1. Omundu akayowa ati omughulu ow’oko kihanda kiwe akaleka erikolera Yehova?

OMUNDU mulebe oyo wanzire anabirihiwa omo ndeko? Ekyo kyanganita bulighe bunene! Mwali wetu mughuma oyukahulawamo Hilda akabugha ati: “Omughulu omwira waghe mutaleghula ahola itwamabibugha emyaka 41 omo ndwa, munalengekania niti oyo wo mwatsi w’obulighe bunene kulenga eyindi myatsi yosi eyo nabirilabamo. * Aliwe omughulu omwana waghe n’omukali wiwe, n’abana biwe mubaleka erikolera Yehova, mukyabya kitsibu kinene okwingye kulenga n’eriherya omwira waghe.”

2-3. Ngoko kisakire omo Esyonyimbo 78:40, 41, Yehova akayowa ati omughulu abaghombe biwe bakaleka erimukolera?

² Terilengekania ngoko Yehova mwayowa muhanda omughulu abamalaika balebe ababya b’oko kihanda kiwe omo lubula mubaleka erimukolera! (Yuda 6) Kandi lengekanaya ngoko Yehova mwayowa muhanda omughulu ekihanda kiwe ekyabya anzire eky’Abaisraeli kyabya kikayisamambula ngendo nyingi okw’iye. (Soma Esyonyimbo 78:40, 41.) Okw’ekyo, uminye ngoko Tata wetu w’elubula w’olwanzo akayowa muhanda omughulu omundu mulebe oyo twanzire akaleka erimukolera. Anasi obulumi obo ukalabamo. Akendikukwira obulighe, neryo iniakuha obukirania n’obuwatikya obo ulayireko.

³ Omo mwatsi ono, tukendilangira emyatsi eyo twangakola tutoke eribana obuwatikya bwa Yehova omughulu omundu mulebe oyo twanzire amaleka erimukolera. Kandi tukendilangira ngoko twangawatikya abandi omo ndeko abanemulaba omwilengwako eryo. Eky’erimbere, tutsuke erikania oko myatsi milebe eyo tutatolere erikola.

4. Ababuti bangyi bakayowa bati omughulu omughala kutse omwali wabo akaleka erikolera Yehova?

⁴ Omughulu omughala kutse omwali oyo banzire akaleka erikolera  Yehova, kangyi-kangyi, ababuti bakalengekanaya bati alinga mubatitakola omubírí wabo wo ndeke ow’eribawatikya erisighala omo kwenene. Omughulu mughala wiwe ahighawa omo ndeko, mughala wetu Luke mwabugha ati: “Munalengekania niti amakosa ni waghe. Isindighotsera busana n’omwatsi oyo. Ininganahika n’oko kika ky’erilira n’omutima inialuma.” Mwali wetu Elizabeth, naye oyo walaba omo mwatsi owali ng’oyo mwalengekania ati: “Alinga ingye mama wiwe munditakola ebyo nitolere erikola. Munalengekania nga munitakola ebyo nabya nitolere erikola eriwatikya omwana waghe erianza Yehova.”

5. Omughulu omundu akaleka erikolera Yehova, amakosa akabya ini wandi?

⁵ Litolere isitwibirirawa ngoko Yehova abiriha obuli mughuma w’okw’itwe obwiranda bw’eriyisombolera. Ekyo ni bughambu, kiri okw’itwe erisombola nga tukendimukolera kutse iyehe. Abana balebe mubayira ababuti abatabya by’erileberyako ebyuwene okwibo, aliwe abana abo mubasombola erikolera Yehova n’erisighala bataleghula okw’iye. Ihabya n’abandi bana abayira ababuti abawatikayabo kundu erikolera Yehova, aliwe enyuma babikula, abana abo mubaleka erikolera Yehova. Kwesi, obuli mundu yukasombola ng’akendikolera Yehova. (Yos. 24:15) Okw’ekyo, babuti, inywe mukayowa muhanda busana n’abana benyu erileka erikolera Yehova, isimwalengekanaya muti amakosa ni wenyu!

6. Omwana anganayowa ati omughulu omubuti wiwe amaleka erikolera Yehova?

⁶ Hakanabya endambi omubuti inialeka erikolera Yehova kutse iniasigha n’ekihanda kiwe. (Esy. 27:10) Ekyo kyanganatula kutsibu oko ngebe y’abana abanzire n’abasikirye ababuti babo. Mwali wetu Esther, oyo tata wiwe ahighawa omo ndeko, akabugha ati: “Kangyi-kangyi, ingalira ngalangira ngoko tata waghe anemuhera oko kwenene omwiyiririra. Nianzire tata waghe, okw’ekyo omughulu ahighawa omo ndeko, kangyi-kangyi inganayibulaya ng’ane ati. Munakwa n’etasyo nibya.”

7. Yehova akayowa ati oko balwana n’abambesa abawite ababuti ababirihiwa omo ndeko?

⁷ Inywe balwana n’abambesa, omughuma w’oko babuti benyu amabya iniabirihiwa omo ndeko, twamabakirania n’omutima wetu wosi! Kandi muminye ngoko Yehova anasi ndeke obulumi obo mukalabamo. Yehova abanzire kandi akabatsemera kundi munemulola embere erimukolera butaleghula​—nitwe baghala n’abali benyu b’omo ndeko tubanzire. Kandi mwibuke ngoko ababuti benyu eriyisogha batya, amakosa si wenyu. Ngoko tunalyabugha oho mbere, Yehova abiriha obuli mundu obwiranda bw’erisombola ng’akendimukolera kutse iyehe. Kandi obuli mundu oyowabiriyiherera oko Yehova n’eribatisibwa “asyaheka iyowene omuheke wuwe-wuwe.”​—Gal. 6:5.

8. Bakalindirira omwanzwa wabo asubire Yehova, ab’oko kihanda kiwe abataleghula batolere ibabya ibanemukolaki? (Lebaya n’akasanduku “ Usubire Yehova.”)

⁸ Omughulu omundu mulebe oyo twanzire akaleka erikolera Yehova, kangyi-kangyi tukabya itune n’amaha tuti akendisyamusubira. Neryo twangayira tuti tukalindirira omundu oyo asubire Yehova? Ulole embere eriwatya obwikirirya bwaghu. Wamabikola utya, iwukendibya eky’erileberyako ekyuwene oko bandi bandu b’omo kihanda kyenu alinga nibya n’oko mundu oyulyaleka erikolera Yehova oyo. Kandi nibya iwukendibana n’akaghala k’erikinda erilengwako elyo. Tulangire emyatsi milebe eyo wangakola eribya iwune n’obwikirirya obuwatire.

9. Wangakolaki utoke eribya iwune n’obwikirirya obuwatire? (Langira n’akasanduku “ Amasako awangakusubya mutima omwanzwa waghu amaleka erikolera Yehova.”)

⁹ Kola ngoko wangatoka utoke eribya iwune n’obwikirirya obuwatire. Ni ky’omughaso okw’iwe erilola embere eriwatya obwikirirya bwaghu n’obwabandi b’omo kihanda kyaghu. Wangakola ekyo kyo ghuti? Ubane akaghala erilwa oko Yehova omwibya ukasoma ekinywa ky’oMungu n’erighanirya kukyo ko buli, kutya n’eribya ukahindana oko mihindano y’eKikristo. Mwali wetu Joanna oyo tata wiwe n’omwali wabo mubaleka ekwenene, akabugha ati: “Nabere nasoma oko bandu abakanibweko omo Biblia nga Abigaili, Esiteri, Yobu, Yosefu na Yesu, munaleka erihangya-hangya. Eby’erileberyako byabo mubyanisubya mutima kandi mubyaniwatikya eribya ininatekene. Kandi n’esyonyimbo syetu esikalwa oko Jw teledifizyo nasyo isikanisubaya mutima.”

10. Esyonyimbo 32:6-8 sikatuwatikaya siti eriyiyinia omughulu tukayowa muhanda omo mutima?

¹⁰ Ubwire Yehova emyatsi yosi eyikakuhanga-hangaya. Omughulu ukayowa muhanda, isiwaleka erimusaba. Uhatikane oMungu w’olwanzo uti akuwatikaye erilangira emyatsi ngoko akalangirayo “n’erikukangirirya enzira wangalabamo.” (Soma Esyonyimbo 32:6-8.) Ni kwenene, kyanganakala eribwira Yehova ngoko ukayowa. Aliwe uminye ngoko Yehova anasi eryaghalwa ly’omutima waghu. Akwanzire kutsibu kandi akakusaba erimubwira amalighe waghu wosi.​—Eri. 34:6; Esy. 62:7, 8.

11. Ngoko kihandikire omo Abaebrania 12:11, busanaki ni ky’omughaso munene eritenditika-tikira erikunga ly’olwanzo lya Yehova? (Ulebaye n’akasanduku “ Erihigha ababi b’omo ndeko kikakanganaya ngoko Yehova atwanzire.”)

¹¹ Ulighe eritswera ly’abasyakulu. Erihigha omundu omo ndeko, ni kighuma ky’oko ndegheka sya Yehova. Erikunga ly’olwanzo lya Yehova elyo, y’enzira eyuwene y’eriwatikya omukolanabi kandi ikaletera n’abandi b’endundi. (Soma Abaebrania 12:11.) Abandu balebe banganalengekania  bati abasyakulu mubakatswera muhanda, aliwe isiwibirirawa ngoko kangyi-kangyi abandu abo sibalyanza eribugha ekibi oko mukolanabi. Ubye n’eriyiketera ngoko abasyakulu abakabisogha omwatsi oyo mubakakola ngoko bangatoka erikolesya amasako n’eritswera busana na “Yehova.”​—2 Emy. 19:6.

12. Abandu balebe mubabana ebighuma byahi ebyuwene erikwama ekyalaghiro kya Yehova ky’eritendikania n’omundu oyulyahighawa omo ndeko?

¹² Wamabisikya erisoha ly’abasyakulu ly’erihigha omundu oyo wanzire omo ndeko, ekyo kyanganamuwatikya erisubira Yehova. Mwali wetu Elizabeti, oyo tulyakanayako embere, akabugha ati: “Mukyatukalako kutsibu eritendibya tukakania na mughala wetu kundi abya isiakiri mwana. Aliwe abere abisubira Yehova, mwaligha ngoko abya atolere erihiwa omo ndeko. Enyuma, mwabugha ati mwigha emyatsi mingyi. Ekyo mukyaleka inialangira erikunga lya Yehova ngoko lyuwene.” Ye Mark, omwira wiwe naye akatomekako ati: “Habere halaba ebiro bingyi, mughala waghe mwambwira ati mwanza erisubira Yehova kundi mututabya tukakania naye omughulu ahighawa omo ndeko. Ngasima Yehova ngoko mwatuwatikya erikwama ebyalaghiro biwe.”

13. Ni byahi ebyangakuwatikya omughulu ukayowa muhanda omo mutima?

¹³ Ukanaye n’abira abangatoka eriyihira omo mwanya waghu. Ubye ukalabya endambi nene haghuma n’abaghala n’abali betu abakulire bunya-kirimu abangakuwatikya eritendiherya amaha. (Emi. 12:25; 17:17) Mwali wetu Joanna, oyo tulyakanayako embere, akabugha ati: “Munayowa omo mbwera. Aliwe eribya ngakania n’abandu abo niyiketere mukyaniwatikya kutsibu.” Wangakolaki omundu mughuma omo ndeko amabibugha emyatsi eyangaleka iwayowa muhanda?

14. Busanaki litolere itwakwama erihano elikabugha liti: “Muganyirane, mubuyirane omugulu omundu awite omwatsi oko ogundi”?

¹⁴ Ubye n’amalengekania awuwene oko baghala n’abali betu. Isitwalindirira tuti obuli kiro bakendibugha emyatsi eyikendituhimba ngoko tulwe tulengekenie. (Yak. 3:2) Itwe bosi situhika-hikene, okw’ekyo isiwasweka abandu balebe bamabula eky’eribugha, kutse ebabugha emyatsi eyangakuhutalya, kundi sibaliyiririra. Wibuke erihano ly’omukwenda Paulo elikabugha liti: “Muganyirane, mubuyirane omugulu omundu awite omwatsi oko ogundi.” (Kol. 3:13) Mwali wetu mughuma oyo omughuma w’oko kihanda kiwe ahighawa omo ndeko, akabugha ati: “Yehova mwaniwatikya eribughira abaghala betu ababya bakasonda erinisubya mutima kwesi ibanemunihutalya isibasi.” Endeko yangayira yiti yitoke eriwatikya ab’oko kihanda ky’oyulyahighawa omo ndeko abakine bataleghula?

15. Twangayira tuti eriwatikya ab’oko kihanda ky’omundu oyulyahighawa omo ndeko?

¹⁵ Ubye ukakokya n’olwanzo n’omuhwa munene ab’oko kihanda ky’oyulyahighawa omo ndeko abakine bataleghula. Mwali wetu oyukahulawamo Miriam akabugha ati: “Mughala wetu abere abihiwa omo ndeko, iningubaha eriya oko mihindano. Ingahanga-hangaya busana n’ebinywa ebyo bandu bakendibugha. Aliwe habya abaghala n’abali betu bangyi nabo ababya bakayowa  muhanda busana n’emyatsi eyatuhikira. Kandi mubatabya bakabugha muhanda oko mughala wetu oyo wahighawa omo ndeko. Mubaniwatikya eritendiyowa ingyuwene omo maligho.” Oghundi mwali wetu akibuka ati: “Mughala wetu abere abihiwa omo ndeko, abira betu banzwa mubasa erisyatusubya mutima. Abaghuma mubambwira bati sibawite eky’eribugha. Abandi mubalira haghuma naghe n’abandi mubanitumira esyobaruha esy’erinisubya mutima. Ebyo bakola mubyaniwatikya kutsibu!”

16. Endeko yanganalola embere yo yiti eriwatikya ab’oko kihanda ky’oyulyahighawa omo ndeko?

¹⁶ Tulole embere eriwatikya ab’oko kihanda ky’oyulyahighawa omo ndeko abataleghula. Endambi eyo, w’omughulu balaghire kutsibu oko olwanzo n’ebinywa byetu ebikasubaya mutima. (Ebr. 10:24, 25) Hakanabya endambi ab’oko kihanda ky’oyulyahighawa omo ndeko, ibayowa nabo nga babirihiwa omo ndeko kundi abandu balebe omo ndeko ibabirileka eribya bakabugha nabo. Isitwaleka ibayowa batya busana netu eribahuna! Litolere itwasima n’eribya tukasubya mutima abalwana n’abambesa abawitw ababuti ababirileka erikolera Yehova. Mwali wetu Maria oyo mwira wiwe ahighawa omo ndeko n’enyuma syaho amasigha ekihanda kiwe, akabugha ati: “Abaghuma b’oko bira baghe ibakasa ewaghe erisyahuka n’erisyaniwatikya erigha haghuma n’abana baghe. Ibakayihira omo mwanya waghe n’erilira haghuma naghe. Ibakanilwirako abandu babinibughako amabehi. Mubaniwatikya kutsibu!”​—Rom. 12:13, 15.

17. Abasyakulu bangakolaki batoke erikirania abali omo maligho?

¹⁷ Abasyakulu bakakola ngoko bangatoka batoke eriwatikya abandu b’oko kihanda ky’oyulyahighawa omo ndeko abakine bataleghula. Uwite olusunzo lw’embaghane olw’erikirania aBakristo bali kyenyu abawite abanze babo ababirileka erikolera Yehova. (1 Tes. 5:14) Ubye n’omubere w’eribakirania, ukanaye nabo embere emihindano itsuke kutse yabihwa. Ubye ukayababana eka wabo n’erisaba haghuma nabo. Wubye ukayatulira nabo, n’oko sindi ndambi iwababirikira eka waghu batoke erisangira okwiramya ly’enyu ly’eka. Abasyakulu b’endeko batolere ibakangania ngoko batsomene esyombuli sya Yehova esiri omo maligho n’eriyihira omo mwanya wasyo n’erikanganisyo olwanzo olo siyitayire.​—1 Tes. 2:7, 8.

18. Ngoko kiri omo 2 Petero 3:9, Yehova anzire ababirileka erimukolera ibakolaki?

¹⁸ Yehova “syanzire omundu n’omuguma akahera nikwa anzire abandu bosi ibabindula emitima yabo n’erileka ebibi.” (Soma 2 Petero 3:9.) Nomo omundu anganakola erilolo erikalire, engebe yiwe ikabya iyikinawite omughaso omo meso wa Yehova. Wibuke ngoko Yehova mwaliha ekindu ky’obughuli bunene​—ni bughambu engebe y’omwana wiwe mwanzwa​—busana n’itwe bosi bakolanabi. Omo lwanzo Yehova anzire eriwatikya ababirileka erimukolera bamusubire. Ane n’amaha ati bakendisombola erisuba okw’iye ngoko Yesu anakanganayakyo omo musyo wiwe w’omwana oyo watala. (Luka 15:11-32) Abangyi abaleka ekwenene, enyuma mubasubira tata wabo w’elubula w’olwanzo. N’abaghala n’abali betu mubabakokya n’obutseme bunene. Mwali wetu Elizabeth, oyo tulyakanayako oho embere, mwabya n’obutseme akalangira mughala wiwe akasubibwa omo ndeko. Akibuka ati: “Ngasima kutsibu kundi abandu bangyi mubatuwatikya eritendiherya amaha.”

19. Busanaki litolere itwalola embere eriyiketera Yehova?

¹⁹ Litolere itwabya tukayiketera Yehova omughulu wosi. Syangatusaba erikola emyatsi eyangatuhutalya. Ni mwenge kandi ni Tata oyukaghanyira kandi oyo wanzire kutsibu abakamukolera. Uminye ngoko syangakulekerania na hake omo maligho ogho ukalabamo. (Ebr. 13:5, 6) Mughala wetu Mark oyo tulyakanayako oho embere akabugha ati: “Yehova mwatatulekerania na hake. Syalibya ehali okw’itwe omughulu w’amaligho. Yehova akendilola embere erikuha “obutoki bunene.” (2 Kor. 4:7) Okw’ekyo, wanganasighala mutaleghula kandi iwune n’eriyiketera n’omo omundu oyo wanzire anganaleka erikolera Yehova.