Kikanakukalako eryibuka emyatsi eyo wamalua okw’iyighisya? Ekyo kikahikira abandu bosi bo kangyi-kangyi. Ekyangakuwatikya niki? Ry’erisubira omo emyatsi mikulu-mikulu y’ebyo wamalua okw’iyighisya.

Ukayighisya, ubye ukimana kangyi-kangyi ukalengekania oko myatsi y’omughaso eyo unemusoma. Ekyo ky’omukwenda Paulo ahana abaghala n’abali babo ati babye bakakola bakayighisya esyobaruha siwe. Mwahandika ati: “Neryo enzumwa y’emyatsi eyo tukabugha yeno.” (Ebr. 8:1) Omw’ikola atya mwawatikyabo eriminya enzumwa ngulu n’eribawatikya erilangira ngoko emyatsi yihambene.

Naghu, wabibugha eriyighisya wanganayihiriraho esyodakika nga 10 ukalengekania oko esyonzumwa ngulu-ngulu s’ebyo wamalua okw’isoma. Wamabya isighukibukire ndeke emyatsi mikulu-mikulu, tasyasoma emitwe mike-mike, kutse obuli mulondo w’erimbere ow’obuli nungu erikuwatikya eryibuka ebyo uligha. Wamabya imughukigha omwatsi muhya, uyikase erikania oko mwatsi oyo ukakolesya ebinywa byaghu. Omughulu ukayikasa eritasyalengekania oko myatsi eyo wamalua okw’isoma, kikakwolobera eryibuka ebyo uligha, kandi ukowa ndeke ngoko wangakolesya emyatsi eyo omo ngebe yaghu.