OMWATSI W’ERIGHA 43
OLWIMBO 90 Tuhirane m’omuhwa
Wangakinda ghuti eritika-tika?
“Mubye mukalebya emyatsi yosi nga yinuwene.”—1 TES. 5:21.
ENZUMWA NGULU:
Tukendilangira ngoko twangakinda eritika-tika eryangatula oko omubiiri ogho tukakolera Yehova.
1-2. (a) Ni mabulyo wahi agho baghombe ba Yehova banganayibulya? (b) Tukendikania okuki omo mwatsi ono?
ITWE bosi, tubye bakulu kutse balere, hakanabya endambi itwabya n’eritika-tika. a Ng’eky’erileberyako, omulwana oyutewabatisibwa anganayibulya Yehova ng’anamutsomene kwenene. Ekyo kyanganaleka inyayibulya nga nina ky’omughaso okw’iye eribatisibwa. N’ekindi ky’erileberyako kye ky’omughala wetu oyo omughulu abya mulwana, mwasombola erihira Yehova y’embere omo ngebe yiwe, omo mwanya w’erisonda esyofranga nyingyi. Lino abirikula, kandi awite olufranga lunyoho-nyoho olw’eribya akalisyamo ekihanda kiwe. Anganayibulya eriyisogha liwe ly’omo bulwana nga lyanabya ly’amenge. N’ekindi ky’erileberyako kye ky’amwali wetu oyukekeluhire oyo syakiwite akaghala. Anganabunika mutima kundi syakiwite obutoki bw’erikolera Yehova ngoko abya akakola kera. Wanabiriyibulya amabulyo ng’ano: Yehova ananilangire kwe? Eriyiherera lyaghe ngakolera Yehova, kyanabya ky’omughaso? Ebyo ninemukolera Yehova munabwire, anemusimabyo kwe?’
2 Wamatendisondya ebisubiryo oko mabulyo ayo, ekyo kyanganaleka iwaherya obwikirirya bwaghu oko Yehova, nibya iwaleka n’erimuramya. Omo mwatsi ono, tukendilangira ngoko eBiblia yanganatuwatikya twamabya tukalengekania (1) tuti alinga Yehova syatutsome, (2) tuti alinga mutwayisogha muhanda kera, kutse (3) tuti alinga Yehova syangatasyatukolesya.
NIKI KYO KYANGATUWATIKYA OMUGHULU TUKATIKA-TIKA?
3. Omughulu tukatika-tika, litolere itwakolaki?
3 Omughulu tunemutika-tikira omwatsi mulebe, litolere itwasondya ebisubiryo by’omo Biblia. Twamabya tukakola tutya, obwikirirya bwetu oko Yehova n’obwira bwetu naye ibukendiwata, neryo netu itwasika “omo bwikirirya.”—1 Kor. 16:13.
4. Tukalebaya “emyatsi yosi nga yinuwene” tuti? (1 Abanya Tesalonika 5:21)
4 Soma 1 Abanya Tesalonika 5:21. EBiblia yikatuhana yiti, “Mubye mukalebya emyatsi yosi nga yinuwene.” Twangakola ekyo kyo tuti? Twamabitika-tikira omwatsi mulebe, litolere itwasondekania ebyo eBiblia yikabugha oko mwatsi oyo. Ng’eky’erileberyako, tutasyalengekania oko mulwana oyo wabya akayibulya Yehova ng’anamutsomene kwenene-kwenene. Akalengekania ati Yehova syamutsomene, ekyo kinasondire eribugha kiti emyatsi ko yiri yitya? Iyehe. Atolere inyalebya “emyatsi yosi nga yinuwene” omw’isonda amalengekania wa Yehova oko mwatsi oyo.
5. Twangabana tuti ebisubiryo bya Yehova oko mabulyo wetu?
5 Omughulu tukasoma eBiblia, kikabya nga Yehova anemukania netu. Aliwe, twamanza eribana ebisubiryo bya Yehova oko mabulyo wetu, litolere itwakola bingyi kwilaba erisoma eBiblia lisa. Tutolere erigha Amasako, kutsibu-tsibu awakendisubirya oko mabulyo wetu. Twanganakwesa-kwesa eyindi myatsi y’oko mwatsi oyo omw’ikolesya ebitsapo ebyo endondeka ya Yehova yabirituhiriraho. (Misyo 2:3-6) Tutolere erisaba Yehova obuwatikya obw’eribana ebisubiryo oko mabulyo wetu. Neryo twanganaronda esyokanuni sy’eBiblia n’emyatsi eyangatuwatikya omo mibere eyo tulimo. Kandi kyanganuwana erisoma emyatsi y’abaghombe ba Yehova bataleghula ababya bakayowa ng’itwe, abakanibweko omo Biblia.
6. Emihindano yetu yikatuwatikaya yiti erikinda eritika-tika lyetu?
6 Kandi Yehova akakanaya netu erilabira emihindano y’endeko. Twamabya isitulibula oko mihindano y’endeko, twanganowa omwatsi mulebe omo mukania kutse ekisubiryo kilebe eky’omughala kutse mwali wetu, ebyangatuwatikya eribughaho eritika-tika lyetu. (Misyo 27:17) Muleke tukanaye oko myatsi milebe eyangatuwatikya erikinda eritika-tika lyetu.
OMUGHULU UKATIKA-TIKA UTI YEHOVA NGANAKUTSOME KWENENE-KWENENE
7. Abandu balebe banganayibulyaki?
7 Wanabiriyibulya uti, ‘Yehova ananilangire kwe?’ Eribya ukalengekania uti sighuli w’omughaso, ekyo kyanganaleka iwalengekania uti siwangatoka eribya mwira w’Omuhangyiki w’obuhangwa bosi. Alinga Omwami Daudi naye mwanalengekania atya. Mwayibulya nga kinatokekene Yehova eritsomana abandu. Mwabulya ati: “Uwe [Yehova], ko mundu niki uti ukamulolako kwehi? Kutse omundu buyira nindi, uti ukamusamalira kwehi?” (Esy. 144:3) Neryo twangabana hayi ekisubiryo ky’oko riburyo, ‘Yehova ananilangire kwe?’
8. Ngoko kiri omo 1 Samueli 16:6, 7, 10-12, Yehova iye akalangiraki oko bandu?
8 EBiblia yikatukangiriraya ngoko Yehova atsomene abandu abakalangirika nga si b’omughaso omo meso w’abandi. Ng’eky’erileberyako, Yehova mwatuma Samueli omo nyumba ya Yese ayahire amaghuta oko mughala wiwe mughuma oyo akendisyabya mwami we Israeli. Yese mwabikira abana biwe 7 erisyahindana na Samueli, aliwe mwatabirikira omulere omo bosi, ye Daudi. b Aliwe, Daudi yo Yehova abya inyabirisombola. (Soma 1 Samueli 16:6, 7, 10-12.) Yehova iye mwalangira Daudi ngoko ali kwenene-kwenene. Abya asi ngoko omulwana oyo amwanzire erilua oko mutima.
9. Busanaki wanganayiketera kundu ngoko Yehova akutsomene? (Ulebaye n’epitsa.)
9 Terilengekania oko ebikakanganaya ngoko kwenene-kwenene Yehova akutsomene. Akakuha amahano awakutolere. (Esy. 32:8) Ekyo kikakanganaya ngoko akwasi ndeke. (Esy. 139:1) Omughulu ukakolesaya amahano agho Yehova akakuha, neryo iwayilangirira ngoko amahano ayo amakuwatikya, ekyo kikaleka iwayiketera kundu ngoko Yehova akutsomene. (1 Emya. 28:9; Emib. 17:26, 27) Yehova anemulangira ebyosi ebyo ukakola utoke erimukolera n’erimwowa. Akalangira emibere yaghu eyuwene, kandi anzire inyabya mwira waghu. (Yer. 17:10) Anzire naghu iwaligha eribya mwira wiwe.—1 Yoh. 4:19.
“Wamasonda-sonda [Yehova], asyabanika ukʼuwe.”—1 Emya. 28:9 (Ulebaye enungu 9) c
WANGAKOLAKI WAMABYA IGHUNEMUTIKA-TIKIRA EBYO WAYISOGHA KERA?
10. Omughulu tukalengekanaya oko ebyo twayisogha kera, ni mabulyo wahi agho twanganayibulya?
10 Kyanganahika, omundu inyatika-tikira ebyo ayisogha kera n’eriyibulya nga byanabya by’amenge. Kwamuhwa mwayisogha erileka omubiiri owabya akamwingirirya esyofranga nene, atoke erikola bingyi omo mubiiri wa Yehova. Neryo lino ebiro byabirilaba, kutse nibya emyaka mingyi. Neryo anganatsuka erilengekania oko bandu balebe abo asi, abatayisogha ng’iye, abalangirikire munabwire nga babiriyira oko syofranga n’amaisa aghuwene. Ekyo kyanganaleka inyayibulya ati: ‘Munanayisogha ndeke erihira Yehova y’embere kwe? Kutse naghe nga nakola kutsibu, ngambe munabwire singwite oko syofranga kwe?’
11. Niki kyo kya hanga-hangaya omuhandiki w’Esyonyimbo 73?
11 Naghu wamabya iwabiriyibulya amabulyo awali ng’ayo, lebaya ekyo eBiblia ikabugha oko muhandiki w’ Esyonyimbo 73. (Esy. 73:3-5, 12) Mwalangira abandu abatekolera Yehova nga bawite omubiri owakala-kalire, nga ni bateke, kandi nga sibawite ebikabahanga-hangaya. Abere abilangira engebe y’abandu abo yikalangirika nga yuwene, mwalangira nga mwayisogha muhanda erikolera Yehova. Inyakaghalawa “omo musibo gosi” busana n’amalengekania ayo awakabuna mutima. (Esy. 73:13, 14) Neryo mwakinda ati amalengekania awatuwene ayo?
12. Ngoko kiri omo Esyonyimbo 73:16-18, ekyawatikaya omuhandiki w’esyonyimbo erikinda amalengekania wiwe awatuwene niki?
12 Soma Esyonyimbo 73:16-18. Abere abiya oko hekalu ya Yehova, omuhandiki w’esyonyimbo esi, mwayowa buholo. Mwatoka erilengekania ndeke abiyeya omo kati-kati k’abandu ba Yehova. Mwalangira ngoko, nomo abandi banganalangirika nga bawite amaisa aghuwene, sibawite amaha w’ebiro ebikasa. Neryo, mwatulera omo mutima n’eriyiketera ngoko mwayisogha ndeke akahira Yehova y’embere omo ngebe yiwe. N’ekyo mukyaleka inyatasyabya n’engumbu nene ey’erilola embere erikolera Yehova.—Esy. 73:23-28.
13. Niki kyo kyangakuwatikya eritulera omo bwenge wamabya ukatika-tikira eriyisogha eryo wakola kera? (Ulebaye n’epitsa.)
13 Naghu wanganatoka erikinda amalengekania waghu awatuwene ngoko omuhandiki w’esyonyimbo anatoka. Wangakola ekyo kyo ghuti? Ubye ukibuka emyatsi eyuwene eyo uwiteko, erihirako n’obwira bwaghu haghuma na Yehova; kandi wibuke ngoko abatekolera Yehova sibawite emyatsi mibuya eyo. Oko bangyi abatekolera Yehova, eribya n’omubiiri oghuwene w’omwatsi w’omughaso munene omo ngebe yabo, kundi sibawite amaha w’ebiro ebikasa. Aliwe iwe, Yehova anemukuha ebindu ebyuwene-wene munabwire, kandi abirilagha n’eritasyakuha ebindi bindu ebyuwene-wene omo biro ebikasa. (Esy. 145:16) Terilengekania n’oko kino: Siwangaminya engebe yaghu nga yendibya yiti nga wayisogha eritendihira Yehova y’embere omo maisa waghu. Ekwenene y’eno: Abakayisogha erihira Yehova y’embere omo maisa wabo kundi bamwanzire kandi banzire n’abahimbani babo, bakabana emyatsi eyikabaletera obutseme bunene omo maisa wabo.
Ubye ukalengekania kangyi-kangyi oko myatsi mibuya eyo Yehova akendisyakukolera omo biro ebikasa (Ulebaye enungu 13) d
OMUGHULU UKALENGEKANAYA UTI YEHOVA SYALISIMA EBYO UKAMUKOLERA LINO
14. Abandu balebe bali omo mibere yahi, n’ekyo kyanganaleka ibayibulyaki?
14 Munabwire abaghombe ba Yehova balebe banganataluka erikola bingyi ngoko babya bakakola embere kundi babirikekeluha, balwere, kutse bawite bulema bulebe bw’ekinya-mubiri. Ebyo byanganaleka ibalengekania bati sibakiri b’omughaso embere sya Yehova. Banganayibulya bati, ‘Yehova akinasima ebyo ngamukolera lino?’
15. Omuhandiki w’ Esyonyimbo 71 abya ikirirye kundu omwatsi wahi?
15 Omuhandiki w’ Esyonyimbo 71 naye mwayowa atya. Mwasaba ati: “Sunyirekeranaye omugulu nyiri molo-molo!” (Esy. 71:9, 18) Nomo omuhandiki w’esyonyimbo anayowa nga syakiwite akaghala, mwayiketera kundu ngoko amabilola embere erikolera oMungu wiwe yo butaleghula, Yehova inyakendimuwatikya. Omuhandiki w’esyonyimbo mwigha ngoko, Yehova akatsemera abakayikasa erimukolera, nibya nomo hane ebingyi ebyangabakakirya.—Esy. 37:23-25.
16. Yehova anganakolesya abakekeluhire omo nzira syahi? (Esyonyimbo 92:12-15)
16 Naghu wamabya ighukekeluhire, uyikase eriyilangira ngoko Yehova akakulangira. Anganakuwatikya erilola embere erimukolera butaleghula nomo unemughalwa kinya-mubiri. (Soma Esyonyimbo 92:12-15.) Omo mwanya w’eribya ukahwererya amalengekania waghu oko myatsi eyo utewangatoka, uyikase eribya ukalengekania oko ebyo wangatoka. Eky’erileberyako kyaghu eky’obwikirirya n’eritsomana abandi byanganawatikyabo. Wanganakanirya abandi ngoko Yehova abirikuwatikya omo myaka mingyi n’eribabwira oko milaghe yiwe eyo ukalindirira n’omuhwa. Kandi isiwibirirawa ngoko emisabe eyo ukasabira abandi yiwite akaghala kanene. (1 Pet. 3:12) Nomo tuli omo mibere eyiri yiti, itwe bosi tunawite ekyo twangaha Yehova n’abandi.
17. Busanaki si kyuwene eribya tukayilingirirania n’abandi?
17 Wamabya ighukapokaya ebyo ukakolera Yehova lino, uminye ngoko Yehova akalangira ebyo ukakola mo by’omughaso munene. Isiwanatalingirirania ebyo ukakola n’eby’abandi! Busanaki? Kundi Yehova iye syalikulingiriranaya n’abandi. (Gal. 6:4) Ng’eky’erileberyako, Maria mwaha Yesu y’ekihembo eky’amaghuta awakakumba ndeke, kandi awakaghula esyofranga nene. (Yoh. 12:3-5) Aliwe, omukwakali mwera mwateka ebitsere bibiri eby’obughuli buke mo kihembo omo hekalu. (Luka 21:1-4) Nomo bine bitya, Yesu mwatalingirirania ebihembo by’abakali babiri abo. Omo mwanya w’ekyo mwakangania ngoko Maria n’omukwakali mwera, abosi mubakangania obwikirirya. Kundi Yesu inyakakwama emibere ya Tata wiwe omo nzira eyihika-hikene, wanganayiketera ngoko Yehova akalangira ebyosi ebyo ukamukolera kundi uwite obwikirirya okw’iye, kandi kundi umwanzire, nomo wanganalangira nga ni mwatsi muke.
18. Twangatoka tuti erikinda eritika-tika lyetu? (Ulebaye n’akasanduku “ Ekinywa kya Yehova kyanganakuwatikya erikinda eritika-tika.”)
18 Itwe bosi hakanabya endambi itwatika-tika. Aliwe ngoko twamabilangira, eBiblia yanganatuwatikya erikinda eritika-tika ryetu. Kwesi uyikase eribana ebisubiryo oko myatsi eyikakuhanga-hangaya. Wamabikola ekyo, ighukenditulera omo mwanya w’erihangya-hangya. Yehova akwasi ndeke. Akatsemera ebyosi ebyo wayisogha erikola, utoke erihira omubiiri wiwe w’embere omo maisa waghu, kandi akendisyakuhemba. Yehova anzire, kandi atsomene obuli mughombe wiwe mutaleghula.
OLWIMBO 111 Ebikaleka itwatsema
a AMAANA W’EBINYWA: Eritika-tika eryo tukendikaniryako omo mwatsi ono, ry’eritika-tikira ngoko tuli b’obughuli omo meso wa Yehova, kutse eritika-tikira ebyo twayisogha kera, tukalengekania tuti sibyabya by’amenge. Aliwe, si ry’eritika-tika eryo eBiblia ikabugha yiti likakanganaya ngoko situwite obwikirirya oko Yehova n’omo milaghe yiwe.
b EBiblia siyiritubwira emyaka eyo Daudi abya nayo omughulu Yehova amusombola, aliwe alinga kabya kalwana akakusuka.—Ulebaye Akaleberyo k’Omuteya ak’ekiro 1, Omwisi 9, 2011, aka. 29, enu. 2.
