1. Tukakekeluha, ni mwatsi wahi owo twangakola?

TUKAKEKELUHA, twanganatsuka erikwa obuba tukalengekania tuti sitwendisyakola ndeke omo mubírí wa Yehova ngoko twabya tukakola itukine balwana. Nomo twangabya isitukiwite akaghala ako twabya nako itukine balwana, twanganakolesya amenge n’emyatsi eyo tw’igha eriwatikya abalwana erikola bingyi omo ndondeko ya Yehova n’eriligha eyindi mibírí. Omusyakulu mughuma w’endeko oyuwabiribugha biro bingyi mwabugha ati: “Omughulu natsuka eriyowa ngoko sinangasyatoka erikola bingyi ngoko nabya ngakola kera busana n’erikekeluha, munatsema kundi habya ihane abalwana abangatoka erikola omubírí wo ndeke.”

2. Omo mwatsi ono tukendikania okuki?

² Omo mwatsi awalaba mutwalangire ngoko abalwana banganabana endundi omughulu bakakola obwira n’abaghala n’abali betu ababirikekeluha. Omo mwatsi ono, tukendilangira ngoko eriyikehya, eriyiminya lulengo, erisima n’eribya mwenge byanganawatikya abaghala n’abali betu abakekeluhire erikola haghuma n’abalwana, n’ekyo kyanganaletera endeko yosi y’endundi.

3. Ngoko kisakire omo Abanya Filipi 2:3, 4, omundu oyukayikehaya atolere inyakolaki, n’ekyo kyanganamuwatikya kiti?

³ Abaghala n’abali betu abakekeluhire bamanza eriwatikya abalwana, litolere ibabya bandu abakayikehaya. Omundu oyukayikehaya akalangira abandi mo b’omughaso munene kumulenga. (Soma Abanya Filipi 2:3, 4.) Abakekeluhire abali n’omubere w’eriyikehya banasi ngoko omundu anganakola emyatsi omo syonzira mbiriri-mbiriri esyuwene, kandi esyosi isinahambene n’Amasako. Busana n’ekyo, sibalirindirira obuli mundu erikola emyatsi ngoko babya bakakolayo. (Omug. 7:10) Banganawatikya  kutsibu abalwana omw’ibakanirya oko myatsi eyo bigha. Aliwe kandi bakaminya ngoko ‘omusindo w’ekihugo kino anemubinduka’ neryo okw’ekyo, kyanganabya ky’omughaso okw’ibo erigha esyonzira nyihya-nyihya esy’erikoleramo emyatsi.​—1 Kor. 7:31.

4. Abalebya betu b’omutimbo bakayiwata bati ng’Abalawi?

⁴ Abaghala betu abakekeluhire abakayikehaya bakalangira ngoko omo busyakulu sibakitoka erikola bingyi ngoko babya bakakola kera. Eky’erileberyako, abalebya betu b’omutimbo bakabya bayira emyaka 70 endondeko ya Yehova yikabasaba erikola oghundi mubírí. Ekyo kyanganabakalako. Babya ibanzire kutsibu erikolera abaghala n’abali babo, ibanzire kutsibu omubírí wabo oyo, kandi bakinanzire kutsibu erikolagho. Aliwe bakaminya ngoko kyowene abaghala betu balwana erikola omubírí oyo. Okw’ekyo, bakayiwata ng’Abalawi b’omo Israeli ya kera, ababya bakasabwa erileka omubírí w’omo Hema yʼerihindanamo babiyira emyaka 50. Abalawi basyakulu abo ibakabya ibane n’obutseme nomo bangabya ibakakola omubírí wahi. Mubakola n’omuhwa munene ngoko bangatoka eriwatikya abalwana. (Emig. 8:25, 26) Munabwire, abalebya betu b’omutimbo bakabya bayira emyaka 70 bakaleka erilenderera esyondeko nyingyi. Aliwe, bakinawatikaya kutsibu n’erihimba abandi.

5. Eky’erileberyako kya Dan na Katie kyamakw’ighisyaki?

⁵ Tukanaye oko ky’erileberyako kya mughala wetu Dan, oyo wabya mulebya w’omutimbo omo myaka 23. Dan abere ayira emyaka 70,  iye na mukali wiwe mubasabwa eribya bapainia b’embaghane. Bakakola bati batoke eritsemera omubírí wabo muhya-muhya oyu? Dan akabugha ati lino awite bingyi by’erikola kulenga kera! Akakola emibírí y’endeko, akawatikaya abaghala betu eriberererya emibere eyisabirwe batoke eribya baghombe bawatikya, kandi anemubegherya abandi eritulira omo miyi n’omo syo ngomo. Inywe mukekeluhire, nomo mwangabya omo mubírí w’omughulu wosi kutse iyehe, mwanganawatikya abandi bo kutsibu. Muti? Mwighe eritsemera emibere eyo mwamabyamo, muyihirireho emyatsi mihya-mihya ey’erikola, muhire amalengekania wenyu wosi oko ebyo mwangatoka erikola butsira oko ebyo mutemwangatoka erikola.

6. Eriyiminya lulengo ni bughambuki? Teka eky’erileberyako.

⁶ Omundu oyuyasi lulengo akaminya ngoko hane ebyo ate angatoka erikola. (Emi. 11:2) Eriyiminya lulengo kikamuwatikaya eritendiyilindirirako bingyi kulenga eby’angatoka erikola. Neryo ekyo kikamuwatikaya eritendiherya obutseme bwiwe n’erilola embere erikola kutsibu. Twanganasosekania omundu oyuyasi lulengo n’omusofere oyukaghendaya omutoka omo bweruka. Omusofere oyo asabirwe erisuba omo bitesi by’ahisi imwatoka eryeruka obweruka obo. Kwenene, anganaghenda bolo-bolo aliwe inyanemulola embere. Kutya n’omundu oyuyasi lulengo akaminya ngoko ni mughulu “w’erisuba omo bitesi by’ahisi” atoke erilola embere erikolera Yehova.​—Flp. 4:5.

7. Barzilai mwakangania ati ngoko ayasi lulengo?

⁷ Terilengekania oko ky’erileberyako kya Barzilai, abya musyakulu w’emyaka 80 omughulu Omwami Dawidi amubirikira erisyakola haghuma naye. Busana n’eriyiminya lulengo, Barzilai mwaghana erisyakola haghuma n’Omwami. Busana n’erikekeluha liwe, Barzilai mwaminya ngoko hane ebyo syangasyatoka erikola, neryo mwabwira Omwami ati ye Kimuhamu, oyukine mulwana, aye omo mwanya wiwe. (2 Sam. 19:35-37) Nga Barzilai, abaghala betu abakekeluhire bakatsema erisighira abalwana b’akanya k’erikola omubírí wa Yehova.

8. Omwami Dawidi mwakangania ati ngoko ayasi lulengo omughulu asonda erihimba ehekalu?

⁸ Omwami Dawidi naye mwatusighira eky’erileberyako ekyuwene oko mwatsi w’eriyiminya lulengo. Abya anzire n’omutima wiwe wosi erihimbira Yehova y’enyumba. Aliwe Yehova abere abimubwira ngoko omubírí oyo akendisyakolwa n’omulwana ye Solomona, Dawidi mwataghana eriyisogha lya Yehova. (1 Emy. 17:4; 22:5) Omo mwanya w’erikola atya, mwakola ngoko angatoka eriwatikya okw’iteghekania omubírí oyo. Dawidi mwatalengekania ati iye yutolere erihimba ehekalu kundi Solomona “akine mulere kandi syabegere.” (1 Emy. 29:1) Dawidi abyasi ngoko ehekalu yikendihimbwa kundi Yehova akenditsumula omubírí, si busana n’amenge w’abakasondola. Munabwire, nga Dawidi, abaghala betu abakekeluhire banemulola embere erikolera Yehova nomo emibírí yabo yinemubinduka. Kandi banasi ngoko Yehova akenditsumula abalwana abakakola omubírí owo babya bakakola kera.

9. Mughala wetu mughuma w’omo Katunga k’Ebeteli mwakangania ati ngoko ayasi lulengo?

⁹ Mughala wetu Shigeo ni ky’erileberyako ekyuwene ky’oko mughulu wetu ono eky’eriyiminya lulengo. Omo 1976 abiyira myaka 30, mwasombolwa erikolera omo Katunga k’Ebeteli. Omo mwaka 2004 mwasombolwa mo musangania w’Akatunga k’Ebeteli. Enyuma mwalangira ngoko akaghala kiwe kanemukeha, syangasyatoka erikola omubírí ngoko abya akakolagho kera. Mwasaba kutsibu busana n’omwatsi oyo n’erilengekania buli busanaki litolere mughala wetu mulwana oyukinawite akaghala  yubye musangania w’Akatunga k’Ebeteli. Munabwire mughala wetu Shigeo syakiri musangania w’Akatunga k’Ebeteli. Aliwe anemulola embere erikola haghuma n’abandi omo Katunga k’Ebeteli. Erilabira eky’erileberyako kya Barzilai, n’eky’Omwami Dawidi, na mughala wetu Shigeo, twamabilangira ngoko omundu oyukayikehaya n’oyuyasi lulengo syalilengekanaya kutsibu oko ebyo abaghala betu balwana batasi erikola, aliwe akalengekanaya oko maka wabo. Syalilangirabo ng’abandu abakendimusaghula omubírí wiwe, aliwe akalangirabo ng’abakoli balikyabo.​—Emi. 20:29.

10. Abaghala n’abali betu abakekeluhire batolere ibabya n’amalengekania wahi oko balwana omo ndeko?

¹⁰ Abakekeluhire bakalangira abalwana ng’ebihembo ebikalua oko Yehova kandi bakasimabo busana n’omubírí owo bakakola. Omughulu akaghala kabo kakakeha, abaghala n’abali betu abakekeluhire bakatsema bakalangira abakinawite akaghala k’obulwana ibanayiteghekire kandi ibanganatoka erikola omubírí w’omo ndeko.

11. Erisako lya Ruta 4:13-16 likakanganaya liti ngoko abaghala n’abali betu abakekeluhire bakabana endundi omughulu bakaligha eriwatikibwa n’abalwana?

¹¹ Omughuma w’oko bandu abakanibweko omo Biblia yo Naomi, ni ky’erileberyako ekyuwene eky’omundu oyukekeluhire oyo waligha obuwatikya b’oyukine mulwana. Omwana wiwe abere abihola, Naomi mwasaba omwalyana wiwe oyo wasighala mukwirwa yo Ruta ati asube ewabo. Aliwe, Ruta mwaghana erisighania Naomi, neryo mwasuba naye e Betlehemu. Naomi mwatsema erilangira Ruta akamukwama, neryo mwaligha obuwatikya bwiwe. (Ruta 1:7, 8, 18) N’ekyo mukyaletera ababiri bosi b’endundi! (Soma Ruta 4:13-16.) Abaghala n’abali betu abakekeluhire abakayikehaya bakakwama eky’erileberyako kya Naomi.

12. Omukwenda Paulo mwakangania ati ngoko ni mundu oyukasima?

 ¹² Omukwenda Paulo mwasima busana n’obuwatikya obwabana oko baghala n’abali babo. Eky’erileberyako, mwasima Abakristo be Filipi busana n’obuwatikya bw’ekinya-mubiri obo bamutumira. (Flp. 4:16) Kandi mwakangania erisima liwe oko buwatikya obo Timoteo amuha. (Flp. 2:19-22) Kandi mwasima oMungu busana n’abasyamusubaya mutima omughulu abya akatwalwa e Roma inyane omo muliki. (Emib. 28:15) Yo Paulo abya mbangyi eyaghenda amaelfu w’ebilometere yikatulira n’erihira omo syondeko mw’akaghala. Aliwe, ini mulume oyukayikehaya kutsibu erihika oko kika ky’eriligha obuwatikya bw’abaghala n’abali babo.

13. Abaghala n’abali betu abakekeluhire bangakangania bati erisima lyabo oko balwana?

¹³ Baghala n’abali betu inywe mukekeluhire, mwanganakangania ngoko mukasima abaghala n’abali betu abakiri balwana omo ndeko omo nzira nyingyi. Bamabisonda eribawatikya ne trasporo kutse etaksi, eriyabaghulira ebindu, kutse oko yindi myatsi eyo mulaghireko, ngambe imwaligha obuwatikya bwabo. Muminye ngoko obuwatikya bwabo ni nzira nguma eyo Yehova akakolesaya eribakangania olwanzo. Mwanganahika okw’ibya bira kutsibu n’abakabawatikaya. Kandi muwatikaye abira benyu abo eriyitunda hakuhi na Yehova, n’eribwirabo ngoko mukatsema mukalangira abalwana bakayikasa erikola bingyi omo ndeko. Kandi mubye mukalabya endambi nabo mukabwirabo oko myatsi eyo mwabirilolako. Mwamabikola mutya imukendibya “bandu b’ewasingya” oko Yehova busana n’abalwana abo Yehova abirileta omo ndeko.​—Kol. 3:15; Yoa. 6:44; 1 Tes. 5:18.

14. Omwami Dawidi mwakangania ati ngoko ni mwenge?

¹⁴ Omo ky’erileberyako ky’Omwami Dawidi twamabanamo oghundi mubere owo abaghala n’abali betu abakekeluhire batolere ibakangania​—eribya benge kutse eribya bakahitya. Dawidi mwateka esyofranga nyingyi n’ebindu by’obughuli erilua omo buteke bwiwe eriwatikya obuhimbe bw’ehekalu. (1 Emy. 22:11-16; 29:3, 4) Mwakola ekyo nomo olukengerwa lwangaherwe mughala wiwe yo Solomona. Omughulu situkiri n’akaghala k’ekinya-mubiri k’erikola oko myatsi y’obuhimbe y’eKiteokrasi twanganalola embere eriwatikya oko myatsi y’obuhimbe y’eKiteokrasi erilabira esyofranga esyo tukateka erikwamana n’obutoki bwetu. Kandi twanganawatikya abaghala n’abali betu balwana eribana endundi omw’ibakanirya oko myatsi eyo twayilolerako omo myaka mingyi.

15. Ni myatsi yahi ey’obughuli bunene eyo Paulo aha Timoteo?

¹⁵ Oko mwatsi w’eribya mwenge, tulebaye eky’erileberyako ky’omukwenda Paulo. Mwakokya Timoteo erikola haghuma naye omubírí w’obumisionere, kandi butsira buhemu, mwakangirirya mughala wetu mulwana oyo y’emibere yiwe y’erikangirirya n’eritulira. (Emib. 16:1-3) Paulo mwakangirirya Timoteo eribya mutuliri kandi mukangirirya mubuya w’engulu mbuya. (1 Kor. 4:17) Timoteo naye mwakolesya emyatsi eyigha oko Paulo akabegherya abandi.

16. Niki kyo kyaleka Shigeo inyabegherya abandi?

¹⁶ Munabwire, abaghala n’abali betu abakekeluhire sibalisagha bati bamabibegherya abaghala n’abali betu balwana erikola emibírí eyo babya bakakola kera isibendisyayira emibírí y’omughaso y’erikola omo ndeko. Eky’erileberyako, omo myaka mingyi mughala wetu Shigeo oyo tulyakanayako aho mbere, mwabegherya abaghala betu balwana b’omo Katunga k’Ebeteli. Mwakola ekyo omubírí w’oBwami atoke erilola embere omo kihugho eky’abya akakoleramo. Neryo omughulu aleka eribya musangania w’Akatunga k’Ebeteli, habya ihane  mughula wetu oyubegheribwe ndeke ow’eriya omo mwanya wiwe. Hamabilaba emyaka 45 mughala wetu Shigeo inyane omo Katunga k’Ebeteli kandi anemulola embere eriwatikya abaghala betu balwana erilabira emyatsi eyo abirigha. Abaghala betu abali nga Shigeo bakawatikaya kutsibu abandu b’oMungu!

17. Ngoko kisakire omo Luka 6:38, abaghala n’abali betu abakekeluhire bangaha abandi boki?

¹⁷ Inywe baghala n’abali betu abakekeluhire, muli ebikakanganaya ngoko erikolera Yehova butaleghula n’omo bwikirirya y’enzira eyuwene y’engebe. Erilabira eky’erileberyako kyenyu, mukakanganaya ngoko kyowene okw’itwe erigha esyokanuni sy’eBiblia n’erikolesyasyo omo ngebe yetu. Mumwayilangirira ngoko emyatsi yabya yikakolwa kera, aliwe kandi munemuyilangirira ko kitolere eribeghera emibere mihya-mihya. Baghala n’abali betu abakekeluhire inywe mwabatisibawa lino-lino, nenyu mwanganawatikya abandi omo nzira nyingyi. Mwanganabakanirya ngoko eriminya Yehova mulyabaletera obutseme omo busyakulu bwenyu. Abaghala n’abali betu balwana bakenditsema ery’owa emyatsi eyo mwabirilabamo n’ebyo mwabir’igha. Mwamabilola embere “erihitya” omw’ikangirirya abandi erilabira ebyo mwabir’igha omo ngebe, Yehova inyakendibatsumula kutsibu.​—Soma Luka 6:38.

18. Abaghala n’abali betu abakekeluhire n’abalwana bangawatikania bati?

¹⁸ Baghala n’abali betu inywe mukekeluhire, omughulu mukayitunda hakuhi n’abaghala n’abali betu balwana ekyo kikabawatikaya erisikania mutima. (Rom. 1:12) Obuli mundu anawite ekindu ky’obughuli ekyo oghundi atawite. Abaghala n’abali betu abakekeluhire basi emyatsi mingyi kandi bawite amenge busana n’ebyo babiriyilangirira omo myaka mingyi. Abaghala n’abali betu balwana bawite amaka manene. Omughulu abaghala n’abali betu abakekeluhire n’abalwana bakakola haghuma ng’abira, ekyo kikaletera Tata wetu w’elubula y’olukengerwa n’eriletera endeko y’emiyisa.