OMWATSI W’ERIGHA 27
“Uyiketere Yehova”
“Uyiketere Yehova; Wikiriraye, Suleke omutima akalua omo nda.”—ESY. 27:14.
OLWIMBO 128 Eriyiyinia erihika oko nduli
EBIKENDIKANIBWAKO *
1. (a) Yehova abirituha amaha wahi? (b) “Eriyiketera Yehova” ni bughambuki? (Ulebaye “Erikania oko kinywa.”)
YEHOVA abiriha abosi abamwanzire b’amaha awuwene. Hakisiya hake inyabughaho amakoni, obulighe n’oluholo. (Erib. 21:3, 4) “Abakayikehaya” abayiketere iye, akasyabawatikaya eriyira ekihugho mo paradiso. (Esy. 37:9-11) Kandi akasyaleka ikyatokekana oko buli mughuma w’okw’itwe eribya n’obwira obuwene haghuma naye. Obwira obo bukasyuwana kundu kulenga obo tuli nabo naye munabwire. Ayo ni maha mabuya kundu! Aliwe, niki kyo kikaleka itwayiketera kundu ngoko ebyo oMungu abirilagha bikasyabererera? Yehova syalyatabula eriberererya eby’abirilagha. Kwesi, tunatolere “eriyiketera Yehova.” * (Esy. 27:14) Tukakanganaya ekyo omw’ilindirira butaluha kandi n’obutseme oMungu wetu aberereraye eby’abirilagha.—Isa. 55:10, 11.
2. Yehova abirikanganiaki?
2 Yehova abirikangania ngoko akaberereraya ebyo abirilagha. Eky’erileberyako kyakino. Omo kitabu ky’Eribisulirwa, Yehova mwalagha ngoko omo mughulu wetu, akasyahindanaya abandu erilua omo buli kitunga, n’ebihanda byosi n’emibughe yosi, neryo ibamuramya haghuma omw’iramya ery’erire. Munabwire, ekikumula ky’embaghane ky’abandu eki kyasibwe mo “endeko nene.” (Erib. 7:9, 10) Ekikuto eki nomo kinemo abalume, abakali n’abana b’emihanda yosi erilua omo kihugho kyosi, ni kihanda kighuma ekiri omo bughuma n’omo buholo. (Esy. 133:1; Yoa. 10:16) Kandi ab’omo ndeko nene ni batuliri b’omuhwa ab’engulu mbuya. Bakabya ibanayiteghekire eribwira obuli mundu oyo wangahulikirira ngoko ekihugho ekyuwene kiri hakuhi. (Mat. 28:19, 20; Erib. 14:6, 7; 22:17) Wamabya ighuli omo ndeko nene, ahate eritika-tika utsemire busana n’ebibuya ebikendibya omo biro ebikasa.
3. Sitani anzireki?
3 Sitani syanzire ukabya n’amaha w’ebiro ebikasa. Syanzire ukikirirya ngoko Yehova akutsomene kandi ngoko akasyaberereraya ebyo abirilagha. Sitani amatoka eritsandya amaha wetu, itukendiherya obutubaha, kandi nibya itwanganaleka erikolera Yehova. Ngoko tukendilangira, Sitani mwasondekania eritsandya amaha wa Yobu n’erisonda erimukuna aleke erikolera Yehova.
4. Tukendikania okuki omo mwatsi ono? (Yobu 1:9-12)
4 Omo mwatsi ono, tukendilangira esyonzira esyo Sitani akolesaya akasonda eritsandya obutaleghula bwa Yobu oko Yehova. (Soma Yobu 1:9-12.) Kandi tukendilangira ekyo twang’igha oko eky’erileberyako kya Yobu na busanaki litolere itwabya itunibukire ngoko oMungu atwanzire kandi ngoko akasyaberereraya ebyo abirilagha.
SITANI MWAYIKASA ERITSANDYA AMAHA WA YOBU
5-6. Ni byahi byo byahikira Yobu omo katambi kake buyira?
5 Yobu abya n’amaisa awuwene. Abya n’obwira obuwene haghuma na Yehova. Abya n’ekihanda kinene ekirimo obutseme, kandi ini muteke kutsibu. (Yobu 1:1-5) Aliwe omo kiro kighuma kisa, Yobu mwaherya hakuhi obuli kindu. Eky’erimbere, mwaherya obuteke bwiwe. (Yobu 1:13-17) Enyuma syaho, abana biwe bosi bamahola. Terilengekania hake oko buhanya obo. Ababuti bakabya omo bulighe bunene omughulu omughuma w’oko bana babo amahola. Neryo terilengekania Yobu na mukali wiwe nga mobabya n’obulighe bungahi bakowa ngoko abana babo ikumi bosi babirihola. Sikiriswekaya erilangira ngoko busana n’obulighe, Yobu mwatulanga esyongyimba siwe n’eriwa ahisi!—Yobu 1:18-20.
6 N’enyuma syaho Sitani mwaletera Yobu y’obukoni obukalire kandi obukita esisoni. (Yobu 2:6-8; 7:5) Embere syaho, abandu babya basikirye Yobu yo kutsibu. Abandu ibakasyamusaba amahano. (Yobu 31:18) Aliwe, mobabulirana. Mwabya mundu bule, abaghala babo, abira biwe, nibya n’abaghombe b’omo nyumba yiwe mobamughana!—Yobu 19:13, 14, 16.
Abaghala n’abali betu bangyi munabwire banganaminya ngoko Yobu ayowa omughulu alaba omo maligho (Lebaya enungu 7) *
7. (a) Yobu mwaghanirya ati amaligho wiwe akasira hayi, aliwe mwatakolaki? (b) Omukristo anganahikirwa ati n’amaligho awali ng’awakanganibwe oko pitsa?
7 Sitani abya anzire Yobu inikirirya ati akaghalawa kundi Yehova amuhiteneko. Eky’erileberyako, Sitani mwakolesya ekihunga kinene eriterya enyumba eyo abana ikumi ba Yobu babyamo bakalya akalyo ko haghuma. (Yobu 1:18, 19) Kandi mwakyimya omuliro erilua elubula n’eritimya ebihangulo bya Yobu n’ababya bakateyabyo. (Yobu 1:16) Kundi ekihunga n’omuliro byasa omo nzira y’ekitiko-tiko, Yobu mwaghanirya ati Yehova yulyabileta. Neryo ekyo, mokyaleka Yobu inialengekania ati anganabya iniabirihitania Yehova. Nomo bine bitya, Yobu mwatatsuma Tata wiwe w’elubula. Yobu abya inianalighire ngoko Yehova abirimukolera ebibuya bingyi omo myaka mingyi. Neryo mwalengekania ati amabya imw’angirira ebibuya, lyabya litolere iniangirira n’ebituwene. Neryo mwabugha ati: ‘Erina lya Yehova litsumulawe.’ (Yobu 1:20, 21; 2:10) Nomo Yobu anabya iniabiriherya obuteke bwiwe, abana biwe, n’obunyaghasa bwiwe, mwasighala mutaleghula oko Yehova. Aliwe Sitani mwataleker’aho.
8. Ni ghundi mwatsi wahi wo Sitani akolera Yobu?
8 Enyuma syaho, Sitani mwakolesya abalume basatu ababya nga ni bira ba Yobu, abaleka inyayowa nga syawite mughaso. Abalume aba mobabugha bati Yobu akaghalawa kundi abirikola emyatsi mingyi eyituwene. (Yobu 22:5-9) Kandi abalume aba babya banzire Yobu ikiriraye ati nomo angayikasa erikola ebibuya bingahi, oMungu syalebiryeho kindu. (Yobu 4:18; 22:2, 3; 25:4) Ni bughambu, babya bakasonda Yobu alengekanaye ati oMungu syamwanzire, syamutsomene, n’erilengekania ati erimukolera sikiwite endundi yosi-yosi. Alinga ebinywa byabo mobyaleka Yobu inialangira emibere eyalimo nga siyendisyabinduka.
9. Niki kyo kyawatikaya Yobu eribya n’obutubaha n’erisika?
9 Terilengekania oko mwatsi ono. Yobu anikere omw’ibu, iniane n’obulumi bw’olughumerera. (Yobu 2:8) Abira biwe ko banemubugha bati ni mundu mubi kandi bati sihali ekibuya ekyakakola. Amaligho wiwe abirimulitohera kutsibu, n’obulighe bw’abana biwe bunemuluma oko mutima wiwe ko kutsibu. Oko nzuko, Yobu anayiliri bukutu. (Yobu 2:13–3:1) Abira ba Yobu aba, bamabya ibakalengekanaya bati eribya bukutu lya Yobu likakanganaya ngoko akendileka Yehova, ibakayiteba. Neryo Yobu, alinga inyasumba omutwe wiwe n’erisamalira abira biwe b’amabehi neryo inyabugha ati: “Erihika okw’ihola lyaghe, sindiendisyaghana eritunganene lyaghe!” (Yobu 27:5) Niki kyo kyawatikaya Yobu eribya n’obutubaha n’erihanda omutima nomo anabya akaghalwa? Nibya, nomo anabya abunikire mutima kutsibu, mwataleka eriyiketera ngoko oMungu wiwe w’olwanzo akasyabughaho amaligho wiwe. Abya inianasi ngoko n’omw’angahola, Yehova akasyamulubukya.—Yobu 14:13-15.
TWANG’IGHA YOBU YO TUTI?
10. Omwatsi wa Yobu akatukangirirayaki?
10 Omwatsi wa Yobu akatukangiriraya ngoko Sitani syangatukasa erileka Yehova kandi ngoko Yehova anasi emyatsi yosi. Ebyahikira Yobu byanganatuwatikya eriminya ndeke emyatsi eyikahikira abandu. Tukanaye oko myatsi milebe eyo twang’ighira oko Yobu.
11. Twamatendileka eriyiketera Yehova, ni mwatsi wahi wo twangan’ikirirya? (Yakobo 4:7)
11 Yobu mwakangania ngoko twamatendileka eriyiketera Yehova, twanganayiyinia oko buligho bosi-bosi n’eritoka erilwa na Sitani. Ekyo ikikendileta ndundi yahi? Amasako akatukanganaya ndeke-ndeke ngoko Sitani inyakenditusagha.—Soma Yakobo 4:7.
12. Amaha w’erisyalubuka mwawatikya Yobu y’ati?
12 Litolere itwabya n’amaha awawatire omw’ilubuka ly’abaholi. Ngoko twalangira omo mwatsi owalaba, Sitani abeghere erikolesya obuba bw’oluholo akayikasa ati tw’umbaye eribya bataleghula oko Yehova. Omo mwatsi wa Yobu, Sitani mwabugha ati busana n’erilwira oko buyingo bwiwe, Yobu angakolire ekyosi-kyosi, nibya n’erileka erikolera Yehova. Sitani abya akayiteba. Nibya n’omughulu Yobu abya akalengekania ati akendihola, mwasighala mutaleghula oko Yehova. Eriyiketera obubuya bwa Yehova n’erikirirya kundu ngoko oko nduli Yehova akasyakokotaya emyatsi, mobyamuwatikya eriyiyinia. Yobu abya ikirirye ngoko Yehova amatendikokotya emyatsi inyakineho, syangabulire erimulubukya omo biro by’embere. Amaha w’erisyalubuka abya w’ekwenene oko Yobu. Amaha ayo amabya w’ekwenene okw’itwe, nibya n’obuba bw’oluholo sibwangaleka itw’umbya eribya bataleghula oko Yehova.
13. Busanaki litolere itwayiteghererya ndeke esyonzira esyo Sitani akolesaya oko Yobu?
13 Litolere itwayiteghererya ndeke esyonzira esyo Sitani akolesaya oko Yobu kundi na munabwire anemukolesya esyonzira sighumerera esyo sy’okw’itwe. Sitani mwabugha ati: “Omundu [butsira Yobu musa] anganaha ebyosi awite busana n’engebe yiwe.” (Yobu 2:4, 5) Aho, Sitani akabugha ati sitwanzire Yehova Mungu y’oko kwenene, kandi ati twanganamuleka ekyo kyamabya ikikendisabula engebe yetu. N’akandi Sitani akabugha ati oMungu syatwanzire kandi ati nomo twangayikasa erimutsemesya syatsomene. Kundi tunasi ebyo Sitani akasonda erikola, situlikiriraya amabehi wiwe.
14. Amaligho anganatuwatikya erikolaki? Teka eky’erileberyako.
14 Litolere itwalangira amaligho mo mwatsi owakatuwatikaya eriyiminya. Amaligho awahikira Yobu mwamuwatikya eriminya obulema bwiwe bulebe n’erikokotyabo. Eky’erileberyako, mwaminya ngoko litolere inyakulya kutsibu omubere w’eriyikehya. (Yobu 42:3) Netu kutya twangan’igha bingyi okw’itwibene-bene omughulu tuli omo maligho. Mughala wetu oyukahulawa mo Nikolay, * oyo wahirawa omo muliki nibya inyanalwere kutsibu, akabugha ati: “Endambi eyo nalabaya omo muliki moyanyiwatikya eriminya emibere eyo nabya nyitolere eryuwania.” Tukabya twabiminya obulema bwetu, twanganalangira nga tukendibukokotya tuti.
15. Nindi yo litolere itwahulikirira, kandi busanaki?
15 Litolere itwahulikirira Yehova, butsira esyonzighu syetu. Omughulu Yehova akanaya na Yobu, Yobu mwamuhulikirira ndeke. OMungu mwabulya Yobu y’amabulyo malebe, erimuwatikya erilangira ngoko amutsomene kutsibu, mwamubulya ati: ‘Unalangire amaka awali omo bindu ebyo nahangyika? Nyinasi ebyosi ebyabirikuhikira. Ukalengekanaya uti sinyikutsomene?’ Yobu mwasubirya inianayikehirye kandi mwakangania erisima rinene oko bubuya bwa Yehova. Mwabugha ati: “Oko mughulu oyo naminya ebyo abandi bambwira, nikwa lino eriso lyaghe likakulolako.” (Yobu 42:5) Omughulu abugha ebinywa ebyo, Yobu abya inyakinikere omw’ibu, n’omubiri wiwe wosi iniakinoswireko ebimata, kandi iniakinalira busana n’abana biwe abahola. Nomo bine bitya, Yehova mwamukangania ngoko amwanzire kandi mwamukangania ndeke-ndeke ngoko amulighire.—Yobu 42:7, 8.
16. Ngoko kisakirwe omo Isaya 49:15, 16, litolere itwabya itunibukireki omughulu tukalaba omo maligho?
16 Na munabwire, abandu banganatubwira amakaku n’erituwata nga situwite mughaso. Banganasonda eritutsandirya erina, itwe, kutse endondeka yetu “n’eritulega omo misindo yosi y’ebibi n’amabehi.” (Mat. 5:11) Erilabira omwatsi wa Yobu, tukigha ngoko Yehova anayiketere ko tukasyasighala bataleghula okw’iye omughulu tukalaba omo maligho. Yehova atwanzire kandi syangalekerania n’ahake abayiketere iye. (Soma Isaya 49:15, 16.) Isiwahulikirira n’ahake emyatsi y’amabehi eyo esyonzighu sy’oMungu sikabugha! James, mughala wetu we Buturuki oyo ekihanda kiwe kyalaba omo maligho awakalire, akabugha ati: “Motwaminya ngoko erihulikirira amabehi awakabughawa oko bandu b’oMungu lyangatubunire mutima. Neryo motwahira amalengekania w’oko maha wetu w’oBwami kandi motwayitsinga erikola omubírí wa Yehova. Ekyo mokyaleka itwalola embere eribya itune n’obutseme.” Nga Yobu, tukahulikirira Yehova! Amabehi w’esyonzighu syetu syalitsandaya amaha wetu.
AMAHA WAGHU ASYAKUWATIKYA
Yehova mwatsumula Yobu busana n’obutaleghula bwiwe. Iye na mukali wiwe mobatsemera emiyisa ya Yehova oko biro bingyi (Lebaya enungu 17) *
17. Wamighaki erilua oko ky’erileberyako ky’abalume n’abakali bataleghula abakanibweko omo Abaebrania 11?
17 Yobu ni mughuma w’oko baghombe ba Yehova abataleka eribya n’obutubaha n’erisika omughulu balaba omo maligho awakalire. Omo baruha yiwe oko Baebrania, omukwenda Paulo akakanaya oko bandi bangyi, akabahula mo “endeko nene y’abalangiri.” (Ebr. 12:1) Abosi mobalaba omo maligho awakalire; aliwe, omwibyaho lyabo ryosi mobasighala bataleghula oko Yehova. (Ebr. 11:36-40) Eriyiyinia lyabo n’erikola omubírí n’omuhwa byanabya eriluhira busa? Iyehe n’ahake! Nali batanayilangirira ebyo oMungu alagha bikabererera, mobalola embere eriyiketera Yehova. Kandi kusangwa babya bikirirye ngoko Yehova abiribaligha, babya basi ngoko bakasyalangira eribererera ly’esyondaghane esyo. (Ebr. 11:4, 5) Eky’erileberyako kyabo kyanganaleka eriyisogha lyetu ry’eritendileka erikolera Yehova iryawata.
18. Uyisoghire kundu erikolaki? (Abaebrania 11:6)
18 Obubi bunemukanyirira omo kihugho ekyo tulimo lino. (2 Tim. 3:13) Sitani syalyataleka erilenga oko bandu b’oMungu. Nomo twangahikirwa n’amaligho awali ati omo biro ebikasa, ngambe itwayisogha kundu erilola embere erikolera Yehova yo kutsibu, itunikirirye ngoko “twabirihira amaha wetu oko Mungu oyuliho.” (1 Tim. 4:10) Wibuke, ebyo oMungu aha Yobu oko nduli, bikakanganaya ngoko ‘Yehova ni w’eriganyira kutsibu, kandi akaganyira abandu.’ (Yak. 5:11) Netu ngambe isitw’umbaya erisighala bataleghula oko Yehova, itunikirirye ngoko akasyahemba “abakamusonda-sonda.”—Soma Abaebrania 11:6.
OLWIMBO 150 Sondaya oMungu ubane omulamo
^ Tukabya twalengekania oko mundu mulebe oyo wayiyinaya omo maligho awakalire, kangyi-kangyi tuk’ibuka Yobu. Ebyahikira omulume mutaleghula oyo byangatwighisyaki? Tukigha ngoko Sitani syangatukasa erileka Yehova. Kandi tukigha ngoko Yehova anasi ebyosi ebikatuhikira. N’akandi ngoko Yehova anahikaya amaligho wa Yobu w’oko nduli, netu kutya, kiro kighuma akasyabughaho awetu. Twamabikangania omo mikolere yetu ngoko twikirirye kundu emyatsi eyo, itukendibya baghuma b’oko ‘abayiketere Yehova’ kwenene.
^ ERIKANIA OKO KINYWA: Ekinywa ky’Ekiebrania ekikabindulawa mo “maha” kikamanyisaya “erilindirira” ekindu kilebe n’engumbu nene. Kandi kyanganaminyisya erikirirya kutse eriyiketera omundu mulebe.—Esy. 25:2, 3; 62:5.
^ Amena malebe mwakabindulawa.
