Wanabirisoma ndeke emyatsi yosi y’omo syogazeti Akaleberyo k’Omuteya esy’omwaka ono? Byamabya bitya, lebaya nga wanganasubirya oko mabulyo ano:

Yehova akakolera abakali ati, netu twangamwigha tuti?

Yehova syalisolola abakali, syanzire abalume kulenga abakali. OMungu akahulikirira abakali, atsomene ngoko bakayowa n’ebikabahanga-hangaya. Kandi akayiketerabo omw’ibaha olusunzo lw’erikola oko mubiiri wiwe.​—w24.01, aka. 15-16.

Abanya Efeso 5:7, ikabugha yiti: “Simubye mukakola ng’abo.” Twangakolesya tuti erisakyo eryo?

Omukwenda Paulo mwatuhana ati isitwabya bira b’abandu abatesikaya esyokanuni sy’oMungu. Abandu abo banganabya abo tukalabaya nabo endambi, n’abo tukakanaya nabo oko Enternete.​—w24.03, aka. 22-23.

Twangayiteya oko mabehi wahi?

Tutolere itwayiteya kutsibu oko myatsi eyo situtatsopolya ndeke eyikasira oko bira betu abo twasi ndeke, kutse eyikasira omo syomesaje esyo abandu abo tutasi bakatutumira, kutse eyikasira oko bandu abayisamambula oko bwikirirya abakabya nga bamatsemesibwa n’ekwenene.​—w24.04, aka. 12.

Ni mwatsi wahi wo twasi n’ogho tutasi okw’itswera lya Yehova oko Mwami Solomona, abandu abahola omo Sodoma ne Gomora, n’abahola omw’ibwagha ly’amaghetse?

Oko kwenene, sitwasi Yehova ngabiriyisogha eritsandya abandu abo kera na kera. Aliwe, ekyo twasi, Yehova asi ndeke emyatsi yosi kandi akaghanyira kutsibu.​—w24.05, aka. 3-4.

OMungu eribya “Lubwe” ekyo kikaleka itwayiketeraki? (Ebih. 32:4)

Twanganarondya obusayiro omo Yehova. Ni w’eriyiketerwa, mughulu wosi akaberereraya esyondaghane siwe. Kandi Yehova syalibinduka, emibere yiwe n’erisonda riwe sibibinduka.​—w24.06, aka. 26-28.

Ebyangakuwatikya eribeghera endeko nyihya ni byahi?

Uyiketere ngoko Yehova akendikuwatikya ngoko anawatikaya n’abaghombe biwe ba kera. Isiwabya ukasosekania endeko yaghu ya lino n’eya kera. Ubye n’ebingyi by’erikola omo ndeko yaghu nyihya kandi uyikase erirondya abira bahya omo ndeko yaghu nyihya.​—w24.07, aka. 26-28.

Ni somo syahi syo tukabana omo misyo isatu eyikabanika omo Matayo 25?

Omusyo w’esyombuli n’esyombene akakanganaya omughaso w’eribya mutaleghula. Omusyo w’abambesa b’amenge n’abakiru akatukanganaya omughaso w’eribya itunayiteghekenie n’eriteya. N’omusyo w’esyotalanta akakanganaya omughaso w’eribya tukakola n’omuhwa munene.​—w24.09, aka. 20-24.

Ebaraza eyabya embere sy’ehekalu ya Solomona yabya n’obuli bungahi?

Omo 2 Emyatsi y’Emighulu 3:4, ebihandiko bilebe bya kera bikabugha biti obuli bw’ebaraza eyo bwabya bw’amaboko 120, ni bugha ambu metre 53. Aliwe eyindi mbindula y’eriyiketerwa yikabugha yiti Ebaraza eyo “yabya y’amaboko 20,” kutse hakuhi metre 9 oko buli. Ebipimo by’omwiso ebi byamalangirika nga byo bitolere, erikwamana n’obunene bw’oluhimbo lw’ehekalu.​—w24.10, aka. 31.

Omughombe muwatikya litolere ‘iniabya n’omukali mughuma musa,’ ekyo ni bugha ambuki? (1 Tim. 3:12)

Ekyo ni bugha ambu, atolere inyalunga n’omukali mughuma musa, kandi syatolere inyabya omundu oyunemukola obusingiri. Kandi, syatolere eribya akasamalira abandi bakali omo ngumbu nyibi.​—w24.11, aka. 19.

Busanaki tukabugha tuti ebinywa ebyo Yesu abugha omo Yohana 6:53, sibighumerera n’ebyo abugha oko Kalyo k’erigholo-gholo k’Omukama?

Yohana 6:53, ikakanaya okw’irya omubiri wa Yesu n’erinywa omusasi wiwe. Yesu mwabugha ebinywa ebyo oko mwaka 32 M.W., inyane e Galilaya. Mwabwirabyo Abayahudi ababya batolere erimwikirirya. Aliwe, Yesu mwatsukisya Akalyo k’erigholo-gholo k’Omukama e Yerusalema, omwaka mughuma enyuma w’aho. Eyo yo Yesu akanaya oko abaghuma b’oko abo akendisyatabala nabo omo lubula.​—w24.12, aka. 10-11.