OMWATSI W’ERIGHA 5
OLWIMBO 108 Olwanzo lw’oMungu oluteleghula
Emiyisa eyo tukabana kundi Yehova atwanzire
“Kristo Yesu mwasa oko kihugho busana n’erisabula abakoli b’amalolo.”—1 TIM. 1:15.
ENZUMWA NGULU
Omwatsi ono akakanganaya emiyisa eyo tukabana busana n’embanulo kandi ngoko twangakangania erisima lyetu oko Yehova.
1. Twangakolaki tutoke eritsemesya Yehova?
TUBUGHE tuti wamaha omundu mulebe oyo wasi ekindu kilebe ky’embaghane, ekyuwene, kandi ekyangamuwatikya. Omundu oyo amabibika ekihembo ekyo omo kasandu n’eribirirwakyo, ighukendiyowa muhanda! Aliwe, wanganatsema omundu oyo amabikolesya ekihembo ekyo n’erikusima busana nakyo. Eky’erileberyako ekyo kyamatwighisyaki? Yehova mwatuha Mughala wiwe ahole busana netu. Yehova akatsema kutsibu tukamukangania erisima lyetu oko kihembo ky’obughuli ekyo n’oko lwanzo lwiwe olwamukuna erituha ekihembo ekyo, ni bugha ambu embanulo!—Yoh. 3:16; Rom. 5:7, 8.
2. Tukendikania okuki omo mwatsi ono?
2 Ebiro bikalaba, twanganatsuka eribirirwa eribya tukasima busana n’embanulo. Twamatendibya tukasima busana n’embanulo, kyanganabya nga twamabika ekihembo ekyo omo kasanduku, eyo sitwendibya tukalangirakyo, neryo itwabirirwakyo. Erikakirya omwatsi oyo, tutolere eribya tukasima oMungu na Kristo oko ebyo babiritukolera. Omwatsi ono anganatuwatikya erikola ekyo. Tukendikania oko miyisa eyo tukabana lino busana n’embanulo, n’oko miyisa eyo tukendisyabana omo biro ebikasa. Kandi tukendilangira ngoko twangakangania erisima lyetu oko lwanzo olo Yehova atukanganaya, kutsibu-tsibu amayenga malebe embere n’enyuma w’omuhindano w’Eryibuka oluholo lwa Yesu.
EMIYISA EYO TUKABANA LINO
3. Ni muyisa wahi ogho tukabana lino busana n’embanulo?
3 Na lino, tunemubana emiyisa erilabira eriyiherera lya Kristo mo mbanulo. Ng’eky’erileberyako, erilabira embanulo, Yehova akatughanyira amalolo wetu. Syasabirwe eritughanyira, aliwe akakola atya omwanza liwe. Omuhandiki w’esyonyimbo mwakangania erisima liwe okw’ighanyira lya Yehova. Mwabugha ati: “Uwe [Yehova], uli mubuya, kandi ukabuyira.”—Esy. 86:5; 103:3, 10-13.
4. Yehova mwateka embanulo busana na bahi? (Luka 5:32; 1 Timoteo 1:15)
4 Abandu balebe banganalengekania bati situtolere erighanyirwa na Yehova. Oko kwenene, sihali n’omughuma w’okw’itwe oyutolere erighanyirwa. Omukwenda Paulo mwaminya ekyo kyo ndeke, mwabugha ati, “Sinitolere erihulwamo mukwenda.” Mwatasyatomekako ati: “Aliwe busana n’olukogho lw’oMungu, niri ngoko niri lino.” (1 Kor. 15:9, 10) Tukabya twabisaba obughanyiri busana n’amalolo wetu, Yehova akatughanyira. Busanaki? Si kundi tutolere erighanyirwa, aliwe ni kundi atwanzire. Wamabya ighubunikire mutima kundi ukalengekanaya nga sighutolere erighanyirwa, wibuke ngoko Yehova mwatateka embanulo busana n’abandu abahika-hikene, aliwe mwatekayo busana n’abandu abatahika-hikene, abakayowa muhanda busana n’amalolo wabo kandi abakayikasa eribinduka.—Soma Luka 5:32; 1 Timoteo 1:15.
5. Hane omundu oyo angabugha ati oMungu atolere erimughanyira? Kanaya.
5 Situtolere erilengekania tuti kundi twabirikolera Yehova omo myaka mingyi, atolere eritughanyira. Yehova akibuka emyatsi yosi eyo twabirimukolera. (Ebr. 6:10) Mwatuha embanulo yo buyira, mwatatuhayo busana n’erituliha oko myatsi mibuya eyo twabirimukolera. Kwesi, twamabilengekania tuti kundi twabirikolera Yehova y’emyatsi mingyi atolere eritughanyira, itwanganabya nga twamabugha tuti situlaghire oko mbanulo.—Tasyalebya Abanya Galatia 2:21.
6. Busanaki Paulo mwakola kutsibu omo mubiiri wa Yehova?
6 Paulo abya asi ngoko syatolere erighanyirwa nomo angakola bingahi omo mubiiri wa Yehova. Neryo ibwa, busanaki abya akakola kutsibu omo mubiiri wa Yehova? Mwakola ekyo akasima Yehova oko bubuya n’olukogho lwiwe. (Efe. 3:7) Nga Paulo, netu tunemulola embere erikolera Yehova n’omuhwa tukamusima kundi tumwanzire. Situlimukolera tukalengekania tuti ekyo kikendileka itwasingana oko lukogho lwiwe.
7. Ni ghundi muyisa wahi ogho tukabana lino busana n’embanulo? (Abanya Roma 5:1; Yakobo 2:23)
7 Oghundi muyisa ogho tukabana lino busana n’embanulo ry’eribya n’obwira obuwene haghuma na Yehova. a Ngoko twalangira omo mwatsi owalaba, mutwabutwa isituwite obwira haghuma n’oMungu. Aliwe, busana n’embanulo twanganatsemera “obuholo haghuma n’oMungu” n’eribya bira biwe.—Soma Abanya Roma 5:1; Yakobo 2:23.
8. Busanaki tutolere erisima Yehova oko lusunzo l’omusabe?
8 Kundi tuli n’obwira haghuma Yehova, tuwite olusunzo lw’erikania naye erilabira omusabe. Yehova syalihulikirira lisa emisabe y’abandu biwe bakabya kikuto, aliwe kandi akahulikirira emisabe w’obuli mughuma w’okw’itwe. Omusabe anganatuwatikya eritulera omo mutima n’omo bwenge, aliwe kandi anganawatya obwira bwetu haghuma n’oMungu. (Esy. 65:2; Yak. 4:8; 1 Yoh. 5:14) Omughulu Yesu abya oko kihugho, inyakasaba kangyi-kangyi kundi inyanasi ngoko Yehova akahulikirira, kandi inyanasi ngoko omusabe akendimuwatikya eriwatya obwira bwiwe haghuma na Tata wiwe. (Luka 5:16) Tukasima kutsibu kundi erilabira eriyiherera lya Yesu, twanganabya bira ba Yehova, nibya twanganakania naye omo musabe!
EMIYISA EYO TUKENDISYABANA OMO BIRO EBIKASA
9. Omo biro ebikasa, embanulo yikendisyaletera Abaramya bataleghula omuyisa wahi?
9 Abaghombe bataleghula ba Yehova bakendisyabana omuyisa wahi omo biro ebikasa busana n’embanulo? Bakendisyabana engebe y’erikota. Abandu bangyi bakalengekanaya bati sikyendisyatokekana abandu eribyaho kera na kera kundi abandu babirihola oko maelfu w’emyaka. Isiwibirirawa ngoko Yehova abya anzire abandu ibabyaho kera kera. Adamu kwatakola erilolo, sihendibya omundu oyo endilengekania ati sikyangatokekana eribyaho kera na kera. Obuli mundu angabereho kera na kera. Nomo munabwire kyanganakala eriligha ngoko omundu anganasyabyaho kera na kera, twanganayiketera ngoko kikendisyatokekana kundi tunasi ngoko Yehova mwaliha ebeyi nene, ni bugha ambu engebe y’Omughala wiwe mwanzwa, tutoke erisyabyaho kera na kera.—Rom. 8:32.
10. Abahirirweko amaghuta n’esindi mbuli bakalindiriraki?
10 Nomo engebe y’erikota ni kihembo ky’omo biro ebikasa, Yehova anzire itwabya tukalengekania kukyo eritsuka lino. Abahirirweko amaghuta bakalindirira n’omuhwa engebe eyuwene omo lubula omughulu bakendisyatabala ekihugho kughuma na Kristo. (Erib. 20:6) N’esindi mbuli bakalindirira erisyabya omo paradiso oko kihugho ekitendisyabyamo obulumi, eryaghalwa kutse obulighe. (Erib. 21:3, 4) Uli mughuma w’oko sindi mbuli abawite amaha w’erisyabyaho kera na kera oko kihugho? Ekyo si kihembo kike kulenga eribana engebe omo lubula! Yehova mwatuhangyika busana n’eribya oko kihugho. Erisyabya oko kihugho kera na kera kikendisyatuletera obutseme bunene.
11-12. Ni miyisa milebe yahi eyo tunemulindirira erisyabana omo Paradiso? (Ulebaye n’esyopitsa.)
11 Terilengekania ngoko engebe yaghu yikendisyabya omo Paradiso oko kihugho. Siwendisyahangya-hangya busana n’obukoni kutse busana n’oluholo. (Isa. 25:8; 33:24) Yehova akendisyakuha emyatsi yosi mibuya eyo ulaghireko. Wanzire erisyigha oko myatsi yahi? Ukendisyanza erigha bingyi oko syonyama? Ukendisyanza erigha eriwata ebyombo by’omuziki? Ukendisyanza erigha eridesa? Alinga omo paradiso, tukendisyalagha oko bandu abasi erikola esyopla sy’amanyumba, abasi erihimba, n’abasi bulime. Kandi tukendisyalagha oko bandu abasi erihuka akalyo, erikokotya ebindu, n’abasi erikola ehirima ehyuwene-wene n’erisughahyo. (Isa. 35:1; 65:21) Omughulu ukendisyabyaho kera na kera ukendisyabya n’endambi nene y’erigha erikola emyatsi yosi eyo, n’eyindi myatsi mingyi.
12 Bukendisyabya butseme bunene erikokya abandu abakendisyalubuka! (Emib. 24:15) Terilengekania naghu ngoko ukendisyatsema ukigha emyatsi mingyi oko ebyo Yehova ahangyika. (Esy. 104:24; Isa. 11:9) N’ekikulu oko byosi siwendisyakola erilolo na hake! Neryo ukendisyabya n’obutoki bw’erikolera Yehova yo ndeke, kandi siwendisyalagha okw’isaba obughanyiri. Neryo wanganaligha eriherya emiyisa yosi eyi ey’omo biro ebikasa busana “n’eritsemera erilolo omo katambi kake”? (Ebr. 11:25) Iyehe! Engebe eyo tukendisyabya nayo omo biro ebikasa yilengire kutsibu ekindu kyosi-kyosi ekyo twanganabana omo kihugho lino. Wibuke ngoko eparadiso si mwatsi ogho tukendisyabera erilindirira, hane ekiro yikendisyabya. Kandi emyatsi yosi eyo yikendisyatokekana kundi Yehova mwatwanza kutsibu erihika oko kika ky’eritulihira embanulo!
Ni miyisa yahi eyo ukalindirira kutsibu omo Paradiso? (Ulebaye enungu 11-12)
WANGAKANGANIA GHUTI NGOKO UKASIMA YEHOVA BUSANA N’OLWANZO LWIWE?
13. Twangakangania tuti erisima lyetu oko lwanzo lwa Yehova? (2 Abanya Korinto 6:1)
13 Twangakangania tuti ngoko tukasima Yehova busana n’embanulo? Omw’ihira omubiiri wiwe w’embere omo ngebe yetu. (Mat. 6:33) Oko kwenene, Yesu mwahola kusudi “abaliho isibabyaho busana n’erikola ebyo banzire, aliwe busana n’eritsemesya oyo wahola busana nabo n’erilubukibwa.” (2 Kor. 5:15) Yehova abiritukangania obubuya bwiwe n’eritughanyira. Tukakanganaya ngoko tukasima kutsibu oko byosi ebyo abitukolera omughulu tukamukolera ngoko twangatoka.—Soma 2 Abanya Korinto 6:1.
14. Twangakangania tuti ngoko tuyiketere Yehova n’obusondoli bwiwe?
14 Kandi tukakanganaya ngoko tukasima Yehova omw’iyiketera iye n’erikwama obusondoli bwiwe. Tuti? Twanganakangania ekyo omughulu tukasonda eriyisogha. Ng’omughulu tukayisogha nga tukendisoma akalasi kangahi, kutse nga tukendikola omubiiri wahi. Tutolere eriyibulya Yehova ng’anzire itwakolaki. (1 Kor. 10:31; 2 Kor. 5:7) Omughulu tukayisogha omo nzira eyikakanganaya ngoko tuyiketere Yehova, obwikirirya bwetu okw’iye n’obwira bwetu haghuma naye bikawata. N’amaha wetu w’erisyabyaho kera na kera akabya w’ekwenene okw’itwe.—Rom. 5:3-5; Yak. 2:21, 22.
15. Oko mughulu w’Eryibuka oluholo lwa Yesu, twangakangania tuti erisima lyetu?
15 Hane n’ekindi ekyangakangania ngoko tukasima busana n’olwanzo lwa Yehova: Erikola ngoko twangatoka erikangania erisima lyetu oko Yehova busana n’embanulo amayenga malebe embere n’enyuma w’omuhindano w’Eryibuka oluholo lwa Yesu. Tutolere erihika oko muhindano oyo, n’eribirikira abandi kugho. (1 Tim. 2:4) Ukanganaye abo ukabirikira oko muhindano oyo ebikendisyabyayo. Wanganakola utya omw’ikanganiabo evideo Busanaki Yesu mwahola? n’evideo Eryibuka oluholo lwa Yesu, esikabanika oko jw.org. Abasyakulu b’endeko batolere eribirikira ababirileka erikola. Terilengekania oko butseme obukabya omo lubula n’oko kihugho omughulu esyombuli sya Yehova esyabya isyabirihera syamasuba omo kihyo! (Luka 15:4-7) Oko muhindano w’Eryibuka oluholo lwa Yesu, isitwatwiriraya okw’iramukania itwe basa-basa, aliwe ngambe itwayikasa eriramukya kutsibu-tsibu abahya kutse ababiribugha emyaka mingyi isibalihika oko muhindano oyo. Twanzire ibayowa ndeke!—Rom. 12:13.
16. Busanaki tutolere erikola bingyi omo mubiiri w’eritulira oko mughulu w’Eryibuka oluholo lwa Yesu?
16 Wanganatasyakola kutsibu omo mubiiri w’eritulira amayenga malebe embere n’enyuma w’omuhindano w’Eryibuka oluholo lwa Yesu? Wamabikola ekyo, ukabya iwamakangania ngoko ukasima oko ebyo Mungu na Kristo babiritukolera. Omughulu tukasangira kutsibu oko mubiiri w’eritulira, tukalola embere eriyilangirira obuwatikya bwa Yehova, n’ekyo kikaleka itwatasyayiketera Yehova yo kutsibu. (1 Kor. 3:9) Kandi uyikase eribya ukasoma Amasako w’erisoma omo biro by’Eryibuka oluholo lwa Yesu, awakabanika omo katabu Tuyighisaye Amasako obuli kiro kutse awakabanika omo katabu k’omuhindano. Nibya wanganasoma Amasako ayo omo pragrame yaghu y’eriyighisya.
17. Ekikatsemesaya Yehova niki? (Ulebaye n’akasanduku “ Ngoko twangakangania erisima lyetu oko lwanzo lwa Yehova.”)
17 Kwa muhwa, busana n’emibere eyo ulimo siwangatoka erikola bingyi omo mubiiri wa Yehova. Wibuke ngoko Yehova syalilinganisaya ebyo ukakola n’eby’abandi; akatsemera kutsibu olwanzo lwaghu okw’iye. Akatsema kutsibu akalangira ukamusima busana n’embanulo, ekihembo ky’obughuli bunene.—1 Sam. 16:7; Mar. 12:41-44.
18. Busanaki tukasima Yehova Mungu na Yesu Kristo?
18 Embanulo yo yikaleka itwaghanyirwa amalolo wetu, itwabya n’obwira haghuma na Yehova, n’eribya n’amaha w’erisyabana engebe y’erikota. Kwesi, tulole embere erikangania erisima lyetu oko lwanzo lwa Yehova olwamukuna erituha emiyisa yosi eyo. (1 Yoh. 4:19) Kandi tulole embere erikangania erisima lyetu oko Yesu, oyo atwanza kutsibu n’eriligha eriherera engebe yiwe busana netu!—Yoh. 15:13.
OLWIMBO 154 Olwanzo olutehwa
