Unalue wasi?
Busanaki omo basuda b’Omwami Daudi mwanabya n’abate Baisraeli?
OMO basuda b’omwami Daudi mwanabya n’abate Baisraeli. Abaghuma ba kubo ni Zeleki Omuamoni, Uriya Omuhiti na Itma Omumoabu. a (1 Emy. 11:39, 41, 46) Omo basuda ba Daudi imuli “n’Abakereti, Abapeleti n’Abagiti.” (2 Sam. 15:18) Alinga Abakereti, Abapeleti n’Abafilistini babya batunga. (Ezek. 25:16) Alinga Abagiti babya bikere omo muyi we Gati owali omo kihugho ky’Abafilistini.—Yos. 13:2, 3; 1 Sam. 6:17, 18.
Busanaki Daudi mwalighira abalume abo abate Baisraeli eribya basuda biwe? Abya inyasi ndeke ngoko ni bataleghula okw’iye, kandi ekikulu kutsibu ini bataleghula oko Yehova. Ng’eky’erileberyako, ekitabu kighuma ekikakanaya oko Biblia kikabugha oko Bakereti n’Abapeleti kiti: “Omughulu Daudi abya akatabala, mubabya bataleghula okw’iye, nibya n’omo mighulu eyikalire kutsibu.” Mubakangania bati ngoko ni bataleghula okw’iye? Omughulu “abalume bosi be Israeli” baleka erikwama Omwami Daudi aliwe bamakwama ‘omundu mutya-mutya oyukahulawamo Seba,’ Abakereti n’Abapeleti mubasighala bataleghula oko Daudi kandi mubawatikya Daudi eribughaho omulele ogho Seba atsukisaya. (2 Sam. 20:1, 2, 7) Kandi omughulu Adoniya mughala w’Omwami Daudi asonda erimya obwami bo kinyanganga, Abakereti n’Abapeleti mubasighala bataleghula oko Daudi kandi mubawatikya eriyira Solomona mo mwami kundi yo Yehova abya inyabirisombola eribya mwami omo mwanya wa Daudi.—1 Abam. 1:24-27, 38, 39.
Owundi oyo watabya Muisraeli oyo wabya mutaleghula oko Daudi ko kutsibu ni Itai Omugiti. Itai n’abasuda biwe 600 mubawatikya Omwami Daudi omughulu mughala wiwe Abusoloma atsukisaya omulele n’eriba emitima y’Abaisraeli batoke erimuyira mo mwami omo mwanya wa Daudi. Daudi mwabwira Itai ati kundi si Muisraeli syamuwatikaye oko malwa. Aliwe Itai mwabugha ati: “Ngoko [Yehova] aliho, kandi ngoko mukama wage mwami aliho, kwenene aho mukama wage mwami asyabya, nomo lyangabya ihola, kutse eribyaho, ha nʼaho mugombe wawe asyabya!”—2 Sam. 15:6, 18-21.
Itai abya mutaleghula oko Daudi, omwami oyo Yehova asombola
Nomo Abakereti, Abapeleti n’Abagiti sibabya Baisraeli, mubaminya ngoko Yehova yo Mungu w’ekwenene kandi ngoko Daudi yo Yehova abirihirako amaghuta. Alinga Daudi mwatsema eribya n’abalume abataleghula abo!
a Omughambo w’oMungu owali omo Eryibuka Ebihano 23:3-6 akabugha ati Omuamoni n’Omumoabu sibatolere eringira omo ndeko ye Israeli. Aliwe, alinga omughambo inyakaghanisaya abagheni eribya Baisraeli, isyalighanisayabo eritamba n’abandu b’oMungu kutse erikala omo kati-kati k’abo. Ulebaye ekitabu Études perspicace des Écritures, Volume 1, aka. 100.
