OMWATSI W’ERIGHA 19
Twangawatya tuti obwikirirya bwetu omo ndaghane ya Yehova ey’ekihugho kihya-kihya?
“[Yehova] amabuga, isiendisyakolakyo kwehi?”—EMIG. 23:19.
OLWIMBO 142 Erimakirira amaha wetu
EBIKENDIKANIBWAKO a
1-2. Litolere itwakolaki tukalindirira ekihugho kihya-kihya?
TUKASIMA Yehova yo kutsibu busana n’endaghane yiwe ey’erisyaleta ekihugho kihya-kihya omo mwanya w’ekihugho kibi kino. (2 Pet. 3:13) Nomo sitwasi ekihugho kihya-kihya ekyo nga kikendisyasa kiroki, ebikalaba omo kihugho kino bikakanganaya ngoko hakisiya ndambi nge.—Mat. 24:32-34, 36; Emib. 1:7.
2 Nomo twamabibugha omo kwenene mo biro bingahi, itwe bosi tutolere erilola embere eriwatya obwikirirya bwetu omo ndaghane eyo. Busanaki? Kundi nomo twanganabya n’obwikirirya bunene kungahi, bwanganakeha. Paulo mwabugha ati, eribula obwikirirya ky’ekibi ekikatuhamba bweghu-bweghu. (Ebr. 12:1) Erilola embere eriteya obwikirya bwetu, itolere itwabya tukalengekania kutsibu oko myatsi eyikakanganaya ngoko ekihugho kihya-kihya kiri hakuhi.—Ebr. 11:1.
3. Tukendikania okuki omo mwatsi ono?
3 Omo mwatsi ono tukendikania oko myatsi isatu eyangawatya obwikirirya bwetu omo ndaghane ya Yehova ey’ekihugho kihya: (1) omwibya tukalengekania kutsibu oko mbanulo, (2) omwibya tukalengekania kutsibu oko kaghala ka Yehova, n’owa (3) omwibya tukakola emyatsi eyikaleka itwayitunda hakuhi na Yehova. Kandi tukendilangira ngoko ebyo Yehova abwira Habakuki byanganawatya obwikirirya bwetu munabwire. Tutsuke twakania oko myatsi milebe eyo twanganabya itunemulabamo lino eyikasaba eribya n’obwikirirya obuwatire omo kihugho kihya-kihya ekikasa.
EMYATSI EYIKASABA ERIBYA N’OBWIKIRIRYA OBUWATIRE
4. Ni myatsi yahi eyo tukayisogha eyikasaba eribya n’obwikirirya obuwatire?
4 Obuli kiro tukayisogha myatsi mingyi. Hakanabya eriyisogha erikasaba eribya n’obwikirirya obuwatire. Tukayisogha erisombola abakendibya bira betu, emyatsi y’eriyitsemesyamo, akalasi ako tukendisoma, nga tukendilunga, nga tukendibuta abana, kutse nga tukendikola mubírí wahi. Litolere eriyibulya kino, ‘Ebyo ngayisogha bikanakanganaya ngoko nilighire ndeke-ndeke ngoko ekihugho kibi kino kikasonda erihwaho n’erisighira akanya ekihugho kihya-kihya ky’oMungu ekikasa? Kutse ebyo ngasombola erikola bikanakanganaya nga nili n’amalengekania w’abandu abalighire bati erihola w’omwiso w’ebyosi?’ (Mat. 6:19, 20; Luka 12:16-21) Twamabikirirya kwenene-kwenene ngoko ekihugho kihya-kihya kiri hakuhi, itukendibya tukayisogha ndeke.
5-6. Busanaki tulaghire oko bwikirirya obuwatire omo mighulu eyikalire? Teka eky’erileberyako.
5 Kandi tukanahikirawa n’amaligho aw’akasaba eribya n’obwikirirya obuwatire. Twanganendereribwa kutse itwahambwa n’obukoni obukalire, n’eyindi myatsi eyanganaleka itwabunika mutima. Oko mwanzo, twanganalangira nga tukenditoka eriyiyinia omo maligho ayo. Aliwe amaligho awali ng’ayo, kangyi-kangyi syalihwa luba; neryo ekyo kikatusaba eribya n’obwikirirya obuwatire tutoke erilola embere erikolera Yehova itune n’obutseme.—Rom. 12:12; 1 Pet. 1:6, 7.
6 Omughulu tuli omo maligho twanganalengekania tuti alinga ekihugho kihya-kihya kya Yehova sikyendisyasa. Ekyo kikasonda eribugha kiti obwikirirya bwetu sibuwatire? Iyehe. Tulangire eky’erileberyako. Omughulu embula yabiriwa oko biro bingyi, abandu banganalengekania bati alinga siyendisyakya. Ko bikanabya bitya omughulu tukabunika mutima kutsibu, tukalengekanaya tuti alinga ekihugho kihya-kihya kya Yehova sikyendisyasa. Aliwe obwikirirya bwetu bwamabya ibunawatire, tukaminya ngoko esyondaghane sya Yehova sikendisyabererera. (Esy. 94:3, 14, 15; Ebr. 6:17-19) Twamabikirirya ekyo isitwangaleka erikolera Yehova.
7. Litolere itwayiteya okuki?
7 Kandi tulaghire oko bwikirirya obuwatire tutoke erikola omubírí w’eritulira. Abandu bangyi abo tukatulira bakalengekanaya bati “Engulu Yowene” eyikakanaya oko kihugho kihya-kihya eky’oMungu eky’omo biro bikasa si y’ekwenene. (Mat. 24:14; Ezek. 33:32) Kumbe itwayiteya eritendibya ng’abo, tukatsuka eritika-tikira ebyo Yehova akatukangiriraya. Okw’ekyo, litolere itwalola embere eriwatya obwikirirya bwetu. Tulebaye emyatsi isatu eyangatuwatikya eriwatya obwikirya bwetu.
UBYE UKALENGEKANIA OKO MBANULO
8-9. Erilengekania kutsibu oko mbanulo kikawataya kiti obwikirya bwetu?
8 Eribya tukalengekania kutsibu oko mbanulo ni nzira nguma ey’eriwatya obwikirirya bwetu. Embanulo ikaleka itwikirirya ngoko oMungu akendisyaberererya ebyo abirilagha. Omughulu tukalengekanaya kutsibu oko ekyaleka embanulo iyateghekanibwa, kandi ngoko ekyo mukyasaba Yehova y’emyatsi mingyi, ekyo kikaleka itwikirirya kwenene-kwenene ngoko omulaghe w’oMungu w’erisyatuha engebe y’erikota omo kihugho ekyuwene akendisyabererera. Busanaki tukabugha tutya?
9 Eriliha embanulo kyaba kisabireki? Yehova mwatuma Mughala wiwe mwanzwa, oyo w’abya ekyusa kiwe kandi mwira wiwe, ase abutawe oko kihugho mo mundu oyuhikahikene. Inyane oko kihugho, Yesu mwayiyinia omo mihanda yosi y’amaligho, neryo mwateseka, n’erihola oluholo olukaluma. Ekyo si kyabya kyolo oko Yehova. OMungu wetu ow’olwanzo syangalighire Mughala wiwe ateseke n’erihola busana n’erituha engebe eyuwene y’omo biro bike bisa. (Yoa. 3:16; 1 Pet. 1:18, 19) Kundi Yehova mwaherera Mughala wiwe mwanzwa erituwatikya, akendisyakoka ekyosi-kyosi tutoke eribyaho kera na kera omo kihugho kihya-kihya.
UBYE UKALENGAKANIA OKO KAGHALA KA YEHOVA
10. Ngoko kiri omo Abanya Efeso 3:20 Yehova ali n’obutoki bw’erikolaki?
10 Enzira y’akabiri ey’eriwatya obwikirirya bwetu ry’eribya tukalengekania oko kaghala ka Yehova. Awite akaghala ak’eriberererya obuli mwatsi ogho akalagha. Munabwire, abandu banene bakalengekanaya bati erisyabyaho kera na kera omo kihugho kihya-kihya sikyendisyatokekana. Aliwe Yehova abeghere erilagha emyatsi eyo abandu sibangatoka eriberererya. Yehova iye akatoka eriberererya ebyo abirilagha kundi ni Mutoki w’ebyosi. (Yobu 42:2; Mar. 10:27) Ekyo kikaleka itwatatika-tika abitulagha ebikaswekaya.—Soma Abanya Efeso 3:20.
11. Teka eky’erileberyako ky’emilaghe milebe ya Yehova eyabya ikalangirika nga siyangatokekana. (Ulebaye akasanduku “ Esyondaghane silebe esy’eriswekya esyabererera.”)
11 Tulebaye emyatsi milebe eyo Yehova alagha bandu biwe ba kera, eyabya ikalangirika nga siyangatokekana. Mwalagha Abrahamu na Sara ati bakendisyabana omwana ibabirikekeluha. (Enz. 17:15-17) Kandi mwalagha ati akendisyaha abitsikulu ba Abrahamu ekihugho kye Kanana. Omo myaka yosi eyo abitsikulu biwe babya omo bukobe omo kihugho kye Misiri mukyabya nga sikyangatokekana endaghane eyo eribererera. Aliwe endaghane eyo muyabererera. Enyuma, Yehova mwalagha ati omukekulu Elizabeti akendibuta omwana. Kandi mwalagha Maria, omumbesa oyuwabya isyasi abalume, ati akendibuta Mughala wiwe, ekyo ky’endiberererya eyindi ndaghane eyo Yehova abya inyabirilagha kera omo ririma ly’Edeni!—Enz. 3:15.
12. Amasako abiri ano akatukanganayaki oko kaghala ka Yehova? Yosua 23:14 na Isaya 55:10, 11.
12 Omughulu tukalengekanaya oko myatsi yosi eyo Yehova alagha n’eriberererya, tukalangira ngoko Yehova awite akaghala kanene. N’ekyo kikaleka itwikirirya kundu ngoko endaghane yiwe y’ekihugho kihya-kihya yasyabererera. (Soma Yosua 23:14; Isaya 55:10, 11.) N’erikirirya ekyo likaleka itwabya initwe tutolere eriwatikya abandi bikiriraye ngoko endaghane ya Yehova ey’ekihugho kihya-kihya si nzoli. Yehova iyuwene-wene mwabugha oko lubula luhya-luhya n’ekihugho kihya-kihya ati: “Ebinywa ebi ni byʼeriyiketera nʼebyʼekwenene.”—Erib. 21:1, 5.
UBYE UKAKOLA EMYATSI EYANGALEKA IWAYITUNDA HAKUHI NA YEHOVA
EMIHINDANO Y’ENDEKO
Omubírí w’obunya-kirimu oyu angawatya ati obwikirirya bwaghu? (Lebaya enungu 13)
13. Emihindano y’endeko yanganawatya yiti obwikirirya bwetu? Kanaya.
13 Omwatsi w’akasatu owangawatya obwikirirya bwetu ry’eribya tukakola emyatsi eyangaleka itwayitunda hakuhi na Yehova. Ng’eky’erileberyako tulangire endundi eyo tukabana omo mihindano yetu y’endeko. Mwali wetu Anna, b oyuwabugha emyaka minene okw’ikumi omo mibiri mbiriri-mbiriri y’omughulu wosi, akabugha ati: “Emihindano ikaniwatikaya eribya n’obwikirya obuwatire. Nomo oyukakangiriraya anganabya isyalikangiriraya emyatsi mihya, kutse amabya isyawite obutoki bunene bw’erikangirirya, sinilibula erihamba omwatsi mulebe owakaniwatikaya eriminya ndeke amakangirirya malebe w’eBiblia. Ekyo kikaniwatikaya eriwatya obwikirirya bwaye.” Kandi obwikiriya bwetu bukawata omughulu tukahulikirira ebisubiryo by’abaghala n’abali betu.—Rom. 1:11, 12; 10:17.
OMUBIRI W’ERITULIRA
Omubírí w’obunya-kirimu oyu angawatya ati obwikirirya bwaghu? (Lebaya enungu 14)
14. Omubírí w’eritulira akawataya ati obwikirya bwetu?
14 Kandi tukawataya obwikirirya bwetu omughulu tukakola oko mubírí w’eritulita. (Ebr. 10:23) Barbara, amabikolera Yehova omo myaka eyilengire oko 70. Akabugha ati: “Nabiriyilangirira ngoko omubírí w’eritulira akawataya obwikirirya. Ngoko ngalola embere erikanirya abandi oko syondaghane sibuya sya Yehova, n’obwikirirya bwaghe ko bukalola embere butya eriwata.”
ERIYIGHISYA
Omubírí w’obunya-kirimu oyu angawatya ati obwikirirya bwaghu? (Lebaya enungu 15)
15. Eribya tukayighisya itwibene-bene kikawataya kiti obwikirirya bwetu? (Ulebaye n’esyopitsa.)
15 Oghundi mwatsi owakawataya obwikirirya bwetu ry’eriyighisya lyetu. Mwali wetu Susan akabugha ati eriyihiriraho eprograme ey’eriyighisya kikamuwatikaya kutsibu. Akabugha ati: “Omo Yenga, ngateghekanaya Akaleberyo k’Erigha ak’omo yindi Yenga. Omo Kwanza n’omo Pili, ngateghekanaya emihindano y’omo kati-kati k’eyenga. N’omo bindi biro, ngayighisaya.” Mwali wetu Susan akasikaya eprograme yiwe y’eriyighisya, n’ekyo kikaleka obwikirirya bwiwe ibwawata. Mwali wetu Irene amabibugha emyaka eyilabire okw’ikumi akakolera oko bwikalo bukulu. Abirilangira ngoko eribya akigha amaminyereri w’eBiblia kikawataya obwikirirya bwiwe. Akabugha ati, “Ngasweka kutsibu erilangira ngoko amaminyereri wa Yehova mwabererera n’omo hyatsi hike-hike.” c
“SIKANDISYAHIKA KWENENE”
16. Busanaki ebinywa ebyo Yehova abwira Habakuki bitulebirye netu munabwire? (Abaebrania 10:36, 37)
16 Abaghombe balebe ba Yehova batsuka erilindilira kera enduli y’ekihugho kibi kino. Abandu bangyi bakalengekanaya bati ekiro ky’enduli kyabiritselewa. Aliwe Yehova anasi ngoko abaghombe biwe bakayowa. Mwabwira omuminyereri Habakuki ati: “Kusangwa esyonzoli sikine busana nʼomugulu ategekawa, nasyo sikanguha erihika oko nduli yasyo, nasyo sisyendisyabiha; nomo syangalinda, ulindesyo; kusangwa sikandisyahika kwenene, sisyendisyamala.” (Hab. 2:3) Ebinywa by’oMungu ebyo byabya bilebirye Habakuki musa? Kutse netu binatulebirye munabwire? Akasondolwa n’ekirimu ky’oMungu omukwenda Paulo mwakolesya ebinywa ebyo oko Bakristo abakalindirira n’omuhwa ekihugho kihya-kihya. (Soma Abaebrania 10:36, 37.) Nomo twangalengekania tuti esyondaghane sya Yehova, erihirako n’ey’erisyatusabula syabiritselewa, “sikandisyahika kwenene. Sisyendisyamala!”
17. Mwali wetu mughuma mwakolesya ati eriharo eryo Yehova aha Habakuki?
17 Erihano lya Yehova liti: “Ulindesyo.” Abaghombe bangyi ba Yehova babirikolesya erihano eryo omo myaka mingyi. Tulebaye eky’erileberyako ekya mwali wetu Louise, oyo watsuka erikolera Yehova omo 1939. Akabugha ati: “Oko mughulu oyo, iningalengekanaya niti e Armagedoni yikendisyasa isindinabugha n’akalasi. Ekyo mukitahika. Omo myaka mingyi, eribya ngasoma emyatsi y’omo Biblia eyikakanaya oko bandu abalindirira Yehova aberereraye emilaghe yiwe, mukyaniwatikya erilindirira. Munasoma oko mwatsi wa Noa, Abrahamu, Yosefu, n’abandi abalindilira omo myaka mingyi embere sy’eribana ekyo Yehova alaghabo. Erilola embere erikirirya ngoko emilaghe ya Yehova yikendisyabererera kyabiriniwatikya ingye n’abandi erikirirya ngoko ekihugho kihya-kihya kiri hakuhi.” N’abandi bangyi ababirikolera Yehova omo myaka mingyi bikirirye ekyo!
18. Erilengekania oko bihangyikwa kyanganatuwatikya kiti erikirirya ngoko ekihugho kihya-kihya kikendisyahika?
18 Oko kwenene, ekihugho kihya-kihya sikirikyahika. Aliwe, terilengekania oko myatsi milebe eyitutimbireko, ng’esyongununu, emiti, esyonyama, n’abandu. Sihali oyuwangatika-tika ati ebindu ebyo sibiri. Nomo kera ebindu ebyo sibyabya, lino bine kundi Yehova mwahangyikabyo. (Enz. 1:1, 26, 27) OMungu wetu abirilagha ati akendisyaleta ekihugho kihya-kihya. Akendisyaberererya endaghane yiwe eyo. Omo kihugho kihya-kihya ekikasa abandu bakendisyatsemera engebe kera na kera ibane n’emibiri eyihikene. Twanganaligha ngoko ekihugho kihya-kihya kyasyahika oko ndambi ey’oMungu abirihiraho.—Isa. 65:17; Erib. 21:3, 4.
19. Wangawatya ghuti obwikirirya bwaghu?
19 Omo ndambi eyikisiya, ukole ngoko wangatoka eriwatya obwikirirya bwaghu. Ubye ukakangania erisima lyaghu busaba n’embanulo. Ubye ukalengekania oko kaghala ka Yehova. Ubye ukakola emyatsi eyangakuwatikya eriyitunda hakuhi na Yehova. Wamabikola ebyo, naghu wanganabya w’oko “abakalya omwandu w’erilaga busana n’erikirirya n’eritendiluha.”—Ebr. 6:11, 12 NTN62; Rom. 5:5.
OLWIMBO 139 Yilangire iwune omo kihugho kihya-kihya
a Munabwire abandu bangyi sibikirirye endaghane y’eBiblia ey’ekihugho kihya-kihya. Bakalengekanaya bati ni nzoli. Twikirirye ngoko Yehova asyaberererya esyondaghane siwe syosi. Aliwe litolere itwakola kutsibu tutoke erilola embere eriwatya obwikirirya bwetu. Tuti? Omwatsi ono akendusubirya okw’ekyo.
b Amena malebe mwakabindulawa.
c Emyatsi mingyi eyikakanaya oko maminyereri w’eBiblia yikabanika omo Endexe, omo kitsweka “Amaminyereri”. Wanganaleberya oko mwatsi “Yale Anayotabiri Yehova Yanatimia” omo Akaleberyo k’ekiro 1 Omwisi 1, 2008.
