Abandu balebe abakasoma omwatsi ono lubaluba bakayibulaya eribulyo eryo. Aliwe omo masako ayo muli abandu babiri abakahulawamo Mefiboseti, kandi, twanganabana esomo omwigha ebyabya.

Omwami we Israeli Sauli abya n’abana irinda ab’obulwana n’abasika babiri. Omughala wiwe w’erimbere abya Yonatani. Enyuma syaho, omwami mwabuta oghundi mulwana oyukahulawamo Mefiboseti; amubuta oko Rizpa omuraghane wiwe. Eky’eriswekya, Yonatani naye mwabuta omwana oyukahulawamo Mefiboseti. Neryo, oMwami Sauli abya n’omwana n’omwitsikulu, abosi ibawite erina righumerera.

Mughulu mulebe, oMwami Sauli mwatsuka eripona Abagibeoni n’erisonda erita abosi. Alinga abangyi b’omwibo mobitibwa. Oko kwenene ekyo kyabya kibi. Busanaki? Kundi kera omo biro bya Yosua, abakulu be Israeli mobakola endaghane y’obuholo n’Abagibeoni.​—Yos. 9:3-27.

Erilaghana eryo ryabya irikinakola n’omo biro by’oMwami Sauli. Omo mwanya w’erikwama omughambo oyo, oMwami mwasonda erita Abagibeoni. N’ekyo mukyaleka ‘Sauli n’ekitunga kiwe ibabyako olubanza l’omusasi.’ (2 Sam. 21:1) Oko ndulya, Dawidi mwabya mwami. Abagibeoni ababala, mubamukanirya oko kitsibu ekikalire ekyakoleka ekyo. Dawidi mwabulyabo nga niki kyo kyangalihwa mo mbanulo busana n’omwatsi owatuwene owo Sauli akola n’erikingulira emiyisa ya Yehova yitoke erihika omo kitaka kye Israeli. Omo mwanya w’erisaba esyofranga, Abagibeoni mobabugha bati bahabawe abana irinda ‘b’omundu oyo wababugha’ bahanikebo n’eritabo. (Emig. 35:30, 31) Dawidi mwahabo ebyo bamusaba.​—2 Sam. 21:2-6.

Oko mughulu oyo, Sauli na Yonatani babya ibabirihola omo malwa, aliwe omughala wa Yonatani yo Mefiboseti abya iniakineho. Abya ini kirema busana n’ekisida ekyamuhikira omo bwana bwiwe kandi syabya omo mwatsi wa sokulu wiwe w’erilwa n’Abagibeoni. Dawidi abya iniabirilagha Yonatani erisyabya mwira wiwe, ekyangaletere endundi abana biwe, erihirako na Mefiboseti, mughala wa Yonatani. (1 Sam. 18:1; 20:42) Omwatsi oyo akabugha ati: “Nikwa omwami [Dawidi] mwabalya Mefiboseti, mugala wa Yonatana mugala wa Saulo, busana n’erilahirya rya Yehova.”​—2 Sam. 21:7.

Nomokine, Dawidi mwaha Abagibeoni ebyo bamusaba. Mwahanika ababiri b’oko baghala ba Sauli, n’omughuma wa kubo abya iniakahulawamo Mefiboseti, n’abitsikulu batano ba Sauli. (2 Sam. 21:8, 9) Omwatsi owo Dawidi akola mwalusya omusango w’eryuta omusasi oko kihugho kye Israeli.

Omwatsi oyu ni w’erilengekaniako buli. Omughambo w’oMungu abya iniabughire ndeke ndeke ati: “Abana sibitawe busana n’abise wabo.” (Ebi. 24:16) Yehova syangalighire ekyo bakolera abaghala babiri ba Saulo n’abitsikulu biwe batano bamabya isibabyako omusango wosi wosi. Omughambo oyo kandi abya inianabughire ati: “Obuli mundu asyitwa busana n’ekibi kiwekiwe.” Alinga abatunga irinda ba Saulo abitawa abo mobasangira omo nzira nyilebe omo bwiti obo Saulo akola akasonda eribughaho Abagibeoni. Busana n’ekyo, abatunga irinda ba Saulo abo, mobaliha ebibi ebyo bakola.

Omwatsi ono akakanganaya ngoko omundu syangayighambulisania omwikola ebituwene akalengekania ati akakwama obusondoli bo ndeke. Omusyo mughuma akabugha ati: “Ulingiriranaye enzira y’ebisando byawe, n’esyonzira syawe siteghekanibawe.”​—Emi. 4:24-27; Efe. 5:15.