1. Munabwire abandu bangyi bawite omutsye wahi?

 KWA muhwa, naghu wabiriyilangirira ngoko munabwire abandu bangyi bayitsomene kwilaba ngoko batsomene abandi. Ng’eky’erileberyako, abandu balebe bakakolesaya e Enternete eriyikangania n’erikangania ebyo banemukola. Aliwe, ni bandu bake kutsibu bo banzire eripipa erina lya Yehova Mungu. Omo mwatsi ono, tukendilangira eriha erina lya Yehova ly’olukengerwa nga ni bugha ambuki, kandi busanaki tutolere itwakola tutya. Kandi tukendigha ngoko twangaha erina ly’oMungu olukengerwa olo litolere, kandi ngoko oMungu akendisyaha erina liwe olukengerwa omo biro ebikasa hano ho sesene.

ERIHA YEHOVA Y’OLUKENGERWA NI BUGHA AMBUKI?

 2. Yehova mwakangania ati olukengerwa lwiwe oko Kitwa kye Sinai? (Ulebaye n’epitsa kijalada.)

² Olukengerwa niki? Omo Biblia, ekinywa “olukengerwa” kikakolesibawa erikania oko kindu ekikaleka omundu iniabyako obwaka. Biro bilebe bisa Yehova abilusya ekihanda kye Israeli e Misri, mwakanganiabo olukengerwa lwiwe. Terilangira omo bwenge bwaghu ngoko emyatsi yabya: Amamilioni w’Abaisraeli babirihindana hakuhi n’Ekitwa kye Sinai bakasyahulikirira ebyo Mungu akasonda eribabwira. Neryo ekitu ekikinire kyamaswika ekitwa. Aho n’aho, omuki munene mwasula oko kitwa kyosi, neryo muhabya omusiki munene, kandi ehirabyo amatuku n’emilenge y’esyongubi mubyowika. (Eril. 19:16-18; 24:17; Esy. 68:8) Omughulu Yehova akola emyatsi eyo, alinga Abaisraeli mubasweka kutsibu bakalangira obwaka bwiwe bunene.

 3. Twangaha tuti Yehova y’olukengerwa?

³ Netu twanganaha Yehova y’olukengerwa. Enzira nguma eyo twangakoleramo ekyo, ry’eribwira abandi oko myatsi eyikaswekaya eyo abirikola, n’oko mibere yiwe eyuwene kutsibu. Kandi tukaha oMungu y’olukengerwa omughulu tukamupipa busana n’emyatsi yosi eyo akatutokesaya erikola. (Isa. 26:12)  Omwami Daudi abya ky’erileberyako kibuya ky’oko bandu ababya bakaha Yehova y’olukengerwa. Omo musabe mughuma ogho akola embere sy’endeko ye Israeli, Daudi mwabugha ati: “Obukulu, obutoki, obubuya, olukengerwa, n’obusike ni byaghu, kundi ebindu byosi ebiri elubula n’ebiri oko kihugho ni byaghu.” Daudi abere abibugha erisaba, “abandu bosi ababya bahindene mubapipa Yehova oMungu.”​—1 Emya. 29:11, 20.

 4. Yesu mwaha ati Yehova y’olukengerwa?

⁴ Omughulu Yesu abya hano oko kihugho, inyakaha Tata wiwe y’olukengerwa omw’ibwira abandu ngoko n’iye yukamuha akaghala ako akakolesaya erikola ebitiko-tiko. (Mar. 5:18-20) Kandi Yesu inyakaha Yehova y’olukengerwa erilabira ebinywa ebyo abya akabugha oko Tata wiwe kandi ngoko abya akakolera abandi. Kiro kighuma, Yesu akakangirirya omo sinagogi, mwalangira omukali oyo abyako embinga omo myaka mingyi. Embinga eyo yabya iyabirikondomya omubiri wiwe, neryo isyangatoka erimana. Yesu mwalangira ngoko omukali oyo abirighalwa kutsibu, neryo mwasonda erimuwatikya. Neryo mwaseghera hakuhi naye, n’eritsuka erikania naye omo lukogho. Mwamubwira ati: “Mukali wamabiboholwa oko ndwala yaghu.” Yesu mwamuhirako ebyala, neryo aho n’aho “mwayisingyika n’eritsuka eripipa oMungu.” Neryo omukali oyo mwasima kutsibu abilangira ngoko oMungu amabimulamya! (Luka 13:10-13) Kwenene, omukali oyo abya atolere eriha Yehova y’olukengerwa, netu tutolere erikola tutya.

EBIKATUKUNA ERIHA YEHOVA Y’OLUKENGERWA

 5. Ni myatsi yahi eyikaleka itwasikya Yehova?

⁵ Tukaha Yehova y’olukengerwa kundi tumusikirye kutsibu. Hali emyatsi mingyi eyangaleka itwamusikya. Yehova ni mutoki w’ebyosi, akaghala kiwe sikalihwa. (Esy. 96:4-7) Amenge wiwe manene alangirikire ndeke-ndeke omo myatsi eyo abirikola. Abirituha engebe n’ebyosi ebyo tulaghireko eribyaho. (Erib. 4:11) Ni mutaleghula. (Erib. 15:4) Obuli mwatsi ogho akakola akatokekana, kandi biro byosi akaberereraya eby’abirilagha. (Yos. 23:14) Kyo kyaleka omuminyereri Yeremia inyabugha oko Yehova ati: “Omo katikati kʼabandu bʼamenge bosi bʼebihanda, kandi omo mami gosi wabo sihali oyuli nga we!” (Yer. 10:6, 7) Kwenene, tuwite emyatsi mingyi eyikaleka itwasikya Tata wetu w’elubula. Aliwe, situsikirye Yehova lisa. Tumwanzire.

 6. Busanaki twanzire Yehova?

⁶ Tukaha Yehova y’olukengerwa kundi tumwanzire kutsibu. Tulebaye emibere mingyi eya Yehova eyikaleka itwamwanza. Ni mughanyiri kandi akakwira abandu b’obulighe. (Esy. 103:13; Isa. 49:15) Omughulu tukaghalawa, naye akaghalawa. (Zek. 2:8) Akatuwatikaya erimuminya n’eribya bira biwe. (Esy. 25:14; Emib. 17:27) Kandi akayikehaya; “Akunama akalebya olubula n’ekihugho. N’erisumba omundu w’ahisi erilua omo lututu.” (Esy. 113:6, 7) Emyatsi yosi eyo yikaleka itwanza eriha oMungu wetu mukulu y’olukengerwa.​—Esy. 86:12.

 7. Tuwite akanya ak’erikolaki?

⁷ Tukaha Yehova y’olukengerwa kundi twanzire abandi nabo ibamuminya. Abandu bangyi sibasi ekwenene oko Yehova. Busanaki? Ni kundi Sitani abiriliba obwenge bwabo omw’ilalaghania amabehi awakalire oko Mungu. (2 Kor. 4:4) Sitani abirilighisya abandu ngoko Yehova ni mutsibu, syatutsomene, kandi yukaleka itwaghalwa oko kihugho kino. Aliwe, tunasi ekwenene oko Mungu wetu! Tuwite akanya ak’eribwira abandu oMungu nga nindi kwenene-kwenene n’eriwatikyabo erimupipa. (Isa. 43:10) Esyonyimbo 96 sikakanganaya  omughaso w’eriha Yehova y’olukengerwa. Tukakania oko binywa bilebe ebyasondolawa n’ekirimu ebikabanika omo esyonyimbo esyo, ulengekanaye oko syonzira esyo wangahamo Yehova y’olukengerwa olo atolere.

NGOKO TWANGAHA YEHOVA Y’OLUKENGERWA OLO ATOLERE

 8. Ni nzira nguma yahi eyo twangaha mo Yehova y’olukengerwa? (Esyonyimbo 96:1-3)

⁸ Soma Esyonyimbo 96:1-3. Ebyo tukabugha oko Yehova byanganamuletera olukengerwa. Emilondo eyo twamabilua okw’isoma muli ebinywa ebikatuhana biti, “mwimbire Yehova,” “mupipe erina riwe,” “mutulaghanaye engulu mbuya y’omulamo wiwe,” kandi “mutulaghanaye olukengerwa lwiwe omo kati-kati k’ebihanda.” Twanganakolesya esyonzira esyo eriha olukengerwa oko Tata wetu w’elubula. Abayahudi bataleghula n’Abakristo b’erimbere mubatatika-tika eribwira abandi emyatsi yosi mibuya eyo Yehova abiribakolera n’eryerya erina liwe. (Dan. 3:16-18; Emib. 4:29) Twangakola emyatsi eyo yo tuti?

9-10. Omwatsi wa Angelena amakwighisyaki? (Ulebaye n’epitsa.)

⁹ Tulangire ebyahikira Angelena, a mwali wetu mughuma oyo ikere e Amerika. Omo butubaha bunene mwalwira oko rina lya Yehova eyo akakolera omubiiri. Kundi abya muhya oko mubiiri oyo, mwabirikirwa oko muhindano n’abandi bahya. Omo muhindano oyo, obuli mundu endibya akakania oko maisa wiwe. Angelena mwateghekania esyopitsa esyo akendikangania abandi balangire ngoko atsemire eribya Mwimiri wa Yehova. Aliwe, oghundi mukoli mulikyabo oyo amutangirira mwatsuka eribugha ngoko akulira omo kihanda ky’Abimiri ba Yehova. Neryo mwatsuka eribugha muhanda oko ebyo twikirirye. Angelena akabugha ati: “Munapona kutsibu. Sinabya nanzire abandu bikiriraye amabehi ayo oko Yehova. Neryo munayisogha eribwirabo ekwenene oko Yehova.”

¹⁰ Omulume oyo abere abibugha eribugha, Angelena mwasaba kikutu-kutu. Neryo mwamusubirya omo bolo ati: “Naghe niri nga we. Munakulira omo kihanda ky’Abimiri ba Yehova, n’erihika lino nikine mughuma wa kubo.” Nomo mubabya ng’abamakubanako obuhaka, Angelena mwasighala inyanatulere, mwakangania esyopitsa siwe kughuma n’abira biwe bakakolera Yehova ibanatsemire. Kandi omw’isikya mwakanirya abakoli balikyabo oko ebyo ikirirye. (1 Pet. 3:15) Ekyo mukyaluiramo  ebighuma byahi? Angelena abere abibugha eribugha, omulume oyo mwatulera. Nibya mwakania oko myatsi milebe eyo abya akatsemera omo bulwana bwiwe, omughulu abya akaya oko mihindano y’Abimiri ba Yehova. Angelena akabugha ati: “Yehova ni Mungu oyo litolere itwimira. Ni lusunzo lunene eribugha ekwenene okw’iye.” Netu tuwite olusunzo lunene olw’eripipa Yehova n’erimuha olukengerwa nomo abandi sibalimukenga.

11. Eritsuka kera abaramya b’ekwenene babirikangania bati ngoko banemukwama akanuni akakabanika omo Esyonyimbo 96:8?

¹¹ Soma Esyonyimbo 96:8. Twanganapipa Yehova omo bindu byetu by’obughuli. Eritsuka kera abaramya b’ekwenene bakaha Yehova y’olukengerwa omo nzira eyo. (Misyo 3:9) Ng’eky’erileberyako, Abaisraeli mubateka esyofranga, n’ebindi bindu bingyi eriwatikya erihimba ehekalu n’erisughayo. (2 Abam. 12:4, 5; 1 Emya. 29:3-9) Abakwenda balebe ba Yesu babya “bakakolesya ebindu byabo” Yesu n’abigha biwe batoke eribana ebyo balaghireko. (Luka 8:1-3) N’Abakristo b’oko karne k’erimbere mubateka ebihembo eriwatikya abaghala n’abali babo b’obunya-kirimu. (Emib. 11:27-29) Netu munabwire, twanganaha Yehova y’olukengerwa omw’iteka ebihembo omwanza lyetu.

12. Ebihembo ebyo tukateka omwanza lyetu, byangaletera Yehova y’olukengerwa biti? (Ulebaye n’epitsa.)

¹² Tulebaye eky’erileberyako kighuma ekikakanganaya ngoko ebihembo ebyo tukateka omwanza lyetu, bikaletera Yehova y’olukengerwa. Oko 2020, embula muyaghana eriwa omo biro bingyi e Zimbabwe. Amamilioni w’abandu ibanganahola busana n’eribula akalyo, erihirako na mwali wetu ye Prisca. Nomo byanabya bitya, mwali wetu Prisca mwalola embere n’eprograme yiwe y’eribya akatulira omo buli tatu n’obuli tano, nibya n’oko mughulu w’ekirimo. Abahimbani balikyabo mubatsuka erimusekererya busana n’eribya akaya omo mahubiri omo mwanya w’eribya akaya omo malima, ibakamubwira bati: “Ukendihola n’enzala.” Aliwe, omw’iyiketera rinene Prisca inyakasubirayabo ati: “Yehova syalinatalekerania n’ahake abaghombe biwe.” Habere hakya biro bilebe, mwabana omusaada erilua oko ndondeka yetu. Prisca mwabana emisaada eyo busana n’ebihembo ebyo tukateka omwanza lyetu. Abahimbani ba Prisca mubasweka kutsibu n’erimubwira bati, “Biro byosi, oMungu syalikulekeranaya n’ahake, netu  twanzire erigha bingyi okw’iye.” Abahimbani 7 ba kubo mubatsuka erihindana kughuma netu.

13. Emighendere yetu yanganaletera yiti Yehova y’olukengerwa? (Esyonyimbo 96:9)

¹³ Soma Esyonyimbo 96:9. Twanganaha Yehova y’olukengerwa erilabira emighendere yetu. Abahereri ababya bakakolera omo nyumba ya Yehova ibasabirwe eribya ibanerire kinya-mubiri. (Eril. 40:30-32) Litolere itwabya itunerire kinya-mubiri, kandi itwayihighula oko buli mwatsi ogho Yehova aponire. (Esy. 24:3, 4; 1 Pet. 1:15, 16) Tutolere itwayikasa kutsibu erileka “emibere ya kera,” ni bugha ambu emibere mibi n’emitsye mibi; n’eribya “n’emibere mihya-mihya,” ni bugha ambu itwabya tukalengekania n’erikola omo nzira eyikakanganaya ngoko tunemukwama eky’erileberyako kibuya ky’oMungu n’emibere yiwe eyuwene. (Kol. 3:9, 10) Omo buwatikya bwa Yehova, nibya n’abandu abakakola emyatsi mibi banganabinduka n’eribya n’emibere mihya-mihya.

14. Omwatsi wa Jack amakwighisyaki? (Ulebaye n’epitsa.)

¹⁴ Tulebaye eky’erileberyako kya Jack, oyo abya mulume mutsibu, erihika oko kika bamamuluka erina lya Sitani. Mubamutswera oluholo busana n’ebitsibu ebyo abya inyabirikola. Akalindirira ekiro eky’eritibwa, Jack mwaligha erigha eBiblia na mughala wetu mughuma oyo walenderera engomo eyo abyamo. Nomo Jack anakola ebitsibu ebikalire, mwabinduka, amabatisibwa n’eribya Mwimiri wa Yehova. Jack mwabinduka kutsibu erihika oko kika, ekiro ky’eritibwa liwe kyabere kyahika abakateghaya engomo mubasa bakasyamulagha emisonia iyine omo meso wabo. Oghundi mukulu w’engomo mwabugha ati, “Jack abya mughuma w’oko bandu batsibu b’omo ngomo eno. Aliwe lino ni mughuma w’oko bandu abuwene kutsibu.” Habere halaba eyenga nguma Jack inyabiritibwa, abaghala betu abasyasondola omuhindano w’omo kati-kati k’eyenga omo ngomo mubahindana n’oghundi mundu w’omuliki oyo abya mutsibu, yabya ngendo yiwe y’erimbere erisyahindana oko mihindano yetu. Niki kyo kyamukuna erisyahindana? Mwabugha ati mwasweka kutsibu akalangira Jack akabindula emighendere yiwe, neryo naye anzire eriminya eky’erikola atoke eriramya Yehova. Kilangirikire ndeke-ndeke ngoko emighendere yetu yanganaletera Tata wetu w’elubula y’olukengerwa!​—1 Pet. 2:12.

 NGOKO YEHOVA AKENDILWIRA OKO RINA LIWE HANO HO SENENE

15. Yehova akendisyalwira ati olosi oko rina liwe omo biro ebikasa hano ho sesene? (Esyonyimbo 96:10-13)

¹⁵ Soma Esyonyimbo 96:10-13. Omo milondo eyi eyikabughirira esura 96 y’ekitabu ky’Esyonyimbo, Yehova akakanibawako ng’Omutsweri oyuwene kandi ng’Omwami. Yehova akendilwira ati oko rina liwe hano ho sesene? Akendikola atya omw’ihiraho eritunganene. Hatya-hatya, akenditoghotya e Babiloni Mukulu kundi yabirimutsandirya erina liwe ribuyirire. (Erib. 17:5, 16; 19:1, 2) Babiloni Mukulu akatsandibwa, abandu balebe banganasyayisogha eritsuka eriramya Yehova kughuma netu. N’oko ndulya, erilabira e Armagedoni, Yehova akendisyatsandya ekihugho kyosi kya Sitani, ni bugha ambu abosi abakayisamambula okw’iye n’abakabugha muhanda oko rina liwe; aliwe inyasabula abosi abamwanzire, ni bugha ambu abakamwowa, n’abakaha erina liwe ly’olukengerwa. (Mar. 8:38; 2 Tes. 1:6-10) Enyuma sy’erilengwako ly’omwiso, erikendisyabya oko ndulya y’Obutabali bwa Kristo obw’emyaka elfu moya, Yehova akendisyabya inyabiriyira erina liwe mo libuyirire olosi. (Erib. 20:7-10) N’oko ndambi eyo, “ekihugo kyasyusula nʼeriminya lyʼolukengerwa [lwa Yehova], ngoko amagetsi akusula omo ngetsi nʼeriswikayo.”​—Hab. 2:14.

16. Uyisohire kundu erikolaki? (Ulebaye n’epitsa.)

¹⁶ Kikendisyatsemesya tukalangira obuli mundu akapipa Yehova ngoko atolere! Itunemulindirira ekiro ekyo, munabwire tukole ekyosi-kyosi ekyo twangatoka erikolesya ehyanya hyosi ehyo tukabana eriha oMungu y’olukengerwa. Erituwatikya erikola ekyo, Ekyaghanda Ekikasondola kyabirisombola erisako lye Esyonyimbo 96:8 mo risako ryetu ly’omwaka 2025: “Mupipe erina lya [Yehova] ly’olukengerwa.”