1-2. Ebinywa bya Yehova ebikabanika omo Isaya 65:16, 17 bikatuwatika biti eriyiyinia?

“SIMULUHE!” Oyo wo wabya mutwe w’omuhindano munene w’Abimiri ba Yehova ow’omwaka 2017. Eprograme y’omuhindano munene oyo muyatukangania ngoko twangayiyinia omo maligho wetu. Hamabilaba emyaka ini itwabirikola omuhindano munene oyo, aliwe tukinalola embere eriyiyinia omo kihugho kibi kino.

² Omo biro byalaba muwalolire oko maligho wahi? Muwaholerwe n’omundu w’oko kihanda kyaghu kutse omwira waghu oyo wanzire? Ukwire obukoni obukalire? Engebe inemukukalako busana n’erikekeluha? Unemuhikirwa n’ebitsibu ebikayasira, amategheko w’ekinyamaka, kutse eryendereribwa? Kutse unemughalwa busana n’obukoni bw’ekorona kutse busana n’eyindi myatsi? Tunemulindilira n’obutseme omughulu amaligho wosi ayo akasyahwaho n’eribiriranwa. Emyatsi mibi eyo siyendisyasyibukwa kutse erikoleka!​—Soma Isaya 65:16, 17.

3. Litolere itwakolaki lino, kandi busanaki?

³ Engebe ikalire omo kihugho kibi kino, kandi omo biro ebikasa eyindi myatsi eyikalire kutsibu eyikasyatusaba eriyiyinia yanganasyatuhikira. (Mat. 24:21) Kwesi litolere itwayitsinga erikulya omubere w’eriyiyinia. Busanaki? Kundi Yesu mwabugha ati: “Busana nʼerihatikana [eriyiyinia] lyenyu mwasyabana engebe yenyu.” (Luka 21:19) Twanganatoka eriyiyinia twamabya tukalengekania ngoko abandi nabo banemuyiyinia omo maligho awali ng’awetu.

4. Busanaki tukabugha tuti Yehova yo ky’erileberyako ekyuwene eky’eriyiyinia?

⁴ Nindi yo ky’erileberyako ekyuwene eky’eriyiyinia? Ni Yehova Mungu. Kwamuhwa ekyo kyanganakuswekya. Aliwe, wamalengekania kukyo ko ndeke isiwangasyasweka. Diabolo yukatabala ekihugho kino, ekyo kyo kikaleka ikyosulamo amaligho. Yehova  awite obutoki bw’eribughaho amaligho ayo na lino, aliwe akalindilira ekiro ekyo abirihiraho. (Rom. 9:22) Neryo oMungu wetu akalola embere omwiyiyinia akalindilira erihika ly’ekiro ekyo. Tulebaye emyatsi tisa eyo Yehova akayiyinayamo.

5. Erina ly’oMungu mulyaghana erisikibwa liti, naghu ukayowa wuti busana n’ekyo?

⁵ Yehova akayiyinaya bakatsuma erina liwe. Yehova anzire erina liwe kandi anzire obuli mundu iniasikyalyo. (Isa. 42:8) Aliwe hamabilaba emyaka nga elfu sita erina liwe libuya irinemuhemulwa. (Esy. 74:10, 18, 23) Omwatsi oyo atsuka omo lirima lye Edeni, omughulu Diabolo (ni bughambu “Omutsongeri”) abugha oko Mungu kw’amabehi ati akaghana eriha Adamu na Eva ekindu kilebe ekyangabaletera obutseme. (Enz. 3:1-5) Eritsuka oko mughulu oyo, abandu bakinalegha Yehova bati akaghana eriha abandu b’ekindu ekyo balaghireko. Yesu mwahangya-hangya busana n’eritendisikibwa ly’erina lya Tata wiwe. Busana n’ekyo mwakangirirya abigha biwe erisaba bati: “Tata wetu oyuli elubula, erina lyawe ribye ribuyirire.”​—Mat. 6:9.

6. Busanaki Yehova mwahamula ati emyaka mingyi yilabe embere akanganaye ngoko n’iye musa yuli n’ehamuli y’eritabala ekihugho n’olubula?

⁶ Yehova akayiyinaya abandu bangyi bakaghana erikirirya kw’ali n’ehamuli y’eribya Mutabali w’ekihugho kyosi. Yehova iye musa yutolere eritabala ekihugho n’olubula, kandi enzira yiwe y’eritabala yo yuwene kulenga esyosi. (Erib. 4:11) Aliwe, Diabolo mwatebya abamalaika n’abandu, amaleka ibatsuka erilengekania bati oMungu syawite ehamuli y’eritabala ekihugho n’olubula. Yehova erikangania ngoko iye musa yusingene okw’ibya n’ehamuli y’eritabala ndeke kyangasabire mughulu muli. Omo menge wiwe, oMungu mwasighira abandu b’emyaka mingyi bayitabale neryo bayilangirire ngoko omundu syangatoka eriyitabala ndeke atitakwama obusondoli bw’oMuhangyiki. (Yer. 10:23) Busana n’eriyiyinia ly’oMungu, sihendisyasyabya omundu n’omughuma oyukendisyatikatikira ehamuli y’oMungu y’eritabala olubula n’ekihugho. Abandu bosi bakendisyaminya ngoko enzira ya Yehova y’eritabala yo yuwene, kandi ngoko oBwami bwiwe busa bo bwangaleta obuholo n’eriyisyandira oko kihugho.

7. Abaghana eryowa Yehova ni bahi, kandi bakasyayirawa bati?

⁷ Yehova akayiyinaya abana biwe baleke bakaghana erimwowa. Yehova mwabumba abamalaika n’abandu ibahikahikene. Aliwe, omumalaika mughuma mutyowa ye Sitani (ni bughambu “Oyukahanganira oko mundu”) mwatebya Adamu na Eva, nabo bamaghana eryowa Yehova. Abandi bamalaika n’abandi bandu mubayighunga kubo, nabo bamaghana eryowa Yehova. (Yuda 6) N’enyuma syaho, abandu b’omo kihanda kye Israeli, ababya ibabirisombolwa n’oMungu, mubaghana erimukwama bamatsuka eriramia eyindi miungu y’amabehi. (Isa. 63:8, 10) Yehova mwayowa muhanda busana n’erihoterwa eryo. Aliwe mwayiyinia, kandi anemuyitsinga eriyiyinia erihika ekiro akasyatsandaya abosi abakaghana erimowa. Neryo Yehova haghuma n’abaghombe biwe bataleghula bakendisyabya n’obutseme kundi sihendisyasyabya eriyiyinia busana n’ebitsibu by’ekihugho kibi kino!

8-9. Ni mabehi wahi awo bakabugha oko Yehova, netu twangayira tuti eryerya erina liwe?

⁸ Yehova akayiyinaya Diabolo akabugha amabehi butumbya. Sitani mwatsongera Yobu n’abandi baghombe bataleghula ba Yehova ati bakamukolera busana n’ebyo akabaha. (Yobu 1:8-11; 2:3-5) Diabolo syalitumbya eritsongera abandu erihika lino. (Erib. 12:10) Twanganakangania ngoko Sitani ni mubehi omughulu tukayiyinaya omo maligho n’erisighala bataleghula oko Yehova kundi tumwanzire. Yehova mwahemba Yobu, netu akasyatuhemba twamayiyinia.​—Yak. 5:11.

⁹ Sitani akakolesaya abakulu b’ebisomo by’amabehi erikangiriria bati Yehova ni mutsibu  kandi yukaleka abandu ibaghalwa. Nibya n’omughulu abana balere bakahola, abaghuma b’oko bakulu b’ebisomo abo bakanakangiriraya bati ni Mungu yulyabirikira abana abo b’elubula kundi alaghire oko bandi bamalaika. Obo ni butakenga obukalire oko Mungu! Tunasi ndeke ngoko iye ni Tata w’olwanzo. Omughulu twamahikako obukoni obukalire kutse omwanzwa wetu amahola, situlitsweba oMungu. Omo mwanya w’erikola tutya, tukabya n’amaha ngoko akendisyabughaho amakoni n’erilubukya abaholi. Twanganabwira obuli mundu oyo wanzire erituhulikirira ngoko Yehova ni Mungu w’olwanzo. Omughulu tukakola tutya tukaleka Yehova iniatoka erisubirya Sitani oyukamutsuma.​—Emi. 27:11.

10. Esyonyimbo 22:23, 24 sikakanganayaki oko Yehova?

¹⁰ Yehova akayiyinaya abaghombe biwe banzwa bakaghalwa. Yehova ni Mungu oyukakwira abandu b’obulighe. Akakwa obulighe bunene akalangira tukaghalwa busana n’eryendereribwa, n’amakoni kutse n’eritendihika-hikana. (Soma Esyonyimbo 22:23, 24.) Yehova anasi ndeke ngoko tukaghalawa; anzire iniabughaho amaghali wetu, kandi kwenene akasyalusaya woho. (Ulinganisaye na Erilwayo 3:7, 8; Isaya 63:9.) Kandi ekiro kyasyabya ky’ahika Yehova ‘asyasangula emisonia yosi oko meso [wetu]. Kandi oluholo silwendisyasyabyaho, erisusumana kutse eririra, kutse eriagalwa.’—Erib. 21:4.

11. Yehova akayowa ati akalindilira abaghombe biwe bataleghula ababirihola?

¹¹ Yehova akayiyinaya busana n’abira biwe ababirihola. Yehova akayowa ati busana n’abalume n’abakali bataleghula ababirihola? Ali n’omuhwa munene ow’erisyasyalola kubo! (Yobu 14:15) Terilengekania olukando olo Yehova ali nalo busana n’omwira wiwe ye Abrahamu? (Yak. 2:23) Kutse olukando lwa Musa olo Yehova ali nalo, oyo abya akakania naye “meso na meso”? (Eri. 33:11) Tasyalengekania ngoko Yehova akalindilira n’omuhwa munene eritasyalangira Dawidi n’abandi bimbi b’esyonyimbo  bakamupipa! (Esy. 104:33) N’omo abira bw’oMungu abo babirihola, Yehova syabibirwebo n’ahake. (Isa. 49:15) Akinibukire obuli mwatsi w’oko buli mughuma wa kubo. EBiblia ikabugha yiti, “ni Mungu wʼabaliho.” (Luka 20:38) Omo meso wiwe bakineho, kiro kighuma akasyasubuliryabo engebe, neryo kandi akendisyatsuka eribya akahulikirira emisabe yabo eyikalwa oko mutima n’eriligha eriramya lyabo. Kwesi naghu wamabya iwabiriholerwa n’omwanzwa waghu, wanganasubibwa mutima.

12. Ekikaleka Yehova iniayowa muhanda kutsibu omo mutima omo biro by’enduli bino ni kyahi?

¹² Yehova akayiyinaya akalangira abandu babi bakaghalya abandi. Omughulu obutowa bwatsuka omo ririma lye Edeni, Yehova abya inianasi ndeke ngoko emyatsi yikenditsuka eritsanda kutsibu, neryo enyuma syaho yikasyuwana. Yehova aponire obubi bo kutsibu, ebitatunganene n’eritsatsuha, emyatsi eyoswire omo kihugho kya lino, ibwa kutsibu okwaho, akakwira abatawite obuwatikya b’obulighe ng’esyongubi n’abakwirwa. (Zek. 7:9, 10) Yehova akayowa muhanda omo mutima omughulu akalangira abaghombe biwe bataleghula bakendereribwa n’eribohwa. Muminye ngoko Yehova abanzire inywe bosi mukayitsinga eriyiyinia haghuma naye.

13. Ni myatsi yahi eyikita esyonye eyo Yehova akalangira ikakoleka omo kati k’abandu mo lino, kandi akendikolaki busana nayo?

¹³ Yehova akayiyinaya akalangira abandu bakayikoberya omo bibi. Abandu bahangyikawa omo kisosekanio ky’oMungu, aliwe Sitani anzire ibakola ebibi. Oko mughulu wa Noa oMungu “mwalangira obubi bwʼabandu ibwamabya bungyi” neryo “Yehova mwayikubya bomo busana nʼeribumba omundu omo kihugo, mokyamwita bulige omo mutima wuwe.” (Enz. 6:5, 6, 11) Lino emyatsi yanabiryuwana? Iyehe! Diabolo akatsema akalangira ngoko emisindo yosi y’obusingiri yabirikanyirira, nibughambu emyatsi y’engyiko omo katikati k’abalume abatatahenie kutse abalume n’abandi balume n’abakali n’abandi bakali! (Efe. 4:18, 19) Sitani akatsema kutsibu omughulu akalangira abaghombe ba Yehova bakatoghera omo rilolo erikalire. Omughulu erilindirira lya Yehova likasyahika oko nduli, Yehova akasyakanganaya ngoko aponire abosi abakakola ebibi abatanzire eriyisubako neryo akasyabalusaya oko kihugho.

14. Abandu banemukolera ekihugho n’esyonyama byo bati?

¹⁴ Yehova akayiyinaya abandu bakatsandia ekihugho ekyo ahangyika. Munabwire ‘omundu syalitabala oghundi erimuhutalya lisa’ aliwe kandi anemutsandia ekihugho n’esyonyama, ebihangyikwa ebyo Yehova aha omundu ati abiteghaye. (Emug. 8:9; Enz. 1:28) Abakakwesakwesa emyatsi eyilebirye ekihugho bakabugha bati omo myaka milebe eyikasa emihanda * miliyoni nguma ey’ebihangyikwa ikenditsanda busana n’emyatsi eyo abandu bakakola. Eki kikaleka abandu bangyi ibayibulya ekihugho nga kyasyabya kiti omo biro bikasa! Kikatsemesaya eriminya ngoko Yehova abirilagha “eritogotya abandu abakatsandaya ekihugo” neryo iniasyayira ekihugho kyosi mo paradiso.​—Erib. 11:18; Isa. 35:1.

15-16. Ekyangatuwatikya erilola embere eyiyiyinia nga Yehova niki? Teka eky’erileberyako.

¹⁵ Terilengekania oko bitsibu byosi ebikaletera erihangya-hangya ebikaleka Tata wetu w’elubula iniayiyinia oko maelfu w’emyaka. (Lebaya akasanduku “ Emyatsi eyo Yehova akayiyinayamo.”) Yehova anganatoghotirye ekihugho kibi kino ky’oko ndambi yosi-yosi. Aliwe, omutima wiwe w’erilindilira akatuletera emiyisa! Ng’eky’erileberyako,  tubughe tuti bamabwira omulume n’omukali wiwe bati omwana oyo bakendibuta akendibutwa n’amakoni mangyi kandi akendisyaghalwa kutsibu omo ngebe yiwe erihika okwihola iniakine mulere. Nomo banasi ngoko erimutsunga si mwatsi molo, ababuti abo bamatsema omwana wabo akabutwa. Kundi banzire omwana wabo oyo bamayiyinia omo maligho wosi omwana wabo otoke eribya omo ngebe eyuwene.

¹⁶ Kobine bitya okw’itwe bana ba Adamu na Eva, tukabutawa isituhika-hikene. Aliwe, Yehova atwanzire kandi atutsomene. (1 Yoa. 4:19) Ababuti abo tulyakanayako ibo sibangatatoka eribughaho amaligho w’omwana wabo, aliwe Yehova iye awite obutoki bw’eribugha amaligho w’abana biwe. Abirihiraho ekiro ekyo akasyalusayaho ebyosi ebikaghalaya abandu. (Mat. 24:36) Situlangire ngoko netu litolere olwanzo lwa Yehova ilwatukuna eriyiyinia erihika oko nduli kwehi?

17. Busanaki ebinywa ebiri omo Abaebrania 12:2, 3 ebikakanaya oko Yesu bikatuwatikaya erilola embere eriyiyinia?

¹⁷ Yehova ni ky’erileberyako ekihika-hikene eky’eriyiyinia. Yesu naye mwayiyinia nga Tata wiwe. Omughulu abya oko kihugho, Yesu mwayiyinia oko binywa by’obuyighu, oko sisoni, n’oko muti w’amaghali busana netu. (Soma Abaebrania 12:2, 3.) Kwenene, eky’erileberyako kya Yehova mukyawatikya Yesu atoke eriyiyinia. Netu kyanganatuwatikya.

18. 2 Petero 3:9 ikatuwatikaya yiti eriminya emyatsi eyabirikoleka busana n’erilindilira lya Yehova?

¹⁸ Soma 2 Petero 3:9. Yehova anasi ekiro ekitolere eky’eribughaho ekihugho kibi kino. Busana n’omutima wiwe w’erilindilira abandu bangyi babiribana akanya ak’erimuminya, na lino amamiliyoni w’abandu banemumuramia. Abosi batsemire kundi Yehova mwayiyinia oko myaka mingyi batoke eributwa, erimwanza n’eriyiherera okwiye. Omughulu amamiliyoni w’abandu akasyayiyinaya erihika oko nduli, kikasyalangirika ndeke ngoko Yehova mwasombola enzira eyitolere ey’eribya n’omutima w’erilindilira!

19. Tukayisogha kundu erikolaki, netu twasyahembwaki?

¹⁹ Yehova akatukangiriraya ngoko twangayiyinia n’obutseme. Nomo Sitani yanabirileta amaligho n’eryaghalwa, Yehova akine ‘oMungu wʼolukengerwa [w’obutseme, NWT].” (1 Tim. 1:11) Netu kutya twanganalola embere eribya n’obutseme tukalindirira Yehova eraye erina liwe, akanganaye ngoko n’iye yutolere eribya mutabali mukulu w’ekihugho kyosi n’eribughaho ebitsibu n’eyindi myatsi eyikatwaghalaya. Tuyisoghe kundu eriyiyinia n’eribana akaghala omwiminya ngoko Tata wetu w’elubula naye anemuyiyinia. Twamabikola tutya, ebinywa bino ibikendibererera okw’itwe: “Obutseme buli nʼomundu oyukasika omwʼirengwako, kusangwa amabitoka erirengwako asyangirira embita yʼengebe, eyo oMungu abirilaga abamwanzire.”​—Yak. 1:12.