1. Busanaki kikakala oko bandi eritsemera omubiiri w’eritulira? (Ulebaye n’epitsa.)

 ITWE bandu ba Yehova, twanzire Tata wetu w’elubula. N’ekyo kikatukuna eritulira abandi batoke erimuminya. Abangyi b’okw’itwe, bakatsemera omubiiri w’eritulira. Aliwe abandi sibalitsemeragho. Busanaki? Kundi abandu balebe ni bakutu kandi bakalengekanaya bati sibakangirirya babuya. N’abandi bakakwa obuli nga buba eriyabana abandu butsir’ibirikirwa. Abandi bakasagha bati alinga sibendihulikirirabo. N’abandi sibalyanza eriyakenderya abandu. Nomo abaghala n’abali betu abo banzire Yehova yo kutsibu, kikabakalako erikanirya abandu abo batasi oko ngulu mbuya. Nomo bine bitya, banasi ngoko omubiiri oyo ni w’omughaso kandi banemuyikasa erisangira kugho kangyi-kangyi. Yehova akatsemerabo kutsibu!

2. Kyamabya ikinemukukalako eribana obutseme omo mubiiri w’eritulira, busanaki sighutolere eribunika-mutima?

² Naghu, hakanabya endambi ikyakukalako eribana obutseme omo mubiiri w’eritulira? Kyamabya kitya, isiwabunika mutima. Ekyo kyanganakangania ngoko ukayikehaya kandi siwanzire eriyikangania. Kandi ekyo kyanganakangania ngoko siwanzire eriyalwa n’abandu. Kandi sihali omundu oyo wanzire bakamupokya, kutsibu-tsibu omughulu akasonda erikolera abandi ebyuwene. Uminye ngoko Tata waghu w’elubula, anemulangira ebyosi ebyo unemulabamo, kandi anzire erikuwatikya. (Isa. 41:13) Omo mwatsi ono, tukendikania oko bindu bitano ebyangatuwatikya erikinda amalengekania ayo; kandi ngoko twangabana obutseme omo mubiiri w’eritulira.

 ULEKE EKINYWA KY’OMUNGU KIKUHE AKAGHALA

3. Ekyawatikaya omuminyereri Yeremia eritulira abandi niki?

³ Eritsuka kera, Ekinywa ky’oMungu ikikaha abandu biwe akaghala omughulu bakakola omubiiri owakalire. Tulangire eky’erileberyako eky’omuminyereri Yeremia. Mwahangya-hangya omughulu Yehova amuha omubiiri ow’eritulira. Yeremia mwabugha ati: “Sinasi eribugha kusangwa indi mulwana.” (Yer. 1:6) Ekyamuwatikaya eribana akaghala k’eritulira niki? Mwabana akaghala omo ebyo Yehova amubwira. Mwabugha ati: “Mukyabya omo mutima waghe ng’omuliro owakagulumira owabohere oko makuha wage.” (Yer. 20:8, 9) Nomo ekiharo ekyo Yeremia endituliramo kyabya kyoswiremo abandu abakalire, omulaghe ogho bamuha eritulira, mwamuha akaghala ako abya alaghireko erikola omubiiri wiwe.

4. Eribya tukasoma Ekinywa ky’oMungu n’erilengekania kukyo ko kutsibu, kikatukuna erikolaki? (Abanya Kolosai 1:9, 10)

⁴ Abakristo bakabana akaghala ako balaghireko erilabira ebinywa by’oMungu ebikabanika omo Biblia. Omughulu Paulo ahandikira endeko ye Kolosai, mwababwira ngoko eriminya bingyi oko Yehova likendiwatikyabo “erilola embere ibanemukola ebyuwene” n’ekyo ikikendikangania ngoko banemuyighendya ngoko Yehova anzire. (Soma Abanya Kolosai 1:9, 10.) Erikola ebyuwene eryo, lyabya lihiriremo n’eritula engulu mbuya. Neryo omughulu tukasoma Ekinywa ky’oMungu n’erilengekania kukyo ko kutsibu, ekyo kikawataya obwikirirya bwetu kandi itwaminya ndeke omughaso w’eritulira engulu y’Obwami.

5. Twamanza eribana endundi omo busomi bwetu bw’eBiblia n’omw’iyighisya lyetu, litolere itwakolaki?

⁵ Twamanza eribana endundi yo ndeke-ndeke omo Kinywa ky’oMungu, silitolere itwabya tukasomakyo luba-luba, eriyighisya n’erilengekania kukyo kw’endata-ndata. Aliwe litolere itwimya akatambi akatosire. Wamabisoma erisako rilebe neryo iwatowalyo, isiwakirukalyo. Omo mwanya w’ekyo, ukolesaye ekitabu Index des Publications kutse ekitabu Msaada wa Kutafuta Habari kwa Ajili ya Mashahidi wa Yehova eriminya bingyi oko handiko eyo. Wamabya ukimya endambi nene omw’iyighisya, ekyo ikikendikuwatikya eriyiketera kundu ngoko Ekinywa ky’oMungu kikabugha ekwenene. (1 Tes. 5:21)  Wamabiyiketera kundu Ekinywa ky’oMungu, ekyo ikikendikukuna eribya n’engumbu y’erikanirya kukyo kw’abandi.

UBYE UKAYITEGHEKANIA NDEKE EMBERE SY’ERIYATULIRA

6. Busanaki tutolere eriyiteghekania ndeke embere sy’eriyatulira?

⁶ Wamabiyiteghekania ndeke embere sy’eriyatulira, isiwendihangya-hangya kutsibu omughulu ukakanaya n’abandi. Yesu mwawatikya abigha biwe eriyiteghekania embere sy’eritumabo omo mubiiri w’eritulira. (Luka 10:1-11) Kundi mubakolesya ebyo Yesu abakangiriraya, mubakola emyatsi mingyi eyuwene; n’ekyo mukyabaletera obutseme bunene.​—Luka 10:17.

7. Twangayiteghekania tuti embere sy’eriyatulira? (Ulebaye n’epitsa.)

⁷ Twangayiteghekania tuti embere sy’eriyatulira? Litolere itwalengekania oko ebyo tukendibugha kandi ngoko tukendibughabyo omo binywa byetu. Kyuwene erilengekania oko myatsi ibiri kutse isatu eyo abandu b’omo kiharo kyetu banganabugha kutse erikola, neryo itwayiteghekania ngoko twangasubirya kuyo. Neryo tuyikase, omughulu twamatsuka erikania n’omundu isitwasunza, aliwe itwaseka hake n’eribya bandu abatsanga-tsangire.

8. Paulo mwasosekania Abakristo n’ebindu by’eribumba; ekyo ni bugha ambuki?

⁸ Omukwenda Paulo mwabwira abaghala n’abali babo ati: “Tuwite ekindu kino ky’obughuli omo bindu by’eribumba.” (2 Kor. 4:7) Ekindu ky’obughuli ekyo, niki? Wo mubiiri w’eritula engulu y’Obwami owakasabula esyongebe. (2 Kor. 4:1) N’ebindu by’eribumba, byo byahi? B’abaghombe b’oMungu abakatulira abandi b’engulu mbuya. Oko mughulu wa Paulo, abahingania ibabeghere erikolesya ebindu by’eribumba erihekamo ebindu byabo eby’obughuli; ng’akalyo, edivai, n’esyofranga. Netu kutya, Yehova akatukolesaya eritulira abandi b’omwatsi w’obughuli bunene, ni bugha ambu engulu mbuya y’Obwami. Omo buwatikya bwa Yehova, twanganabana akaghala ako tulaghireko tutoke erilola embere eritulira.

UBYE UKASABA YEHOVA Y’OBUTUBAHA

9. Twangakinda tuti eryubaha abandu kutse eryubaha tuti sibendituhulikirira? (Ulebaye n’epitsa.)

⁹ Oko ndambi silebe, twanganubaha abandu kutse itubaha tuti sibendituhulikirira.  Twangakinda tuti obuba obo? Lengekanaya oko musabe w’abakwenda omughulu baghanayabo eritulira. Mubatasagha kandi mubataleka eritulira. Omo mwanya w’ekyo, mubasaba Yehova bati awatikayebo “eribya bakabugha ekinywa [kiwe] n’obutubaha.” Yehova mwalw’iniasubirya oko musabe wabo. (Emib. 4:18, 29, 31) Erisagha abandu kyamabileka itwakwa obuba bw’eritulira, netu litolere itwasaba Yehova y’obuwatikya. Usabe Yehova akuwatikaye eryanza abandu bo kutsibu neryo ekyo ikyakukuna eritendisagha eritulirabo engulu mbuya.

10. Yehova akatuwatikya ati eribya Bimiri biwe? (Isaya 43:10-12)

¹⁰ Yehova abiritusombola eribya Bimiri biwe, kandi akalagha erituwatikya eribya n’obutubaha. (Soma Isaya 43:10-12.) Tukanaye oko syonzira ini esyo akakoleramo ekyo. Ey’erimbere, nomo tunemutulira engulu mbuya yo hayi, Yesu ane haghuma netu. (Mat. 28:18-20) Ey’akabiri, Yehova abirisombola abamalaika erituwatikya. (Erib. 14:6) Ey’akasatu, Yehova abirituha ekirimu kibuyirire kibye kikatuwatikya eryibuka ebyo twabirigha. (Yoh. 14:25, 26) N’ey’akani, Yehova abirituha abaghala n’abali betu abo twangaya nabo omw’itulira. Omo buwatikya bwa Yehova n’obw’abaghala n’abali betu abatwanzire, twanganatoka eribya n’obutubaha n’erilola embere omo mubiiri w’eritulira.

UBYE UKABINDUKA ERIKWAMANA N’EMIBERE EYO WAMAYEYAMO KANDI UBYE N’AMALENGEKANIA AGHUWENE

11. Omughulu tukatulira, twangabana abandu bangyi bo hayi? (Ulebaye n’epitsa.)

¹¹ Ukanayowa nga wamabunika-mutima omughulu mutitasunga abandu omo kiharo kyaghu? Wanganayibulya kino: ‘Abandu b’omo kiharo kyaghe, bali hayi oko ndambi eno?’ (Emib. 16:13) ‘Bane oko mubiiri kutse omo soko?’ Kyamabya kitya, siwangabana abandu bangyi wamabitulira omo syombalo? Mughala wetu ye Joshua akabugha ati: “Ingabya nabiya oko syoparkingi n’eyo bakaghuliraya ebindu, ingabana ehyanya hy’eritulira.” Kandi ye Joshua n’omukali wiwe ye Bridget, ibakabana abandu bangyi bamabiyalendererabo omwigholo-gholo nibya n’omo Yenga omwitungyi.​—Efe. 5:15, 16.

12. Twangaminya tuti ebyo abandu bikirirye kutse ebikabatsemesaya?

 ¹² Omundu amabya nga syanzisibwe n’omwatsi ogho twamamuletera, kumbe itwasonda eriminya ebyo ikirirye n’ebyo akatsemera. Bakatsukisya omukania, Joshua na Bridget banzire erikolesya eribulyo ly’oko nzuko y’etrakte. Ng’eky’erileberyako, bamabikolesya etrakte EBiblia ukalangirayo uti? babeghere eribugha bati: “Abandu balebe bakabugha bati eBiblia ni kitabu ky’oMungu, n’abandi bati iyehe. Nikwa ukalengekanaya utiki?” Kangyi-kangyi, ekyo kikatsukisaya omukania.

13. Busanaki twanganatseme nomo abandu banganaghana erituhulikirira omo mahubiri? (Emisyo 27:11)

¹³ Nomo banganaghana erituhulikirira omughulu tukatulirabo, itwe tukabya itwabirihikira omuradi wetu. Busanaki? Kundi tukabya itwabirikola ekyo Yehova n’Omughala wiwe bakatusaba, ni bugha ambu erihubirya. (Emib. 10:42) Nomo twanganalua omo mahubiri isitwetabana omundu n’omughuma w’erikania naye, kutse abandu ibabirighana erituhulikirira, twanganabya n’obutseme kundi itunasi ngoko twabiritsemesya Tata wetu w’elubula.​—Soma Emisyo 27:11.

14. Busanaki tukatsema omughulu omutuliri mughuma amabana omundu oyo wanzisibwe omo kiharo?

¹⁴ Kandi twanganatsema kughuma n’omutuliri mulikyetu oywamabana omundu oyo wanzisibwe omo kiharo. Akaleberyo k’Omuteya mukasosekania omubiiri wetu n’abakaronda omwana oyulyahera. Abandu bangyi bakamurondako bakakwesa eyi n’eyi. Aliwe omughulu akabanika, abosi bakatsema kughuma n’oyulyamubana. Netu kutya, itwe bosi omo ndeko tukawatikaya okw’iyira abigha bahya ba Yesu. Tulaghire oko bandu bosi omo ndeko eriwatikya eritulira abandu bosi omo kiharo. Kandi itwe bosi tukabya n’obutseme omughulu omwigha mughuma amatsuka erihika oko mihindano.

ULEKE OLWANZO LWAGHU OKO YEHOVA N’OKO BANDI LUKUKUNE

15. Erikolesya erisako lya Matayo 22:37-39 kikatuwatikaya kiti eribya n’omuhwa w’eritulira? (Ulebaye n’epitsa kijalada.)

¹⁵ Twamabya tukalengekania oko lwanzo lwetu oko Yehova n’oko bandu, ekyo kyanganaleka itwabya n’omuhwa munene ow’eritulira. (Soma Matayo 22:37-39.) Terilengekania ngoko Yehova akatsema akatulangira tukakola omubiiri w’eritulira kandi ngoko abandu  bakenditsema omughulu bakenditsuka erigha eBiblia! Kandi wibuke ngoko abakatuhulikirira, banganasyasabuka.​—Yoh. 6:40; 1 Tim. 4:16.

16. Twangabana tuti obutseme omo mubiiri w’eritulira omughulu sitwangalua eka? Teka eby’erileberyako.

¹⁶ Hane emyatsi eyikaleka ikyakukalako erilua eka waghu? Kyamabya kitya, ulengekanaye oko ekyo wangakola erikangania olwanzo lwaghu oko Yehova n’oko bandi. Omo mughulu w’ekihunzo kye Korona, Samuel na Dania isibangalua omo nyumba yabo. Omo mughulu wosi owakalire oyo, ibakatulira kangyi-kangyi oko telefone, n’erihandikira abandu b’esyobaruha, n’erisondola esyofunzo sy’eBiblia oko Zoom. Samuel inyakatulira abandu abo abya akahindana oko lupitali olo abya akapatirako edawa. Akabugha ati: “Omughulu tukalaba omo maligho twanganahangya-hangya n’eriluha, nibya n’obwikirirya bwetu bwanganalengwako. Litolere itwabana obutseme omo mubiiri wa Yehova.” Kandi Dania mwayitinira, amabugha omo ngyingo mw’emisi isatu. Neryo mwabugha emisi sita inyanemughendera omo kakinga k’ebirilema. Akabugha ati: “Ingayikasa erikola ekyo nangatoka omo mighulu eyo. Ingatulira omunganga oywabya akanitunza, kandi ingakanaya n’ababya bakatuletera ebindu. Kandi ingakanaya n’oghundi munganga oko telefone.” Nomo Samuel na Dania babya isibangakola ngoko babya bakakola kera, mubayikasa erikola ngoko bangatoka n’eribana obutseme omo mubiiri wabo.

17. Wangabana endundi yahi wamabikolesya amahano agho twamabigha omo mwatsi ono?

¹⁷ Uyikase erikolesya amahano atano agho twamabigha omo mwatsi ono. Obuli rihano liri ng’ekiungo ekikaya omo kalyo. Omughulu akalyo kalebe kakayamo ebiungo byosi ebitolereko, kakasiha. Twamabikolesya amahaho wosi ayo, itukenditoka erilwa n’amalengekania awatuwene kandi itukendibya n’obutseme bunene omo mubiiri w’eritulira.