1. Yehova mwakukoleraki?

WAMINYA ekwenene yo wuti? Eky’erimbere, wanganabya imuwowa “Engulu Yowene” erilabira ababuti baghu kutse oyo mukakola naye, kutse erilabira oyo mukasoma naye kutse erilabira omubírí w’eritulira lukyo kwa lukyo. (Mar. 13:10) Neryo omundu mughuma mwalabya endambi nene n’erikolesya akaghala kanene erikwighisya eBiblia. Omughulu wabya ukigha eBiblia muwatsuka eryanza Yehova n’eriminya ngoko naye akwanzire. Yehova mwakuleta omo kwenene, lino uli mwigha wa Yesu Kristo kandi uwite amaha w’erisyabyaho kera na kera. (Yoa. 6:44) Tunasi ngoko ukasima Yehova yo kutsibu kundi mwakolesya omundu mulebe erikwighisya ekwenene, neryo Yehova amakuligha mo mughuma woko baghombe biwe.

2. Omo mwatsi ono tukendikania okuki?

² Kusangwa twabiriminya ekwenene, tuwite olusunzo lw’eriwatikya abandi eriyighunga okwitwe omo nzira eyikatwala oko ngebe. Twanganabya itukalangira eritulira lukyo kwa lukyo iryolobire, aliwe twanganalangira eribulya omundu mulebe ng’anganigha eBiblia haghuma netu, kutse erisondola efunzo nga likalire. Naghu ukanayowa utya? Byamabya iko biri bitya, amahano awo tukendibana omo mwatsi ono anganakuwatikya. Tukendilangira ekikatukuna eriwatikya abandi eribya bigha. Kandi tukendilangira ngoko twangakinda ebikaleka itutatoka erisondola efunzo y’eBiblia. Eky’erimbere, tulebaye eritulira n’erikangirirya abandi engulu mbuya nga ni by’omughaso busanaki.

3. Busanaki tukatulira?

³ Omughulu Yesu abya oko kihugho, mwaha abigha biwe b’omubírí owalimo emyatsi ibiri. Ow’erimbere, mwabwirabo ati batulire engulu mbuya y’oBwami kandi mwabakangania ngoko bangatulira. (Mat. 10:7; Luka 8:1) Yesu mwabwira abigha  biwe ekyo bangakola omughulu abandu bamahulikirira kutse omughulu bamaghana erihulikirira engulu mbuya. (Luka 9:2-5) Kandi mwabwira abigha biwe ati bakendisyatula engulu mbuya oko bandu bangyi, n’omo bihugho bingyi, omughulu abugha ati ikasyatulaghanibwa “nʼeriminyisya ebihanda byosi.” (Mat. 24:14; Emib. 1:8) Yesu mwabugha ati nomo abandu bangaghana engulu mbuya kutse n’omo bangalighayo, litolere itwatulirabo engulu y’oBwami bw’oMungu n’ebyo bukendisyakola.

4. Ngoko kihandikire omo Matayo 28:18-20, ni kindi kyahi ekyo tutolere itwatomeka okwitulira oBwami?

⁴ Omwatsi w’akabiri w’erikola owo Yesu asaba abigha biwe wo wahi? Yesu mwabwira abigha biwe ati bayakangiriraye abandi erikola ebyosi ebyo abahana. Abandu balebe banganabugha bati Yesu mwaha omubírí w’eritulira aBakristo b’oko karne k’erimbere basa. Ekyo nina kwenene? Iyehe, Yesu mwakangania ngoko omubírí w’omughaso munene oyu akendisyalola embere n’omo mughulu wetu, “erihika okwʼihwererera lyʼemigulu.” (Soma Matayo 28:18-20.) Alinga Yesu mwaha abigha biwe b’omubírí oyu omughulu ahulukira abalabire oko 500 ba kubo. (1 Kor. 15:6) Kandi omo eribisulirwa eryo aha Yoane, Yesu mwakangania ndeke-ndeke ngoko abigha biwe bosi bakasyawatikaya abandi erigha eriminya Yehova.​—Erib. 22:17.

5. Ngoko kihandikire omo 1 Abanya Korinto 3:6-9, Paulo mwasosekania ati omubírí w’eritulira n’omubírí w’eriyira abigha?

⁵ Omukwenda Paulo mwasosekania omubírí w’eriyira abigha n’omubírí w’erilima. Mwakangania ngoko silitolere tukatwirya okwihera embuto lisa. Mwabwira aBakristo abe Korinto ati: “Ingye nahera embuto, Apolo mutulira kuyo kwʼamagetse, . . . kandi inywe muli irima ly’oMungu.” (Soma 1 Abanya Korinto 3:6-9.) Kusangwa tuli bakoli “omwirima ly’oMungu,” situlihera esyombuto lisa, aliwe kandi tukutulira kusyo kw’amaghetse n’erilangira ngendo-ngendo nga sinemukula. (Yoa. 4:35) Kandi tunasi ngoko oMungu yukaleka embuto iyalasa, nibughambu yukaleta abandu b’okwiye.

6. Omughulu tukakangiriraya abandu litolere itwabawatikya erikolaki.

⁶ Tunemurondya abosi abali omo mibere eyitolere “busana nʼengebe.” (Emib. 13:48) Eriwatikya abandu abo batoke eribya bigha, litolere itwabawatikya (1) eryowa, (2) eriligha (3) n’erikolesya ebyosi ebyo bakigha omo Biblia. (Yoa. 17:3; Kol. 2:6, 7; 1 Tes. 2:13) Abosi abali omo ndeko banganawatikya abigha b’eBiblia bamabibya eby’erileberyako ebyuwene oko bahya-bahya abo, omwibakangania olwanzo n’eribakokya n’obutseme omughulu bakasa oko mihindano. (Yoa. 13:35) N’oyukighisaya omwigha y’eBiblia anganalabya endambi nene n’omwigha wiwe atoke erimuwatikya erisighania esyonyikirirya n’amategheko ‘ebikongoterere’ kutse ebyabirilasya emirihi. (2 Kor. 10:4, 5) Kyanganasaba emisi mingyi eriwatikya omundu erikola esyombinduka syosi esyo omo ngebe yiwe n’erihika okwibatisibwa. Aliwe, erikola esyombinduka syosi esi kyuwene.

7. Ekikatukuna eritulira n’erikangirirya abandu niki?

⁷ Busanaki tukatulira n’eriwatikya abandu eribya bigha? Eky’erimbere kundi twanzire Yehova. Omughulu ukakola ngoko wangatoka erisikya ekyalayiro eky’eriyira abigha, ukakanganaya ngoko wanzire oMungu. (1 Yoa. 5:3) Terilengekania oko kino: Eryanza Yehova lyabirikukuna eribya ukatulira lukyo kwa lukyo. Nikwa, erisikya ekyalayiro ekyo anabya mwatsi olobire okwiwe? Alinga iyehe. Omughulu watulira lukyo kwa lukyo engendo y’erimbere muwanakwa obuba? Inga! Aliwe, kundi wabya wasi ngoko oyo w’omubírí owo Yesu anzire iwakola, muwaligha erikolagho. Neryo habere habilaba mughulu mulebe iwunemutulira, alinga muwatsuka eribeghera omubírí oyo. Neryo  tubughe tutiki okwisondola efunzo y’eBiblia? Erilengekania okwisondola efunzo likanakuletera obuba? Kwamuhwa. Aliwe, wamabisaba Yehova uti akuwatikaye eribya n’obutubaha, n’eribulya omundu mulebe ng’anganaligha erigha naye eBiblia, Yehova anganakuwatikya iwatsemera omubírí w’eriyira abigha.

8. Ngoko kisakire omo Mariko 6:34, ekindi ekyangatukuna erikangirirya abandi niki?

⁸ Eky’akabiri, olwanzo lwetu oko bandu lukatukuna eribakangirirya ekwenene. Kiro kighuma Yesu n’abigha biwe, babere babitulira kutsibu mubaluha. Mubayitagha omwanya w’eriluhukiramo, aliwe ekikumula ky’abandu mukyabakwama. Yesu mwakwira abandu abo b’obulighe, neryo mwatsuka eribakangirirya “emyatsi mingyi.” (Soma Mariko 6:34.) Mwakola n’omuhwa n’omo anabya aluhire. Busanaki? Yesu mwayihira omo mwanya w’ekikumula ky’abandu abo. Mwalangira ngoko abandu abo bakaghalawa kutsibu, ngoko bayitsutsire kutsibu eribya n’amaha, kandi abya anzire eribawatikya. Na munabwire abandu bangyi bane omo mibere eyiri ng’eyo. Bawite amaligho mangyi kandi balaghire oko buwatikya n’eribya n’amaha n’omo banganalangirika nga batsemire omo ngebe yabo. Bali ng’esyombuli esiherire esitawite omulisya oyukasondolasyo. Omukwenda Paulo mwabugha ati abandu abali ng’abo sibasi oMungu kandi sibawite amaha. (Efe. 2:12) Bali omo “nzira nene eyikalolaya okwihera”! (Mat. 7:13) Olwanzo n’eribakwira obulighe bikatukuna eriwatikya abandu b’omo kiharo kyetu omughulu tukalangira ngoko balaghire eriminya oMungu. Kandi enzira eyuwene ey’eribawatikya ry’eribasaba erigha nabo eBiblia.

9. Ngoko kihandikire omo Abanya Filipi 2:13, Yehova anganakuwatikya ati?

⁹ Wanganabya iwukatikatika eritsukisya efunzo kundi unasi ngoko eriyiteghekania n’erisondola efunzo bikasaba endambi nene. Byamabya iko biri bitya, ubwire Yehova ngoko ukayowa. Umusabe uti akuwatikaye utoke eryanzisibwa n’eribana omundu ow’erigha naye eBiblia. (Soma Abanya Filipi 2:13.) Omukwenda Yoane mwatubwira ati oMungu akasubiraya oko misabe eyihambene n’erisonda liwe. (1 Yoa. 5:14, 15) Busana n’ekyo wanganayiketera ngoko Yehova akendikuwatikya utoke eryanzisibwa n’omubírí w’eriyira abigha.

10-11. Ekyangatukakirya erisondola efunzo y’eBiblia niki?

¹⁰ Tunasi ndeke ngoko erikangirirya abandi ni ry’omughaso munene, aliwe erikola bingyi ngoko twanzire omo mubírí w’eriyira abigha lyanganatukalako. Tukanaye oko maligho awo tukalolako omo mubírí w’eriyira abigha kandi ngoko twangakindagho.

¹¹ Twanganataluka erikola bingyi ngoko tulue twanzire. Eky’erileberyako, abatuliri balebe babirikekeluha n’emibiri yabo yabiriluha. Naghu une omo mibere ng’eyo? Byamabya iko biri bitya, lengekanaya oko ebyo ekihunzo ky’eKorana kyabiritukangirirya. Twabirifumbula ngoko wanganasondola efunzo eyuwene omo nzira y’ekielektronike! Kwesi kitokekene iwatsukisya efunzo iwune eka waghu n’erisondolayo. N’ekindi kya kino, abandu balebe banganabya ibanzire erigha eBiblia, aliwe sibebanika ewabo omughulu abaghala n’abali betu bakalabayo bakatulira. Neryo kwamuhwa banganabanika omo tututu kutse omwigholo ibwabirira. Wanganigha n’omundu oko syondambi esyo? Yesu mwakangirirya Nikodemu omo kiro. Ako ko katambi ako Nikodemu asombola.​—Yoa. 3:1, 2.

12. Ebikaleka itwaminya ngoko twanganabya batuliri babuya ni byahi?

¹² Twanganalengekania tuti sitwangatoka erisondola efunzo y’eBiblia. Kwamuhwa twanganalengekania tuti tutolere itwatsuka twaminya emyatsi mingyi kutse itwatsuka twabya bakangirirya babuya embere  sy’erigha eBiblia n’omundu mulebe. Wamabya ikukalengekanaya utya, tukanaye oko myatsi isatu eyangakuwatikya erikirirya ngoko wanganatoka erisondola efunzo. Ow’erimbere, Yehova anasi ngoko unatolere erikangirirya abandi. (2 Kor. 3:5) Ow’akabiri, Yesu, oyuwite ‘ehamuli yosi oko kihugho n’omo lubula’ akakuhamulira erikangirirya. (Mat. 28:18) Ow’akasatu, wanganayiketera obuwatikya bw’abandi. Yesu abya iniayiketere obuwatikya bwa Tata wiwe kandi iniakabugha ebyo Tata wiwe amukangiriraya. Naghu wanganakola utya. (Yoa. 8:28; 12:49) N’ekindi kiriho, wanganasaba oyukasondola ekikuto kyenyu ky’eritulira kutse omupainia, kutse omutuliri oyw’asi eritulira ndeke akukanganaye ngoko wangatsukisya efunzo n’erisondolayo. Enzira nguma eyangakuwatikya eribya mukangirirya mubuya, ly’erikwamanisya omughuma w’oko batuliri abo omughulu akayasondola efunzo.

13. Busanaki eribeghera erikolesya esyonzira nyihya-nyihya sy’erikangirirya ni ky’omughaso?

¹³ Twanganalangira eribeghera erikolesya esyonzira nyihya-nyihya kutse ebimano bihya-bihya eby’eritulira nga litukalireko. Enzira yetu ey’erisondolera mw’efunzo y’abiribinduka. Ekitsapo kyetu kihya eky’erisondoleramo amafunzo, Tsemera engebe kera na kera!, kikasaba eriyiteghekania oko funzo n’erisondolayo omo nzira eyisighene n’eyo twabya tukakolesya ebiro byalaba. Tukasoma ebibohi bike, aliwe itwabya n’omukania muli haghuma n’omwigha. Omughulu tukakangiriraya, tukakolesaya esyovideo nyingyi n’ebyamano bingyi eby’ekielektronike nge JW Library^®. Wamabya isiwasi erikolesya ebyamano ebyo, wanganasaba omundu mulebe oyw’asi erikolesyabyo ndeke y’obuwatikya. Itwe bandu tuli n’omubere w’erikola emyatsi eyo twabiribeghera misa. Eribeghera enzira nyihya-nyihya ey’erikola mw’emyatsi likatukalako. Aliwe, omo buwatikya bwa Yehova n’obw’abandi, twanganabeghera n’eritsemera erisondola efunzo n’erigha n’abandi eBiblia. Omupainia mughuma mwabugha ati: “Enzira nyihya-nyihya ey’erigha eBiblia n’abandu eyi yikatsemesaya omwigha n’omukangirirya.”

14. Twamabya itwikere omo kiharo ekiri mw’abandu bangyi abatetuhulikirira litolere itwibukaki, kandi 1 Abanya Korinto 3:6, 7 ikatusikaya mutima yiti?

¹⁴ Twanganabya itwikere omo kiharo ekikalire mw’eritsukisya efunzo y’eBiblia. Abandu balebe banganaghana erihulikirira engulu mbuya eyo tukabaletera kutse nibya ibalwa nayo. Byamabya iko biri bitya omo kiharo kyetu, niki kyo kyangatuwatikya eribya itunahirire h’amaha tuti abandu abali ng’abo banganahulikirira engulu y’eBiblia? Wibuke ngoko omo kihugho kino ekitsandire amaisa anganabinduka luba-luba neryo abandu ababya bakaghana erituhulikirira; banganahika okw’ilangira ngoko balaghire oko busondoli bw’oMungu. (Mat. 5:3) Abandu balebe ababya bakaghana ebitsapo byetu, enyuma syaho mubaligha efunzo y’eBiblia. Kandi tunasi ngoko Yehova yo Mukama w’erighesa. (Mat. 9:38) Eky’akatusaba ly’eriyitsinga erihera embuto n’eryutanga kw’amaghetse, aliwe niye yukalasaya. (1 Kor. 3:6, 7) Kandi ekikatsemesaya, twibuke ngoko n’omo twanganataluka erisondola efunzo y’eBiblia yo lino, Yehova akatuhemba busana n’omuhwa wetu omo mubírí w’eritulira butsira busana n’abandu bangyi abo tukaha ebitsapo kutse abo tukigha nabo eBiblia! *

15. Yehova akayowa ati omughulu omundu mulebe akaligha efunzo y’eBiblia n’eritsuka erikolesya ebyo akigha?

¹⁵ Yehova akatsema omughulu omundu akaligha ekwenene y’eBiblia n’eritsuka erikanirya  kuyo kw’abandi. (Emi. 23:15, 16) Yehova akabya n’obutseme bunene omughulu akalangira abandu biwe bakatulira n’erikangiriria n’omuhwa munene munabwire! Eky’erileberyako, ekihunzo ky’eKorona n’omo kinemuyitsatsanga omo kihugho kyosi, omo mwaka w’omubírí owe 2020 amafunzo 7 705 765 mwasondolibwe, neryo ekyo mokyawatikya abandu 241 994 eriyiherera oko Yehova n’eribatisibwa. Abigha bahya-bahya abo nabo, bakendisondola awandi mafunzo w’eBiblia n’eriyira abandi bandu bangyi mo bigha. (Luka 6:40) Butsira n’eritikatika, tuminye ngoko tukatsemesaya Yehova yo kutsibu omughulu tukayira abandi mo bigha.

16. Tuyisoghe kundu erikolaki?

¹⁶ Eriyira abigha si mubírí molo, aliwe omo buwatikya bwa Yehova twanganatoka erikangirirya abahya-bahya eryanza Yehova Tata wetu w’elubula. Kisi tuyisoghe kundu eriyikasa eribana omundu, syali mo mughuma, owerigha naye eBiblia. Twamabibya tukabulya abandu abo tukasiba nabo nga banganatsemera erigha eBiblia, itwanganatsemera ebighuma ebyo omwatsi oyo anganaleta. Tuminye ngoko Yehova anganatsumula eriyikasa lyetu eryo.

17. Tukayowa tuti twamatoka erisondola efunzo nguma y’eBiblia?

¹⁷ Tuwite olusunzo lunene kundu olw’eritulira n’erikangirirya abandi! Omubírí oyo kwenene akatuletera obutseme bungyi. Omukwenda Paulo oyo wawatikaya abandu bangyi omo muyi we Tesalonika eribya bigha, mwakangania obutseme bwiwe omo binywa bino: “Kusangwa amaha wetu nindi, nʼobutseme bwetu nindi, kutse akakira akʼeriyihalambira nindi kwehi? Si nina nywe omugulu tuli embere syʼOmukama wetu Yesu okwʼihika liwe kwehi? Kwenene inywe muli lukengerwa nʼobutseme bwetu.” (1 Tes. 2:19, 20; Emib. 17:1-4) Abandu bangyi lino banemuyowa nga Paulo. Mwali wetu Stéphanie haghuma n’omwira wiwe babiriwatikya abandu bangyi erihika okwibatisibwa. Mwali wetu Stéphanie akabugha ati: “Sihali obutseme obulengire eriwatikya omundu eriyiherera oko Yehova n’erihika okwibatisibwa.”