OMO tatu, ekiro 18 Omwisi 1, 2023, omulaghe w’embaghane mwahuluka oko jw.org, owakakanganaya ngoko mughala wetu Gage Fleegle na mughala wetu Jeffrey mubakasombolawa eritomekwa oko b’omo Kyaghanda Ekikasondola eky’Abimiri ba Yehova. Abaghala betu babiri abo babirikolera Yehova butaleghula omo myaka mingyi.

Mughala wetu Fleegle mwakulira omo malengera-ryuba we Pennsylvania, e Amerika, kandi ababuti biwe bo bamukangiriraya ekwenene. Inyakine omo myaka y’obusuko, ababuti biwe mubahumira omo kayi kake akabyamo obwagha bw’Abatuliri. N’enyuma w’aho, mwabatisibwa omo kiro 20 Omwisi 11, 1988.

Ababuti b’omughala wetu Fleegle, ibabeghere erimuhiramo omuhwa w’eringira omo mubiiri w’omughulu wosi. Ibakakokaya eka wabo abaleberya b’emitimbo n’abanya-Beteli, neryo mughala wetu Fleegle inanganayilangirira ngoko abaghala n’abali betu abo bali n’obutseme. Neryo, omwaka mughuma enyuma w’eribatisibwa, mwatsuka obupainia b’omughulu wosi omo kiro 1 Omwisi 9, 1989. Enyuma w’emyaka ibiri, mwahikira omuradi wiwe ow’ayihiriraho inyakine n’emyaka 12, mwabirikirwa oko Beteli. N’oko Mwisi we 10, 1991, mwatsuka omubiiri wiwe oko Beteli ye Brooklyn.

Oko Beteli, mughala wetu Fleegle inyakakola omubiiri w’erifula esyongyimba omo masine. Mwakola omubiiri oyo omo myaka 8. N’enyuma w’aho mwatumwa eriyakolera omo Katunga k’Omubiiri. Oko mughulu oyo, mwakolera omo ndeko y’omubughe w’Ekirusi oko myaka milebe. Oko 2006, mwatahya omukali wiwe ye Nadia, neryo mubakolera naye oko Beteli. Kughuma, babya omo ndeko ey’omubughe w’Eportugale kandi omo myaka eyilengire okw’ikumi mubabya omo ndeko ey’omubughe w’Ekiespanyole. Abere abibugha emyaka mingyi omo Katunga k’Omubiiri,  mughala wetu Fleegle mwatumwa erikola omubiiri omo Katunga ak’Erikangirirya, n’enyumwa w’aho mwatumwa omo Biro y’Akatunga k’Omubiiri. N’oko Mwisi 3, 2022 mwasombolwa mo muwatikya w’omo Katunga k’Omubiiri ky’Ekyaghanda Ekikasondola.

Mughala wetu Winder mwakulira omo Murrieta, e Californie, omo Amerika. Ababuti bo bamukangiriraya ekwenene, neryo mwabatisibwa ekiro 29 Omwisi 3, 1986. Omo Misi eyakwama, mwayisogha eribya mupainia muwatikya. Mwatsemera omubiiri oyo, neryo amabya n’omuhwa w’erilolyagho embere. Mwabugha emisi mingyi inyane mupainia buwatikya, neryo amabya mupainia b’omughulu wosi ekiro 1 Omwisi 10, 1986.

Inyakine omo myaka y’obusuko, mughala wetu Winder mwalenderera abakulu biwe babiri, ababya bakakolera oko Beteli oko mughulu oyo. Ekyo mukyamuhiramo omuhwa w’erisyakolera oko Beteli abikula. N’oko Mwisi 5, 1990, mwabirikirwa eriyakolera oko Beteli eye Wallkill.

Oko Beteli, mughala wetu Winder mwakola omo syobiro mbiriri-mbiriri ng’omo Biro ey’Obuyonzo, omo Biro eyikimanira eferme, n’omo Biro y’Ebeteli. Mwatahya omukali wiwe ye Angela oko 1997, n’eritsuka aho, banemukolera kughuma oko Beteli. Oko 2014 mubatumwa e Warwick, eyo mughala wetu Winder mwawatikya oko mubiiri w’erihimba obwikalo bukulu. Oko 2016, mubahumira e Patterson eyiri Akalasi ke Watchtower, eyo mughala wetu Winder inyakakola omo bye Audio​/Video. Enyuma w’emyaka ini mubatasyatumabo e Warwick, eyo mughala wetu Winder inyakakolera omo Biro ey’Akatunga k’Abakoli. Oko Mwisi 3, 2022 mwayirwamo muwatikya w’omo Katunga ak’Abakoli ak’Ekyaghanda Ekikasondola.

Tukasaba tuti Yehova atsumule ‘abalume bihembo’ abo abakalola embere erikola kutsibu oko mubiiri w’Obwami.​—Efe. 4:8.