1. Busanaki abandu bangyi bakalengekanaya bati sikyangatokekana erisyabana engebe y’erikota?

 ABANDU bangyi bakayikasa erirya ndeke n’erikalya-kalya omubiri batoke eribya n’obunyaghasa obuwene n’eribyaho omo myaka mingyi. Aliwe, banasi ngoko nomo bangakola emyatsi eyo, siyangaleka ibatakekeluha n’erihola. Alinga bakalengekanaya bati sikyangatokekana erisyabyaho kera na kera. Aliwe, omo Yohana 3:16 na 5:24, Yesu mwakangania ngoko kinatokekene oko bandu erisyabana “engebe y’erikota.”

2. Yohana esura 6 ikabughaki oko ngebe ya kera na kera? (Yohana 6:39, 40)

² Kiro kighuma Yesu mwakola ekitiko-tiko eky’eriha ekikumula ky’abandu emikati n’esyosamaki. a Ekyo mukyaswekya, aliwe ekyo abwira ekikumula ky’abandu enyuma w’aho mukyatasyaswekya kutsibu. Mubamukwama e Ekapernaumu, hakuhi n’omusike w’engetse ye Galilaya, n’eyo yo abwirabo ngoko asyalubukya abaholi n’erihabo engebe y’erikota. (Soma Yohana 6:39, 40.) Terilengekania oko bira baghu n’abanzwa baghu ababirihola. Ebinywa ebyo Yesu abugha ebyo bikakanganaya ndeke-ndeke ngoko abandu bangyi ababirihola banganasyalubukibwa kandi ngoko iwe n’abanzwa baghu mwanganasyatsemera engebe kera na kera! Aliwe, ebyo Yesu abugha enyuma omo Yohana esura 6, mubyatowika ndeke oko bandu bangyi abamwowa, na munabwire bikinakalire oko bandi eryowabyo. Yesu mwasonda eribugha atiki?

3. Ngoko kiri omo Yohana 6:51, Yesu mwabughaki okw’iye?

³ Yesu abere abiha ekikumula ky’abandu emikati n’esyosamaki omo nzira y’ekitiko-tiko, mubibuka amana agho Yehova aha Ab’abaisraeli omughulu byabya omo mbwarara. Abandu  abo Yesu akanaya nabo babya basi ndeke ngoko amana akahulawamo “omukati erilua elubula.” (Esy. 105:40; Yoh. 6:31) Yesu mwakolesya emyatsi milebe eyo ekikumula ekyo kyabya kyasi oko mana erikangiriryabo esomo y’omughaso munene. Nomo amana abya akalua oko Mungu omo nzira y’ekitiko-tiko, aliwe oko nduli, ababya bakalyagho mubahola. (Yoh. 6:49) Aliwe, Yesu iye mwayahula mo “omukati w’engebe owalua elubula,” “omukati ogho oMungu akaha,” na “omukati w’engebe.” (Yoh. 6:32, 33, 35) Yesu mwakangania ngoko iye asighene kutsibu n’amana. Mwabugha ati: “Ingye indi mukati w’engebe owalua elubula. Omundu amabirya kugho, inyakendisyabyaho kera na kera; n’omukati ogho ngendiha oyo, wo mubiri waghe, abandu batoke eribana engebe.” (Soma Yohana 6:51.) Abayahudi abamowa akabugha atya mubayibula. Mubataminya ekyangalekire Yesu inyabugha ati iye ni “mukati” owakalua elubula kandi owalengire amana ogho Mungu aha obo tata-kulu wabo. Neryo, Yesu mwabwirabo ati: “Omukati ogho ngendiha oyo wo mubiri waghe.” Abya akasonda eribugha atiki? Ni ky’omughaso munene okw’itwe eriminya ekyo Yesu asonda eribugha kundi ekisubiryo kikakanganaya ngoko kyanganatokekana itwe n’abanzwa betu itwabana engebe y’erikota. Muleke tuminye ekyo Yesu asonda eribugha.

OMUKATI W’ENGEBE N’OMUBIRI WIWE

4. Busanaki abandu balebe mubahitana busana n’ebyo Yesu abugha?

⁴ Abandu balebe mubahitana Yesu abere abibwirabo ati akalyo ako batolere erirya w’omubiri wiwe “batoke eribana engebe.” Alinga mubalengekania bati Yesu akasonda eribugha ati bamulye! (Yoh. 6:52) Yesu mwatasyatomekako oghundi mwatsi ogho alinga mwatasyadungabo kutsibu. Mwabugha ati: “Oko kwenene ngababwira, mwamatendirya omubiri w’Omughala w’omundu n’erinywa omusasi wiwe, isimuwite engebe emwisi syenyu.”​—Yoh. 6:53.

5. Busanaki twikirirye ngoko Yesu mwatasonda eribugha ati abandu b’endirya omubiri wiwe n’erinywa omusasi wiwe-wiwe?

⁵ Kera, oko mughulu wa Noa, Yehova mwaghania abandu arirya omusasi. (Enz. 9:3, 4) Enyuma, Yehova mwasubira omo mughambo oyo oko Baisraeli. Omundu oyukalya omusasi abya atolere “inyitwa.” (Law. 7:27, ebinywa by’eyikwa.) Yesu mwasighika omughambo oyo. (Mat. 5:17-19) Kwesi sikyenditokekana inyasaba Abayahudi erirya omubiri wiwe n’erinywa omusasi wiwe. Aliwe, omw’ikolesya ebinywa ebyo ebitabeghere erikolesibwa, Yesu abya akakangirirya abandu ngoko bangabana “engebe y’erikota.”​—Yoh. 6:54.

6. Tukaminya tuti ngoko ebinywa bya Yesu eby’erirya omubiri wiwe n’erinywa omusasi wiwe babya by’ekisosekanio?

⁶ Yesu abya akasonda eribugha atiki? Kilangirikire ndeke-ndeke ngoko Yesu abya akabugha omo musyo ngoko anakanaya oho mbere n’omukali Musamaria. Mwamubwira ati: “Owosi-wosi oyukanywa oko maghetse agho ngendimuha, syendisyasyakwa enyota; aliwe amaghetse agho ngendimuha, akendibya ngununuko y’amaghetse omw’iye awakaha engebe y’erikota.” (Yoh. 4:7, 14) b Yesu mwatasonda eribwira Omusamaria ati akendinywa oko maghetse w’omo libulu n’erilw’inyabana engebe y’erikota. Kutya, syabya akasonda eribugha ati ekikumula ky’abandu ababya akakania nabo e Kapernaumu b’endibyaho kera na kera bamabirya omubiri wiwe n’erinywa omusasi wiwe.

 EHANDI AHO YESU AKOLESAYA EBINYWA BY’EKISOSEKANIO

7. Abandu balebe bakabughaki oko binywa bya Yesu ebiri omo Yohana 6:53?

⁷ Abandu balebe bakabugha bati omo Yohana 6:53, Yesu abya akakangania ebyo abandu batolere eribya bakakola oko Kalyo k’erigholo-gholo k’Omukama kundi n’oko mughulu oyo mwakolesya ebinywa by’ekisosekanio. (Mat. 26:26-28) Bakabugha bati obuli mundu oyukahika oko muhindano w’Akalyo k’erigholo-gholo k’Omukama atolere inyalya omukati n’erinywa edivai ebikalabibawa embere sy’abandu. Neryo, ekyo nina kwenene kwe? Ni ky’omughaso eriminya ekisubiryo kundi oko buli mwaka amamilioni w’abandu omo kihugho kyosi bakahindana netu oko muhindano oyo. Tukendilangira ngoko ebyo Yesu abugha omo Yohana 6:53, sibighumerera n’ebyo abugha akatsukisya Akalyo k’erigholo-gholo k’Omukama.

8. Ni tendisosana lyahi eriri omo kati-kati k’emyatsi ibiri eyo twamabilangira omo nungu eno? (Ulebaye n’esyopitsa.)

⁸ Muleke tukanaye oko eritendisosana eriri omo kati-kati k’emyatsi ibiri eno. Ery’erimbere, ebinywa ebiri omo Yohana 6:53-56, Yesu mwabughabyo mughulu wahi kandi hayi? Mwabugha ebinywa ebyo omughulu abya n’ekikumula ky’Abayahudi e Galilaya oko mwaka 32 M.W. Mwabughabyo hakuhi mwaka mughuma embere atsukisaye Akalyo  k’erigho-gholo k’Omukama e Yerusalema. Ery’akabiri, abya akabugha n’abahi? Mwabwira ebinywa ebyo abandu ababya bakamusonda busana n’akalyo k’ekinya mubiri ako abya akahabo omo mwanya w’erigha oko myatsi ya Yehova n’oko Bwami bw’oMungu. (Yoh. 6:26) Yesu abere abugha omwatsi ogho balangira ng’amakala-kala mubalw’ibaleka erimuhulikirira. Nibya n’abigha biwe balebe mubaleka erimukwama. (Yoh. 6:14, 36, 42, 60, 64, 66) Abandu abo sibabya basosire abakwenda 11 ababya kughuma na Yesu omwaka mughuma enyuma, oko 33 M.W. akatsukisya Akalyo k’erigholo-gholo k’Omukama. Oko mughulu oyo, abakwenda biwe 11 bataleghula mubatamuluako nomo mubatowa ndeke ebyosi ebyo abya akakangirirya. Aliwe, abakwenda biwe bataleghula babya bikirirye kundu ngoko Yesu abya Mughala w’oMungu oyo alua elubula, ekyo abangyi b’omo kikumula ky’abandu abo akanaya nabo e Galilaya sibabya bikirirye. (Mat. 16:16) Mwasimabo ati: “Inywe mwabirinimakirira omo maligho waghe.” (Luka 22:28) Eritendisosana eryo twamalangira omo myatsi ibiri eyi, lyamakangania ngoko omo Yohana 6:53, Yesu syabya akasonda erikangania ngoko Akalyo k’erigholo-gholo k’Omukama k’endibya kakakolwa. Nibya hane n’eyindi myatsi eyikakanganaya ekyo.

EBINYWA BYA YESU EBYO, NAGHU BINAKULEBIRYE

9. Ebinywa ebyo Yesu abugha akalya Akalyo k’erigholo-gholo k’Omukama bilebirye bahi?

⁹ Akalya Akakalyo k’erigholo-gholo k’Omukama, Yesu mwaha abigha biwe omukati owatemo elevire n’eribabwira ati omukati oyo akasosekanaya omubiri wiwe. Neryo mwahabo n’ekikombe ky’edivai ati banywekyo n’eribwirabo ati, eki kikasosekanaya “omusasi waghe w’endaghane.” (Mar. 14:22-25; Luka 22:20; 1 Kor. 11:24) Ekyo abugha oko ndaghane eyo ni ky’omughaso munene. Endaghane nyihya-nyihya eyo muyitakolwa n’abandu bosi, aliwe muyakolwa “n’enyumba ye Israeli [y’obunya kirimu]” abakendisyabya “omo Bwami bw’oMungu.” (Ebr. 8:6, 10; 9:15) Abakwenda mubatowa obuli mwatsi oko ndaghane eyo, aliwe bendihirwako hatya-hatya amaghuta erilabira ekirimu kibuyirire, n’eringira omo ndaghane nyihya-nyihya batoke erisyabya kughuma na Yesu omo lubula.​—Yoh. 14:2, 3.

10. Ebyo Yesu abugha e Galilaya bisighene biti n’ebyo abugha omughulu w’Akalyo k’erigholo-gholo k’Omukama? (Ulebaye n’epitsa.)

¹⁰ Ebyo Yesu abugha omughulu w’Akalyo k’erigholo-gholo k’Omukama bilebirye “ekihyo kike.” Abigha biwe bataleghula ababya kughuma naye bo babya b’erimbere eringira omo kikuto kike ekyo. (Luka 12:32) Ibo n’abandi abendibya omo kikuto ekyo bo babya batolere erirya oko mukati n’erinywa oko divai. Nibo bo bendindibya omo lubula kughuma na Yesu. Ebyo Yesu abugha omughulu w’Akalyo k’erigholo-gholo k’Omukama bisighene n’ebyo abugha embere sy’ekikumula ky’abandu e Galilaya. Ebyo Yesu abwira abigha biwe omughulu w’Akalyo k’erigholo-gholo k’Omukama bilebirye lisa ekikuto kike ky’abandu. Aliwe, ebyo Yesu abugha e Galilaya bilebirye abandu bangyi.

11. Yesu mwabughaki e Galilaya ebikakanganaya ngoko syabya akakania oko kikuto kike kisa ky’abandu?

¹¹ Abandu bangyi b’oko abo Yesu abya akakania nabo e Galilaya babya bakamusondako akalyo. Aliwe, Yesu mwayikasa eriwatikyabo eriminya ngoko hane eky’omughaso munene kulenga akalyo. Ekyo ky’endileka ibabana engebe y’erikota. Nibya Yesu mwabugha ati n’ababirihola bakendisyalubukibwa oko kiro  ky’enduli n’eritasyabyaho kera na kera. Hano omo Yohana esura 6, Yesu syabya akakania oko lusunzo olo abandu bake basa bendibana, ngoko abugha enyuma omughulu w’Akalyo k’erigholo-gholo k’Omukama. Aliwe, e Galilaya mwakania oko lusunzo olo abandi bandu bendibana. Mwabugha ati: “Omundu amabirya kugho, inyakendisyabyaho kera na kera; n’omukati ogho ngendiha oyo, wo mubiri waghe, abandu batoke eribana engebe.”​—Yoh. 6:51. c

12. Omundu atolere inyakolaki atoke eribana engebe y’erikota?

¹² Yesu mwanasonda eribugha ati obuli mundu oyowabiribyaho akendisyabana engebe y’erikota? Iyehe, aliwe abakalya ‘oko mukati oyo,’ ni bugha ambu, abakikiriraya Yesu bo bakendisyabana olusunzo olo. Abandu bangyi munabwire bakabugha bati bikirirye Yesu mo Musabuli wabo. (Yoh. 6:29) Aliwe ekyo kisabire bingyi. E Galilaya yabya bandu bangyi ababya bikirirye Yesu oko nzuko, aliwe mubaleka erimwikirirya. Busanaki?

13. Erikirirya Yesu kisabireki oko kwenene?

¹³ Omo kikumula ky’abandu abo, abangyi babya bakakwama Yesu kundi abya akabaha ebyo balaghireko. Babya banzire inyalamyabo, inyabaha akalyo, eribwirabo ebyo banzire eryowa. Aliwe Yesu mwakanganiabo ndeke-ndeke ngoko mwatasa oko kihugho erisyahabo lisa ebyo balaghireko. Mwasa erisyakangiriryabo ebyo batolere erikola batoke eribya bigha biwe b’ekwenene. Babya basabirwe ‘eryasa’ okw’iye ni bugha ambu, eriligha  n’erikwama ebyosi ebyo abya akakangirirya.​—Yoh. 5:40; 6:44.

14. Twangakolaki tutoke eribana endundi omo mubiri n’omusasi wa Yesu?

¹⁴ Yesu mwakangirirya ekikumula ky’abandu abo ngoko eriherera omubiri n’omusasi wiwe ky’endibaha akanya ak’eribyaho kera na kera. Neryo, babya batolere erikirirya omwatsi oyo. Ekyo kyabya ky’omughaso oko Bayahudi abo, na lino kikine ky’omughaso okw’itwe. (Yoh. 6:40) Neryo, ekyo Yesu abugha omo Yohana 6:53, kikakanganaya ngoko twamanza eribana engebe y’erikota, litolere itwabya n’obwikirirya omo mbanulo. Ekyo kikendisyatokekana oko bandu bangyi.​—Efe. 1:7.

15-16. Ni myatsi yahi y’omughaso eyo twamigha omo Yohana 6?

¹⁵ Omo Yohana esura 6 muli emyatsi mingyi y’omughaso munene kandi eyikatusikaya mutima itwe bosi. Omo sura eyo tukigha ngoko Yesu atsomene abandu bo kutsibu. Omughulu abya e Galilaya mwalamya abakoni, mwakangirirya oko Bwami bw’oMungu, n’eriha abandu b’akalyo ako babya balaghireko. (Luka 9:11; Yoh. 6:2, 11, 12) N’eky’omughaso, mwakangirirya ngoko iye ni “mukati w’engebe.”​—Yoh. 6:35, 48.

¹⁶ Abandu abo Yesu ahula mo “sindi mbuli” sibalirya kandi sibangalya omukati n’erinywa edivai omughulu w’Akalyo k’Erigholo-gholo k’Omukama. (Yoh. 10:16) Nomo bine bitya, nabo bakabana endundi omo mubiri n’omusasi wa Yesu Kristo. Bakakola batya omw’ibya n’obwikirirya omo mbanulo ya Yesu n’emyatsi eyikaswekaya eyo embanulo eyo yatokesaya. (Yoh. 6:53) Aliwe, abandu abakalya omukati n’erinywa edivai bakakanganaya ngoko babiringira omo ndaghane nyihya-nyihya kandi ngoko bali n’amaha w’eritabala elubula omo Bwami bw’oMungu. Nomo twangabya oko abahirirweko amaghuta kutse oko esindi mbuli, omwatsi awali omo Yohana 6 ni w’omughaso munene kutsibu okw’itwe. Akatukangiriraya ngoko, twamanza eribana engebe y’erikota, itwe bosi tutolere itwabya n’obwikirirya obuwatire omo mbanulo.