OMWATSI W’ERIGHA 4
OLWIMBO 30 Tata waghe, Mungu waghe, mwira waghe
Yehova akwanzire kutsibu
“Yehova ali n’olwanzo lunene.”—YAK. 5:11.
ENZUMWA NGULU
Eriminya ngoko Yehova atwanzire likendileka itwayitunda hakuhi naye, itwayowa omo buholo, itwalangira ngoko atutsomene kandi ngoko akatuhumulikanaya.
1. Omughulu ukalengekanaya oko Yehova, ekikasa omo bwenge bwaghu niki?
WANABIRILENGAKANIA Yehova ng’ali ati? Omughulu ukakanaya naye omo musabe, ekikasa omo bwenge bwaghu niki? Yehova syalilangirika. Nomo bine bitya, eBiblia ikamukanayako omo nzira nyingyi. EBiblia ikabugha yiti Yehova ni ryuba kandi ni ngabo, kandi iyabugha yiti ni “muliro owakatoghotaya.” (Esy. 84:11; Ebr. 12:29) Omuhandiki mughuma w’eBiblia ye Ezekieli, mwakania oko Yehova omo nzoli. Mwamusosekania n’eribwe ry’esafiro, n’ekyuma ekikaka, n’ekima ekikangabasenie. (Ezek. 1:26-28) Emighuma y’oko myatsi eyo eBiblia ikakanaya oko Yehova yanganatuswekya kutsibu kutse nibya yanganita buba.
2. Ekyangaleka ikyakala oko bandi eriyitunda hakuhi na Yehova niki?
2 Kundi situlimulangira Yehova, kyanganatukalako erikirirya ngoko atwanzire. Busana n’emyatsi mingyi mibi eyabiribahikira omo ngebe, abandu balebe banganalengekania bati Yehova syangabanza na hake. Banganabya isibalibatabya na tata w’olwanzo. Yehova anasi emyatsi eyo nga yikaleka itwayowa tuti, kandi anasi ngoko yikaleka ikyatukalako kutsibu eriyitunda hakuhi naye. Erituwatikya, Yehova akatukanganaya obubuya bwiwe omo Kinywa kiwe.
3. Busanaki litolere itwaminya ndeke olwanzo lwa Yehova?
3 Ekinywa kighuma ekikakanganaya Yehova yo ndeke-ndeke, lo lwanzo. (1 Yoh. 4:8) Yehova ni lwanzo. Olwanzo lo lukamukuna erikola emyatsi yosi eyo akakola. Olwanzo lw’oMungu silulimo obuhemu kandi luwite akaghala kanene kutsibu kundi akakanganayalo nibya n’oko abatamwanzire. (Mat. 5:44, 45) Omo mwatsi ono, tukendikania oko Yehova n’oko lwanzo lwiwe ko kutsibu. Tukabya twalola embere erigha bingyi oko Mungu wetu, n’olwanzo lwetu okw’iye ko tukanalola embere lutya.
YEHOVA ATWANZIRE KUTSIBU
4. Eriminya ngoko Yehova awite olwanzo lunene kikaleka iwayowa uti? (Ulebaye n’epitsa.)
4 “Yehova ali n’olwanzo lunene.” (Yak. 5:11) Omo Biblia, Yehova iyuwene-wene akayisosekanaya na koyo w’olwanzo. (Isa. 66:12, 13) Terilengekania hake oko koyo oywanzire omwana wiwe mulere kandi amutsomene. Akamutambika n’eribugha naye omo mulenge owahehere kandi owakatuleraya. Omwana amabilira kutse amabya omo bulighe, koyo akayikandanga erimuha ebyo alaghireko. Omughulu tuli omo bulighe, twanganayiketera olwanzo lwa Yehova. Omuhandiki w’Esyonyimbo mwahandika ati: “Omughulu ngahandabuka n’erikwa engitsi, Ukanyisibikaya, n’erinyitsemesya.”—Esy. 94:19.
“Ngʼoyukalembesanibawa na nyinya wuwe, ko nasyabalembesania nyitya” (Ulebaye enungu 4)
5. Yehova akakukoleraki busana n’olwanzo lwiwe oluteleghula?
5 Yehova syalileghula. (Esy. 103:8) Twamabikola ekibi syalileka eritwanza. Ekihanda kye Israeli ikikahitanaya Yehova yo kangyi-kangyi. Aliwe omughulu babya bakayisubako n’eribinduka, mwabya akabakangania obubuya bwiwe b’olwanzo. Ng’eky’erileberyako, mwabwira ekihanda ky’abandu biwe ati: “Uli w’obuguli bunene omo meso wage, kusangwa wabirisikibwa, kandi nabirikwanza.” (Isa. 43:4, 5) Olwanzo lwa Yehova silulilwabinduka. Netu munabwire twanganayiketeralo. Nibya n’omughulu tukakola amakosa awakalire, Yehova syalitulekeranaya. Twamabiyisubako n’erimusubira, itukendiyilangirira ngoko akinatwanzire. Akalagha ati ‘asyatubuyira ndeke.’ (Isa. 55:7) EBiblia ikabugha yiti erighanyira rya Yehova rikaleta “emighulu eyikatuleraya” eyikalua “oko Yehova” iyuwene-wene.—Emib. 3:19.
6. Erisako rye Zekaria 2:8 lyamatukangiryaki oko Yehova?
6 Soma Zekaria 2:8. Yehova akalwinyalangira luba ngoko tukayowa kandi akabya inyanayiteghekire erituteya. Akakola atya kundi atwanzire. Akayowa muhanda omughulu tukaghalawa. Busana n’ekyo twanganikirirya ngoko syangabula eritusubirya omughulu tukamusaba tuti: ‘Unyitegaye [ng’akalangira] k’ameso wawe.’ (Esy. 17:8) Eriso ni kighuma ky’oko bitsuko by’obughuli bunene oko mubiri wetu kandi ekikateghibawa kutsibu. Neryo omughulu Yehova akatusosekanaya n’akalangira k’eriso liwe, aho akabya ng’akabugha ati, ‘Oyukabatulako inywe bandu baghe, akabya inyamatula oko kindu ky’obughuli bunene okw’ingye.’
7. Busanaki litolere itwayikasa erikirirya kutsibu ngoko Yehova atwanzire?
7 Yehova anzire iwaminya ngoko akwanzire. Aliwe anasi ngoko emyatsi mibi eyo twabirilabamo yanganaleka itwayibulya netu ng’anatwanzire. Kutse twanganabya itunemulaba omo myatsi eyanganaleka ikyatukalako erikirirya ngoko Yehova atwanzire. Ekyangatuwatikya erikirirya kundu ngoko Yehova atwanzire niki? Ry’erilangira olwanzo olo Yehova akakanganaya Yesu, Abakristo abahirirweko amaghuta, n’obuli mughuma w’okw’itwe.
NGOKO YEHOVA AKAKANGANAYA OLWANZO LWIWE
8. Busanaki Yesu abya ikirirye ngoko Tata wiwe amwanzire?
8 Omo myaka eyiteyangaghanzwa, Yehova na Mughala wiwe mwanzwa mubabya bira kundu n’eryanzana kutsibu-tsibu. Obwira bwabo bwabirimala erihika munabwire. Oko kihugho n’omo kyanya kyosi, sihalihatabya obwira obwabirimala ng’obo. Ngoko kilangirikire omo Matayo 17:5, Yehova mwakangania burora-rora ngoko anzire Yesu. Yehova anganabughire buyira ati, ‘Oyu yo nabiriligha.’ Aliwe mwanza itwaminya ngoko anzire Yesu, neryo mwamwahula mo, “Mughala waghe, omwanzwa.” Yehova abya inyatsemere Yesu, kutsibu-tsibu busana n’ekyo Yesu abya inyakasonda erikola, ni bughambu eriherera engebe yiwe. (Efe. 1:7) Yesu naye, abya asi ngoko Tata wiwe amwanzire kwenene-kwenene, syabya akatika-tikira ekyo n’ahake. Yesu mwabugha kangyi-kangyi butsira eritika-tika ngoko Tata wiwe amwanzire.—Yoh. 3:35; 10:17; 17:24.
9. Ni kinywa kyahi kyo kikakanganaya ngoko Yehova anzire Abakristo abahirirweko amaghuta? Kanaya kukyo. (Abanya Roma 5:5)
9 Kandi Yehova akakanganaya ngoko anzire Abakristo abahirirweko amaghuta. (Soma Abanya Roma 5:5.) Ekinywa “akakolesaya” kikalua omo kinywa ky’Ekigiriki ekikamaanisaya “eryutulira.” Ekitabu kighuma ekikakanaya oko Biblia kikakanganaya ngoko ekyo ni bugha ambu olwanzo lw’oMungu “lukatusenderako ng’olusi.” Ebinywa ebyo by’ekisosekanio bikakanganaya ngoko Yehova anzire kutsibu Abakristo abahirirweko amaghuta; akakanganayabo olwanzo lunene ng’olusi. Abakristo abahirirweko amaghuta banasi ngoko “oMungu” abanzire. (Yuda 1) Omukwenda Yohana mwakangania ngoko bakayowa omughulu ahandika ati: “Mulebaye ngoko Tata abiritwanza kutsibu, tutoke eryahulwa mo bana b’oMungu!” (1 Yoh. 3:1) Neryo Yehova anzire Abakristo abahirirweko amaghuta basa kwe? Ko bite bitya. Yehova abirikangania ngoko anzire obuli mughuma w’okw’itwe.
10. Omwatsi munene ogho Yehova akola erikangania ngoko akwanzire wo wahi?
10 Omwatsi mukulu owakakanganaya ngoko Yehova atwanzire ni wahi? Ye mbanulo. Embanulo ry’eritegheko likulu ly’olwanzo eryo oghundi mundu syalyatakola oko kihugho n’omo kyanya kyosi! (Yoh. 3:16; Rom. 5:8) Yehova mwaligha Omughala wiwe ow’obughuli aholere abandu bosi, tutoke erighanyirwa amalolo wetu n’eribya bira biwe. (1 Yoh. 4:10) Twamabya tukalengekania kutsibu oko ekyo Yehova na Yesu bakola, ekyo ikikendileka itwalangira ndeke-ndeke ngoko banzire obuli mughuma w’okw’itwe yo kutsibu. (Gal. 2:20) Ekyaleka Yehova inyaliha embunulo, sibusana n’eritunganene liwe lisa; aliwe mwaliha embanulo kundi atwanzire. Yehova mwakangania ndeke-ndeke ngoko atwanzire omughulu aherera ekindu ky’obughuli bunene kutsibu okw’iye, ni bugha ambu ye Yesu. Yehova mwaligha Omughala wiwe eryaghalwa n’erihola busana netu.
11. Erisako erye Yeremia 31:3, lyamatwighisyaki?
11 Ngoko twabirilangira, olwanzo lwa Yehova okw’itwe siluli omo mutima wiwe lisa, aliwe kandi akatukanganayalo. (Soma Yeremia 31:3.) Yehova mwatukura okw’iye kundi atwanzire. (Tasyalebya na Eryibuka Ebihano 7:7, 8.) Sihali ekindu kutse omundu oyo wangatulusya oko lwanzo lwa Yehova. (Rom. 8:38, 39) Eriminya ngoko oMungu atwanzire likaleka iwayowa wuti? Usome Esyonyimbo 23, ulangire olwanzo n’eritsomana ly’oMungu nga mubyaleka Daudi inyayowa ati, netu nga byanganaleka itwayowa tuti.
UKAYOWA WUTI ERIMINYA NGOKO YEHOVA AKWANZIRE?
12. Wangabugha utiki oko Esyonyimbo 23?
12 Soma Esyonyimbo 23:1-6. Esyonyimbo 23, ni lwimbo olukakanganaya eriyiketera kundu olwanzo n’eritsoma rya Yehova. Oyo wahandika olwimbo olo ni Daudi. Omo lwimbo olo akakanganaya obwira obunokire obo abya nabo haghuma na Yehova, Omulisya wiwe. Daudi mwaligha Yehova amusondole n’ekyo mukyaleka inyayowa buholo; kandi inyayiketere Yehova yo kundu. Daudi abya ikirirye ngoko si hali kiro Yehova asyaleka erimwanza. Ekyaleka inyabya n’eriyiketera linene atya niki?
13. Busanaki Daudi abya ikirirye ngoko Yehova amutsomene?
13 “Sindiendisyabula kindu.” Daudi mwayilangirira ngoko Yehova amutsomene kundi ebiro byosi Yehova inyakamuha ebyo alaghireko. N’ekindi, Daudi abya asi ngoko Yehova ni mwira wiwe kandi amusimire. Ekyo kyo kyabya kikaleka inyikirirya ngoko, nomo hangabyaki omo biro ebikasa, Yehova syendisyabula erimuha ebyo alaghireko. Daudi abya asi ngoko Yehova amwanzire kandi amutsomene. Neryo busana n’ekyo, mwatabya n’obuba bosi-bosi, aliwe inyakatsemera ebyo awiteko.—Esy. 16:11.
14. Yehova anganakangania ati ngoko atwanzire kandi atutsomene?
14 Yehova akatukanganaya olwanzo n’eritutsomana, kutsibu-tsibu omughulu emyatsi eyikalire ikatuhikira omo ngebe. Mwali wetu Claire, a oyowabirikolera oko Beteli omo myaka eyilabire oko 20, mwahangya-hangya omughulu amaligho akwamana omo kihanda kiwe. Baba wiwe mwalwala kutsibu, mulere wiwe w’obukali mwahiwa omo ndeko, n’ekihanda kyabo mukyaherya omubiiri ogho kyabya kikabaniramo olufranga, mubaherya n’enyumba yabo nibya. Yehova mwabakangania ati ngoko abanzire kandi abatsomene? Claire akabugha ati: “Yehova mwawatikya. Itukabana ebyo tulaghireko obuli kiro. Kangyi-kangyi Yehova inyakatuha bingyi kwilaba n’ebyo tulaghireko! Ngalengekanaya kangyi-kangyi oko nzira esyo Yehova abirituwatikiryamo, kandi sinangibirirwa n’ahake olwanzo olo abiritukangania. Eribya ngibuka emyatsi eyo kyabiriniwatikya erilola embere erikolera Yehova n’obutseme nibya n’omo mighulu eyikalire.”
15. Ekyatuleraya Daudi niki? (Ulebaye n’epitsa.)
15 “Akasubaya omutima wage.” Ihakanabya endambi Daudi inyayowa muhanda busana n’amaligho n’emyatsi eyikalire eyo abya akalabamo. (Esy. 18:4-6) Nikwa Daudi inyakatulera busana n’erilangira ngoko Yehova amwanzire kandi amutsomene. Yehova mwasondola omwira wiwe mwanzwa oywabya aluhire oyo n’erimutwala “omo lulisiryo lw’ebiti bibisi” n’“ahali amagetse awatekire.” Ekyo mukyawatikya Daudi eritasyabana akaghala n’erilola embere erikolera Yehova inyanatsemire.—Esy. 18:28-32.
Nibya n’omughulu Daudi abya omo busayi, mwatulera busana n’erilangira ngoko Yehova amwanzire kandi amutsomene (Ulebaye enungu 15)
16. Olwanzo lwa Yehova lwabirikutulerya luti?
16 Na munabwire kutya, amaligho n’eyindi myatsi eyikalire bikatuhikako, aliwe ‘ebibuya bya [Yehova] byo byabirileka itutaheribwa.’ (Eki. 3:22; Kol. 1:11) Tukanaye oko Rachel. Omo mughulu w’ekihunzo ky’Ekorona iba wiwe mwamusighania, amaleka n’erikolera Yehova. Ekyo mukyamwaghalya kutsibu omo mutima. Yehova mwawatikya Rachel yw’ati? Akabugha ati: “Yehova mwanikangya olwanzo lwiwe. Mwamba abira. Abira abo mubabya bakalabya endambi haghuma naghe, eriniletera akalyo, erinihandikira esyomesaje n’erinitumira amasako w’eBiblia awakasikaya mutima. Ibakaseka haghuma naghe, kandi mubataleka eribya bakanyibukya ngoko Yehova anitsomene. Ngasima Yehova mughulu wosi kundi mwamba ekihanda kinene ekiri n’olwanzo lunene.”
17. Ekyawatikaya Daudi erikinda obuba bwiwe niki?
17 “Sindiendisyubaha ebibi, kusangwa uli haguma nage.” Kangyi-kangyi engebe ya Daudi iyikabya omo bwiko, kandi abya awite esyonzighu nyingyi esikalire. Aliwe, eriminya ngoko Yehova amwanzire ikikaleka Daudi inyayowa mbolere. Daudi inyakalangira Yehova ng’ane haghuma naye omo buli mwatsi, n’ekyo ikikamusikaya mutima. Busana ekyo, mwimba ati: “[Yehova] . . . mwanilamya oko buba bwage bosi.” (Esy. 34:4) Oko kwenene, habya ihane emyatsi eyabya ikaleka Daudi inyubaha, aliwe eriminya ngoko Yehova amwanzire mukyamuwatikya erikinda obuba obo.
18. Eriminya ngoko Yehova akwanzire lyangakuwatikya liti omughulu ukahirawa n’emyatsi eyikakwita obuba?
18 Eriminya ngoko Yehova atwanzire likatuwatikaya liti omo mighulu eyikalire? Mwali wetu mupainia oyukahulawa mo Susi akakanaya ngoko bayowa, iye n’iba wiwe, omwana wabo abere ayita. Akabugha ati: “Obuhanya ng’obu bukabya bwakuhikira ukahwerekerera n’erikwa engitsi uti alinga obundi buhanya obukalire kw’aho bukendikuhikira. Aliwe olwanzo n’eritsomana lya Yehova mubyaleka itwayowa mbolere.” Rachel, oyo twabirikaniako, akabugha ati: “Kiro kighuma omo kiro, inabiriyowa muhanda kutsibu omo mutima, munasaba Yehova omo mulenge muli ininemulira. Oko ndambi eyo, munalw’inayowa ngoko Yehova amanisikya mutima n’erinitulerya, ngoko koyo akanakolera omwana wiwe, neryo munayato. Sinendisyibirirwa ekiro ekyo n’ahake.” Omusyakulu w’endeko mughuma oyukahulawa mo Tasos mwabugha emyaka ini omo ngomo busana n’erighana eribya musuda. Mwayilangirira ati ngoko Yehova amwanzire kandi amutsomene? Akabugha ati: “Yehova mwanikolera bingyi kulenga n’ebyo nabya nilaghireko. Ekyo mukyaleka inikirirya kundu ngoko nanganayiketera iye omo myatsi yosi. N’ekindi, ekirimu kya Yehova mukyaniwatikya eribya n’obutseme inine omo ngomo omuli myatsi mingyi eyangaleka omundu inyabya n’erihangya-hangya linene. Ekyo mukyaleka inayilangirira ngoko namalola embere eriyiketera Yehova, ingendiyilangirira olwanzo lwiwe lo kutsibu. Neryo munatsuka erimukolera omubiiri w’obupainia b’omughulu wosi inyine omo ngomo.”
UYITUNDE HAKUHI N’OMUNGU WAGHU OW’OLWANZO
19. (a) Eriminya ngoko Yehova atwanzire likaleka itwabya tukasaba tuti? (b) Omo myatsi yosi eyo Yehova abikukolera busana n’olwanzo lwiwe, owahi wo ukatsemera kutsibu? (Ulebaye akasanduku “ Amasako awakaleka itwayilangirira ngoko Yehova atwanzire kutsibu.”)
19 Emyatsi eyalolawako eyo twamabikaniako, eyosi ikakanganaya ngoko Yehova, “oMungu w’olwanzo,” ane haghuma netu! (2 Kor. 13:11) Atsomene obuli mughuma w’okw’itwe. Twikirirye ngoko ‘obubuya [bwiwe] b’olwanzo bwasyatutimbako.’ (Esy. 32:10) Omughulu tukalengekanaya buli oko nzira esyo abiritukanganiryamo olwanzo, tukatasyalangira ndeke kutsibu ngoko atutsomene, neryo ko tukayitunda hakuhi naye kutya. Aho itukendibya tukakania naye bweghu-bweghu omo musabe, n’erimubwira ngoko tulaghire oko lwanzo lwiwe. Itukendibya tukamubwira emyatsi yosi eyikatubahisaya, itunasi ngoko anatuhulikirire kandi syendibula erituwatikya.—Esy. 145:18, 19.
20. Olwanzo lwa Yehova lukatuwatikaya luti eriyitunda hakuhi naye?
20 Tukatsemera olwanzo lwa Yehova ngoko tukanatsemera eryota oko muliro omughulu w’embeho. Olwanzo lwa Yehova luwite akaghala kanene kutsibu, aliwe kandi luhehere. Kwesi utsemire kundi Yehova akwanzire. Obuli mughuma w’okw’itwe angirire olwanzo lwa Yehova n’eribugha ati: “Nyanzire [Yehova]”!—Esy. 116:1.
WANGASUBIRYA UTIKI?
-
Wangabugha utiki oko olwanzo lwa Yehova?
-
Ekyangaleka iwaligha ngoko Yehova akwanzire kutsibu niki?
-
Eriminya ngoko Yehova akwanzire kikaleka iwayowa uti?
OLWIMBO 108 Olwanzo lw’oMungu oluteleghula
a Amena malebe mwakabindulawa.