Butsira eritika-tika, Yehova anzire abandu babiri abakalunga ibabya n’obutseme n’eritsemera eribya haghuma ebiro byosi. (Mat. 19:4-6) Wamabya iwunanzire erilunga, wangasombola ndeke uti ow’erilunga naye? Yehova, Omuhangyiki wetu asi ebyo tutolere itwakola omughulu tukakola obwira n’oyo twanzire erisyalunga naye n’erisyabya n’endwa eyuwene. Kwesi wamabikolesya esyokanuni esyo Yehova abirituha, iwukendibana ebighuma ebyuwene omo ndwa yaghu. Terilengekania oko syokanuni silebe.

Eky’erimbere, tutolere itwaminya kino okw’itwe: “Omutima ni w’eriteba kulenga eyindi myatsi yosi, kandi alwere nabi.” (Yer. 17:9) Omughulu abandu babiri abanzire erilunga bakatsuka obwira, bangananzana kutsibu neryo ekyo ikyaleka ibatalengekania oko myatsi eyangabawatikya erisombola ndeke. Omughulu abandu bakasombola erilunga busana banzane kutsibu lisa, kangyi-kangyi sibalibana obutseme omo ndwa yabo. (Emi. 28:26) Busana n’ekyo, si ky’amenge oko bandu babiri abanzire ibalunga erikanganania olwanzo lwabo lo luba n’erilubalaghana erisyalunga isibali baminyana ndeke.

Emisyo 22:3 ikabugha yiti: “Omundu mugerekania amalangira ebibi, akayibisa; nikwa abakiru bakatwangana ibahutala busana nabyo.” Ni maligho wahi awo twangabana busana n’erikolesya e Enternete eritsukisya obwira n’oyo twanzire erisyalunga naye? Eky’obulighe, abandu bangyi mubatsukisya obwira obuli ng’obo oko Enternete n’abandu abo batasi; aliwe, enyuma mubabaghana. Kandi oko Enternete kukabya abandu abakabugha amabehi batoke eribana esyofranga oko bakiru. Kangyi-kangyi abandu abo bakateba bati ni Bimiri ba Yehova.

Terilengekania oko wundi mwatsi mubi ono owanganatuhikira. Oko Enternete kukabya esyosite esikakolesaya esyoprograme sye ordinatere bati sikabawatikaya eriminya abatolere erisikala haghuma omo ndwa. Aliwe sihali ekikakanganaya ngoko esyoprograme syabo esyo ni sy’ekwenene. Kyanganabya ky’amenge eriyiketera esyoprograme sye ordinatere esikakolawa n’abandu erikusondola omughulu ukayisogha omwatsi w’omughaso munene ng’endwa? Amenge w’abandu anganalenga amenge awali omo syokanuni sy’eBiblia?—Emi. 1:7; 3:5-7.

Ekanuni nguma eyiri omo Emisyo 14:15 ikabugha yiti: “Omukiru akikiriraya obuli kinywa, nikwa omugherekania akalebaya ndeke ngoko akaghenda.”  Embere w’erisombola omundu oyo ukendisyalunga naye, ni ky’amenge iwamuminya ndeke. Aliwe erikania naye oko Enternete lisa, siwangatoka erimuminya ndeke. Mwamabya imukalabaya endambi nene mukahandikirana esyo mesaje n’eritumirana esyofoto, ebyo bisa byanganaleka iwabugha uti unasi omundu oyo yo ndeke kwehi? Abandu bangyi ababya bakalengekania bati babiribana omwanze w’erilunga naye oko Enternete, mubabunika mutima babihindana busu kwa busu n’omundu oyo.

Omuhandiki w’Esyonyimbo mwabugha ati: “Sindisiba n’abandu batya batya, kandi sindiriga erigenda n’abatebya.” (Esy. 26:4) Abandu bangyi bakalengekanaya bati si kibi eriyibughako emyatsi y’amabehi oko Enternete batoke eribana abakendibanza. Banganabisa emibere yabo mibi omughulu bakabugha ngoko bali oko Enternete. Nomo abandu balebe bakanabugha bati ni Bimiri ba Yehova, oko kwenene nina Bakristo abanabiribatisibwa kwehi? Nina bandu abakulire bunya-kirimu kwehi? Nina bandu abasikibwe omo ndeko yabo kwehi? Nina by’erileberyako ebyuwene kutse ni “bira babi”? (1 Kor. 15:33; 2 Tim. 2:20, 21) Banawite obwiranda bw’erilunga n’oyo banzire erikwamana n’Amasako? Utolere iwaminya emyatsi yosi eyo, aliwe si kyolo okw’iwe eriminya emyatsi yosi eyo utitabulya abandi Bimiri ba Yehova abasi ndeke omundu oyo. (Emi. 15:22) N’ekindi, omughombe mutaleghula wa Yehova ‘syangamatikana’ haghuma n’omundu oyutikirirye.​—2 Kor. 6:14; 1 Kor. 7:39.

Omo mwanya w’eriyihira omo bwiko bw’erirondya ow’erilunga naye oko Enternete, hane esyonzira esyuwene esy’erikwama ukarondya ow’erilunga naye n’erikulya obwira obuwene obwanganahikya omundu y’oko ndwa eyisikibwe omo meso w’oMungu. Wangasunga hayi omundu oyo utolere erilunga naye? Omughulu Abimiri ba Yehova bakahindana haghuma oko mihindano y’endeko, oko mihindano minene-minene n’oko yindi mihindano eyo bakabya nayo, ekyo kikabawatikaya eriminyana ndeke.

Omughulu si kitokekene eritasyakola emihindano eyiri ng’eyo, ng’omughulu w’obukoni bw’eKorona ono, tukakolesaya ebyamano by’ekielektronike tutoke erikola emihindano y’endeko. Eyo yo wangabana oMwimiri wa Yehova omusimbi. Wanganayowira ngoko akasubiraya omo mihindano n’erikania oko myatsi eyo ikirirye. (1 Tim. 6:11, 12) Mwanganatasyakaniria omo kyumba ky’akabiri emihindano yabihwa. Mukahindana haghuma n’aBimiri ba Yehova erilabira e zoom mukayitsemesya, langira omundu oyo wanzire erisyalunga naye ng’akayitwa ati omo kati-kati k’abandi, ekyo kikendikuwatikya eriminya ndeke nga ni mundu oyuli ati. (1 Pet. 3:4) Omughulu mukayikasa eriminyana ndeke, kyanganabawatikya eriminya nga mune n’erilandamirira righumerera kandi nga munawite emibere eyihambene eyangabawatikya eriminya nga munatolere eritahania.

Abasimbi bamabikwama esyokanuni esiri omo Biblia omughulu bakasondaya omundu w’eritahania naye, sibangabula eriyilangirira ekwenene y’ebinywa ebiri omo musyo mughuma owakabugha ati: “Oyukabana omukali [kutse omulume] akabana kindu kyowene, kandi akabana eriganyira [olukogho, NWT] lya Yehova.”​—Emi. 18:22.