimirya ndambi nyingahi. Paulo mwahandikira Timoteo eriyiteya oko bandu “abakabya mbandangania, nʼeriyihira omo myatsi yʼabandi.” (1 Tim. 5:13) Munabwire, kitokekene erikola ekindu ekiri ng’ekyo omo nzira y’ekielektronike.

Omukristo oyukulire syangabugha kutse erihulikirira olutongo kutse emyatsi eyitatolere eriminywa n’abandi Bimiri ba Yehova. (Esy. 15:3; Emi. 20:19) Kandi atolere inyayihighula oko myatsi eyangahutalya kutse eyangowika muhanda kutse eyite y’ekwenene. (Efe. 4:25) Tuwite esyongulu nyingyi esiseghemere eBiblia. Tukabana akalyo ak’obunya-kirimu oko jw.org, n’oko JW teledifizio^® obuli mwisi.

Abimiri balebe bakakolesaya esyo mesage sy’ekielektronike erighula, erighulya kutse erikangania ebyo bakaghulaya kutse eriha abandi b’omubírí. Ebyosi ebyo ni myatsi y’ekomerese, sibilebirye n’ahake eriramya lya Yehova. OMukristo oyutekwamirira ‘erianza esyofranga’ akayihighula oko kitegho ky’erilolya embere emyatsi yiwe y’ekomerese erilabira abaghala babo.​—Ebr. 13:5.

Twanganakolesya esyo mesageri sy’ekielektronike erisaba esyofranga busana n’abaghala n’abali betu abali omo bwagha kutse abalyabana obuhanya? Twanzire abaghala betu kandi tubatsomene, neryo tukawatikaya abalaghire oko buwatikya n’eribasubya mutima. (Yak. 2:15, 16) Aliwe, erikola tutya erilabira esyo mesage sy’ekielektronike kyanganaleka ikyakala oko Betheli kutse endeko eribawatikya. (1 Tim. 5:3, 4, 9, 10, 16) Kandi isitwaleka abaghala betu balengekanaye bati nitwe twabirisombolwa n’erihabwa olusunzo lw’embaghane lw’eribateya n’eribatsomana.

Twanzire eriletera oMungu y’olukengerwa. (1 Kor. 10:31) Neryo wamayisogha erikolesya esyo mesage esy’ekielektronike n’eyindi teknolojia, ulengekanaye oko bitsibu ebwangalwiramo kandi uyiteghaye.