LISA mwabugha ati: “Olukogho lw’abaghala n’abali betu Bakristo wo mwatsi owanyitulako kutsibu.” * Abya akakania oko mwatsi owaleka inyaligha ekwenene. Ko byanabya bitya n’oko Anne, oyo wabugha ati: “Eky’erimbere ekyaleka inatsemesibwa kutsibu n’ekwenene l’olukogho lw’aBimiri ba Yehova, butsira ebyo babya bakakangirirya.” Lino abali betu babiri aba bakatsemera erisoma eBiblia n’erilengekania kuyo ko buli, aliwe olukogho molwabatulako kutsibu.

Twangakangania tuti olukogho olukatula oko mitima y’abatutimbireko? Tukanaye oko syonzira ibiri: Erilabira ebinywa byetu n’emikolere yetu. Nikwa tukendilangira nga ni bahi bo litolere itwakangania olukogho.

Omukali mughenge oyukanibweko omo Emisyo ekihande 31 akabya n’“ebihano by’obubuya” oko lulimi lwiwe. (Emi. 31:26) Akaleka “ebihano” ebi bisondole eby’akabugha kandi ng’akendibibugha ati. Abo tata nabo litolere ibabya n’“ebihano” ebi oko syondimi syabo. Ababuti bangyi banasi ngoko eribugha omo bukali lyanganahutalya abana babo kandi lyanganaleka ibatahulikirira ebyo bakabugha. Neryo ababuti bamayikasa erikangania olukogho omughulu bakabugha, ikikendyolobera abana babo erihulikirira n’ery’owa.

Nomo wangabya ighuli mubuti kutse iyehe, wang’igha wuti eribya ukabugha n’olukogho? Omo kitsweka ky’erimbere ky’omulondo w’Emisyo 31:26 mune omwatsi mulebe; abughire ati: “Akatanda obuno buwe omo menge.” Eryo ni bughambu litolere itwasombola ebinywa byetu n’eribibugha n’amenge. Kyanganuwana eribya tukayibulya tuti: ‘Ebyo ngasond’ibugha binemwendihitania abakanyihulikirira kutse binemwendihira h’obuholo?’ (Emi. 15:1) Inga, ni ky’amenge erilengekania embere sy’eribugha.

Oghundi musyo akabugha ati: “Hali oyukabugha butalengekania ng’eritsimita ly’omuyali.” (Emi. 12:18) Twamabilengekania abandi nga bakendiyowa bati busana n’ebyo tukabugha n’emibere eyo tukabibughamo, ekyo ikyanganatuwatikya eriteya ebyo tukabugha. Kwenene, erikolesya “ebihano by’obubuya” likendituwatikya eritendikolesya ebinywa ebikahutalaya n’eribugha butsira lukogho. (Efe. 4:31, 32) Tukendibindula amalengekania n’ebinywa ebitatolere mo binywa bibuya ebyo tukabugha omo lukogho. Oko mwatsi oyo Yehova mwateka eky’erileberyako omughulu atuleraya omughombe wiwe Eliya oyo wabya n’obuba. Omumalaika oyo wasa omo rina lya Yehova mwabugha omo “mulenge muke owahehere.” (1 Bam. 19:12) Aliwe, eribya n’olukogho si ryeribya tukabugha ebinywa bibuya lisa. Litolere itwakangya n’amategheko w’olukogho. Tuti?

Omughulu tukatomeka oko binywa byetu bibuya kw’amategheko w’olukogho, tukabya ituk’igha Yehova. (Efe. 4:32; 5:1, 2) Lisa, oyo twabirikaniako, mwakania oko lukogho olo aBimiri ba Yehova bamukanganaya. “Omughulu ekihanda kyetu kyasabawa erihuma omw’itsumbukania, ebihanda bibiri by’omo ndeko yetu mobataya oko mibírí yabo busana n’erisyatuwatikya erihuma. Nibya oko mughulu oyo, nabya isindinatsuka erigha eBiblia!” Amategheko w’olukogho  ayo, mwakuna Lisa eriyiteghererya ekwenene yo ndeke.

Anne, oyo tulyakanayako oko nzuko y’omwatsi ono, naye mwakangania erisima busana n’olukogho olo aBimiri ba Yehova bamukanganaya. Mwahandika ati: “Busana n’emibere eyiri omo kihugho, ikinyikalireko erikirirya abandu.” Akatomekako ati: “Omughulu nahindana n’aBimiri ba Yehova, monabatika-tikira. Monayibulya nyiti, ‘Kwe bakanyitsomanakoki?’ Aliwe, olukogho lw’ekwenene l’oyo wabya akangangirirya eBiblia molwaleka inamwikirirya.” Ekyo mokyaleta endundi yahi? “Enyuma, monatsuka erilengekania buli oko ebyo nabya ng’igha.”

Ngoko twamalangira, amategheko w’olwanzo n’olukogho ebyo abandu b’omo ndeko bakanganaya, mwatula oko mutima wa Lisa na Anne ko kutsibu kandi mwabawatikya eritsuka erigha ekwenene. Olukogho olo endeko yabakanganaya, molwaleka ibatsuka eriyiketera Yehova n’abandu biwe.

Abandu balebe banganabeghera erikolesya ebinywa by’olukogho n’eriseka, busana n’emibere eyo bakuliramo kutse busana n’emibere y’eyo  bikere. Erikenga abandi busana na ngoko omundu ali kutse busana n’emibere eyakuliramo, ni mwatsi w’erisimwa. Aliwe, twamabikenga abandi busana na ngoko tuli na busana n’emibere eyo twakuliramo lisa, aho twanganabya isitulikanganaya olukogho olukalua oko Mungu.​—Linganisaya na Emibiri 28:2.

Olukogho lw’ekwenene olukalua oko Mungu ni kitswe ky’ekighúma ky’ekirimu kibuyirire ky’oMungu. (Gal. 5:22, 23) Neryo eryo ni bughambu, ekirimu kibuyirire ky’oMungu kyo kitolere ikyatukuna erikangania olukogho lw’ekwenene. Omughulu tukakola tutya tukabya ituk’igha Yehova na Yesu. Kandi nga Yesu, tukatsomana abandi kwenene-kwenene. Olwanzo lwetu oko Yehova n’oko balikyetu lo lukatukuna. Neryo olukogho lukabya mubere owawatire owakalua oko mutima n’owo oMungu alighire.

Kyanganatw’olobera erikangania olukogho l’oko bandu ababiritukangania olukogho kutse abo twasi. (2 Sam. 2:6) Enzira nguma ry’erisimabo. (Kol. 3:15) Aliwe, byangabya biti twamalangira tuti siritolere erikangania omundu mulebe y’olukogho?

Tulengekanaye oko kino: Yehova akateka eky’erileberyako kikulu omw’ikangania abandu b’olukogho olo batatolere, n’eKinywa kiwe ekihandikirwe kikatukangiriraya esomo y’omughaso eyilebirye erikangania omubere oyu. Ekinywa “olusunzo lw’olukogo” kutse olukogho olo tutatolere, kikakolesibawa ngendo nyingyi omo Masako w’eKigiriki w’eKikristo. OMungu akatukanganaya olukogho lw’ati?

Terilengekania oko mamiliyoni n’amamiliyoni w’abandu abo Yehova abirikangania olukogho lwiwe omw’ibaha ebyo balaghireko batoke eribyaho. (Mat. 5:45) Okw’ibugha ekwenene, nibya embere abandu baminye Yehova, mwabakangya olukogho. (Efe. 2:4, 5, 8) Eky’erileberyako, mwahitya eky’awiteko ekyowene kulenga ebyosi, eKyusa kiwe, busana n’abandu bosi. Omukwenda Paulo mwahandika ati Yehova mwateka embanulo kundi “olukogo [lwiwe] ni lunene.” (Efe. 1:7) Eritomeka okw’ekyo, nomo tukanakola amalolo n’erihitania Yehova, syalileka eritusondola n’eritukangirirya. Erikangirirya n’ebinywa biwe biri “ng’obunyenye bw’embula.” (Ebi. 32:2) Sitwangatatoka erimuliha busana n’olukogho olwakatukanganaya. Kandi tunasi ngoko Yehova kw’atatukanganaya olukogho olo tutatolere, sitwangabere n’amaha w’ebiro ebikasa.​—Linganisaya na 1 Petero 1:13.

Ahate eritika-tika, olukogho lwa Yehova silulileghula kandi lukatula oko mitima y’abandu. Eryo ni bughambu, omo mwanya w’eribya tukasombola abo tukendikangania olukogho, litolere itwayikasa erigha Yehova n’erikangania abandi b’olukogho ebiro byosi. (1 Tes. 5:15) Omughulu tukakanganaya olukogho lw’ebiro byosi, tukabya ng’ekihuhania ky’omuliro omughulu w’embeho. Tukasikaya abatunga betu bo mutima, aBakristo balikyetu, abo tukakola nabo omubírí, abakolo balikyetu, nibya n’abahimbani betu.

Terilengekania oko bandu b’omo kihanda kyaghu kutse ab’omo ndeko yaghu abakendibana endundi busana n’ebinywa n’amategheko waghu w’olukogho. Hanganabya omundu omo ndeko yaghu oyulaghire oko buwatikya bw’erisugha enyumba n’akalima kiwe, kutse erimukolera emibírí y’obuli kiro ng’eriyamughulira ebindu. N’ekindi, wamabihindana omundu mulebe y’omo mubírí w’eritulira oyulaghire oko buwatikya, wanganalangira nga wangamuwatikya wuti?

Omw’igha Yehova, ngambe ebinywa n’amategheko wetu ibyasondolwa n’“ebihano by’obubuya ebiro byosi.”